Аян 5

«Тоқтының» ақырзаманның билігін қабылдауы

1 Содан кейін тақ үстінде Отырғанның оң қолынан бір шиыршық кітапты*5:1 Яғни шиыршықталған ұзын жазбаны (1:11; Мыс 17:14; Езк 2:9-10; Дан 12:4; Түсіндірмедегі «Кітапты» да қараңыз). көрдім. Шиыршық кітаптың екі жағына да жазу жазылып, ол жеті мөрмен бекітілген болатын. 2 Сол кезде бір құдіретті періштені де көрдім. Ол қатты дауыспен: «Кім мөрлерді бұзып, кітапты ашуға лайық?» — деп жариялады. 3 Алайда көктен де, жерден де, жер астынан да кітапты ашып, оның ішіне қарау билігі бар ешкім табылмады.

4 Кітапты ашып, оның ішіне қарауға лайықты ешкімнің табылмағандығына қатты қайғырып жыладым. 5 Сонда ақсақалдардың біреуі маған:

— Жылама, қара: Дәуіт патшаның әулетінен,*5:5 Немесе: Дәуіттің түбірінен шыққан «Өскіні» не «Өркені», яғни Ұрпағы (22:16; Иш 11:1,10; Рим 15:12). Яһуда руынан шыққан «Арыстан»*5:5 Жар 49:8-10; Езк 21:27; Евр 7:14. жеңіске жетті! Оның сол жеті мөрді сындырып, кітапты ашып, оқуға билігі бар, — деді.

6 Мен қарасам, тақтың ортасында, айнала тұрған төрт нөкер мен ақсақалдар қоршаған «Тоқтыны» көрдім. Ол құрбандыққа шалынғандай*5:6 Яғни бауыздалудан қалған жарасының орны көрініп тұрды. (Осы жазбадағы басқа аяндар сияқты, бұл суреттеме де рухани қасиеттер мен оқиғаларды сыртқы бейнелер арқылы білдіреді: мұнда Мәсіхтің құрбандық өлімі бейнеленген.) болып көрінді. Оның жеті мүйізі мен жеті көзі бар екен, бұлар бүкіл әлемге жіберілген Құдайдың жеті Рухын*5:6 1:4; 3:1; 4:5. білдіреді.

7 Тоқты барып, тақта Отырғанның оң қолынан кітапты*5:7 5:1-2. қабылдады. 8 Тоқты соны қолға алған кезде төрт нөкер мен жиырма төрт ақсақал Тоқтының алдына бас ұра жығылды. Әрқайсысының қолында домбыраға ұқсас алтын аспап*5:8 Қолға ұсталатын осы ішекті аспапты мадақтау әндерін сүйемелдеу үшін қолданатын (Жыр 32:2). және түтетілетін хош иісті заттарға толы алтын табалар болды. Осы хош иісті заттар Құдай халқының*5:8 Яғни Құдайға бағышталған (қасиетті) адамдардың (8:3; 13:10; Дан 7:18; Түсіндірмедегі «Киеліні» де қараңыз). айтқан мінажаттарын*5:8 8:3-4; Мыс 30:7; Жыр 140:2. білдіреді.

9 Нөкерлер мен ақсақалдар жаңа мадақтау жырын айтып былай деді:

«Сен лайықсың кітапты қолыңа алуға

Және мөрлерін бұзып, оны ашуға!

Өйткені құрбан болып, қаныңды төктің,

Сол арқылы әр ру,*5:9 (7:9; Мар 16:15-16) Яки: әр тайпа. тіл, ұлт пен халықтан

Шыққандардың төлемін өтеп босаттың,

Һәм Құдайға оларды бағыштадың,

10 Әрі Құдайымызға арнап соларды

Жасадың діни қызметкерлер патшалығы;

Олар жер бетін билейтін болады».*5:10 1:6; 3:21; 20:4.

11 Мен тағы да қарап, тақты, төрт нөкерді және ақсақалдарды қоршап тұрған мыңдаған, миллиондаған періштелерді көріп, үндерін естідім. 12 Олар қатты дауыспен әндетіп былай деді:

«Құрбандыққа шалынған Тоқты

Билік пен байлықты,

Даналық пен құдіретті,

Құрмет, ұлылық пен дәріпті

Қабылдауға әбден лайықты!»

13 Көк пен жердегі, жер асты мен теңіздегі, яғни бүкіл әлемдегі, әрбір тіршілік иесінің былай деп ән салған даусын естідім:

«Тақта Отырған және Тоқты

Дәріптелу мен құрметке,

Ұлылық пен құдіретке

Мәңгі бақи лайықты!»

14 Төрт нөкер: «Аумин», — деп жауап берді. Ал жиырма төрт ақсақал жерге бас ұра жығылып, (мәңгі тірі Жаратқан Ие мен Тоқтыға) тағзым етті.