1 Nɛ i nu gbi ko nɛ nya wa kɛ je sɔlemi tsu ɔ mi nɛ ngɛ bɔfohi kpaago ɔmɛ dee ke, "Jehanɛ ɔ, nyɛɛ ya nɛ nyɛ ya plɛ Mawu mi mi fumi ɔ ngɛ kpluu kpaago ɔmɛ a mi kɛ pue zugba a nɔ."

2 Lɔ ɔ he je ɔ, kekle bɔfo ɔ je sɔlemi tsu ɔ mi nɛ e ya plɛ nɔ nɛ ngɛ e kpluu ɔ mi ɔ ngɔ pue zugba a nɔ. Kɛkɛ nɛ nɔ fɛɛ nɔ nɛ Lohwe ɔ he okadi ngɛ e he nɛ e ngɛ Lohwe ɔ e amaga a jae ɔ hia pa yayahi nɛ yee nɔ.

3 Bɔfo enyɔne ɔ plɛ e kpluu ɔ mi nɔ́ ɔ ngɔ pue wo ɔmɛ a mi, nɛ a mi nyu ɔmɛ plɛ nɔ gbogboe mi muɔ. Nɛ nɔ́ tsuaa nɔ nɛ ngɛ wo ɔmɛ a mi ɔ gbo.

4 Bɔfo etɛne ɔ plɛ e kpluu ɔ mi nɔ́ ɔ ngɔ pue pa amɛ kɛ nyu hɛ ngmɛ ɔmɛ a mi nɛ a plɛ muɔ. 5 Nɛ i nu nɛ nyu ɔmɛ a bɔfo nɛ ɔ ngɛ dee ke, "Oo Tsɛ Klɔuklɔu, mo nɔ nɛ o ngɛ, kɛ nɔ nɛ o hi si sa a, dalɔ ji mo, nɛ o kojomi nɛ ɔ sa. 6 Ejakaa a gbe o nimli klɔuklɔuhi kɛ o gbali ɔmɛ nɛ a muɔ pue si ngɛ zugba a nɔ. Nɛ ngɛ a he je ɔ, mo hu o pue nihi nɛ gbe mɛ ɔ a muɔ si. Hiɔwo nɛ sa mɛ pɛ ji lɔ ɔ nɛ."

7 Nɛ i nu nɛ afɔle sami la tɛ ɔ e bɔfo ɔ de ke, "Ee, Nutsɔ Mawu Ope, o kojomi ɔmɛ da nɛ a ji anɔkuale."

8 Jehanɛ ɔ, bɔfo eywiɛne ɔ plɛ e kpluu ɔ mi nɔ ɔ kɛ pue pu ɔ nɔ. Nɛ lɔ ɔ ha nɛ pu ɔ tso wawɛɛ nɛ e saa nimli kɛ e la a. 9 Nɔ fɛɛ nɔ ngla kɛ e la dɔdɔɛ ɔ. Kɛkɛ nɛ a tu musu bɔmi munyu kɛ si Mawu, nɔ nɛ wo aja amɛ kɛ ba a. Se a tsakee we a juɛmi kɛ a je mi bami kɛ ha e hɛ mi nyami womi.

10 Jehanɛ ɔ, bɔfo enuɔne ɔ plɛ e kpluu ɔ mi nɔ́ ɔ kɛ pue Lohwe ɔ nɛ je wo ɔ mi ɔ e matsɛ sɛ ɔ nɔ. Kɛkɛ nɛ e matsɛ yemi he ɔ kulaa wo diblii. Nɛ e sisi bi ɔmɛ ta a lilɛ ngɛ nɔ nami he je. 11 Nɛ a tu musu bɔmi munyuhi kɛ si Mawu ngɛ a nɔ nami kɛ pa amɛ a he. Se a kua a tsui tsakemi ngɛ a ni yayami peemi ɔmɛ a he.

12 Bɔfo nɛ ji ekpa a plɛ e kpluu ɔ mi nɔ ɔ kɛ pue Yufrate pa a mi nɛ e mi gbli. Lɔ ɔ he je ɔ, matsɛmɛ nɛ je pu site he ɔ ngɔ a ta hwuli ɔmɛ kɛ be kɛ ho pu sinɔ he blɔ ya nɛ nɔ ko tsi we mɛ blɔ. 13 Nɛ i na mumi yayamihi etɛ nɛ dla a he kaa ovɔnɔhi nɛ a tuu kɛ je Gbeye Lohwe ɔ nya mi kɛ Lohwe ɔ nɛ je wo ɔ mi ɔ kɛ e lakpa Gbalɔ ɔ a nya mi. 14 Mumi yayamihi nɛ peeɔ nyakpɛ níhi ya na matsɛhi ngɛ je ɔ mi kulaa konɛ a bua a nya nɛ a je ta kɛ wo Nutsɔ ɔ he ngɛ Mawu Ope ɔ Kojomi Ligbi ngua nɛ ma a nɔ.

15 "Nyɛɛ hyɛ, i ma ba tlukaa kaa julɔ! A jɔɔ nihi kulaa nɛ ngɛ mi mlɛe nɛ a ngɛ a tade ɔmɛ a nɔ hyɛe saminya konɛ a ko nyɛɛ he gu nɛ a hɛ mi ba pue si ɔ."

16 Nɛ a bua a ta amɛ ngɛ je ɔ mi ɔ tsuo nya ngɛ he ko nɛ a tsɛɛ ngɛ Hebri gbi mi ke Armagedon ɔ, nɛ ji Megido Yoku ɔ.

17 Kɛkɛ nɛ bɔfo nɛ ji kpaago ɔ plɛ e kpluu ɔ mi nɔ ɔ kɛ wo kɔɔhiɔ mi; nɛ gbi ko pɛ wawɛɛ kɛ je Hiɔwe sɔlemi tsu ɔ mi ngɛ matsɛ sɛ ɔ he ke, "A gbe nya!" 18 Jehanɛ ɔ Hiɔwe si nɛ e pa la, nɛ zugba hoso wawɛɛ. Zugba hosoo we ja hyɛ kɛ je benɛ nɔmlɔ bɔ ade ngɛ zugba a nɔ ɔ. 19 Nɛ Babilon, ma ngua a mi gba etɛ, nɛ je mi ma ngua amɛ butu. Mawu kai Babilon yayami ɔmɛ tsuo, nɛ e gbla e tue, nɛ e ha nɛ e nu e mi mi fumi wai kɔɔpoo ɔ kulaa. 20 Nɛ wo kpɔhi laa, yokuhi sɛ si nɛ a pee tɛtlɛɛ. 21 Hiɔmi tɛ nguahi nɛ a jiɔmi maa su sɛ ni tɛ jiɔmi lafa je Hiɔwe ba nɛ pue nimli a nɔ ngɛ zugba a nɔ. Nɛ a tu musu bɔmi munyuhi kɛ si Mawu ngɛ hiɔmi tɛhi nɛ a he ngɛ gbeye nɛ ɔmɛ a he.