1 Benɛ Yesu yaa a, e na nyumu ko nɛ e hɛ yu kɛ je e fɔmi mi. 2 Kɛkɛ nɛ e kaseli ɔmɛ bi lɛ ke, "Mawetsɛ, mɛni he je nɛ a fɔ nyumu nɛ ɔ hɛ yuyuilɔ ɔ? Anɛ lɛ nitsɛ nɛ e pee yayami aloo e fɔli a yayami nɛ a pee he je i?"

3 Yesu ha mɛ heto ke; "Tsa pi a ti nɔ ko nɛ pee yayami ko, se mohu e ba mi ja bɔ nɛ pee nɛ a je Mawu he wami ɔ kpo kɛ tsɔɔ. 4 E sa nɛ wɔ tsuo waa gbe ni tsumi nɛ nɔ nɛ tsɔ mi ɔ ha wɔ ɔ nya mla, ejakaa e piɛ bɔɔ nɛ du ma bu nɛ a be ni tsue hu. 5 Se be abɔ nɛ i ngɛ je nɛ ɔ mi ɔ, je ɔ kane ji mi."

6 Kɛkɛ nɛ Yesu la lada kɛ pue si nɛ e ngɔ kɛ pɔtɔ zu nɛ e kɛ kpa nyumu ɔ hɛ ngmɛ ɔmɛ a nɔ; 7 nɛ e de lɛ ke, "Yaa nɛ o ya du o he ngɛ Siloam Taku ɔ mi," nɛ Siloam sisi ji nɔ nɛ a tsɔ lɛ. Nyumu ɔ ho ya du ngɛ taku ɔ mi nɛ e kpale kɛ ba nɛ e bɔni nɔ hyɛmi.

8 Se e huɛmɛ kɛ nihi nɛ le lɛ kaa hɛ yuyuilɔ kɛ ni balɔ ɔ, bi a he ke, "Anɛ tsa pi nɔmlɔ ɔ nɛ baa ni ɔ ji nɛ ɔ lo?" 9 Nɛ ni komɛ de ke lɛ i, ni komɛ hu ke tsa pi lɛ i. Nɛ a susu ke, "E be nyɛe maa pee lɛ nɔuu i. Se mohu e je jamɛ a ni balɔ ɔ nɛ hyɛ we nɔ́ ɔ." Kɛkɛ nɛ nyumu ɔ nitsɛ de mɛ ke, "Ami nɔuu i."

10 A bi lɛ bɔ nɛ e ba ha nɛ e bɔni nɔ́ hyɛmi.

11 Nɛ e de mɛ ke, "Nyumu ko nɛ a tsɛɛ lɛ ke Yesu ɔ nɛ pɔtɔ zu nɛ e kɛ kpa ye hɛ ngmɛ ɔmɛ a nɔ ha mi nɛ e de mi ke ma ho nɛ ma ya du ye he ngɛ Siloam Taku ɔ mi. I ye e gbi ɔ nɔ, nɛ i bɔni nɔ hyɛmi."

12 Nɛ a bi lɛ ke, "Jije e ngɛ amlɔ nɛ ɔ?" E de mɛ ke, "I li."

13 Kɛkɛ nɛ a kpaka lɛ kɛ ho Farisi bi ɔmɛ a ngɔ ya. 14 Se Hejɔɔmi Ligbi ɔ nɔ nɛ Yesu tsu ni nɛ ɔ ngɛ. 15 Jehanɛ ɔ, Farisi bi ɔmɛ kpale bi lɛ bɔ nɛ e ba ha loko e bɔni nɔ́ hyɛmi ɔ. Nɛ e bɔ mɛ bɔ nɛ Yesu ngɔ mɔsɔ ɔ kɛ kpa e hɛ ngmɛ ɔmɛ a nɔ kɛ bɔ nɛ e ha e ya du nɛ e bɔni nɔ hyɛmi ɔ.

16 Nɛ a ti ni komɛ de ke, "Kikɛmɛ a Yesu nɛ ɔ, lɛɛ tsa pi Mawu ngɔ nɛ e je mɔ, ejakaa e yi Hejɔɔmi Ligbi ɔ nɔ." A ti ni komɛ hu de ke, "Anɛ yayami peelɔ ko ma nyɛ tsu nyakpɛ ni tsumi kaa enɛ ɔ lo?" Enɛ ɔ ha nɛ mi gbami ba a kpɛti. 17 Jehanɛ ɔ, Farisi bi ɔmɛ bi nyumu nɔ nɛ a tsa lɛ ɔ ke, "Mo nɛɛ, nɔmlɔ nɛ bli o hɛ ngmɛ ɔmɛ ɔ, mɛnɔ ji lɛ?" E ha mɛ heto ke, "E peeɔ mi kaa Mawu gbalɔ ji lɛ."

18 Yuda nikɔtɔma amɛ he we lɛ yi. Lɔ ɔ he je ɔ a ya tsɛ e fɔli kɛ ba; 19 nɛ a ba bi mɛ ke, "Nyɛ binyumu ɔ ji nɛ ɔ lo? Anɛ pi hɛ yuyuilɔ ji lɛ nɛ nyɛ fɔ lo? Ke ja a, lɛɛ mɛni ba loko jehanɛ ɔ e bɔni nɔ hyɛmi ɔ?"

20 E fɔli ɔmɛ ha mɛ heto ke, "Wa le kaa wa binyumu ɔ ji nɛ ɔ nɛ, nɛ wa fɔ lɛ hɛ yuyuilɔ, 21 se wali nɔ nɛ ba nɛ e bɔni nɔ́ hyɛmi, nɛ wa li nɔ nɛ bli e hɛ ngmɛ ɔmɛ hulɔ. E wa, nɛ e le munyu tumi. Nyɛ bi lɛ nitsɛ."

22,23 Gbeye yemi nya nɛ fɔli ɔmɛ de Yuda nikɔtɔma amɛ enɛ ɔ ngɛ, ejakaa a ha nɛ a le kaa nɔ nɛ ma de ke Kristo ɔ ji Mesia a, a maa fie lɛ kɛ je asafo ɔ mi.

24 Lɔ ɔ he je ɔ, Farisi bi ɔmɛ tsɛ nyumu ɔ nɛ a tsa lɛ ɔ ekohu nɛ a de lɛ ke, "Mo wo hɛ mi nyami ɔ kɛ ha Mawu. Mo ko wo kɛ ha Yesu, ejakaa wa le Yesu ɔ kaa yayami peelɔ ji lɛ."

25 Se nyumu ɔ de mɛ ke, "Ami lɛɛ i li kaa kpakpa loo yayami peelɔ ji lɛ. Nɔ nɛ pɛ nɛ i le ji, i hyɛ we nɔ́ kɛ je ye fɔmi be mi, se amlɔ nɛ ɔ, i ngɛ nɔ́ hyɛe."

26 Nɛ a bi lɛ ekohu ke, "Mɛni e pee? Kɛ e pee kɛ bli o hɛ ngmɛ ɔmɛ kɛɛ?" 27 E ha mɛ heto ke, "Ei! I de nyɛ mo nɛ nyɛ bui tue. Mɛni nyɛ ngɛ hlae nɛ ma de nyɛ ekohu? Anɛ nyɛ ngɛ hlae nɛ nyɛ hu nyɛ plɛ e se nyɛɛli lo?"

28 Se a jɛ lɛ nɛ a de ke, "Mo ji e se nyɛɛlɔ, wɔɔ lɛɛ Mose se nyɛɛli ji wɔ. 29 Wa le kaa Mawu kɛ Mose tu munyu, se nɔmlɔ nɛ ɔ lɛɛ wa li e he nɔ́ ko."

30 Nyumu ɔ de mɛ ke, "Ei! E ngɛ nyakpɛ kaa nyɛ li e he nɔ́ ko. E nyɛɛ tsaa hɛ yuyuili, nɛ nyɛ ke nyɛ li e he nɔ́ ko! 31 Mawu bui yayami peeli tue, se e buɔ nihi nɛ jaa lɛ, nɛ a peeɔ e suɔmi nya ni ɔ tue. 32 Kɛ je benɛ a bɔ je ɔ, a nui kaa nɔ ko nyɛ nɛ e tsa nɔ ko nɛ e hɛ yu kɛ je e fɔmi mi gblee. 33 Ke pi Mawu ngɔ nɛ nyumu nɛ ɔ je ɔ, e be nyɛe kikɛmɛ a ni nɛ ɔ ma tsu."

34 A hwɔ e yi nɛ a de ke, "Mo nɛ a fɔ ngɛ yayami mi ɔ, mo nɛ o ngɛ wɔ ni tsɔɔe nɛ ɔ?" Kɛkɛ nɛ a fie lɛ kɛ je lejɛ ɔ.

35 Benɛ Yesu nu nɔ́ nɛ ɔ he nɛ e na nyumu ɔ, e bi lɛ ke, "Anɛ o heɔ Nɔmlɔ Bi ɔ nɔ yeɔ lo?"

36 Nyumu ɔ he nɔ ke, "Mawetsɛ, mɛnɔ ji lɛ, ejakaa i ngɛ hlae nɛ ma he e nɔ ma ye."

37 Yesu de lɛ ke, "O na lɛ, nɛ lɛ ji nɔ nɛ kɛ mo ngɛ munyu tue ɔ nɛ."

38 Kɛkɛ nɛ nyumu ɔ de lɛ ke, "Mawetsɛ, i he ye." Nɛ e kpla si nɛ e ja lɛ.

39 Nɛ Yesu de lɛ ke, "I ba je ɔ mi konɛ ni nɛmɛ nɛ hyɛ we nɔ́ ngɛ mumi blɔ fa mi ɔ, a hyɛ nɔ, nɛ ma tsɔɔ ni nɛmɛ nɛ susuu kaa a ngɛ nɔ́ hyɛe ɔ kaa hɛ yuyuili ji mɛ."

40 Farisi bi ɔmɛ nɛ ngɛ lejɛ ɔ, a ti ni komɛ bi lɛ ke, "Anɛ o ngɛ dee ke wɔ hu wa hɛ yu lo?"

41 Yesu de mɛ ke, "A ke nyɛ hɛ yu jinɛ nyɛ be fɔ yee. Se nyɛ fɔ yemi ɔ ngɛ kɛ sa, ejakaa nyɛ deɔ ke nyɛ le nɔ́ nɛ nyɛ ngɛ pee ɔ."