1 Anyɛmimɛ suɔli, nɔ nɛ ye tsui ngɛ hlae nɛ i ngɛ sɔlee ngɛ he ji kaa a he Yuda bi ɔmɛ a yi wami. 2 I le kaa a hɛ dɔɔ ngɛ Mawu hɛ mi nyami he mohu, se a gui blɔ nɛ sa a nɔ. 3 Ejakaa a li kaa a kɛ Mawu kpɛti dlami he je nɛ Kristo ba gbo ngɛ. Se mohu a dii mɛ nitsɛmɛ a dami se, bɔ nɛ pee nɛ a sa Mawu hɛ mi, nɛ lɔ ɔ he je nɛ a yeɔ Yuda bi ɔmɛ a mlaa amɛ kɛ kusumi ɔmɛ a nɔ ɔ nɛ, se tsa pi Mawu yi wami hemi blɔ ɔ ji lɔ ɔ. 4 A nui sisi kaa Kristo haa nihi nɛ heɔ e nɔ yeɔ ɔ níhi kulaa nɛ a ngɛ hlae nɛ a nine nɛ su nɔ ngɛ mlaa a nɔ yemi mi ɔ. Lɛ ji nɔ́ fɛɛ nɔ nyagbe.

5 Ejakaa Mose ngma ke loko a ma wo nɔ ko e he yayami ngɔ ke lɛ nɛ a ma he e yi wami ɔ, ja e da kɛ pi si nɛ e ye ka fɛɛ ka nɔ kunimi, nɛ e pee we yayami ko kulaa ngɛ e wami mi. 6 Se yi wami hemi nɛ a naa ngɛ hemi kɛ yemi mi ɔ de ke, "E he hia we kaa o ya hla Kristo ngɛ hiɔwe nɛ e kple si nɛ e ba ye kɛ bua mo," nɛ 7 "E he hia we kaa o ya gbeje nɛ o ya ngɔ Kristo kɛ ba wami mi ekohu."

8 Ejakaa yi wami hemi nɛ a naa ngɛ Kristo nɔ hemi kɛ yemi mi ɔ, nɛ e he munyu ji nɔ́ nɛ wa ngɛ fiɛe ha nyɛ ɔ, e ngɛ wa ti nɔ tsuaa nɔ kasa nya haa; lɔ ɔ ji kaa e su wa he haa kaa bɔ nɛ wɔ nitsɛmɛ wa tsuihi kɛ wa nyahi ngɛ ɔ. 9 Ejakaa ke o kɛ o nya de ni kpahi ke Yesu Kristo ji o Nutsɔ, nɛ o he ye ngɛ o tsui mi kaa Mawu tle lɛ si kɛ je gbeje ɔ, a ma he o yi wami. 10 Ejakaa adesa tsui nɛ e kɛ heɔ yeɔ ɔ ji nɔ́ nɛ dlaa e kɛ Mawu a kpɛti; nɛ e nya nɛ e kɛ jajeɔ e hemi kɛ yemi ɔ maa e yi wami hemi ɔ nɔ mi. 11 Ejakaa Ngmami ɔmɛ deɔ wɔ ke nɔ tsuaa nɔ nɛ heɔ Kristo nɔ yeɔ ɔ, zo be lɛ gbee. 12 Ngɛ enɛ ɔ blɔ fa mi ɔ, slɔɔto ko be Yuda no kɛ ma je no a kpɛti; ejakaa mɛ tsuo kulaa Nutsɔ kake nɛ a ngɛ, nɛ lɛ nɔuu hu ji niatsɛ kɛ ha nihi tsuo nɛ biɔ lɛ nɔ́ ɔ. 13 Ejakaa nɔ tsuaa nɔ nɛ tsɛɔ Nutsɔ ɔ biɛ ɔ, a ma he e yi wami.

14 Se kɛ a maa pee kɛ bi lɛ nɛ e he a yi wami kɛɛ, ke a he we e nɔ yi? Nɛ kɛ a maa pee kɛ he e nɔ ye kɛɛ, ke a nui e he munyu ko? Nɛ jehanɛ ɔ hu, kɛ a maa pee kɛɛ nɛ a maa nu e he munyu ko ke fiɛlɔ ko fiɛ we ha mɛ? 15 Aloo kɛ maa pee kɛɛ nɛ nɔ ko maa fiɛ kɛ ha mɛ ke nɔ ko tsɔ we lɛ? Nɛ lɔ ɔ ji nɔ́ nɛ Ngmami ɔmɛ ngɛ dee ke, "Nyɛɛ hyɛ bɔ nɛ nihi nɛ fiɛɔ Mawu he jɔmi Manye Munyu ɔ, nɛ a kɛ nɔ́ kpakpahi a he bua jɔmi sanehi ba haa wɔ ɔ, a nanehi ngɛ fɛu ha" a nɛ. E sisi ji, nyɛɛ hyɛ bɔ nɛ a nyaa nihi nɛ fiɛɔ Mawu Manye Munyu ɔ a he ha.

16 Se mohu tsa pi nɔ tsuaa nɔ nɛ bu Manye Munyu ɔ tue ɔ nɛ nya he, ejakaa Gbalɔ Yesaia de ke, "Nutsɔ, mɛnɔ he mi ye benɛ i de mɛ ɔ?" 17 Se kɛ ɔ, he nɛ a naa hemi kɛ yemi ɔ kɛ jee ji Manye Munyu ɔ nɛ ji Kristo he Manye Munyu ɔ tue bumi mi.

18 Se Yuda bi ɔmɛ lɛɛ nɛɛ, anɛ a nu Mawu Munyu ɔ lo? Ee, a nu, ejakaa Manye Munyu ɔ pɛ ngɛ he fɛɛ he nɛ a ngɛ ɔ, nɛ a fiɛ kɛ ya su je ɔ mi nyagbe hehi kulaa. 19 Anɛ a nu Munyu ɔ sisi lo, kaa Mawu maa ngɔ e yi wami hemi ɔ kɛ ha ni kpahi ke a kua ke a be ngɔe ɔ? Ee, ejakaa Mawu de ngɛ Mose be ɔ mi tɔɔ ke, e ma ha nɛ e bi ɔmɛ maa je hunga, ejakaa e maa ngɔ e yi wami hemi ɔ kɛ ha kuasia wɔ jali a ma amɛ konɛ e kɛ ha nɛ a hɛ nɛ tsiɛ. 20 Pee se ɔ, Yesaia hu de kɛ kã ke nihi nɛ hla we Mawu se blɔ ɔ, mɛ mohu nɛ a maa na lɛ. 21 Se loloolo ɔ, e ngɛ nine fɔe kɛ ngɛ Yuda bi ɔmɛ tsɛe, se akɛnɛ a ji kuɛ mi tili he je ɔ, a kua e ngɔ bami.