1 Enɛ ɔ se ɔ, i na Mawu bɔfohi eywiɛ nɛ daa si ngɛ zugba kɔ nya eywiɛ ɔmɛ a nɔ, nɛ a tsi kɔɔhiɔ eywiɛ ɔmɛ a nya bɔ nɛ pee nɛ a ko fia ngɛ zugba a nɔ loo wo ɔ nɔ loo tso ko nɔ. 2 Nɛ i na Mawu bɔfo kpa ko hu nɛ je pu site he kɛ ma, nɛ e hɛɛ Mawu hɛ kalɔ ɔ e nɔ́ nya sɔumi nɔ́ ɔ. Nɛ e kpa ngmlaa wawɛɛ kɛ de bɔfo eywiɛ ɔmɛ nɛ Mawu ha mɛ he wami kaa a puɛ zugba a kɛ wo ɔ ke, 3 "Nyɛ ko puɛ zugba a loo wo ɔ loo tso ɔmɛ kɛ ya si be nɛ waa kɛ nya sɔumi nɔ́ ma kadi wa Mawu ɔ sɔmɔli ɔmɛ a hɛ nya."

4 Nɛ a tsɔɔ mi ni nɛmɛ nɛ a kɛ Mawu nya sɔumi nɔ́ ɔ kadi mɛ ɔ a yi bɔ; nimli akpe lafa nyingmi eywiɛ kɛ eywiɛ nɛ je Israel wɛtso nyɔngma kɛ enyɔ ɔmɛ a mi.

5 Nimli nɛ je Yuda wɛtso ɔ mi nɛ a kɛ nya sɔumi nɔ́ ɔ kadi mɛ ɔ, a yi bɔ ji akpe nyɔngma kɛ enyɔ;

Ruben wɛtso ɔ mi ɔ, nimli akpe nyɔngma kɛ enyɔ;

Gad wɛtso ɔ mi ɔ, nimli akpe nyɔngma kɛ enyɔ;

6 Aser wɛtso ɔ mi ɔ, nimli akpe nyɔngma kɛ enyɔ;

Naftali wɛtso ɔ mi ɔ, nimli akpe nyɔngma kɛ enyɔ;

Manase wɛtso ɔ mi ɔ, nimli akpe nyɔngma kɛ enyɔ;

7 Simeon wɛtso ɔ mi ɔ, nimli akpe nyɔngma kɛ enyɔ;

Levi wɛtso ɔ mi ɔ, nimli akpe nyɔngma kɛ enyɔ;

Isaka wɛtso ɔ mi ɔ, nimli akpe nyɔngma kɛ enyɔ;

8 Zebulon wɛtso ɔ mi ɔ, nimli akpe nyɔngma kɛ enyɔ;

Yosef wɛtso ɔ mi ɔ, nimli akpe nyɔngma kɛ enyɔ;

nɛ Benyamin wɛtso ɔ hu nimli akpe nyɔngma kɛ enyɔ.

9 Enɛ ɔ se ɔ, i na nimli asafo babauu nɛ nɔ ko be nyɛe maa kane. Nimli nɛ ɔmɛ je je ɔ mi he fɛɛ he, kɛ ma fɛɛ ma nɔ kɛ wɛtso fɛɛ wɛtso mi nɛ a daa si ngɛ matsɛ sɛ ɔ kɛ Tobi ɔ hɛ mi. A wo tade hiɔ nɛ a hɛɛ tã bahi ngɛ a dɛ mi. 10 A ngɛ ngmlaa kpae wawɛɛ ke, "Wa yi wami hemi jee wa Mawu ɔ nɛ hii si ngɛ matsɛ sɛ ɔ nɔ ɔ, kɛ Tobi ɔ dɛ mi!" 11 Bɔfo ɔmɛ tsuo daa si kɛ bɔle matsɛ sɛ ɔ kɛ nikɔtɔma amɛ kɛ hɛ kali eywiɛ ɔmɛ. A ngɔ a hɛ mi kɛ bu si ngɛ matsɛ sɛ ɔ hɛ mi nɛ a ngɛ Mawu jae nɛ a ngɛ dee ke, 12 "Amen! A ngɔ yi jemi kɛ anunyami kɛ nile kɛ sina kɛ agbo jemi kɛ he wami kɛ ha wa Mawu ɔ kɛ je neneene kɛ ya neneene. Amen!"

13 Kɛkɛ nɛ nikɔtɔma amɛ a ti nɔ kake bi mi ke, "Ni nɛmɛ nɛ wo tade hiɔ nɛ ɔ, mɛnɔmɛ i, nɛ jije a je?"

14 Nɛ i ha heto ke, "Ye Nutsɔ, i li. I kpa mo pɛɛ nɛ o tsɔɔ mi." E ha mi heto ke, "Mɛ ji nihi nɛ je nɔ́ nami agbo ɔ mi, nɛ a fɔ a tade ɔmɛ a he ngɛ Tobi ɔ muɔ ɔ mi, nɛ tade ɔmɛ hiɔ futafuta. 15 Enɛ ɔ he je nɛ a ngɛ Mawu matsɛ sɛ ɔ hɛ mi nɛ a ngɛ lɛ sɔmɔe nyɔ kɛ pia ngɛ e Sɔlemi We ɔ nɛ. Nɔ nɛ hii si ngɛ matsɛ sɛ ɔ nɔ ɔ, e kɛ mɛ maa hi si nɛ e maa bu a he. 16 Hwɔ be mɛ yee, nɛ kuma hu be mɛ tɔe. Jehanɛ ɔ, pu be mɛ saae, nɛ latsa hu be mɛ tsae gblee. 17 Ejakaa Tobi ɔ nɛ daa si ngɛ matsɛ sɛ ɔ hɛ mi ɔ maa bu a he. E ma kpaka mɛ kɛ ya he nɛ wami nyu ngɛ, nɛ Mawu ma tsu a hɛ mi vo nyu tsuo."