1 Apwiiya Nlhuku nkayeerelha ashinna Musa wiira, "Nthameke va vamoka ni Aisraeli nnaaholhelha inyu ukhuma Umisri ayo. Nrweeke ilhapo Kaalhenhe aka Aburahimu, Naisaka, ni Nayakhobo, wiira kinowaavaha achishaana aya. 2 Kinonruma nnepa aka oholhelheni, ni kinowoomolhacha attu o Ukanaani, attun o Uamori, attu o Uhethi, attu o Uperizi, attu o Uhivi ni attu o Uyebusi. 3 Nrweeke ilhapo yoombone ulhima ni uhuwa mihuwo. Nansho akinorwaa vamoka ni inyu, ukhalhawaya mwaatti attu o itiyamaru, kihiwe koowivakachani mphironi mmo."

4 Attu vewilhe aya ahokelhachiya nipampa, ni mena khaariwo ata mmoka aawanre mapambo awe. 5 Yaapannge chiicho ukhalhawaya Apwiiya Nlhuku aheerelha ashinna Musa wiira, "Mwaahimerie attu ayo, ‘Mwaatti attu o itiyamaru, karwaaka vamoka ni inyu mwaatti, akinopicha kinowiivakachani. Paahi nrulhacheke mapambo inyu ayo, ni mii kinoochuwelha ittu yo upangani.’ " 6 Paahi Aisraeli vaathamme aya umwaakoni Usinai, khayaawanre tho mapambo aya.

7 Kila Aisraeli vaamanke aya nikambi, ashinna Musa ahotheka Nihema Nitakatifu uchereshere nikambi. Nkayeehana nihema nno, "Nihema Nitakatifu." Paahi ntu riyoothe ari ni milhatu wa Apwiiya Nlhuku ahorwaa unihemani uwo, uchereshere nikambi. 8 Kila nkwaha ashinna Musa vaakelha aya Nihema Nitakatifu, attu onkhaye ahemelhacha vamilhakoni waya mpaka vaamanlhe aya ukelha Nnihemani. 9 Nkayaakhalha wiira, ashinna Musa kila vaakenlhe aya Nnihemani, nihute no urekama noonia thoko mooro, nahokhuruwa ni weemelha vanlhakoni wo Nihema Nitakatifu, ni Apwiiya Nlhuku nkayoolhumana ashinna Musa ukhuma nnihuteni mmo. 10 Attu onkhaye vonne aya nipoto no nihute nno vanlhakoni wo Nihema Nitakatifu vawo, onkhaye yaheewulhusha makukhu ni waathimicha Apwiiya Nlhuku. 11 Apwiiya Nlhuku yolhumana ashinna Musa thoko ntu ni mpwana awe. Yamalheke ashinna Musa ahohokolhia unipuroni, nansho mmirawo aakaviha uyo, Yoshua mwaamwana a Nanuni ahohalha u Nihema Nitakatifu.

12 Ashinna Musa nkayeerelha Apwiiya Nlhuku, "Wo ikekheene mwahokiirelha, ‘Mwaaholhelhe attu ukelha ilhapo kinohalha uwoonihani,’ nkamweera tho wiira, nhokichuwelha ni wiira kihoutelhihani. Nansho khannakihimeria mpani nohalha inyu unruma wiira akikavihere! 13 Paahi, kinoulhepelhani wiira yakhalhaka nhokoonelha ikiriri umihoolho winyu, nkooniheke etu iphiro chinyu, kuuchuwelheni, kithepe upatta ikiriri inyu. Tho, muupuwelheke wiira, attu alha, attu inyu."

14 Apwiiya Nlhuku nkayaakhulha, "Kinorwaa vamoka ni inyuva, ni mii kinouteelhihani munrimani."

15 Ashinna Musa nkayaakhulha, "Yakhalhaka inyu mwaanene khannorwaa vamoka ni mii, paahi etu nhinithamihe vaa. 16 Ukhalhawaya inohalha uchuwelhiya chani wiira mii kihoonelhiya ikiriri umihoolho winyu vamoka ni attu inyu, mwaahirweeke vamoka ni hii? Ukhalha winyu vamoka ni hii unonimwalhaaniha mmilhokoni mwa attu akina velhaponi."

17 Apwiiya Nlhuku nkayeerelha ashinna Musa wiira, "Kinoopanga thoko chinre inyu wo ulhepelha chiyo, ukhalhawaya kihouchuwelhani rata, ni mii nhokiteelhiha."

18 Paahi ashinna Musa nkayeera, "Paahi nkooniheke etu nthimicho inyu!"

19 Apwiiya Nlhuku nkayaakhulha, "Kinowoonihani ikuru aka chiri aya, ni uromolha nchina naka wiira, Mii Apwiiya Nlhuku. Ni mii kinompangelha moombone ntu nokittuna, ni umoonelha ikiriri ntu nomoonelha aka ikiriri. 20 Nansho khannoona ikhove aka, ukhalhawaya khaawo ntu riyoothe nohalha ukoona ni ukhalha nkumi. 21 Nansho mwooneke! Vaa vahawo vakittu vakhiviru ni mii vanohalha inyu weemelha vachulhu mwalha. 22 Nthimicho aka vanohalha aya uvira vawo, kinoutumbucherihani munnyateni vachulhu mwalha vawo, ni ukhunelhani wo nthatha naka, mpaka vanohalha aka uvira. 23 Yamalhaka kinoothamiha nthatha naka, ni inyu nnookoona wo utulhi, nansho khannokoona ikhove aka."