1 Benɛ a ya su Betfage kɛ Betania ngɛ Nuyoku ɔ he, nɛ a maa ho Yerusalem sumi ya a, Yesu tsɛ e kaseli ɔmɛ a ti ni enyɔ nɛ e tsɔ mɛ.

2 E de mɛ ke, "Nyɛɛ ya kɔpe nɛ ngɛ wa hɛ mi nɛ ɔ mi. Nɛ ke nyɛ maa ho kɔpe ɔ mi sɛmi ya pɛ nyɛ maa na teji bi ko nɛ a muɔ lɛ si nɛ nɔ ko hi e nɔ hyɛ. Nyɛɛ pine lɛ nɛ nyɛ kpaka lɛ kɛ ba ha mi ngɛ hiɛmɛ nɛ ɔ. 3 Nɛ ke nɔ ko bi nyɛ nɔ́ nɛ he je nɛ nyɛ ngɛ lohwe ɔ pinee ngɛ ɔ, nyɛ de lɛ ke, ‘E he hia wa Nutsɔ ɔ; nɛ e be kɛe nɛ e maa kpale lɛ kɛ ba.’ "

4 Nɔuu nɛ tsɔli ɔmɛ ho nɛ a ya na teji bi ɔ nɛ a muɔ lɛ si ngɛ blɔ he ngɛ agbo ko nya. Nɛ benɛ a bɔni lɛ pinemi ɔ, 5 ni komɛ nɛ daa si ngɛ lejɛ ɔ bi mɛ ke, "Mɛni he je nɛ nyɛ ngɛ lohwe ɔ pinee?"

6 A ha mɛ heto kaa bɔ nɛ Yesu de mɛ ke a de ɔ, kɛkɛ nɛ ni ɔmɛ de we nɔ́ ko hu.

7 A kpaka lohwe ɔ kɛ ba ha Yesu nɛ a je a yi nɔ tade ɔmɛ ngɔ ha e nɔ nɛ Yesu ho hi si ngɛ nɔ. 8 Kɛkɛ nɛ ni komɛ hu wo a tadehi ngɔ ngmɛ pue blɔ ɔ nɔ; nɛ ni komɛ hu ku bahi kɛ je pu ɔmɛ a mi ngɔ pue blɔ ɔ nɔ.

9 E nyɛɛ ni ɔmɛ a kpɛti kɛ yaa, ni fa ngɛ e hlami nɛ ni fa hu ngɛ e se nɛ a ngɛ ngmlaa kpae ngɛ dee ke, "Hosiana! A jɔɔ nɔ nɛ ma ngɛ Nutsɔ ɔ biɛ mi ɔ. 10 Mawu nɛ gbaa wa tsɛ David matsɛ yemi ɔ nɛ kpale kɛ ma a. A gbaa je ɔ tsuo Matsɛ ɔ! Hosiana ngɛ hiɔwe plooplo!"

11 Bɔ nɛ Yesu plɛ kɛ ya se Yerusalem ji nɛ ɔ nɛ. Nɛ e be kɛ ho Sɔlemi We ɔ ya. E po he nɛ e hyɛ we ɔ mi kulaa kɛ kpe. Se jamɛ a be ɔ mi ɔ, je maa ho jɔmi ya, nɛ lɔ ɔ he je ɔ e tsɛ e kaseli ɔmɛ nɛ a kpale kɛ ho Betania ya. 12 E nɔ jena benɛ a kpale kɛ je Betania kɛ ma a, hwɔ ngɛ lɛ yee. 13 Nɛ e na tso ko kaa mangoo tso ɔ jee ngɛ a hɛ mi kɛ e yi ba fuu. Nɛ e ho ya hyɛ ha kaa e wo lo. Se e ya nɛ yiblii kake po ngɛ tso ɔ nɔ, ejakaa tsa pi yiblii womi lebe i.

14 Yesu hyɛ tso ɔ nɛ e de lɛ ke, "Mo, o be yiblii ko woe hu kɛ je mwɔnɛ ɔ kɛ yaa!" Nɛ e kaseli ɔmɛ nu nɔ́ nɛ e de nɛ ɔ.

15 Benɛ a kpale kɛ ba Yerusalem ɔ, e pue nɔ kɛ ho Sɔlemi We ɔ ya. Nɛ benɛ e ya sɛ Sɔlemi We ɔ pɛ nɛ e bɔni ni juali ɔmɛ kɛ sika tsakeli ɔmɛ fiemi ngɛ lejɛ ɔ. E tsitsɛɛ ni juali ɔmɛ kɛ obleku lahuɛ juali ɔmɛ a okplɔɔ ɔmɛ kɛ sɛ ɔmɛ kɛ gba amɛ ngɔ pue si. 16 Nɛ e ngmɛ we blɔ kaa nɔ ko nɛ e tloo nɔ jua nɔ ko kɛ ba Sɔlemi We ɔ.

17 E ka ni ɔmɛ a hɛ mi nɛ e de ke, "A ngma ke, ‘Ye We ɔ maa pee sɔlemi he kɛ ha je ɔ tsuo.’ Se nyɛɛ lɛɛ nyɛ plɛ lɛ ngɔ pee ojo fiali a laami he."

18 Nɛ benɛ asafo nya dali ɔmɛ kɛ mlaa tsɔɔli ɔmɛ nu nɔ́ nɛ Yesu pee ɔ he ɔ, a bɔni e he ga hlami nɛ a kpata e hɛ mi. Se a ngɛ ni ɔmɛ gbeye yee kaa ke a gbe lɛ ɔ, gidigidi maa ba ma a mi, ejakaa Yesu ni tsɔɔmi ɔmɛ sa a hɛ mi.

19 Jamɛ a gbɔkuɛ ɔ nɔuu ɔ, Yesu kɛ e kaseli ɔmɛ si ma a mi. 20 E nɔ jena mɔtu benɛ a bee ɔ, a na tso ɔ nɛ e gbiɛ ɔ kaa e gbo kɛ je zu mi tɔɔ. 21 Kɛkɛ nɛ Petro kai nɔ́ nɛ Yesu de tso ɔ hiɛ ɔ, nɛ e kpa ngmlaa nɛ e de ke, "Tsɔɔlɔ, moo hyɛ, tso ɔ nɛ o gbiɛ ɔ gbo!"

22 Yesu ha heto nɛ e de mɛ ke, "Nyɛ he Mawu nɔ nyɛɛ ye. 23 I ngɛ nyɛ dee anɔkuale mi ke, mo nɔ nɛ o ma de yoku nɛ ɔ ke, ‘Hiaa nɛ o ya nɔ wo mi,’ nɛ o ji he nguane ngɛ o yi mi se mohu o he ye ɔ, yoku ɔ maa hia ya nɔ wo ɔ mi ngɛ o demi ɔ nya. 24 Enɛ ɔ he je ɔ, i ngɛ nyɛ dee ke, ke nyɛ sɔle nɛ nyɛ bi nɔ́ ko ɔ, nyɛ he ye kaa nyɛ nine maa su nɔ, nɛ a ma ha nyɛ nɔ́ nɛ nyɛ bi ɔ. 25 Se mohu loko ji nyɛ maa sɔle ɔ, nyɛɛ hyɛ nɛ ke nɔ ko pee nyɛ yayami ko nɛ nyɛ ngɔ to nyɛ tsui mi ɔ, nyɛ ngɔ ke lɛ bɔ nɛ pee nɛ nyɛ Tsɛ nɛ ngɛ hiɔwe ɔ nɛ e wo nyɛ hu nyɛ tɔmi ɔmɛ tsuo ngɔ ke nyɛ. 26 Nɛ ke nyɛ wo we nihi a yayami nɛ a pee nyɛ ɔ ngɔ ki mɛ ɔ, nyɛ Tsɛ nɛ ngɛ hiɔwe ɔ hu be nyɛ tɔmi ɔmɛ woe ngɔ ke nyɛ."

27 Ní nɛ ɔmɛ a se ɔ, a ba su Yerusalem nɛ benɛ e ngɛ nyɛɛe ngɛ Sɔlemi We ɔ, asafo nya dali ɔmɛ kɛ mlaa tsɔɔli ɔmɛ kɛ ma mi nikɔtɔma amɛ ba na lɛ. 28 Nɛ a bi lɛ ke, "Mɛni he blɔ o ngɛ nɛ o ngɛ níhi nɛ o ngɛ pee ɔmɛ pee? Mɛnɔ ha mo jamɛ a he blɔ ɔ?"

29 Yesu ha mɛ heto nɛ e de ke, "Ma bi nyɛ munyu kake, nɛ ke nyɛ ha mi heto ɔ, ami hu i ma tsɔɔ nyɛ nɔ́ he blɔ nɛ i ngɛ nɛ i kɛ ngɛ ni nɛ ɔmɛ tsue. 30 He blɔ kɛ he wami nɛ Yohane Baptisilɔ ɔ kɛ ngɛ nihi baptisie ɔ, anɛ Nɔmlɔ dɛ mi nɛ e je aloo Mawu dɛ mi i?"

31 Kɛkɛ nɛ a bɔni a he kojomi. A bi a he ke, "Ke wa de ke Mawu ngɔ nɛ he blɔ ɔ je ɔ, e ma bi wɔ ke, ‘Lɛɛ mɛni he je nɛ nyɛ he we Yohane yi mɔ?’ 32 Nɛ ke wa de ke nɔmlɔ ngɔ nɛ he blɔ ɔ je hu, kɛkɛ lɛɛ gidigidi maa te si." Ejakaa ma a he ye kaa Mawu ngɔ nɛ Yohane he wami ɔ je.

33 Lɔ ɔ he je ɔ, a ha heto nɛ a de ke, "Wa li." Yesu hu de mɛ ke, "Lɛɛ ami hu i be nyɛ he blɔ nɛ i ngɛ kɛ ngɛ nɔ́ nɛ ɔmɛ tsue ɔ tsɔɔe!"