1 Attu vonne aya wiira ashinna Musa ahocherewa ukhuruwa umwaakoni, ahothukumanacha ni weerelha Naharuni wiira, "Khanichuwenlhe ittu yaapattilhe ashinna Musa, aniwiihilhe uno ukhuma Umisri. Paahi mwaakuvieke, nnikooroshelheke milhuku cho uniholhelha!"

2 Naharuni nkayaakhulha, "Mwaarulheke manyaahanu inyu ni achishaana inyu ivipuli cho idhahabu chiwanre aya chiyo, nkiwiihereke mii." 3 Paahi attu onkhaye ahorulhacha, nkayaarwehelha Naharuni. 4 Ni ayo ahokusha ivipuli chonkhaye chiyo, nkayaathulhusha, nkayaamiina ni ukoorosha isinyago yo mwaang'ope. Attu nkayoona ni wiira, "Ulha phi nlhuku inyu Aisraeli! Ulha phi uyo nikumihilhe ilhapo yo Umisri!"

5 Naharuni vonne aya ittu ikhumelhenlhe, ahotheka madhubahu umihoolho wo isinyago yo mwaang'ope uyo ni utangacha wiira, "Meelho ninoopanga isikukuu yo waathimicha Apwiiya Nlhuku!" 6 Paahi attu ahonkwacha mapikoosha ni waawiiha ashinama wiira ahitachiye ni upahiya vamadhubahuni. Tho ahowiihacha isadaka cho ukondiha umpwana aya ni Apwiiya Nlhuku. Nkayaakhalhacha ulhia, uwuria ni upangacha chittu cho uhilhoka.

7 Paahi Apwiiya Nlhuku aheerelha ashinna Musa, "Nkhuruweke, ukhalhawaya attu inyu, mwaawihilhe inyu ukhuma Umisri, ahokittekelha! 8 Ahohiyacha iphiro konihilhe aka! Ahokoorosha isinyago yo mwaang'ope o idhahabu. Ahothimicha yeyo ni ukumiha isadaka wo yeyo. Ni vano aneera wiira, ‘Ulha phi nlhuku ihu, hii Aisraeli va! Phi uyo niwiinhe uno ukhuma Umisri!’ "

9 Yamalheke, Apwiiya Nlhuku nkayeerelha ashinna Musa wiira, "Kihochuwelha itiyamaru ya alha attu alha. 10 Ahokirusha chinene. Paahi kinowaalhakalhiha. Nhilhikache ukihiiha! Vavawo kinoupangani inyuva ni iyari inyu nkhalhe nikosho nulhupalhe."

11 Nansho ashinna Musa ahaashontelhelha Apwiiya Nlhuku ni wiira, "Pwiiya Nlhuku, nhirushiye chinene, nhaathunalhelhe attu inyu ayo! Yayo phi attu mwooponlhe inyu ukhuma Umisri wo machiri inyu molhupalhe! 12 Nhipange ittu iriyoothe inohalha waavaha attu o Umisri nlhove no wiira, ‘Nlhuku aya haakumiha wiilhaponi wihu uno, ukhalhawaya aathanana weevakacha umwaakoni ni waalhakalhiha!’ Nhirushiye! Nrukunuweke, nhipange ittu ikihimenrie inyu wiira nnothanana upanga iyo! Nhaapangelhe attu inyu ittu yo uhilhoka iyo, yinre inyu wiira nnoopanga iyo! 13 Mwoopuwelheke anamitheko inyu, Aburahimu, Naisaka, ni Nayakhobo. Inyu mwaanene mwahaalhelha wiira, ‘Kinowoorihani ukhalha ni achishaana enchi thoko ittotwa cho wiirimu.’ Mwaheerelha wiira, ‘Kinowa waavaha achishaana inyu ilhapo yonkhaye Kinolheha aka wiira kinowaavaha, ikhalhe yawaya mahuku o uhimalha.’ "

14 Paahi Apwiiya Nlhuku ahorukunusha irusho chaya. Khayaapannge ittu yo uhilhoka wa attu aya, yenre aya wiira anoopanga.

15 Ashinna Musa ahohokolhia ukhuma umwaakoni anakushilhe ikipande piilhi cho malhuku chaalhepiye malheheriyo uno ni uno. 16 Nlhuku mwanene phi akooronshe ikipande cho malhuku chiyo ni ulhepa malheheriyo uno ni uno.

17 Nayoshua nkayeewa attu vaakhuwelha aya, nkayeerelha ashinna Musa, "Kineewa thoko attu anowaatakana ikhoto unikambini uwo."

18 Nansho ashinna Musa nkayeera, "Wowo kuhii unyakulhiya wo wunlha ama wo ukottolha, wowo unyakulhiya wo wiipiya ichipo!"

19 Ikatema ashinna Musa vaatameria aya vanikambini vawo, ni woona isinyago yo mwaang'ope, ni attu yiinaka, ahorushiya chinene. Ahoriha ikipande cho malhuku chilhe vathi wuuthi mwaako, nkachaaphwia. 20 Paahi ahokusha isinyago yo mwang'ope ilhe nkayaapaha vamooroni. Nkaashilha mpaka nkayaakhalha iphepa. Nkayoothwaa iphepa iyo mmaashini, nkaakhanyereriha Aisraeli wiira awurie. 21 Yamalheke, nkayeerelha Naharuni, "Attu alha yoopanngeni, mpaka nkamwaawulhusha muuwonyani wulhupalhe thoko choo?"

22 Naharuni nkaakhulha, "Chonte, nhikithunalhelhe, munna. Nhaachuwelha chiri aya tayari uwonya. 23 Yaakiirenlhe wiira, ‘Ukhalhawaya khanichuwenlhe ittu yaapattilhe ashinna Musa, aniwiihilhe uno ukhuma Umisri, paahi etu nnikooroshelheke nlhuku o uniholhelha!’ 24 Paahi kahaakhulha wiira, ‘Kila ntu wanre ikipuli yo idhahabu arulheke.’ Paahi ahorulhacha nkayaakivaha, nkakaathulhusha vamooroni, ni ukoorosha isinyago yo mwang'ope!"

25 Paahi ashinna Musa vonne aya wiira attu ahopanga ittu yo uhilhoka, ukhalhawaya Naharuni ahaahiyacha apange thoko chinothanana aya, ni ukhalha ittu yo utheehacha wa amalhaponi aya, 26 aheemelha vanlhakoni vanipuroni, nkayeera, "Kila ntu naarumelhelha Apwiiya Nlhuku, aweeke uwannyaka!" Paahi iyari ya Alawi yonkhaye yahothukumana ni waarukureria. 27 Nkayeerelhacha, "Apwiiya Nlhuku ihu Aisraeli, aholhehera wiira kila mmoka inyu eettukeke uphanga awe nnyununi mwawe, arukurerieke vanikambini ukhuma nlhako mmoka mpaka nlhako nkina, kila mmoka amwiiveke mmuchi awe, mpwana awe ni namwaatamana awe." 28 Alawi ahorumelhelhacha nlhove ni ashinna Musa. Nkayaarwaa ni weevakacha manyaalhopwana maelufu mararu nenno nihuku nno. 29 Ashinna Musa nkayeerelha Alawi, "Lhelho nheekumiha mwaashinene wa Apwiiya Nlhuku wo weevakacha achishaana inyu ni ashunninyu, paahi Apwiiya Nlhuku anouvahani ibarakha."

30 Waashelhe waya, ashinna Musa aherelha attu, "Nhowonya chinene. Vano kinoowelha tho umwaakoni koolhumane Apwiiya Nlhuku. Veekinaka kinokoowolhumana nlhove no waalhepelha wiira ohiyerereni uwonya winyu." 31 Paahi ashinna Musa ahorwaa umwaakoni ni wolhumana Apwiiya Nlhuku yeeraka, "Kinoochukulha chinene wiira attu alha ahowonya chinene. Aheekooroshelha nlhuku o idhahabu nkayanthimicha. 32 Nansho vano kinoushontelhelhani wiira, mwaahiyerereke uwonya waya uwo. Mwaahaahiyerereke, paahi nfuteke nchina naka nkitabuni ulhempe inyu machina a attu inyu."

33 Nansho Apwiiya Nlhuku nkayeerelha ashinna Musa wiira, "Kinohalha ufuta machina a attu akiwonnye vekha aya, nkitabuni mwaka mmo. 34 Vano etu nkhuruweke nrweeke mwaaholhelheke Aisraeli, ukittu kuhimenrieakani. Muupuwelheke mmuruni mwinyu wiira, nnepa wo wiirimu waka unouholhelhani. Nansho, nihuku kinohalha aka waakhuruwelha nno, kinoowa kaatwarusha wo nlhatu no uwonya waya."

35 Paahi Apwiiya Nlhuku ahaakurushelha mareta molhupalhe attu ayo, wo nlhatu no waalhepelha Naharuni wiira yaakooroshelhe isinyago yo mwaang'ope o idhahabu ilhe.