1 Apwiiya Nlhuku nkayeerelha ashinna Musa wiira, 2 "Mwooneke, kihaathanlha Nabezaleli anaaya Nauri, uchulhu wa Nanahuri, o ukhuma nikosho no Uyuda, 3 kihaachariha machiri aka. Kihaavaha irusho cho uchuwelha, urata ni wooria mitheko chonkhaye cho ukoorosha chittu. 4 Wiira akooroshe wo urata, chittu cho idhahabu, isiliva, ni ishaaba. 5 Kihaavaha irusho cho uhema malhuku o uphwanelhiha chittu, uhema imbau, ni wooria ukoorosha kila ittu. 6 Wo uthepa, kihaathanlha Naoholiabu anaaya Naahisamaki, o nikosho ni Nadani, avare ntheko vamoka ni ayo. Tho, kihaavaha attu akina wooria chinene wiira avare mitheko chikinachikina, wiira akooroshe chittu chonkhaye kilhehenre aka wiira chikooroshiye. 7 Atheke Nihema Nitakatifu, Nisanduku no Malhehano ni ikifuniko aya, vamoka ni ikaruma chaya chonkhaye, 8 ni imeza ni chittu chaya, iphata yo idhahabu yorera yo uthomeiya ikhandiri ni ikerero chaya. Akoorosheke madhubahu o ututumihera ubani, 9 madhubahu o isadaka cho upahiya ni chittu chaya chonkhaye, inyipo yulhupalhe yo maashi vamoka ni ikhalhelho aya, 10 ikuwo chitakatifu cho uwariya ni Naharuni ni achishaana aya anohalha uvara ntheko wo opochera ishaani. 11 Tho, akoorosheke makhura o wootiya ni ubani wo unukhelha wo ututumihiya Vakittu Vatakatifu. Akoorosheke chittu chonkhaye chiyo thoko chinre aka wo waalhehera."

12 Apwiiya Nlhuku nkayeerelha ashinna Musa tho, 13 "Mwaahimerieke attu ayo, avarechesheke Nihuku no Wiittuwa naka, ukhalhawaya phi alama yo malhehano uwannyaka mii ni iyari chinyu chonkhaye. Wooniha wiira, mii phi Apwiiya Nlhuku kuupanngeni mwaatti ukhalha atakatifu. 14 Nvarechesheke Nihuku no Wiittuwa, ukhalhawaya nenno nihuku nitakatifu uwannyu mwaatti. Ntu riyoothe hinovarechesha nenno nihuku nno, eeviyeke. Ni ntu nohalha uvara ntheko nenno nihuku nno, haalhakelhiye munlhokoni mwa attu awe. 15 Nvareke ntheko mahuku sita, nansho nihuku no saba, nenno nihuku naka neeshiye no wiittuwa. Ntu riyoothe novara ntheko nenno nihuku nno, eeviyeke. 16 Aisraeli avarechesheke nenno nihuku nno ukhalha phi alama yo malhehano o mahuku o uhimalha. 17 Yayo phi malhehano aka o mahuku o uhimalha uwannyaka mii ni Aisraeli. Ukhalhawaya Mii, Apwiiya Nlhuku kahoopa irimu ni ilhapo wo mahuku sita, ni nihuku no saba kahohiya uvara ntheko, nkakeettuwa." 18 Apwiiya Nlhuku amalhihekeru wolhumana ashinna Musa umwaakoni Usinai, ahaavaha ivibau piilhi cho malhuku chaalhempe aya malheheriyo, anene Apwiiya Nlhuku wo nikokho naya.