1 Apwiiya Nlhuku nkayeerelha ashinna Musa, 2 "Mweerelhe Aisraeli wiira awiihe izawadi uwannyaka. Mpochereke wa attu ayo ittu iriyoothe inothanana aya ukumiha uwannyaka. 3 Chi phi chittu chinohalha inyu upochera chiyo, idhahabu, isiliva, ishaaba, 4 nttoche no mapururu o ikhondoro no kibuluu, no zambarau ni no khwiilha. Ikuwo yooteelha, yorera, ni mapururu o ipuri, 5 marapalha o ikhondoro chilhopwana chihelhiye irangi yokhwilha, marapalha o ipuri, imbau cho nsonobari, 6 makhura o ikhandiri, chittu cho uhelhiya makhura o unukhelha o uttukuria chittu, ubani wo unukhelha chinene, 7 malhuku o nhakhu aneehaniya sadoniki ni malhuku makina o utottelhiya ikuwo yo ukhunelha ikhakacha ya opochera ishaani ni nrupa wo vakhakaachani.

8 "Tho, attu ayo akithekelheke Nihema Nitakatifu wiira kikhalhe munlhokoni mwinyu. 9 Athekeke Nihema ni ukoorosha chittu cho nhina mmo thoko chinohalha aka uwoonihani.

10 "Nkoorosheke nisanduku no imbau cho nsonobari no urekama miono micheshe, ukhanuwa miono miilhi ni nchusha miono miilhi. 11 Nhikeke idhahabu yorera nhina ni vathe, ni urukureeriha nreko wo idhahabu mipata chonkhaye. 12 Tho nkooroshelheke ibangili ncheshe cho idhahabu, cho uwariha mieto chaya ncheshe, ibangili piilhi mpatta mmoka, ni ibangili piilhi mpata nkina. 13 Nhemeke miri cho nsegasega cho n'johoro, ni chiyo nhikeke idhahabu. 14 Mmiriheke chechiyo mishaamu chiyo mbangilini mwo mipata miilhi cho nisanduku chiyo, wiira noorie ukushiya. 15 Chechiyo mishaamu chiyo chikhalheke mwommo mahuku onkhaye, chihithamihiye mena. 16 Munisandukuni mmo, mweesheke ivibau piilhi cho malhuku chilhepilhe aka malheheriyo aka.

17 "Mwamalhihaka, nkoorosheke ikifuniko yo idhahabu yorera, vaneehaniya nipuro no woonelhiya attu ikiriri. Urekama waya miono miilhi ni nusu ni makhuvi aya moono mmoka ni nusu. 18 Tho, nhaneke idhahabu yorera, mwaapangacheke o wuupiya o mapupha o wookwa elhi, anolhikaana ni amakerubi, mweesheke mwisho wo ikifuniko iyo uno ni uno, 19 mmoka mwisho mmoka ni nkina mwisho nkina. Akhalheke vachulhu vawo, nansho avaraaneke, akhalheke ittu imoka ni ikifuniko iyo. 20 Awehaneke, mapupha aya anookwelhe ni ukhunelha ikifuniko iyo, anooromenlhe. 21 Mweesheke ivibau piilhi chinohalha aka uvahani chiyo munisandukuni mmo. Mwamalhaka, nkhunelheke ikifuniko iyo vachulhu nisanduku vawo. 22 Mii kinoukumaanani vavawo, vachulhu nisanduku vawo, variyari wa amakerubi elhi vawo. Kinowa uwulhumanani ni uvahani malheheriyo o waahimeria Aisraeli.

23 "Nkoorosheke imeza yo imbau cho n'johoro yo urekama miono micheshe, ukhanuwa moono mmoka ni nusu ni nchusha naya miono miraru. 24 Nhikeke imeza iyo idhahabu yorera ni urukureeriha nreko wo idhahabu mipata chonkhaye. 25 Mwamalhihaka, nrukureeriheke vachulhu vawo ikibau yo ukhanuwa iinchi ttaru wiira chittu chihimore. Nrukureeriheke ni nreko wo idhahabu yo rera mipata chonkhaye. 26 Nkoorosheke ibangili ncheshe cho idhahabu ni uwariha ikhoona ncheshe cho mieto chaya micheshe chiyo. 27 Ibangili chiyo chipharelhelhihiyeke vakhiviru ni ubau unorukureria vachulhu uyo, wiira chithathelhiye nisanduku nno. 28 Nkoorosheke mishaamu miilhi cho n'johoro ni uhika idhahabu. Phi mishaamu cho uthathelha imeza iyo. 29 Tho, nkoorosheke isahani ni ikikombe, nkawo ni inyipo cho uhelhiya isadaka cho uwuriya. Chonkhaye chiyo nkoorosheke wo idhahabu yorera. 30 Mweesheke imeza iyo umihoolho wo Nisanduku no Malhehano. Vachulhu imeza vawo, mweesheke mikatte chikumihiye isadaka chiyo, mahuku onkhaye.

31 "Nkoorosheke iphata yo uthomeiya ikhandiri ihaniye wo idhahabu yorera. Ikhalhelho aya ni nkupu aya chikhalheke ittu imoka. Tho, chihaniyeke wo ulhikaana ni maua, yaani ikikombe chaya, ituva chaya ni maua aya ayo akhalheke ittu imoka. 32 Ikhalheke ni iritta sita, iritta ttaru mpatta mmoka ni iritta ttaru mpata nkina. 33 Wo kila nritta ukhalheke ikikombe ttaru cho ulhikaana ni ituva cho mwiri wo mlozi, kila imoka ni ituva aya ni niua naya. 34 Vachulhu iphata vawo vakhalheke ikikombe ncheshe cho ulhikaana ni maua o mwiri wo nlozi, ituva chaya ni maua aya. 35 Vanokhuma iritta sita chiyo, vakhalheke ni nlhuto nimokanimoka wuuthi. 36 Mikaanda chiyo ni iritta chiyo chikhalheke ittu imoka ni iphata iyo, ni chonkhaye chihaniyeke wo idhahabu yorera. 37 Tho mwaakoorosheke ikhandiri aya saba, ni ayo aparihelhiyeke wiira amwalhie. 38 Thothoni tho, nkoorosheke mikasi chikani cho uwukulhelha utambi ni isahani cho uhelha itura, wo idhahabu yorera. 39 Nkoorosheke iphata iyo ni chittu chaya chonkhaye chiyo wo idhahabu yorera ikilo makhumi mararu ni nthanu. 40 Nkoorosheke rata wo ulhikaana thoko chenre inyu wo woonihiya umwaakoni ulhe."