1 Enɛ ɔ he je ɔ, ye nyɛmimɛ nɛ Mawu hla kɛ ha lɛ nitsɛ e he, nyɛ nihi nɛ a hla kɛ ha hiɔwe, nyɛ juɛmi nɛ e ya Yesu, nɔ nɛ ji Mawu Tsɔlɔ kɛ wa hemi kɛ yemi ɔ mi Osɔfo Nɔkɔtɔma a he.

2 Yesu ye Mawu, nɔ nɛ wo lɛ Osɔfo Nɔkɔtɔma a, anɔkuale kaa bɔ nɛ Mose hu ye anɔkuale ngɛ Mawu we ɔ. 3 Se kɛ hu ɔ, kaa bɔ nɛ wetsɛ naa yi jemi babauu pe e we nɛ e ma nɛ ngɛ fɛu ɔ, ja a kɛ̃ nɛ Yesu na yi jemi pe Mose. 4 Nɛ nihi fuu ma nyɛ ma wehi, se Mawu ji nihi tsuo a bɔlɔ.

5 Mose tsu ni saminya ngɛ Mawu we ɔ, se sɔmɔlɔ kɛkɛ ji lɛ; nɛ nɔ́ nɛ e ni tsumi ɔ tsɔɔ pɔtɛɛ ji níhi nɛ maa ba hwɔɔ se ɔmɛ a he odase yemi. 6 Se Kristo nɛ ji Mawu Binyumu anɔkuale yelɔ ɔ lɛɛ, lɛ ji Mawu we ɔ nɔ hyɛlɔ kɛ pi si. Nɛ wɔ Kristo se nyɛɛli lɛɛ wɔ ji Mawu we, nɛ e hii wa mi, ke ji wa hɛɛ wa ka a mi kpɛii kɛ bua jɔmi, nɛ wa pɛtɛ wa hemi kɛ yemi ngɛ Nutsɔ ɔ mi ɔ he kɛ ya si nyagbe.

7,8 Akɛnɛ Kristo kle pe wɔ hluu he je ɔ, Mumi Klɔuklɔu ɔ deɔ wɔ ke, "Mwɔnɛ ɔ ke nyɛ nu e gbi ɔ, nyɛ ko wlua nyɛ tsui nɛ nyɛ tsɔ atuã kaa bɔ nɛ e ba mi ngɛ nga a nɔ ɔ, nɛ nyɛ tsɛ ɔmɛ wa a tsui, nɛ a tu munyu kɛ si lɛ benɛ e ngɛ mɛ kae ɔ. 9 Se Mawu to tsui si kɛ ha mɛ jeha nyingmi eywiɛ sɔuu; tse be ɔ, a ka lɛ. Se loloolo ɔ, e ya nɔ nɛ e tsu nyakpɛ ni nguahi kɛ ha mɛ nɛ a na. 10 Nɛ Mawu de ke, ‘Se i na a he abofu saminya, ejakaa be fɛɛ be ɔ a tsui be ye he, a tsui ngɛ ní kpahi a se nyɛɛe nɛ a laa blɔ. A nyɛɛ we blɔ ɔ nɛ i ngɛ hlae kaa a nyɛɛ nɔ ɔ nɔ.’

11 Kɛkɛ nɛ Mawu wo a he abofu nɛ e na a kɛ ka kita ke e be hae nɛ a ba e he jɔɔmi ɔ mi ligbi ko."

12 Nyɛɛ hyɛ nɛ e hi, anyɛmimɛ, nɛ nyɛ ko na yayami peemi tsui nɛ ma ha nɛ nyɛ be hee maa ye, nɛ nyɛ ma tsɔ kɛ je Mawu hɛ kalɔ ɔ he. 13 Se mohu nyɛɛ tu munyu kɛ tsɔɔ nyɛ bi daa ngɛ ni nɛ ɔmɛ a he, be nɛ ɔ mi nɛ be ngɛ kɛ ha nyɛ ɔ, bɔ nɛ pee nɛ yayami nɛ ko sisi nyɛ nɛ nyɛ wlua nyɛ tsui kɛ wo Mawu. 14 Ejakaa ke wa ye anɔkuale kɛ ya si nyagbe, nɛ wa ngɔ wa hɛ kɛ fɔ Mawu nɔ kaa bɔ nɛ wa pee kekle be mi nɛ wa plɛ Kristo se nyɛɛli ɔ, lɛɛ waa kɛ Kristo maa ye e ni ɔmɛ.

15 Be ɔ ji enɛ ɔ nɛ. Nyɛ hɛ nɛ ko je si womi ɔ nɔ ke, "Mwɔnɛ ɔ ke nyɛ nu e gbi ɔ, nyɛ ko wlua nyɛ tsui kaa bɔ nɛ Israel bi ɔmɛ pee be nɛ a tsɔ atuã ngɛ e hɛ mi ɔ."

16 Mɛnɔmɛ nɛ a nu Mawu gbi nɛ e kɛ mɛ ngɛ munyu tue se a tsɔ atuã a? Anɛ pi mɛ nihi nɛ Mose kpaka kɛ je Mizraim ɔ? 17 Nɛ mɛnɔmɛ nɛ a wo Mawu mi mi la jeha nyingmi eywiɛ sɔuu ɔ? Anɛ pi ni nɛ ɔmɛ nɔuu nɛ pee yayami, nɛ lɔ ɔ he je ɔ a gbo ngɛ nga a nɔ? 18 Nɛ mɛnɔmɛ nɛ Mawu kɛ ngɛ munyu ɔ tue benɛ e kã e he kita nɛ e de ke a be zugba nɛ e wo e bi ɔmɛ he si ɔ nɔ sue ligbi ko ɔ? Anɛ pi nihi kulaa nɛ bui lɛ tue ɔ nɛ e ngɛ dee? 19 Nɛ mɛni he je nɛ a nyɛ we zugba a nɔ nɛ a ya su ɔ? Ejakaa a he we lɛ yi.