ଏଜ୍‌ରା 4

ତିଆର୍ କଲାକେ ବିରଦ୍‌

1 ତାର୍‌ପଚେ ବନ୍ଦି ଅଇଲାପିଲାମନ୍ ସବୁବେଲର୍‌ ମାପ୍‌ରୁ ଇସ୍‌ରାଏଲର୍‌ ପର୍‌ମେସରର୍‌ ଉଦେସ୍‌ରେ ଗଟେକ୍ ପାର୍‌ତନା ଗରର୍‌ ତିଆର୍‌ କଲାଇନି ବଲି ଜିଉଦାର୍ ଆରି ବିନିଆମିନର୍‌ ବିରଦିମନ୍‌ ସୁନ୍‌ଲାଇ । 2 ସେଡ୍‌କିବେଲେ ସେମନ୍ ଜିରୁବାବିଲ୍‌ ଆରି ବାବାର୍‌ କୁଲର୍‌ ବଡ୍‌ ମୁକିଅର୍‌ଲଗେ ଆସି ସେମନ୍‌କେ କଇଲାଇ, ଆମେ ତମର୍ ସଙ୍ଗେ ତିଆର୍‌ କର୍‌ବୁ, କାଇକେକି ଜେମ୍‌ତାର୍‌ ତମେ , ସେମମ୍‌ତାର୍‌ ଆମେ ଆମର୍ ପର୍‌ମେସର୍‌କେ କଜ୍‌ଲୁନି, ଆରି ଅସୁରିୟ ରାଜା ଏସର୍‌ଅଦନ୍,ଜେ ଆମ୍‌କେ ଇତି ଆନିଆଚେ , ତାର୍‌ସମଏଁ ଅନି ଆମେ ତାର୍‌ଉଦେସ୍‌ରେ ବଲିଦାନ୍‌କଲୁନି । 3 ମାତର୍‌ ଜିରୁବାବିଲ୍‌ ଆରି ଜେସୁଅ ଆରି ଇସ୍‌ରାଏଲର୍‌ ଅଲ୍‌ଗା ବାବାର୍‌ କୁଲର୍ ବଡ୍‌ ଲକ୍‌ମନ୍ ସେମନ୍‌କେ କଇଲାଇ, ଆମର୍ ପର୍‌ମେସର୍‌ ଉଦେସ୍‌ରେ ଗର୍‌ତିଆର୍‌ କର୍‌ବା ବିସଇରେ ଆମର୍‌ସଙ୍ଗେ ତମର୍ କାଇମିସା ଲାଗାର୍‌ନିସାର୍ ନାଇ,ମାତର୍‌ ଆମର୍‌ ଲଗେ ପାରସ୍‌ ରାଜା କରସ୍‌ ରାଜାର୍‌ ଆଦେସ୍‌ ବାଦୁଲ୍‌ ଆମେ ଦିରେ ଗଟେକ୍‌ ଲଗେ ଅଇ ଇସ୍‌ରାଏଲର୍‌ ପର୍‌ମେସର୍‌ ସବୁବେଲର୍‌ ମାପ୍‌ରୁର୍‌ ନାଉଁରେ ତିଆର୍‌ କରୁ । 4 ତାର୍‌ପଚେ ଦେସର୍‌ଲକ୍‌ମନ୍‌ ଜିଉଦାର୍‌ ଲକ୍‌ମନର୍‌ ଆତ୍‌ ସକ୍‌ତି ନଇଲା ପାରା କର୍‌ବାକେ ଆରି ତିଆର୍‌କଲା କାମେ ସେମନ୍‌କେ କସ୍‌ଟଦେବାକେ ଲାଗ୍‌ଲା, 5 ଆରି, ସେମନର୍‌ ଇଚା ସପଲ୍‌ ନଇବାକେ ପାରସ୍‌ ରାଜାର୍‌ କରସର୍ ଜିଉନା କାଉନା ଆରି ପାରସର୍ ରାଜା ଦାରିଆବସର୍‌ ସାସନ୍ କର୍‌ବା ଜାକ ସେମନର୍‌ ବାଟେ ଜଜ୍‌ନା କର୍‌ବା ଲକ୍‌ମନ୍‌କେ କୁଲିଦେଇ ଦାରି ରଇଲାଇ । 6 ଆରି, ଅକିଅସେରସର ବେଲେ , ତାର୍‌ ଅଦିକାରର୍ ଆରାମେ ସେମନ୍‌ ଜିଉଦା ଆରି ଜିରୁସାଲାମ୍‌ତେଇ ବାସାଅଇଲା ଲକ୍‌ମନର୍‌ ବିରଦେ ଗଟେକ୍‌ ଅପ୍‌ମାନର୍ ଚିଟି ଲେକ୍‌ଲାଇ

ଅସତକିସତର ଚିଟି

। 7 ଆରି, ଅର୍‌ତକସତର୍ ଅଦିକାର୍‌ ବେଲେ ବିସ୍‌ଲମ୍‌,ମିତରଦାତ୍‌, ଟାବେଲ୍‌ ଆରି ତାର୍‌ ଅଲ୍‌ଗା ମଇତର୍‌ମନ୍‌ ପାରସିଅ ରାଜା ଅର୍‌ତକସତର୍ ପାକେ ଲେକ୍‌ଲା,ସେ ଚିଟି ଅରାମିଅ ଅକିଅରରେ ଲେକିଅଇ ଆରି ଅରାମିଅ ବାସାଇ ରଚନା ଅଇ ରଇଲା, 8 ରଉମ୍‌ ମତ୍‌ରି ଆରି ସିମ୍‌ସଅ ଲେକ୍‌ଲା ଅର୍‌ତକିଅସତ ରାଜାର୍‌ଲଗେ ଜିରୁସାଲାମ୍ ବିରଦ୍‌ରେ ଏମ୍‌ତାର୍‌ ଚିଟି ଲେକ୍‌ଲା, 9 ରଉମ୍ ମତ୍‌ରି ସିମ୍‌ସଇ ଲେକୁ ଆରି ସେମନର୍‌ ଅଲ୍‌ଗା ସାଙ୍ଗମନ୍‌ ସବୁ ଲକ୍‌, ଆରି, ଦିନିଅ ଆରି ଅପସତ୍‌କିଅ,ଟରପଲିଅ,ଅପସିରଇ, ଅରକବିଅ,ବାବିଲିଅ, ସୁସନିଅ, ଦେଇଅ, ଏଲିମିଅ ଲକ୍‌ମନ୍‌, 10 ଆରି, ବଡ୍‌ମଇମା ସବୁ ଅସ୍‌ନପ୍‌ପର୍‌ ଲାଗି ଆନ୍‌ଲା, ଆରି ସମରିଆ ନଗରେ ଆରି ପରାତ ଗାଡ୍‌ସେପାଟେ ଦେସର୍ ମନ୍‌କଲା ଜାଗାଇ ତିଆର୍‌କଲା ଏ ସବୁ ଗସ୍‌ଟିର୍‌ ଲକ୍‌ମନ୍‌ ଲେକ୍‌ଲାଇ । 11 ସେମନ୍ ଅର୍‌ତକିଅସତ ରାଜାର୍‌ ଲଗେ ଚିଟି ପାଟାଇ ରଇଲାଇ, ତେଇର୍‌ ଆତ୍‌ ଲେକା ଅଇଲାନି; ପରାତ୍‌ ଗାଡ୍‌ ସେପାଟର୍‌ ଲକ୍‌ ତମର୍‌ ଦାଙ୍ଗ୍‌ଡାମନ୍‌, ଆରି କେତେକ୍ ଲକ୍ । 12 ମଆ ରାଜାର୍‌ ଲଗେ ଜାନାଇଲାଟା ଏନ୍ତାରି ଜେ, ତମର୍‌ ଲଗେଅନି ଆଇଲା ଜିଉଦି ଲକ୍‌ମନ୍‌ ଜିରୁସାଲାମେ ଆମର୍‌ ବାଟେ ଆସିଆଚତ୍‌, ସେମନ୍‌ସେ ବିରଦ୍‌ କଲା କରାପ୍‌ ନଗର୍‌ ତିଆର୍‌ କଲାଇନି ଆରି ପାଚୁରି ସାରାଇକରି କୁନାଦି ମାରି ପୁର୍‌ନା ପାର୍‌ତନା ଗର୍‌ ତିଆର୍‌ କଲାଇନି । 13 ମଆ ରାଜାର୍‌ ଲଗେ ଜାନାଇବାଟା ଏଟାଜେ, କେବେ ଏ ନଗର୍‌ ତିଆର୍‌ କଲା ଆରି ପାଚୁରିକାମ୍‌ ସାର୍‌ସି, ତେବେ ସେ ଲକ୍‌ମନ୍‌ ସିସ୍‌ତୁ, ରାଜା ପାଇବାଦନ୍‌ ଆରି ଆସିଲ୍ ନ ଦେଏ , ଆରି ପଚେ ବେସି ସେଟା ରାଜାମନର୍‌ କେତି ଅଇସି । 14 ଆମେ ରାଜାଗରର୍‌ ନୁନ୍‌ କାଇବୁ ଆରି ମଆ ରାଜାର୍‌ ଅପ୍‌ମାନ୍‌ ଦେକ୍‌ବାଟା ଆମର୍ ଟିକ୍‌ ନାଇ, ସେଟାର୍‌ପାଇଁ ଲକ୍‌ ପାଟାଇ ମଆ ରାଜାକେ ଏ କାତା ଜାନାଇଲୁ । 15 ତମର୍‌ ଆନିଦାଦି ମନର୍‌ ଇତିଆସ୍‌ ବଇ କଜୁ, ତେବେ ସେ ଇତିଆସ୍‌ ବଇତେଇ ତମେ ଦେକ୍‌ସା ଆରି ଜାନ୍‌ସା ଜେ, ଏ ନଗର୍‌ ବିରଦି ନଗର୍‌, ଆରି ରାଜାମନ୍‌ ଆରି ରାଇଜ ସବୁକେ ଅନିଆଇ କର୍‌ବାଲକ୍‌ ଆରି ସେମନ୍‌ ପୁରୁବ୍‌କାଲେ ସେ ଲଗେ ଗଣ୍ଡ୍‌ଗଲ୍ ଗଟାଇ ଆଚତ୍‌ । ସେଟାର୍ ପାଇଁ ଏ ନଗର୍‌ ବିନାସ୍‌ ଅଇଆଚେ । 16 ଆମେ ମଆ ରାଜାକେ ଜାନାଇ ଆଚୁଜେ, ଏ ନଗର୍ ତିଆର୍‌ ଅଇଲା ଆରି ଏ ପାଚୁରି କାମ୍ ସାରାଇଲେ , ସେଟାର୍ ଲାଗି ଗାଡ୍‌ ସେପାଟେ ତମର୍‌ କାଇମିସା ବାଗ୍ ନ ରଏ । 17 ତାର୍‌ପଚେ ରାଜା ମତ୍‌ରି ରଉମର୍‌ ଆରି ଲେକୁ ସିମ୍‌ସୟର ଆରି ସେମନର୍‌ ସମରିଆର୍‌ ଲକ୍‌ମନ୍‌ ବିନ୍‌ ସାଙ୍ଗମନର୍‌ ସଙ୍ଗ୍‌ ଆରି ଗାଡ୍‌ ସେପାଟର୍‌ ଦେସର୍‌ ଅଲ୍‌ଗା ଅଲ୍‌ଗା ଲକର୍‌ ଲଗେ ଉତର୍‌ ପାଟାଇଲା, ଆରି କଇଲାଇ, ତମର୍‌ ମଙ୍ଗଲ୍‌ ଅ, । 18 ତମେ ଆମର୍ ଲଗେ ଜନ୍‌ ଚିଟି ପାଟାଇ ଆଚାସ୍‌; ସେଟା ଆମର୍ ମୁଆଟେ ଟିକ୍‌ ବାବ୍‌ରେ ପଡି ଅଇଲା ଆଚେ । 19 ଆରି, ଆମର୍ ଆଦେସ୍‌ ବୁଲି ଦେକ୍‌ଲାକେ, ଦେକି ଅଇଲା ଆଚେ ଜେ ପୁରୁବ୍‌ କାଲେ ଏ ନଗର୍‌ ରାଜାମନର୍‌ ବିରଦ୍‌ରେ ସତ୍‌ରୁ କରି ଆଚି ଆରି ସେ ଲଗେ ରାଜା ସତ୍‌ରୁ ଆରି ଜାଗ୍‌ଡା କରି ଆଚତ୍‌ । 20 ଆରି ଜିରୁସାଲାମେ ସକ୍‌ତିସାଲି ରାଜାମନ୍‌ ରଇଲାଇ , ସେମନ୍‌ ଗାଡ୍‌ ସେପାଟେ ସବୁ ଦେସେ ସାସନ୍‌ କଲାଇ, ଆରି, ସେମନ୍‌କେ ସିସ୍‌ତୁ, ସର୍‌କାର୍ ପାଇବାଦନ୍‌ ଆରି ଆସିଲ୍ ଦେଲାଇ । 21 ତେବେ ଆମର୍‌ ଲଗେଅନି ଆଦେସ୍‌ ଉଡ୍‌ରା ନ ଅଇବା ଜାକ ସେ ନଗର୍ ଜେନ୍ତାର୍‌ ତିଆର୍‌ ନ ଅଏ , ସେଟାର୍‌ ପାଇଁ ଏବେ ତମେମନ୍‌ ସେଲକ୍‌ମନ୍‌କେ କାମେ ଅନି ଚୁପ୍‌ ଅଇବାକେ ଆଦେସ୍‌ କର୍‌ । 22 ଆରି ଜାଗର୍‌ତା, ଏ ବିସଇରେ ତମେ ଏଲା କରାନାଇ , ରାଜାମନର୍‌ ପାଇଁ କାଇକେ ଅନିଆଇ ବଡ୍‌ସି ? 23 ତାର୍‌ପଚେ ରଉମର୍‌ ଆରି ଲେକୁ ସିମ୍‌ସଇ ଆରି ସେମନର୍‌ ସଙ୍ଗର୍‌ ଲକର୍‌ ଲଗେ ଅର୍‌ତକିଅସତ ରାଜାର୍‌ ଚିଟି ପଡ୍‌ଲାକେ, ସେମନ୍ ଦାପ୍‌ରେ ଜିରୁସାଲାମେ ଜିଉଦିମନର୍‌ ଲଗେ ଜାଇ ବପୁ ଆରି ସଗତ୍ ସଙ୍ଗ୍ ସେମନ୍‌କେ କାମ୍ କର୍‌ବାଟା ବନ୍ଦ୍ କଲାଇ। 24 ତେବେ ଜିରୁ ସାଲାମେ ପର୍‌ମେସର୍ ଗରର୍ କାମ୍‌ ବନ୍ଦ୍ ଅଇଲା । ଆରି, ପାରସ୍‌ ରାଜା ଦାରିଆବସର୍ ସାସନ୍ କଲା ଦୁଇ ବରସ୍‌ ଜାକ ସେଟା ବନ୍ଦ୍‌ ଅଇରଇଲା ,