Ester 9

O prazniko Purim

20 O Mardohej zabeležinđa sa akava so ulo hem bičhalđa lila sa e Jevrejenđe kolai paše hem kolai dur ano regije e carosere e Kserksesere vaćerindoj lenđe 21 te slavinen svako berš o dešu štarto hem o dešu pandžto dive ano masek adar 22 sar dive kad o Jevreja odmorinde pe pumare neprijateljendar hem sar masek kad lengiri tuga irinđa pe ani radost, a o žalost ano dive e slavibnasoro, hem adala dive te slavinen sar dive zako veselje hem zaki gozba, maškara pumende te den o hajba sar darija hem te darujinen e čororen. 23 O Jevreja prihvatinde te nastavinen okova so lelje te ćeren, ćerindoj ađahar sar so pisinđa lenđe o Mardohej.

24 Adalese so, o Haman, o Agagavco, o čhavo e Hamedatinesoro, o neprijatelj sa e Jevrejengoro, ćerđa plan te mudaren pe o Jevreja, pa frdinđa o barbuti vičime "pur" sar te odredini o dive zako lengoro propast hem uništenje. 25 Ali i Jestira anglo caro zastupinđa zako plo narodo hem o caro dinđa proglas i zavera savi ćerđa o Haman protiv o Jevreja te irini pe protiv oleste, pa o Haman hem lesere čhave inele obesime ko vešala. 26 Adalese adala dive vičinde Purim, palo lafi "pur".

Zbog sa so inele pisime ano lil e Mardohejesoro hem zbog sa so dikhle hem sa so ulo, 27 o Jevreja odlučinde te na čhinaven akava adeti, ađahar on hem lengere čhave, hem sa okola kola pridružinena pe lenđe, svako berš te proslavinen adala duj dive ko način savoi lenđe pisime hem ano odredime vreme. 28 Adala dive valjani te setinen pe hem te slavinen svako porodica ani svako generacija, ani svako regija hem ani svako diz. O Jevreja na troman nikad te ačhaven te slavinen adala dive oto Purim, niti te bisterđol adava maškaro lengere potomci.

29 I carica i Jestira i čhaj e Avihajilesiri hem o Mardohej o Jevrejco pisinde aver lil ano autoritet sar te potvrdinen o proglas oto prazniko Purim. 30 O Mardohej sa e Jevrejenđe ano sa o šelu bišu efta regije oto carstvo e Kserksesoro bičhalđa poruka oto mir hem oti sigurnost, 31 te proglasinen o prazniko Purim ano odredime vreme hem te proslavinen ko način sar so odredinde o Mardohej o Jevrejco hem i carica i Jestira. Isto ađahar, o Jevreja zako pumenđe hem zako pumare potomci odredinde o vreme ano berš zako post hem zaki žalost. 32 Ađahar e Jestirakiri naredba potvrdinđa akala odredbe zako Purim hem adava inele zapisime ani knjiga.