1 Blema be ɔ mi lokoo ɔ, Mawu gu blɔ slɔɔtohi a nɔ nɛ e kɛ wa nɛmɛ tu munyu kɛ gu gbali ɔmɛ a nɔ nɛ e je e blɔ nya tomi ɔmɛ kpo bɔɔbɔɔ kɛ tsɔɔ mɛ ngɛ nlamihi kɛ ní namihi kɛ he si jemi mi.

2 Se ngɛ be nɛ ɔmɛ a mi lɛɛ e gu e Bi ɔ nɔ nɛ e kɛ wɔ tuɔ munyu. Bi nɛ ɔ ji nɔ nɛ e ngɔ nɔ́ fɛɛ nɔ kɛ ha; nɛ e nɔ nɛ e gu kɛ bɔ je ɔ kɛ nɔ́ tsuaa nɔ nɛ ngɛ mi ɔ.

3 Lɛ e mi nɛ Mawu anunyami ɔ kpɛɔ ngɛ; nɛ bɔ nɛ Mawu Bi ɔ ngɛ kɛ ha, kɛ níhi nɛ e peeɔ ɔ, e tsɔɔ kaa Mawu ji lɛ, nɛ e he wami ji nɔ́ nɛ hɛɛ adebɔ tsuo. Lɛ ji nɔ nɛ gbo nɛ e kɛ tsukɔ wa he nɛ e kɛ je wa he yayami ɔmɛ, nɛ lɔ ɔ se ɔ, e ya hi si ngɛ anunyami pe kulaa mi ngɛ Mawu Ope ɔ kasa nya ngɛ hiɔwe.

4 Nɛ enɛ ɔ he je ɔ, e ba kle kulaa pe bɔfo ɔmɛ, kaa bɔ nɛ e biɛ "Mawu Bi" nɛ e Tsɛ ɔ kɛ ha lɛ ɔ tsɔɔ ɔ. 5 Ejakaa Mawu de we bɔfo ɔmɛ eko hyɛ ke, "Ye Binyumu ji mo, nɛ mwɔnɛ ɔ i ngɛ mo anunyami nɛ jamɛ a biɛ ɔ hɛɛ ɔ hae." Se e de enɛ ɔ ngɛ Yesu he. Be kpa ko hu e de ngɛ e he ke, "Ami ji e Tsɛ, nɛ e ji ye Bi." 6 Nɛ be nɛ e wo e Bi Tete ɔ kɛ ba je ɔ mi ɔ, e de ke, "Mawu bɔfo ɔmɛ tsuo a ja lɛ."

7 Nɔ́ nɛ Mawu de ngɛ e bɔfo ɔmɛ a he ji, a he sɔɔ kaa kɔɔhiɔ, nɛ a ngɛ kaa tsɔli nɛ a kɛ la lilɛ bɔ mɛ. 8 Se nɔ́ nɛ e de ngɛ e Binyumu ɔ he ji, "Oo Mawu, o matsɛ yemi ɔ ngɛ kɛ yaa neneene; nɛ o kojomi ɔmɛ da be fɛɛ be. 9 O suɔ nɔ́ dadɛ, nɛ o sume nɔ́ nɛ hí; nɛ lɔ ɔ he je ɔ, Mawu, o Mawu ɔ ha mo bua jɔmi babauu pe nɔ fɛɛ nɔ."

10 Mawu hu tsɛ lɛ ke, "Nutsɔ", benɛ e de ke, "Nutsɔ, o bɔ je ɔ kɛ je sisije; nɛ o nine nya ni tsumihi ji hiɔwe nibɔ ni ɔmɛ. 11 A hɛ mi ma kpata ligbi ɔ ko, se moo lɛɛ o maa hi si kɛ ya neneene. Mɛ tsuo a maa pee kaa he hami ni momohi, 12 nɛ o ma koklo mɛ ligbi ko kaa a kokloɔ bo. Nɛ o ma tsake mɛ, se moo lɛɛ o maa hi ja daa nɛ o jeha amɛ a nya be tae ligbi ko."

13 Anɛ Mawu de bɔfo ko hyɛ kaa bɔ nɛ e de e Bi ɔ ke, "Moo hi si ngɛ ye hiɔ nine nɔ ngɛ anunyami mi kɛ ya si be nɛ i ma wo o he nyɛli ɔmɛ ngɔ pee sɛ nɛ o ma wo o nane ngɔ ma nɔ" lo?

14 Dabi, ejakaa bɔfo ɔmɛ a ji mumi mi tsɔli nɛ a tsɔ nɛ a ba ye kɛ bua ni nɛmɛ nɛ a ma na e yi wami hemi ɔ.