1 Lɔ ɔ he je ɔ, jehanɛ ɔ lɛɛ fɔ bumi ko be kɛ ha Yesu Kristo se nyɛɛli ɔmɛ hu. 2 Ejakaa Mumi ɔ he wami nɛ ngɛ Kristo mi, nɛ haa nɔ neneene wami ɔ, kpɔ mi kɛ je yayami kɛ gbenɔ dɛ mi. 3 Tsa pi Mawu kita amɛ a nɔ yemi he je nɛ a he wa yi wami ngɛ, ejakaa wa nyɛ we a nɔ nɛ waa ye. Se mohu Mawu gu blɔ kpa nɔ kɛ kpɔ wɔ kɛ je yayami dɛ mi. Lɔ ɔ ji kaa e tsɔ lɛ nitsɛ e Bi kɛ ba ngɛ he lo su nɛ yayami be mi, nɛ e kɛ e he ba sã bɔ kɛ kpata yayami he wami nɛ e ngɛ ngɛ wa nɔ ɔ hɛ mi. 4 Mawu tsu kikɛmɛ a ni nɛ ɔ ha wɔ konɛ waa ye e mlaa amɛ a nɔ kɛ gu Mumi Klɔuklɔu ɔ se nyɛɛmi mi, nɛ wa ko bu yayami su momo ɔ nɛ ngɛ wa mi ɔ tue hu.

5 Nihi nɛ a he lo ɔ yeɔ a nɔ matsɛ ɔ, a peeɔ he lo ɔ suɔmi nya ni, se nihi nɛ nyɛɛ Mumi Klɔuklɔu ɔ se ɔ, a tsuɔ Mawu bua nɔ ni tsumi. 6 Mumi Klɔuklɔu ɔ se nyɛɛmi kɛ wami kɛ he jɔmi baa. Se he lo ɔ se dimi woɔ nɔ kɛ yaa gbenɔ mi. 7 Ejakaa yayami su momo ɔ nɛ ngɛ wa mi ɔ e kɛ Mawu yi. E bui Mawu mlaa amɛ tue, nɛ e be mɛ bue gblee. 8 Enɛ ɔ he je nɛ nihi nɛ dii he lo se ɔ, a be Mawu hɛ mi nyɛe maa sa a nɛ.

9 Se nyɛɛ lɛɛ he lo ɔ yi nyɛ nɔ; nɛ ke Mumi Klɔuklɔu ɔ ngɛ nyɛ mi ɔ; lɛ nɛ e ngɛ nyɛ kpakae. Nɛ nyɛ kai kaa nɔ nɛ Kristo Mumi ɔ be e mi ɔ, jamɛ a nɔ ɔ pi Kristo se nyɛɛlɔ kulaa. 10 E ngɛ mi kaa Kristo ngɛ nyɛ mi mohu se nyɛ nɔmlɔ tso ɔ ma gbo ngɛ yayami he je; se nyɛ mumi ɔ lɛɛ e ngɛ neneene wami, ejakaa Kristo dla nyɛɛ kɛ Mawu kpɛti. 11 Nɛ ke Mawu Mumi nɛ tle Yesu si kɛ je gbeje ɔ ngɛ nyɛ mi ɔ, e ma ha nyɛ nɔmlɔ tso ɔmɛ nɛ ma gbo ɔ yi ma na wami ekohu kɛ gu Mumi Klɔuklɔu ɔ nɛ ngɛ nyɛ mi ɔ nɔuu nɔ.

12 Lɔ ɔ he je ɔ, anyɛmimɛ suɔli, wa yi wa yayami peemi su momo ɔ hiɔ, nɛ e be wa nɔ he wami nɛ e nyɛɛ wa nɔ nɛ wa peeɔ e suɔmi nya ni. 13 Ke nyɛ di he lo ɔ se ɔ, nyɛ yi be wami nae; se ke nyɛ nyɛɛ Mumi Klɔuklɔu ɔ he wami se ɔ, e ma kpata he lo ɔ kɛ e yayami ni ɔmɛ a hɛ mi, nɛ nyɛ yi ma na wami. 14 Ejakaa nihi nɛ Mawu Mumi ɔ kpakaa mɛ ɔ, mɛ ji Mawu bimɛ.

15 Lɔ ɔ he je ɔ, e sɛ nɛ waa ye gbeye kaa nyɔguɛhi, se mohu waa pee wa he kaa Mawu bimɛ nɛ a he kɛ wo e weku ɔ mi nɛ a hii lɛ tsɛe "Tsaatsɛ, Tsaatsɛ!" ɔ. 16 Ejakaa e Mumi Klɔuklɔu ɔ deɔ wɔ ngɛ wa tsui mi ke Mawu bimɛ ji wɔ. 17 Akɛnɛ wa ji e bimɛ he je ɔ, wa nine maa su e weto ni ɔmɛ a nɔ, nɛ nihi nɛ e kɛ ha e Bi Yesu ɔ, piɔ nɛ ɔ, a peeɔ wɔ hu wa níhi. Se ke wa nine maa su e anunyami ɔ nɔ ɔ, lɛɛ e nɔ nami ɔ hu maa sa wa he.

18 Se anunyami nɛ e ma ha wɔ hwɔɔ se ɔ, e hiɛ hluu pe nɔ́ nami mi nɛ wa ngɛ piɔ ɔ. 19 Nɛ adebɔ kulaa ngɛ e bi ɔmɛ a kpo jemi ɔ blɔ hyɛe kɛ tsui si tomi. 20 Ngɛ jamɛ a ligbi ɔ nɔ ɔ, adebɔ níhi tsuo nɛ ngɛ yakayaka níhi a sisi nɛ pi mɛ nitsɛmɛ a suɔmi nya a, se ngɛ Mawu suɔmi nya a, a maa laa. 21 Nɛ adebɔ ni ɔmɛ nɛ bɔle wɔ kɛ kpe ɔ hu ma na anunyami he yemi kɛ je yayami mi kaa Mawu bi ɔmɛ.

22 Ejakaa wa le kaa adebɔ níhi kulaa ngɛ piie nɛ a ngɛ nɔ́ nae kɛ ba si piɔ. 23 Tsa pi mɛ kɛkɛ, se wɔ Kristo se nyɛɛli tete, wɔ nihi nɛ wa na Mumi Klɔuklɔu ɔ ngɛ wa mi ɔ, wa kɛmɛɛ nɛ wa hii blɔ hyɛe nɛ a je wɔ kɛ je wa piimi kɛ nɔ́ nami ɔmɛ a mi. Nɛ wɔ hu wa ngɛ be nɛ Mawu to nɛ e ma kpɔ e bi ɔmɛ kɛ je nɔ́ nami kɛ amanehlu mi, nɛ e ma ha mɛ nɔmlɔ tso he nɛ be hiɔ nue, nɛ be gboe gbleegbleegblee ɔ blɔ hyɛe.

24 Hɛ kɛ nɔ fɔmi he je nɛ a he wa yi wami ngɛ. Hɛ kɛ nɔ fɔmi tsɔɔ kaa wa ngɛ nɔ́ ko nɛ wa nine sui nɔ lolo ɔ blɔ hyɛe, ejakaa ke nɔ ko nine su nɔ́ ko nɔ momo ɔ, e kɛ e hɛ fɔɛ e nami nɔ hu. 25 Se ke wa ngɔ wa hɛ kɛ fɔ Mawu nɔ kɛ ha nɔ́ ko nɛ bɛ lolo ɔ, e sa kaa waa hyɛ blɔ kɛ tsui si tomi.

26 Ja a nɔuu nɛ Mumi Klɔuklɔu ɔ yeɔ kɛ buaa wɔ ngɛ wa daa ligbi dengme gbomi kɛ sɔlemi mi. Ejakaa wa li bɔ nɛ sa kaa waa sɔle ha tete kɛ bi nɔ́ ko, se Mumi Klɔuklɔu ɔ nitsɛ nɛ sɔleɔ kɛ daa mi haa wɔ kɛ kɔmɔ yemi nɛ a be nyɛe maa kale. 27 Nɛ Tsɛ ɔ nɛ le tsuihi tsuo a mi ɔ, le nɔ́ nɛ he pɛɛ nɛ Mumi ɔ ngɛ kpae ha wɔ ngɛ Mawu nitsɛ suɔmi nya. 28 Ke wa suɔ Mawu, nɛ wa ngɛ e blɔ nya tomi ɔ mi ɔ, wa maa le kaa níhi tsuo nɛ baa wa nɔ ɔ, a hi kɛ ha wɔ.

29 Ejakaa Mawu to e yi mi kɛ je sisije kaa nihi nɛ a kɛ a he ha lɛ ɔ, a hi kaa bɔ nɛ e Bi ɔ ngɛ ɔ, konɛ Bi ɔ nɛ pee Tɛte ngɛ nyɛmimɛ fuu a kpɛti. 30 Akɛnɛ e hla wɔ he je ɔ, e tsɛ wɔ kɛ ba e ngɔ nɛ e bu wɔ "bemi", nɛ e ha wa hyi tɔ kɛ Kristo dami ɔ, nɛ e wo wɔ si kaa wa nine maa su e anunyami ɔ nɔ.

31 Mɛni wa ma nyɛ de ngɛ nyakpɛ ni nɛ ɔmɛ a he? Ke Mawu ngɛ wa se ɔ, mɛnɔ ma nyɛ te si kɛ wo wɔ? 32 Si abɔ nɛ e nyɛ ngɔ lɛ nitsɛ e Bi kɛ sã bɔ ha wɔ ɔ, anɛ e be wɔ nɔ́ tsuaa nɔ hae lo?

33 Mɛnɔ ma nyɛ po wa nya, wɔ nihi nɛ Mawu hla kɛ ha lɛ nitsɛ e he ɔ? Mawu ji nɔ nɛ woɔ nɔ nguɔ.

34 Mɛnɔ ji nɔ nɛ buu wɔ fɔ mɔ? Kristo lo? Dabi! Ejakaa lɛ ji nɔ nɛ gbo ngɛ wa he nɛ e te si ekohu kɛ ha wɔ, nɛ e hii si ngɛ Mawu hiɔ nine nɔ ngɛ hiɔwe ngɛ pɛɛ kpae ha wɔ.

35 Mɛnɔ kulaa ma nyɛ kpɔ Kristo suɔmi ɔ ngɛ wa dɛ? Ke wa na haomi loo amanehlu, aloo ke a fia wɔ tu aloo a gbe wɔ ɔ, anɛ lɔ ɔ tsɔɔ kaa e sume wɔ lo? Aloo ke hwɔ ngɛ wɔ yee aloo ohia ngɛ wɔ yee aloo oslaa ba na wɔ aloo gbenɔ miɔ nɛ e na wɔ ɔ, anɛ lɔ ɔ tsɔɔ kaa Mawu je wa se lo?

36 Dabi, ejakaa Ngmami ɔ deɔ wɔ ke, ngɛ e he je ɔ, e sa nɛ waa pee klaalo kaa wa ma gbo be fɛɛ be, ejakaa wa ngɛ kaa tohi nɛ a wo mɛ kpa nɛ a maa gbe. 37 Se ngɛ enɛ ɔmɛ kulaa mi ɔ, wa yeɔ kunimi kɛ guu Kristo nɔ nɛ suɔ wɔ nɛ e gbo kɛ ha wɔ ɔ nɔ. 38 Ejakaa i heɔ yeɔ kaa gbenɔ loo wami loo bɔfohi loo abosiamihi a je he wami ɔmɛ tsuo, loo níhi nɛ wa ngɛ gbeye yee mwɔnɛ ɔ, loo haomihi nɛ maa ba wa nɔ hwɔɔ, 39 loo hiɔwe loo wo sisi lokoo nɔ́ ko nɔ ko be nyɛe ma gba waa kɛ Mawu suɔmi nɛ wa Nutsɔ Yesu Kristo je kpo kɛ tsɔɔ wɔ benɛ e gbo kɛ ha wɔ ɔ kpɛti.