1,2 O kai Maria nɔ nɛ kɛ nu je via pue Yesu nanehi a nɔ nɛ e kɛ e yi bwɔmi tsu a he ɔ lo? E nyɛminyumu nɛ a tsɛɛ lɛ Lazaro nɛ je Betania, he nɛ e kɛ Maria kɛ e nyɛmi Marta a ngɛ ɔ, ngɛ hiɔ nue. 3 Lɔ ɔ he je ɔ e nyɛmiyi ɔmɛ tsɔ nɛ a ya de Yesu ke, "Mawetsɛ, o huɛ nɛ o suɔ lɛ saminya a, e ngɛ gbenɔ muɔ nya."

4 Se benɛ Yesu nu enɛ ɔ, e de ke, "Tsa pi gbenɔ hiɔ nɛ e ngɛ nue se mohu bɔ nɛ pee nɛ a wo Mawu hɛ mi nyami, nɛ ami Mawu Bi ɔ hu ye hɛ mi nɛ ba nyami kɛ gu enɛ ɔ mi." 5 E ji anɔkuale kaa Yesu suɔ Marta kɛ Maria kɛ Lazaro sane mohu, se benɛ e nu Lazaro hiɔ ɔ he ɔ, 6 e yɛ amlɔ ɔ nɛ e ya hyɛ ha. Se e ye ligbi enyɔ sɔuu ngɛ he nɛ e ngɛ ɔ. 7 Ligbi enyɔ ɔ se loko e de kaseli ɔmɛ ke, "Nyɛ ha nɛ waa ho Yudea ya."

8 Se e kaseli ɔmɛ kplɛɛ we nɔ. A de lɛ ke, "Nutsɔ, be bɔɔ ko ji nɛ ɔ nɛ Yudea nikɔtɔma amɛ ngɛ Yuda a ka mo gbemi. Anɛ o yaa lejɛ ɔ ekohu lo?"

9 Se Yesu ha mɛ heto ke, "Ngmlɛfia nyɔngma kɛ enyɔ nɛ ngɛ je nanɛɛ mi, kɛ je mɔtu kɛ ya si gbɔkuɛ mi daa ligbi. Nɛ ke nɔ ko nyɛɛ ngɛ ngmlɛfia nɛ ɔmɛ a mi ɔ, e tɛ we nɔ, ejakaa je ɔ mi tɛ. 10 Nyɔ mi nɛ a tɛɔ nɔ, ejakaa diblii wo." 11 Kɛkɛ nɛ e de e kaseli ɔmɛ ke, "Wa huɛ Lazaro hwɔ mahe nɛ amlɔ nɛ ɔ i yaa nɛ ma ya tsiɛ lɛ."

12 Se e kaseli ɔmɛ susu kaa nɔ nɛ e ngɛ tsɔɔe ji Lazaro ngɛ e he jɔɔe, lɔ ɔ he je ɔ a de Yesu ke, "Enɛ ɔ tsɔɔ kaa e na he wami saii." 13 Se Yesu lɛɛ nɔ nɛ e ngɛ tsɔɔe ji Lazaro gbo.

14 Jehanɛ ɔ Yesu de mɛ paa ke, "Lazaro gbo. 15 Nɛ ngɛ nyɛ he je ɔ, e ngɔ ye nya kaa i be lejɛ ɔ, bɔ nɛ pee nɛ nyɛ he ye nɔ nyɛɛ ye. Nyɛɛ te si nɛ waa ho lejɛ ɔ ya." 16 Kɛkɛ nɛ Toma nɛ a tsɛɛ lɛ "Hawi" ɔ de e nyɛmimɛ kaseli ɔmɛ ke, "Nyɛ ha waa kɛ lɛ nɛ ya nɛ waa kɛ lɛ nɛ ya gbo."

17 Benɛ a ya su Betania a, a de mɛ ke Lazaro ye ligbi eywiɛ sɔuu ngɛ gbogboe muɔ ɔ mi momo. 18 Betania kɛ Yerusalem kpɛti kɛ we. 19 Ja a he je ɔ, Yuda nikɔtɔma amɛ fuu ba Betania nɛ a ba ye Marta kɛ Maria kɔmɔ ngɛ a nyɛmi ɔ gbenɔ ɔ he. 20 Benɛ Marta na kaa Yesu ma a, e ya kpee lɛ ngɛ blɔ ɔ nɔ, se Maria lɛɛ e tlɔ si ngɛ we ɔ mi.

21 Nɛ Marta de Yesu ke, "Mawetsɛ, a ke o ngɛ hiɛ ɔ jinɛ ye nyɛmi ɔ ko gbo we. 22 Se amlɔ nɛ ɔ hu be bi, ejakaa i le kaa Mawu maa kpale ye nyɛmi ɔ kɛ ba wami mi ke o bi lɛ."

23 Yesu de lɛ ke, "O nyɛminyumu ɔ maa te si kɛ ba wami mi ekohu."

24 Marta he nɔ ke, "I le kaa e maa te si ngɛ ni gbogboehi a si temi ligbi ɔ nɔ."

25 Se Yesu de lɛ ke, "Ami ji nɔ nɛ tleɔ ni gbogboehi si kɛ jee gbeje kɛ baa wami mi ɔ nɛ. Nɔ nɛ heɔ ye nɔ yeɔ ɔ, ke e gbo tete po ɔ, e ma na wami ekohu. 26 Nɛ nɔ tsuaa nɔ nɛ heɔ ye nɔ yeɔ ɔ, e be gboe gbleegbleegblee. Marta, o heɔ enɛ ɔ yeɔ lo?"

27 Marta he nɔ ke, "Ee, Mawetsɛ, i he ye kaa mo ji Mesia a, Mawu Bi nɛ wa ngɛ lɛ blɔ hyɛe ɔ nɛ."

28 Kɛkɛ nɛ Marta je lejɛ ɔ nɛ e ya tsɛ e nyɛmi Maria kɛ ba se nɛ e de lɛ ke, "Mawetsɛ ɔ ba hiɛ ɔ nɛ e ngɛ mo hlae." 29 Nɛ Maria te si amlɔ ɔ nɔuu nɛ e ba e ngɔ.

30 Jamɛ a be ɔ mi ɔ, Yesu sɛ we kɔpe ɔ mi. E ngɛ he nɛ Marta kɛ lɛ ba kpe ngɛ ɔ. 31 Benɛ Yuda nikɔtɔma amɛ nɛ ba ngɛ Maria kɔmɔ yee ɔ na lɛ nɛ e je kpo ɔ, a susu kaa e yaa nɛ e ya fo ya ngɛ he nɛ a pu e nyɛmi ɔ ngɛ ɔ. Lɔ ɔ he je ɔ, a fie e se.

32 Benɛ Maria ya su he nɛ Yesu ngɛ ɔ, e kpla si nɛ e nu e nane nɛ e de lɛ ke, "Mawetsɛ, a ke o ngɛ hiɛ ɔ jinɛ ye nyɛmi ɔ ko gbo we."

33 Benɛ Yesu na bɔ nɛ Maria ngɛ ya foe, nɛ Yuda nikɔtɔma amɛ hu ngɛ kɔmɔ yee kɛ piɛ e he ɔ, e kuɛ ngmɛ bɛ, 34 nɛ e bi mɛ ke, "Jije nɛ a pu lɛ ngɛ." Nɛ a de lɛ ke, "Mawetsɛ, ba nɛ o ba hyɛ." 35 Nɛ Yesu fo ya.

36 Nɛ Yuda nikɔtɔma amɛ de ke, "Huɛhi ji mɛ niinɛ. Hyɛ bɔ nɛ e suɔ lɛ ha?"

37 Se a ti ni komɛ hu de ke, "Nyumu nɛ ɔ nɛ tsa hɛ yuyuilɔ ɔ, mɛni he je e nyɛ we Lazaro nɛ e tsa?" 38 Yesu ye aywilɛho ngɛ e mi ekohu. Jehanɛ ɔ, a ba su yɔkɔ ɔ he. E ji tɛ muɔ nɛ a ngɔ tɛ agbo kɛ tsi nya.

39 Yesu de mɛ ke, "Nyɛ tsitsɛɛ tɛ ɔ kɛ ya se." Se Marta nɛ ji Lazaro nyɛmiyo ɔ de Yesu ke, "Mawetsɛ, be nɛ ɔ mi ɔ e maa sa, ejakaa e ye ligbi eywiɛ sɔuu."

40 Se Yesu bi lɛ ke, "Anɛ i de we mo ke ke o he ye ɔ, o maa na Mawu nyakpɛ okadi ko lo?"

41 Kɛkɛ nɛ a tsitsɛɛ tɛ ɔ kɛ ya se, nɛ Yesu wo e hɛ nɔ nɛ e de ke, "Tsaatsɛ, i naa mo si kaa o bu mi tue. 42 I le kaa o buɔ mi tue daa, se i ngɛ enɛ ɔ dee bɔ nɛ pee nɛ nihi nɛ ngɛ hiɛ ɔ nɛ a he ye kaa mo nɛ o tsɔ mi." 43 Kɛkɛ nɛ e hia ngmlaa nɛ e de ke, "Lazaro, moo je kpo!"

44 Amlɔ ɔ nɔuu nɛ Lazaro je kpo kɛ e he bo nɛ a kɛ pu lɛ ɔ, kɛ duku nɛ a kɛ fi e hɛ mi ɔ. Nɛ Yesu de mɛ ke, "Nyɛɛ pine ní ɔmɛ ha lɛ nɛ e ya."

45 Jehanɛ ɔ Yuda nikɔtɔma amɛ a ti nihi nɛ ba Maria kɔmɔ yemi ɔ, benɛ a na nɔ́ nɛ Yesu pee ɔ, a he e nɔ ye. 46 Se a ti ni komɛ je lejɛ ɔ nɛ a ya bɔ Farisi bi ɔmɛ amaniɛ.

47 Lɔ ɔ he je ɔ, osɔfo nikɔtɔma amɛ kɛ Farisi bi ɔmɛ tsɛ kpe nɛ a susu nɔ́ nɛ ngɛ nɔ yae ɔ he. Kɛkɛ nɛ a bi a he ke, "Kɛ wa ngɛ pee kɛɛ? Ejakaa nyumu nɛ ɔ ngɛ nyakpɛ nihi pee niinɛ. 48 Nɛ ke wa ngmɛ lɛ blɔ ɔ, ma a tsuo maa nyɛɛ e se, nɛ Roma soja amɛ ma ba gbe wɔ nɛ a maa ngɔ Yuda ma a."

49 Se a ti nɔ kake nɛ a tsɛ lɛ ke Kaiafa nɛ lɛ ji osɔfo ngua jamɛ a jeha a de mɛ ke, "Nyɛɛ ke nyɛ li nɔ́ ko kulaa. 50 Anɛ nyɛ susuu we kaa e sa nɛ nɔ kake nɛ gbo ngɛ ma a nane mi pe nɛ ma a tsuo hɛ mi ma kpata lo?"

51 A gba momo kaa Yesu ma gbo ngɛ ma a nane mi. Lɔ ɔ he je ɔ pi Kaiafa nitsɛ e yi mi tomi munyu nɛ e tu ɔ, se mohu a kɛ wo e nya nɛ e de, akɛnɛ lɛ ji Osɔfo Nɔkɔtɔma ngɛ jamɛ a be ɔ mi ɔ. 52 Nɛ si womi ɔ tsɔɔ kaa tsa pi Israel bi kɛkɛ nɛ Yesu ma gbo ha, se mohu e ma gbo bɔ nɛ pee nɛ e bua Mawu bimɛ nɛ gbɛ wo je ɔ mi tsuo nya. 53 Ja a he je ɔ, Yuda nikɔtɔma amɛ bɔni Yesu gbemi he ga tomi.

54 Enɛ ɔ ha Yesu jɔɔ fiɛmi paa ngɛ Yuda bi ɔmɛ a kpɛti nɛ e si Yerusalem kɛ ba Efraim nga a nya kɔpe ko mi, nɛ e kɛ e kaseli ɔmɛ ba hi lejɛ ɔ.

55 Jamɛ a be ɔ mi ɔ, Yuda bi ɔmɛ a Hebemi jeha yemi ɔ su ta. Nɛ lɔ ɔ he je ɔ nihi fuu je kɔpekɔpe ɔmɛ a mi kɛ ba Yerusalem nɛ a ba tsukɔ a he loko Hebemi Ligbi ɔ nɛ su. 56 Nɔ tsuaa nɔ ngɛ Yesu hlae nɛ e na. Nɛ benɛ a ngɛ sieku yee ngɛ Sɔlemi We ɔ, a bi a he ke, "Anɛ e maa ba Hebemi kaimi ɔ lo?" 57 Se jamɛ a be ɔ mi ɔ, osɔfo nikɔtɔma amɛ kɛ Farisi bi ɔmɛ ha lemi kaa ke nɔ ko na Yesu ɔ, e ha nɛ a le nɔuu konɛ a ya nu lɛ.