1 Yamalheke, Apwiiya Nlhuku nkayeerelha ashinna Musa, 2 "Mwaahimerie Aisraeli ahokolhie utulhi, amakeke vakhiviru ni Pi Hahiroth, iriyari yo iwani yo Umigdoli ni ibahari yo Ushamu, mmihoolho wo Ubaal Sefon. Mweesheke nipuro umihoolho waya vakhiviru ni ibahari. 3 Ukhalhawaya Nafarao anowuupuwelha wiira, ‘Aisraeli ayo anookukuriacha, ni uthako uyo uhaatiyelhelha ahoone iphiro yo ukhuma.’ 4 Vavawo mii kinowoomiha nrima Nafarao, ni ayo anouttwarelhelhani. Ni mii kinoopatta nthimicho vanohalha aka waarimeelhiha yayo ni miphingo cho manyaasikari aya onkhaye. Vavawo attu o Umisri anowa uchuwelha wiira mii phi Apwiiya Nlhuku." Paahi Aisraeli nkayaapanga thoko chaahimeriye aya chiyo.

5 Nafarao yeeweke wiira Aisraeli ahottawacha, paahi vamoka ni anamitheko aya olhupalhe yahorukunusha irusho chaya, nkayeera, "Nipanngeni etu wo waahiyerera Aisraeli athamache ahinipangelhe mitheko chihu tho?" 6 Paahi Nafarao nkayeesha tayari mikukuta chaya cho upurulhiya ni ifarasi cho waatakanelha ikhoto ni miphingo chaya cho manyaasikari. 7 Nkaakusha mikukuta chaya cho ulhama mia sita ni mikukuta chonkhaye chikina cho ikhoto cho Umisri, chiholhelhiyaka ni ahoolhelhi olhupalhe o manyaasikari ayo. 8 Apwiiya Nlhuku nkayaathepiha itiyamaru Nafarao amwene o Umisri. Ni ayo nkayattwarelhelha Aisraeli yaathamme Umisri wo wiishipa. 9 Attu o Umisri vamoka na afarasi aya onkhaye, mikukuta cha afarasi o ikhoto ni oweetiha afarasi aya nkayaattwara Aisraeli. Nkayaaphwanya anamakilhe nchereshere ibahari, vakhiviru ni Pi Hahirothi, mmihoolho wo Ubaal Sefon.

10 Aisraeli yaweheke ni woona Nafarao awaaka ni miphingo chaya utulhi waya, ahokelhiya woova chinene, nkayonlhelha Apwiiya Nlhuku wiira ookholhe. 11 Nkayeerelha ashinna Musa, "Chani, khayaariwo mahiye othosha mwiilhaponi Umisri, mpaka nniwiihe nikhwelhe uno uthakoni uno? Veeshiyani unipangelha thoko cho, unithamiha wiilhaponi Umisri? 12 Chani khanohimenrieni alha malhove alha vaari ihu nihinathama Umisri ulhe? Nowinrelheni wiira nnihiyeke nithepeke uvara ntheko wa attu o Umisri. Yaari nambaya waapangelha ntheko attu o Umisri kuliko ukhwelha uthakoni uno."

13 Ashinna Musa nkayaakhulha Aisraeli yeeraka, "Nhoove! Mwiilhipiheke! Lhelho nnowoona Apwiiya Nlhuku chinohalha aya uwookholhani. Ukhalhawaya alha attu o Umisri alha nnoona lhelho, khannoona tho. 14 Apwiiya Nlhuku anowinkhelhani mwaattiva. Mmaalheke, nhipange ittu iriyoothe."

15 Apwiiya Nlhuku nkayeerelha ashinna Musa "Nnokunlhelhani? Mwahimierieke Aisraeli athepeke urwaa mihoolho. 16 Nkusheke ikopo inyu, ntheesheke vachulhu ibahari, ni maashi anoomiania uno ni uno. Ni Aisraeli anoolhapuwa iriyari yo ibahari vomilhe. 17 Mii kinowaahelha itiyamaru attu o Umisri, ni ayo anouttwarani variyari ibahari, ni mii vavawo kinoopatta nthimicho wo nlhatu no waalhakalhiha Nafarao ni miphingo chaya, vamoka ni mikukuta chaya cho ikhoto ni oweetiha afarasi aya. 18 Eiyo, kinoothimichiya wo waarimelhiha Nafarao ni manyaasikari aya. Ni attu o Umisri anoochuwelha wiira mii phi Apwiiya Nlhuku."

19 Paahi nnepa wa Nlhuku, waari uhoolho wo nkutiro wa Aisraeli ahothama nkaakhalha utulhi waya. Ni nihute nne chiicho nahothama uhoolho nkaneemelha utulhi waya, 20 nkanaakhalha iriyari yo Aisraeli ni attu o Umisri. Nihute nne nkanaakhunelha attu o Umisri wo ipiphi nansho nkanaamwalhelha Aisraeli uhiyu. Wo chiichammo etu mikutiro miilhi chiyo, u Nafarao ni nkutiro wa Aisraeli, khachaatamerianne uhiyu nkwee.

21 Ashinna Musa nkayookolha moono aya vachulhu ibahari, ni ayo Apwiiya Nlhuku nkayaakakha ibahari utulhi wo iphioo yo machiri yo ukhuma unosha nchuwa. Yeyo iphioo iyo yahowuka uhiyu nkwee, nkayaamianiha ibahari mipata miilhi uno ni uno, iriyari nkawaakhalha vo wuuma. 22 Aisraeli nkayaaviracha variyari ibahari vakitu voomilhe vawo, maashi nkaakhalha thoko ishiri wiimonono ni wiimushi waya. 23 Attu o Umisri yahaattwara wo uvira vowuuma iriyari yo ibahari vawo vamoka ni afarasi aya, mikukuta cho ikhoto ni oweetiha afarasi aya onkhaye. 24 Mapikosha uhinaaya usha rata, Apwiiya Nlhuku nkayaaweha mphingo wa attu o Umisri ukhuma nipoto no mooro ni nipoto no nihute, nkayoopopiha chinene mphingo wa manyaasikari o Umisri uyo. 25 Nkaaphariha magurudumu o mikukuta chaya, nkayeeta wo uhuvahuva chinene. Vavawo attu o Umisri nkayeeracha, "Apwiiya Nlhuku anowenkelha Aisraeli! Ngwee etu naattawe."

26 Yamalheke Apwiiya Nlhuku nkayeerelha ashinna Musa, "Mwookolhe moono inyu vachulhu ibahari, maashi ahokolhie aakhunelhe attu o Umisri vamoka ni mikukuta chaya ni oweetiha afarasi aya." 27 Paahi ashinna Musa nkayookolha moono aya vachulhu ibahari. Ni vaasha nchuwa, ibahari yahohokolhia thoko chaari aya mpacho. Attu o Umisri nkayaalhikacha uttawa maashi ayo, nansho Apwiiya Nlhuku ahaakakhelhacha ubaharini. 28 Maashi nkayaakhunelha mikukuta vamoka ni attu oweetiha afarasi alhe, nkutiro wonkhaye u Nafarao waattwarelhelha Aisraeli nkawaakhwa mbaharini. Mena khahanlhe ata Mmisri mmoka. 29 Nansho Aisraeli ahovira variyari ibahari vakittu voomilhe, maashi aneemenlhe thoko ishiri mpata aya wo wiimonono ni wo wiimushi.

30 Phi chiichammo Apwiiya Nlhuku chooponlhe aya Aisraeli mmathathani mwa attu o Umisri. Ni ayo Aisraeli nkayoona attu o Umisri anarupanche vachengweni anakhwaachilhe. 31 Aisraeli vonne aya nenno nlhove no ushangiha naapangiye ni Apwiiya Nlhuku wa attu o Umisri nno, yahaathimicha Apwiiya Nlhuku ni waarumelhelha. Nkayaakhalha ni nrima wa Apwiiya Nlhuku, tho ni wa ashinna Musa, namitheko aya.