ଏଜ୍‌ରା 10

ଲକ୍‌ମନର୍ ପାପେଅନି ବାଅଡ୍‌ବାଟା

1 ଏଜ୍‌ରା ପର୍‌ମେସରର୍‌ ଗର୍‌ ମୁଆଟେ ପାର୍‌ତନା ଆରି ପାପ୍‌ କେମା ମାଗ୍‌ଲା, କାନ୍ଦ୍‌ଲା ଆରି ଜୁଆର୍‌ କର୍‌ବାବେଲେ ଇସ୍‌ରାଏଲ୍‌ ଲଗେଅନି ମୁନୁସ୍‌ ଆରି ମାଇଁଜି ଆରି ପିଲା ଟକିମନର୍ ଗଟେକ୍‌ ବଡ୍ ଦଲ୍ ତାର୍‌ ଲଗେ ଗଟେକ୍ ଲଗେ ଟୁଲ୍ ଅଇ ରଇଲାଇ, କାଇକେବଇଲେ ଲକ୍‌ମନ୍‌ ବେସି କାନ୍ଦ୍‌ଲାଇ । 2 ତାର୍‌ପଚେ ଏଲମର୍‌ ପିଲାମନର୍‌ ଲଗେଅନି ଜିଇଏଲର୍‌ ପିଲା ସକନିଅ ଏଜ୍‌ରାକେ ଉତର କରି କଇଲା, ଆମେ ତର୍‌ ପର୍‌ମେସରର୍‌ ବିରଦେ ସତ୍‌କେ ମାନିକରି ଅଲ୍‌ଗା ଦେସର୍‌ ବଁସର୍‌ ମାଇଁଜିମନ୍‌କେ ବିବାକରିଆଚୁ, ଅଇଲେମିସା ଏ ବିସଇରେ ଏବେ ମିସା ଇସ୍‌ରାଏଲ୍‌ ବାଟେ ଆସା ଆଚେ । 3 ଏଟାର୍‌ପାଇ ଆମେ ଏବେ ଆମର୍‌ ପର୍‌ବୁର୍‌ ଆରି ଆମର୍‌ ପର୍‌ମେସରର୍‌ ଆଦେସ୍‌ ଇସାବେ ଆଉଲି ଅଇବା ଲକ୍‌ମନର୍‌ ଦିସାରି ଇସାବେ ଏ ସବୁ ମାଇଁଜି ଆରି ଏମନର୍‌ ତେଇଅନି ଜାତ୍‌ ଅଇଲା ସବୁକେ ଦୁରିକେ କର୍‌ବାକେ ଆମର୍‌ ପର୍‌ମେସରର୍‌ ସଙ୍ଗ୍‌ ନିଅମ୍‌ କରୁ, ଆରି, ଏଟା ବେବସ୍‌ତା ଇସାବେ କରୁ । 4 ଉଟ୍‌, କାଇକେବଇଲେ ତର୍‌ ଉପ୍‌ରେ ଏ କାମର୍‌ ବଜ୍‌ ଆଚେ ଆରି ଆମେ ତର୍‌ ସାଇଜ କର୍‌ବାଲକ୍‌ ଆଚୁ, ବପୁଅଇ ଏ କାମ୍‌ କର୍‌ ।

5 ତାର୍‌ପଚେ ଏଜ୍‌ରା ଉଟି ଏ ବାକିଅ ଇସାବେ କାମ୍‌ କର୍‌ବାକେ ଜାଜକମନର୍‌, ଲେବିଅମନର୍‌ ଆରି ସବୁ ଇସ୍‌ରାଏଲର୍‌ ମୁକିଅ ଲକ୍‌ମନ୍‌କେ ପର୍‌ମାନ୍‌ କରାଇଲା । ତାର୍‌ପଚେ ସେମନ୍‌ ପର୍‌ମାନ୍‌ କଲାଇ । 6 ତେବେ ଏଜ୍‌ରା ପର୍‌ମେସରର୍‌ ଗର୍‌ ମୁଆଟେ ଅନି ଉଟି ଇଲିଆସିବର୍‌ ପିଲା ଜିଅଆନନର୍‌ ବାକ୍‌ରାଇ ଗାଲା, ଆରି, ତେଇ କେଟ୍‌ଲାକେ ରୁଟି କାଏ ନାଇ କି ପାନି କାଏ ନାଇ, କାଇକେବଇଲେ ସେ ବାବିଲେ ରଇଲା ଲକ୍‌ମନର୍‌ ସତ୍‌ ନାମତ୍ ନାଇକେ ସେ ଦୁକ୍‌ କର୍‌ତେରଇଲା । 7 ତାର୍‌ପଚେ ଲକ୍‌ମନ୍‌ ଜିଉଦା ଆରି ଜିରୁସାଲାମର୍‌ ସବୁବାଟର୍‌ ବାବିଲେ ରଇଲା ପିଲାମନ୍‌କେ ସବୁ ଲକର୍‌ ଲଗେ ପର୍‌ଚାର କରି କଇଲା ଜେ, ସେମନ୍‌ ଜିରୁସାଲାମେ ଗଟେକ୍ ଲଗେ ରୁଣ୍ଡ୍‌ ଅଉତ୍‌; 8 ଆରି, ମୁକିଅଲକ୍‌ମନର୍‌ ଆରି ନେତାମନର୍‌ କଇବା କାତା ଇସାବେ କେ ଜଦି ତିନ୍‌ ଦିନ୍‌ ବିତ୍‌ରେ ନ ଆଇଲେ, ତାର୍‌ ସର୍‌ତେ ଜାକ ଚାଡାଇବାର୍‌ ଅଇସି ଆରି ସେ ନିଜେ ବାବିଲେ ରଇଲା ଲକର୍ ଲଗେ ଅନି ବିନେ ଅଇସି । 9 ସେଟାରପାଇ ଜିଉଦା ଆରି ବିନିଆମିନର୍‌ ସବୁ ଦେସର୍‌ ଲକ୍‌ ତିନ୍‌ଦିନ୍‌ ବିତ୍‌ରେ ଜିରୁସାଲାମେ କେଟ୍‌ଲାଇ, ସେ ଦିନ୍‌ର ନ ମାସର୍‌ କଡେଦିନ୍‌ ଅଇଲା ଆରି, ସବୁବାଟର୍‌ ଲକ୍‌ ପର୍‌ମେସରର୍‌ ଗର୍‌ ମୁଆଟର୍‌ ଚକେ ବସି ଏ ବିସଇ ଆରି ବଡ୍‌ ବର୍‌ସା ପାଇ ଡରି ଆଉଲି ଅଇତେ ରଇଲାଇ । 10 ତାର୍‌ପଚେ ଏଜ୍‌ରା ଜାଜକ୍‌ ଟିଆ ଅଇ ସେମନ୍‌କେ କଇଲା, ତମେ ସତ୍‌କେ ମାନାସ୍‌ ନାଇ, ଆରି ଇସ୍‌ରାଏଲର୍‌ ଦସ୍‌ ବଡାଇବାକେ ଅଲ୍‌ଗା ଦେସର୍‌ ମାଇଁଜିମନ୍‌କେ ବିବା ଅଇ ଆଚାସ୍‌ । 11 ସେଟାର୍‌ପାଇଁ ଏବେ ମଇଁମା କରା ତମର୍‌ ବାବାମନର୍‌ ପର୍‌ମେସରର୍‌ ସବୁବେଲର୍‌ ମାପ୍‌ରୁର୍‌ ଲଗେ କେମା ମାଗା ଆରି ତାର୍‌ ନିମାନ୍ ଲାଗ୍‌ବା କାମ୍‌ କରା, ଆରି ଦେସର୍‌ ଅଲ୍‌ଗା କୁଲର୍‌ ଲକ୍‌ମନର୍‌ ତେଇଅନି ଆରି ଅଲ୍‌ଗା ଦେସର୍‌ ମାଇଁଜିମନର୍‌ ତେଇଅନି ନିଜ୍‌କେ ଅଲ୍‌ଗା କରା । 12 ସେଡ୍‌କିବେଲେ ସବୁ ବାଟର୍‌ ଲକ୍‌ ଉତର୍‌ କରି ଆଉଲି ଅଇ କଇଲାଇ, ତମେ ଆମର୍‌ ବିସଇରେ ଜେନ୍ତାରି କଇଲାଇ, ଆମେ ସେନ୍ତାର୍‌ କର୍‌ବାକେ ଅଇସି । 13 ମାତର୍‌ ବେସି ଲକ୍‌ ଆରି ଏବେ ବେସି ବର୍‌ସା ଅଇବା ବେଲା, ଆରି ଆମେ ଡାଣ୍ଡେ ଟିଆ ଅଇବାକେ ନାପାରୁ, କାଇକେବଇଲେ ଏଟା ଗଟେକ୍‌ କି ଦୁଇ ଦିନର୍‌ କାମ୍ ନଏଁ, ଜେନ୍ତାରି ଏ ବିସଇରେ ଆମେ ବେସି ପାପ୍‌ କରିଆଚୁ । 14 ସେଟାର୍‌ପାଇଁ ସବୁଲକର୍‌ ପାଇ ଆମର୍‌ ମୁକିଅଲକ୍‌ମନ୍‌ ବାଚିଅଇବାଇ, ଆରି ଆମର୍‌ ପର୍‌ମେସରର୍‌ ରିସା, ଆମର୍‌ ଲଗେ ସାନ୍ତି ଅଇବା ଜାକ ଆରି ଏ ବିସଇର୍‌ ରାଜିନାମା ଅଇବା ଜାକ ଆମର୍‌ ଗାଅଁର୍‌ ଜନ୍‌ଲକ୍‌ମନ୍‌ ଅଲ୍‌ଗା ଦେସର୍‌ ମାଇଜିମନ୍‌କେ ବିବା ଅଇଆଚତ୍‌, ସେ ସବୁଲକ୍‌ ସମାନ୍‌ ବେଲାଇ ଆସତ୍‌ ଆରି ସେମନର୍‌ ସଙ୍ଗେ ସବୁ ଗାଅଁର୍‌ ନେତାମନ୍‌ ଆରି ବିଚାର୍‌ କାରିଆମନ୍‌ ଆସତ୍‌ । 15 ଏ କାତାର୍‌ ବିରୁଦେ ଅସାଏଲର୍‌ ପିଲା ଜନାତନ୍‌ ଆରି ତିକ୍‌ବରର୍‌ ପିଲା ଜଅସିଅ ଉଟ୍‌ଲାଇ, ଆରି ମସୁଲମ୍‌ ଆରି ଲେବିଅ ସବ୍‌ଦତଇ ସେମନ୍‌କେ ସାଇଜ କଲାଇ।

16 ମାତର୍‌ ବନ୍ଦିଅଇ ରଇଲା ପିଲାମନ୍‌ ସେନ୍ତାର୍‌ କାମ୍‌ କଲାଇ । ଆରି, ଏଜ୍‌ରା ଜାଜକ୍ ଆରି ନିଜର୍‌ ନିଜର୍‌ ବାବାର୍‌ କୁଟୁମ୍‌ ଇସାବେ ଆରି ନାଉଁ ଇସାବେ ସମାନ୍‌ ବାବାର୍‌ କୁଲର୍‌ ବଡ୍‌ ବଡ୍‌ଲକ୍‌ କେତେକ୍‌ ଅଲ୍‌ଗା ଅଇଲାଇ, ଆରି, ସେମନ୍‌ ଦସ୍‌ମାସର୍‌ ପର୍‌ତୁମ୍‌ ଦିନ୍‌ ସେ ବିସଇ କଜ୍‌ବାକେ ବସ୍‌ଲାଇ । 17 ଆରି, ସେମନ୍‌ ପର୍‌ତୁମ୍‌ ମାସର୍‌ ପର୍‌ତୁମ୍‌ ଦିନେ ଅଲ୍‌ଗା ଦେସର୍‌ ମାଇଁଜିକେ ବିବା ଅଇବା ମୁନୁସ୍‌ପିଲା ସବୁଲକର୍‌ ବିଚାର୍‌ କରବାଟା ସାରାଇଲାଇ ।

ବିନ୍‌ ବଁସର ମାଇଜିକେ ବିବ ଅଇରଇବା ଲକ୍‌ମନର୍ ତାଲିକା

18 ଜାଜକ୍‌ମନର୍‌ ପିଲାଟକିମନର୍‌ ଲଗେଅନି ଜନ୍‌ ଲକ୍‌ ଅଲ୍‌ଗା ବସଁର ମାଇଁଜିମନ୍‌କେ ବିବା ଅଇ ରଇଲାଇ, ସେମନ୍‌ ଅଇଲାଇନି ଏ ଲକ୍‌ମନ୍‌, ଆରି, ଜସାଦକର୍‌ ପିଲା ଜେସୁଅର୍‌ ପିଲାମନ୍‌ ଆରି ତାର୍‌ ବାଇମନର୍‌ ବିତ୍‌ରେ ଅନି ମାସେଅ, ଇଲିଏଜର୍‌, ଜାରିବ ଆରି ଗଦଲିଅ । 19 ଏ ମନ୍‌ ନିଜର୍‌ ନିଜର୍‌ ମାଇଁଜିମନ୍‌କେ ଦୁର୍‌ କରି ଦେବୁ ବଲି ପର୍‌ମାନ୍ କଲାଇ, ଆରି, ଦସି ଅଇଲାଇକେ ସେମନ୍‌ ନିଜର୍‌ ନିଜର୍‌ ଦସ୍‌ ପାଇ ରାସିଅନି ଗଟେକ୍‌ ଗଟେକ୍‌ ମେଣ୍ଡା ବଲି କଲାଇ । 20 ଆରି, ଇମେରର୍‌ ପିଲାମନର୍‌ ଲଗେଅନି ଅନାନି ଆରି ସବ୍‌ଦିଅ 21 ଆରିମର୍‌ ପିଲାମନର୍‌ ଲଗେଅନି ମାସେଅ ଆରି ଏଲିଅ, ଆରି ସମଇଅ ଆରି ଜିଇଏଲ୍‌ ଆରି ଉସିଅ, 22 ଆରି, ପସ୍‌ଉରର୍‌ ପିଲାମନର୍‌ ଲଗେଅନି ଇଲିଅଇନଇ, ମାସେଅ, ଇସ୍‌ମାଏଲ୍‌, ନତନେଲ୍‌, ଜସାବଦ୍‌ ଆରି ଇଲିଆସା।

23 ଆରି, ଲେବିଅମନର୍‌ ଲଗେଅନି ଜସାବଦ୍‌ ଆରି ସିମିଇ ଆରି କଲାଇଅ, ଏଟାକେ କଲିଟ୍‌ ବଲି କଇବାଇ, ପତାଇଅ, ଜିଉଦା ଆରି ଇଲିଏଜର୍‌, 24 ଆରି, ଗିତ୍ ଗାଇବା ଲକର୍‌ ବିତ୍‌ରେଅନି ଇଲିଆସିବ୍‌; ବାଟ ଜାଗୁଆଲ୍ ଲକ୍‌ମନର୍‌ ବିତ୍‌ରେଅନି ସଲୁମ୍‌ ଆରି ଟେଲମ୍‌ ଆରି ଉରି । 25 ଇସ୍‌ରାଏଲ୍‌ ଲଗେ ପରିଅସରର୍‌ ପିଲାମନର୍‌ ଲଗେଅନି ରମିଅ ଆରି ଜିସିଅ ଆରି ମଲ୍‌କିଅ ଆରି ମିଆମିନ୍‌ ଆରି ଇଲିଆସର୍‌ ଆରି ମଲ୍‌କିଅ ଆରି ବନାଇଅ । 26 ଆରି, ଏଲମର୍‌ ପିଲାମନର୍‌ ବିତ୍‌ରେ ଅନି ମତନିଅ, ଜିକରିଅ ଆରି ଜିଇଏଲ୍‌ ଆରି ଅବ୍‌ଦି ଆରି ଜେରେମତ୍‌ ଆରି ଏଲିଅ । 27 ଆରି, ସତୁର୍‌ର ପିଲାମନର୍‌ ବିତ୍‌ରେଅନି ଇଲିଅଇନଇ ଇଲିଆସିବ୍‌ ଆରି ମତନିଅ ଆରି ଜେରେମତ୍‌ ଆରି ସାବଦ୍‌ ଆରି ଅସିସା । 28 ଆରି ବେବଅର୍‌ ପିଲାମନର୍‌ ବିତ୍‌ରେ ଅନି ଜିଅଆନନ୍‌, ଅନାନିଅ, ସବେଇ, ଅତ୍‌ଲଇ, 29 ଆରି, ବାନିର୍‌ ପିଲାମନର୍‌ ବିତ୍‌ରେ ଅନି ମସୁଲମ୍‌, ମଲୁକ ଆରି ଅଦାଇଆ, ଜାସୁବ୍‌ ଆରି ସାଲ୍‌, ଜିରେମତ୍‌ । 30 ଆରି, ପଅତ୍‌ ମାଆବର୍‌ ପିଲାମନର୍‌ ବିତ୍‌ରେ ଅନି ଅଦନ୍‌ ଆରି କଲାଲ୍‌, ବନାଇଅ, ମାସେଅ, ମତନିଅ, ବସ୍‌ଚଲେଲ ଆରି ବିନୁଇ ଆରି ମନ୍‌ସି, 31 ଆରି, ଆରିମର୍‌ ପିଲାମନର୍‌ ବିତ୍‌ରେ ଅନି ଇଲିଏଜର୍‌, ଜିସିଅ, ମଲ୍‌କିଲ୍‌, ସମଇଅ, ସିମିଅନ୍‌, 32 ବିନିଆମିନ୍‌, ମଲୁକ, ସମରିଅ, 33 ଅସୁମର୍‌ ପିଲାମନର୍‌ ବିତ୍‌ରେ ଅନି ମତନଇ, ମତତ, ସାବଦ୍‌, ଇଲିପେଲଟ୍‌, ଜିରେମଇ, ମନସି, ସିମିଇ, 34 ବାନିର୍‌ ପିଲାମନର୍‌ ବିତ୍‌ରେ ଅନି ମାଦଇ, ଅମ୍‌ରାମ୍‌ ଆରି ଉଲେଅ, 35 ବନାଇଅ, ବେଦିଆ, କଲୁଉ, 36 ବନିଅ, ମରେମତ୍‌, ଇଲିଆସିବ୍‌, 37 ମତନିଅ, ମତନଇ, ଆରି ଜାସଇଅ, 38 ଆରି, ବାନି ଆରି ବିନୁଇ, ସିମିଇ, 39 ସେଲିମିଅ, ଆରି ନାତନ୍‌ ଆରି ଅଦାଇଆ, 40 ମଗ୍‌ନଦ୍‌ବଇ, ସାସଇ, ସାରଇ, 41 ଅସ‌ରେଲ୍‌ ଆରି ସେଲିମିଅ ସମରିଅ, 42 ସଲୁମ୍‌, ଅମରିଅ, ଜସେପ୍‌ । 43 ନବରର୍‌ ପିଲାମନର୍‌ ବିତ୍‌ରେ ଅନି ଜିଅଏଲ୍‌, ମତତିଅ, ସାବଦ୍‌, ସବିନ, ଜଦଇ ଆରି ଜଏଲ୍‌, ବନାଇଅ, 44 ଏ ସବୁଲକ୍‌ମନ୍‌ ଅଲ୍‌ଗା ଦେସର୍‌ ମାଇଁଜିମନ୍‌କେ ବିବା ଅଇରଇଲାଇ, ଆରି, ସେ ମାଇଁଜିମନର୍‌ ବିତ୍‌ରେ ଅନି କାକେ କାକେ ପିଲାଟକିମନ୍‌ ଜନମ୍‌ ଅଇରଇଲାଇ ।