1 Sisi weyu lubaragiñe Luéyuri Esefuruni, aba lidin Hesusu Betania, le ñein lubéi laganawa Lásaru le lásaaragüdübei hádangiñe hilaaña. 2 Aba hadügün aban adineruni ñein luagu lufulesein; Marta, tuguya éheeraguboun, Lásaru aban hádangiñe ha ñúnbaña luagu dábula luma Hesusu. 3 Ábati tanügün María aban budéin ibiñein le séruti, aba táhurudaguni lugudi Hesusu lau, aba taragahani lau tídiburi, aba lehemougadun ibiñein ligía ñein múnada. 4 Aba lariñagun Húdasi Isükarióte, le liráü Simón, aban hádangiñe lani Hesusu disipulugu, lememe lunbei laluguruni:

5 —Ka san uagu malugurún lubéi ibiñein le luagu ǘrüwa-san fiádürü lun híderawagun gudemetiña?

6 Lariñagunbei Húdasi ítara, mama luagu berese lan hau gudemetiña, lariñagunbei ítara ladüga híweru lan; ani keiti ligía lan gámabarun lagei seinsu, ábaha líweruhan lídangiñe le ichugúbei tidoun. 7 Ábati lariñagun Hesusu lun:

—Ígiraboun; taranseruñádina lubá lachülürün luéyuri nabunúniwa. 8 Súnwandan ñéinbaña lan gudemetiña haganagua; ánheinti au, mámabadina huma súnwandan.

9 Aba hasubudiruni saragu hádangiñe huríu luagu anihein lan Hesusu Betania, aba houdin ñein, mámarügü lun harihini, lun giñe harihini Lásaru le lásaaragüdübei Hesusu hádangiñe hilaaña. 10 Aba giñeti húaradun hábutigu fádirigu lidan aban lun giñe háfaruni Lásaru, 11 ladüga gíbetiña lan huríu adisedutiña hawéi lun hafiñerun luagu Hesusu, lídangiñeti Lásaru.

12 Saragu haña gürigia ñǘdüntiña Herusalén lubá fedu le Luéyuri Esefuruni; larugan, aba hasubudiruni luagu lachülürüba lan Hesusu ñeinhin uburugun. 13 Ábati hátühan tubana fáluma, aba háfuridun lubaroun Hesusu agúaraheina:

—Uéiriguni lun Bungiu! Biniwati le ñǘbuinbei lidan liri Wabureme! Biniwati lurúeite Ísüraeli!

14 Aba ladarirun Hesusu aban burigü, aba lawariruni kei lariñagun tidan Lererun Bungiu:

15 Manufudedabá, uburugu Sión;

anitén burúeite wariñu luagu aban liraüraü burigü.

16 Úati yebe gunfuranda hamani lani disipulugu katei le weyu ligia; lárigiñe, dan le beluhali Hesusu lidoun luéirigun yágüta sielu, aba haritagun luagu bürüwa lan sun katei le luagu, ani ítara liña lan lasuseredun.

17 Gürigiati buga ha ñéinbaña dan le lagúarunbei Hesusu lun Lásaru lídangiñe lumuaha lun láguyuguagüdüni, abahüdagua hamuti le harihubei. 18 Ligía lébubei háfuridun gürigia eresibirei Hesusu, ladüga haganbun luagu milaguru le ladügübei. 19 Ábati hariñagun fariséugu hámagua:

—Ariha humaali luagu siñá lan ladügǘniwa ni kata; hafalaruñein sun gürigia.

20 Ñéinñanu Güriegu hadan gürigia ha ñǘdünbaña Herusalén lun háhuduragun lun Bungiu lidan fedu ligia; 21 aba hayabin Güriegu hagía lumoun Felipe, le Betüsáidana, ñein Galiléa, aba hariñagun lun:

—Busentiwa warihini Hesusu.

22 Aba lidin Felipe, aba lariñaguni lun Andürési, aba houdin biángubei hagía abahüdaguei lun Hesusu. 23 Ábati lariñagun Hesusu houn:

—Chülüha oura lun lichugúniwa uéiriguni nun, au le Liráü Wügüri. 24 Ninarün hau luagu anhein lan mábürühan aban lagu türigu múarugun lun lounwen, ábanmemebei aguu; anhein ounwe, lalubahóuba saragu lídangiñe. 25 Le hínsiñehabuti lun libagari, leferidirubei; anhein le meberesenti lau libagari lidan ubóu le, lareidubei lubá ibagari le magumuchaditi. 26 Le busenti leseriwidunina, lunti lafalarunina; ani le ñein numuti, ñeinbei giñe le eseriwidubalina. Le eseriwidutina, ladügüba núguchi lun inebewa lan.

27 «Anihein aban lanarime idiheri nuagu guentó. Kaba san nariñaga? Nariñaguba funa san: "Núguchi, salba bana lídangiñe idiheri le guentó?" Uá, lun lira niabin. 28 Núguchi, rualá uéiriguni lun biri nídangiñe».

Ábati laganbúniwa lariñagun aban umalali siélugiñe:

—Rúaali uéiriguni lun niri bídangiñe, ani lichugúayaba.

29 Ábati hariñagun gürigia ha ñéinbaña aganbaha luagu wayuhuru lan, híbiri ariñaga:

—Aban ánheli adimurehabei lun.

30 Ábati lariñagun Hesusu houn:

—Mámatia luagu nufulesein laganbúa umalali le, luagu hufulesein. 31 Anihán dan ligía lun laguserawagüdün ubóu, ani guentoba leferidirei Mafia, le agumadihabei lidan ubóu le, lubafu. 32 Dánmeti le niñurúniwa múarugugiñe, nanügübaña súngubei númaguoun.

33 Lau lira lariñaguñein ida luba lan buga lounwen. 34 Aba hariñagun gürigia lun:

—Aganbaadiwa laliihóun tidan waliburun to lánina lilurudun Moisesi luagu labagariduba lan Kristu lun sun dan. Ida liñati bariñagunbei luagu liñurúaba lan Liráü Wügüri? Káteigia Liráü Wügüri ligía?

35 Ábati lariñagun Hesusu houn:

—Anihamémegua larugounga haganagua lau sun luágurügaali lan murusun dan. Éibuga humá lubeiti sun anihagua lan larugounga haganagua, márügüdün láamugaün luburiga; ladüga le éibuguti lidan luburiga, ibidiñeti lun haliñouñein lan. 36 Afiñe humá lubeiti luagu larugounga sun anihagua lan huma lun lirahüñü humá larugounga.

Lárigiñe lariñaguni Hesusu sun burí katei le, aba lidin, aba laramudagun hawéi.

37 Lau sun adüga lan Hesusu saragu milaguru hagibugiñe, mafiñentiña luagu. 38 Lau lira hagunfulirei le lariñagubei profeta Isaíasi:

Nabureme, ka san afiñerubei luagu uganu le wíchugubei?

Ka un larufudei Wabureme Bungiu lubafu?

39 Ligía mafiñerun habéi, ladüga abürühati giñe Isaíasi ítara:

40 Darú lumuti Bungiu harihin, deregüdalóun hanigi,

lun marihin hamá lau hagu,

úame gunfuranda hamá,

miabin hagíame nun lun nareidaguagüdüniña.

41 Lariñagunbalin Isaíasi le luagu Hesusu ladüga ariha laali lan luéirigun.

42 Lau sun lira, saragu haña hádangiñe huríu afiñerutiña luagu Hesusu íbini hádangiñe ábutigu; ani mariñagun hamuti bóugudi, le hanufude hawéi fariséugu, luéi habuguniña tídangiñe haligilisin. 43 Ladüga gúndaatimatiña lau uéiriguni le híchugubei gürigia sügǘ lau le líchugubei Bungiu.

44 Aba lariñagun Hesusu lau umalali héreti:

—Le afiñeti nuagu, mámarügüñein nuagu lafiñera, afiñeti giñe luagu Núguchi le óunahabalina. 45 Le giñe arihitina, larihiñein giñe le óunahabalina. 46 Au lánpubei; niábinbei ubouagun lun sun lan ha afiñetiña nuagu, lun merede hamá lidan luburiga. 47 Le aganbuti nererun ani madügünti gasu lau, mama au asiadirubalin, ladüga mama niábiña lun nasiadiruniña gürigia ubouagu, niábiña asalbaraña. 48 Le meberesenti nau, madügün ligía gasu lau nererun, anihein lunti lasiadiruni: Dimurei burí le ariñaga náalibei, ligíaba asiadirei lídanme lagumuhóun weyu. 49 Ladüga madimurehantina luagu nani nungua; Núguchi le óunahabalina, ligía ariñagubalin le lunbei nariñaguni nun luma le lunbei narufudahani. 50 Ani subudi numuti luagu barǘ lan lugumadin ibagari magumuchaditi, le lubeiti nariñagubei, kei lariñaguni Núguchi nun nariñagei.