1 Apwiiya Nlhuku yaheerelha ashinna Musa, 2 "Mwaattukurieke achishaana ashilhopwana o nttara onkhaye ukhalha awaka. Ukhalhawaya achishaana ashilhopwana o nttara a Aisraeli ni o kila mwannama awaka yayo."

3 Ashinna Musa nkayeerelha attu, "Muupuwelheke nenna nihuku nna! Nihuku nikhumilhe inyu Umisri waari inyu ipotta. Nna phi nihuku Apwiiya Nlhuku nokuminheayani wowo wo moono aya wo machiri. Nenna nihuku nna, nhilhie mena nkatte uhelhiye ihengedure. 4 Nnoothama Umisri nna nihuku nna, no mweeri wo upacha wo mweeri wo Habibu. 5 Apwiiya Nlhuku yahaalhupelhelha manyaapwiiya ihu wiira, anouvahani mwaattiva ilhapo yo Ukanaani, Uhiti, Uamori, Uhivi ni Uyebusi. Paahi vanohalha aya upihani wowo, ilhapo inorera ulhimiya ni uhuwelhiya mihuwo, mwoopuwelheke ilha isikukuu ilha kila iyaakha, mweeri wo upacha ulha. 6 Wo mahuku saba nlhieke mikatte cho uhihelhiya ihengedure, ni nihuku no saba nno nikhalheke isikukuu yo waathimicha Apwiiya Nlhuku. 7 Wo mahuku saba nhilhie mikatte cho uhelhiya ihengedure. Ni mena uhikhalhe mikatte cho uhelhiya ihengedure, mena ihengedure variwoothe munlhokoni mwinyu, ni mwiilhaponi mwinyu mwonkhaye. 8 Nenno nihuku nno mwaahimerieke achishaana inyu wiira, nnopanga chiicho wo nlhatu no ittu yaapangilhe aya Apwiiya Nlhuku uwaninyu, vaathamilhe inyu ilhapo yo Umisri. 9 Yeyo isikukuu iyo inowa ukhalha yo wuupuwelhiya, thoko nripwe uttukiye mmononi mwinyu ama vayuchi winyu, wiira muupuwelhe malheheriyo a Apwiiya Nlhuku, mahuku onkhaye. Ukhalhawaya, Apwiiya Nlhuku ahouthamihani Umisri wo moono aya wo machiri. 10 Wo chiichammo etu, ntapelhelheke isikukuu ilha nihuku naya nithanlhiye, kila iyaakha."

11 Ashinna Musa nkayaathepa weerelha attu wiira, "Ni chiichammo etu, ikatema Apwiiya Nlhuku vanohalha aya upihani ilhapo yo Ukanaani ni uvahani ikhalhe yawinyu thoko chaalhupenlhe aya mwaattiva ni manyaapwiiya inyu, 12 nnothananiya wiira mwaavaheke Apwiiya Nlhuku nlhipu wo kila mwaana inyu o nttara nlhopwana. Kila mwannama nlhopwana yarelhe o upacha mmihuwoni mwinyu nowa ukhalha a Apwiiya Nlhuku. 13 Nansho iyari o upacha ilhopwana yo iphuta, nnoomopolha wo unlhiva mwaakhondoro, ama mwaahittuneke umwoopolha, mmuntheke ishiko. Kila mwaana mwanlhopwana o nttara, munlhokoni mwinyu, mmopolheke. 14 Yakhalhaka mahuku anowa mwaamwaninyu noukohani, ‘Nenna nlhove nna maana aya ishiyani?’ Munhimerieke wiira, ‘Apwiiya Nlhuku ahonoopolha wo machiri o moono aya, ukhuma Umisri waari ihu ipotta. 15 Nafarao wo itiyamaru aya ahokhota unihiyerera wiira nithame, wo chiichammo etu, Apwiiya Nlhuku ahomwiiva kila mwaana mwanlhopwana o nttara mwiilhaponi Umisri. Kila nttara no attu ama no ashinama. Paahi mii kinaavaha isadaka Apwiiya Nlhuku yo kila nttara nilhopwana no achishaana aka ni o mihuwo chaka. Nansho kila nttara nilhopwana munlhokoni mwa achishaana aka, yoyo kinoomwoopolha.’ 16 Nna nlhove nna ninowa ukhalha thoko nripwe uttukiye mmononi mwinyu ama vayuchi winyu, wiira Apwiiya Nlhuku ahonithamiha Umisri wo moono aya wo machiri."

17 Ikatema Nafarao vaahiyerenre aya Aisraeli wiira arwaache, Nlhuku khavirinhe ilhapo ya Afilisti, inakhalhaka yeyo yaari iphiro yo vakhiviru. Nlhuku enre, "Akinottuna wiira attu arukunushe mirima chaya ni uhokolhia Umisri, achuwelhaka wiira anoothananiya waatakana ikhoto." 18 Nansho Nlhuku ahaawelhiha Aisraeli iphiro yo urukureria aviraka uthakoni, alhukamaka ibahari yo Ushamu. Aisraeli yaathamme anari o chireru waatakana ikhoto.

19 Ashinna Musa ahokusha makhuva a Nayusufu alhe, thoko chaalhehenre aya Nayusufu ahinaya ukhwa. Ukhalhawaya ahaalhupelhiha Aisraeli yeeraka, "Nlhuku vanohalha awe uwa ni uthamihani wono, mmweeke mwaakusha makhuva aka ukhuma uno."

20 Paahi Aisraeli yahothamacha Usukothi, nkayaamaka nipuro Uethamu, uchereshere uthako. 21 Uthana Apwiiya Nlhuku ahaaholhelha nnihuteni mwaari thoko nihute norekama nooteelha, wooniha iphiro, ni uhiyu ahaaholhelha ni nipoto no mooro norekama naamwalhelha wiira yoorie weeta uthana ni uhiyu. 22 Nipoto no urekama nne khanaathamme. Naari umihoolho waya ikatema yonkhaye, nihute nooteelha uthana ni ukhalha thoko mooro uhiyu.