1 "Nhihimiache chittu cho woothiya. Ni mena nhinkavihe ntu o uhilhoka wiira munhimiecheshe vanoothacha awe. 2 Nhilhutaane ni nlhoko wa attu anopanga chittu cho uhilhoka, mena nhilhutaane ni attu anohimiacha chittu cho woothiya umilhatuni, wiira arukunushe ikekhia. 3 Nhoothache wiira munkavihere ntu nshikini umilhatuni.

4 "Mwoonaka ing'ope ama iphuta ya mmalhaponi inyu inapotenre, munhokholhoshereke mwanene. 5 Mwoonaka iphuta ya ntu noovengani inawulhuwilhe ni nsigo aya, munkaviheke ntu uyo weemesha iphuta awe iyo, mena nhivire nkamwaarwa.

6 "Nhirukunushe ikekhiaye ya ntu nshikini umilhatuni wawe. 7 Nhootherie attu, ni mena nhiive attu anopanga moombone ni o ikekhiaye. Ukhalhawaya akinonhiyerera ntu o uwonya. 8 Nhipochere nchurukhu wo uhongiya, ukhalhawaya yoyo unowaahelha uhoona ahoolhelhi, ni urukunusha ikekhia ya attu anopanga moombone.

9 "Nhaapangelhe ichimwa alheto, ukhalhawaya mwaattiva nhochuwelha nlheto chinokhalha awe, ukhalhawaya ni inyu mwaari alheto Umisri.

10 "Iyaakha sita mwaalheke choolhia mmamatani mwinyu ni ukhungura choolhia chiyo. 11 Nansho iyaakha yo saba, nhiyeke imata chinyu wo uhaalha imbeyu, wiira amashikini mmilhokoni mwa attu inyu arokottache mahalhahalha o choolhia mmamatani mwinyu mmo ni ashinama o mwiithuphini alhiache. Mpangeke chiichammo imata chinyu cho izabibu ni cho izeituni.

12 "Wo mahuku sita nvareke ntheko inyu, nansho nihuku no saba mwiittuweke, wiira ing'ope chinyu ni iphuta chinyu chiittuweke. Ni ipotta chinyu ni anamitheko alheto ettuwacheke. 13 Mvarechesheke malhove onkhaye kuhimenrieakani. Nhiromolhe machina o milhuku chikina ata vakani, yayo ahiiwaanie mmalhakuni mwinyu.

14 "Nttapelhelheke ni upanga isikukuu mikwaha miraru kila iyaakha ukithimicha mii. 15 Mpangeke isikukuu yo mikatte cho uhihelhiya ihengedure mahuku saba, thoko chaalhehenre aka. Mpangeke ikatema ithanlhiye upangiya mweeri wo Habibu, ukhalhawaya yoyo phi mweeri waathamme inyu Umisri. Ntu riyoothe hiwe umihoolho waka, wo uhikusha ittu.

16 "Mpangeke isikukuu yo milhipu cho upacha cho ntheko inyu ni yo milhipu cho mmamatani mwinyu.

"Mpangeke Isikukuu yo Nlhalha kila vanochokholha inyu ukhungura choolhia mmamatani mwinyu. 17 Kila iyaakha manyaalhopwana onkhaye akumaaneke mikwaha miraru, umihoolho waka mii Apwiiya Nlhuku.

18 "Nhikumihe isadaka yo nkatte uhelhiye ihengedure vanokumiha inyu isadaka ya ashinama uwannyaka. Ni mena nhihiye makhura a ashinama ayo mpaka wichishu wo nihuku no nayelhi.

19 "Kila iyaakha, vanokhungura inyu mmamatani mwinyu, mmwiiheke isadaka yo milhipu unupani waka mii Apwiiya Nlhuku inyu.

"Nhaapie inama yo mwaakhondoro ama yo mwaapuri ni mapelhe a anumwanawe.

20 "Mwooneke, Mii kinonruma nnepa oholhelheni munkwahani mwinyu wiira opiheni rata mwiilhaponi kuweshenreakani. 21 Mmwiwelhelheke ni urumelhelha ittu iriyoothe inohalha awe uhimeriani. Nhinttekelhe ukhalhawaya mii kihonruma wo nchina naka, ni mena khanouhiyererani mena uwonya. 22 Nansho mwamwiiwelhelhaka rata ni upanga chittu chonkhaye chinohimia awe, mii kinowaatakana ni amalhaponi inyu onkhaye. 23 Nnepa aka unouholhelhani ni upihani ilhapo ya attu o Uamori, attu o Uhiti, attu o Uperizi, attu o Ukanaani, attu o Uhivi ni attu o Uyebusi, ni mii kinowaarimelhiha onkhaye ayo. 24 Paahi etu nhikhoromelhe milhuku chaya wiira nthimiche, mena uvara mitheko chaya, mena uttwariha chittu chaya. Nansho nhararieke ni upweshakacha mapoto anothimicha aya.

25 "Nkithimicheke mii Apwiiya Nlhuku inyu. Ni mii kinouvahani ibarakha yo choolhia ni maashi, ni uthamiha mareta munlhokoni mwinyu. 26 Khanowa aakhalha nthiyana nohalha urihakacha mena uhiyara mwiilhaponi mwinyu. Ni mii kinouvaherani ukumi wo iyaakha chinchi.

27 "Kinowoopopiha attu onkhaye anouvingani mwaatti wiira owooveni, ni waakukureha attu onkhaye anohalha inyu waanana, kinowaarukunusha amalhaponi inyu oottaweni. 28 Kinoowiiha matendehu umihoolho winyu, wiira yoomolhache attu o Uhivi, attu o Ukanaani ni attu o Uhiti. 29 Akinaathamiha yayo attu ayo iyaakha imoka, wiira ilhapo ihikhalhe chiicho, ashinama o mwiithuphini ahiwe onchereria ni upwahani machiri. 30 Nansho kinowaawukulha vakani vakani mpaka vanohalha inyu uwanelha ni uvarelha ilhapo iyo. 31 Miinano cho ilhapo inyu iyo chinowa ukhalha ukhuma ibahari yo Ushamu mpaka ibahari yo Umedeteraniya. Ni ukhuma uthakoni mpaka mwoolhoko wo Yufrati. Ukhalhawaya kinowaahelha mmathathani mwinyu anenchi o yeyo ilhapo iyo, ni inyu nnowoomolha wiira athamache. 32 Nhilhehane ittu iriyoothe ni yayo attu ayo, mena ni milhuku chaya. 33 Nhaahiyerere wiira akhalhe mwiilhaponi mwinyu, ahiwe owonyihani nkamwaakiwonya mii. Ukhalhawaya mwavaraka mitheko cho milhuku chaya chiyo, wo ikekhiaye vavawo nnoowaya munriankhoni mwaya."