1 Apwiiya Nlhuku ahoolhumacha malhove onkhaye alha, nkayeera, 2 "Mii phi Apwiiya Nlhuku inyu, kuthaminheni ilhapo yo Umisri, waari inyu ipotta.

3 "Nhikhalhe ni milhuku chikina kaahikhalhe mii vekha.

4 "Nhikooroshe isinyago iriyoothe yo milhuku cho woothiya, ama isinyago iriyoothe irii wiirimu, mwiilhaponi ama mmaashini wuuthi ilhapo. 5 Nhikhoromelhe ama ukavihera ntheko aya, ukhalhawaya mii Apwiiya Nlhuku inyu, phi Nlhuku o ihache. Kinowaatwarusha achishaana wo nlhatu no uhilhoka wa manyaathumwanaya, ata mpaka iyari cho neraru ni cho nechenshe cho yayo ahinokittuna ayo. 6 Nansho kinowaalhoha maelufu o iyari cho alhe anokittuna ni uvarechesha malhehero aka.

7 "Nhiromolhe wo uhikhalha ni maana nchina naka mii Apwiiya Nlhuku inyu. Ukhalhawaya mii Apwiiya Nlhuku akinohiya untwarusha nohalha uromolha nchina naka pufia.

8 "Nhilhiyalhe uvarechesha Nihuku no Wiittuwa, ni upanga nihuku nitakatifu. 9 Nvareke ntheko mahuku sita, ni upanga chittu chinyu chonkhaye. 10 Nansho nihuku no saba phi Nihuku no Wiittuwa na Apwiiya Nlhuku inyu. Nenno nihuku nno nhivare ntheko uriyoothe, inyuva ama mwaamwaninyu mwanlhopwana ama mwanthiyana ama ipotta inyu ama anamitheko inyu ashithiyana ama ashinama inyu ohuwiya ama nlheto rii uwannyu. 11 Ukhalhawaya wo mahuku sita mii Apwiiya Nlhuku inyu, kahoopa irimu ni ilhapo, ibahari ni chonkhaye chiriwo. Yamalheke nkakeettuwa nihuku no saba. Paahi etu mii Apwiiya Nlhuku kahohelha ibarakha nenno Nihuku no Wiittuwa nno, nkakaapanga ukhalha nitakatifu.

12 "Mwaathimicheke athumwaninyu ni anumwaninyu, wiira nlhokelhe mahuku o uhimalha mwiilhaphoni kinouvahakani mii Apwiiya Nlhuku inyu.

13 "Nhiive.

14 "Nhilhuve.

15 "Nhiiye ittu iriyoothe.

16 "Nhimootherie namwaatana inyu.

17 "Nhimirielhe ishenye inupa ya amwaatamana inyu ama ahanu awe ama namitheko awe nlhopwana ama nthiyana ama ing'ope awe ama iphuta awe ama ittu iriyoothe ya amwaatamana inyu."

18 Attu yeeweke ithari ni woona uverunya uverunyaka ni wiiwa nipalhapata vachulhu mwaako waatutuma mwiishi, onkhaye yahoovacha ni uthukumelha. Onkhaye nkayeemelhacha utayi. 19 Nkayeerelha ashinna Musa, "Nnulhumaneke inyuva mwaanene, ni hii ninowiiwelhelhani, nansho Apwiiya Nlhuku ahinuulhumane, nihiwe naakhwa." 20 Ashinna Musa nkayeerelha, "Nhoove, ukhalhawaya Nlhuku howa ulhikachani wiira munthimicheke yoyo mahuku onkhaye, ni mena nhiwonye."

21 Attu onkhaye yeemenlhe utayi ikatema ashinna Musa vaatamenrie aya nihute nolhemelha naari awe Nlhuku nne.

22 Apwiiya Nlhuku nkayeerelha ashinna Musa, "Mweerelheke Aisraeli wiira, ‘Nhoonechesha mwaashinene wiira kihowulhumanani ukhuma wiirimu. 23 Nkithimicheke mii vekha aka, mena nhikooroshe isinyago cho milhuku cho isiliva mena cho idhahabu. 24 Nnokithekelha madhubahu o ittaya, ni vachulhu waya nnookihithelha ikhondoro chinyu ni ing'ope chinyu ukhalha isadaka cho upahiya ni isadaka cho uwiiha mpuha. Vakittu variwoothe vanohalha aka woopusha attu nchina naka, vavawo mii kinoowa kimwanene ni uvahani ibarakha. 25 Mwakithekelhaka madhubahu o malhuku, nhitheke wo malhuku o uhemiya, ukhalhawaya mwahemaka wo ikaruma cho uhemelha malhuku, nnonyalhiha. 26 Mena nhikithekelhe madhubahu o mavato o uwelhelha vachulhu, attu ahiwe yoona umattepe wo uyo ntu nowelha vachulhu uyo.’ "