1 Lárigiñe lariñaguni Hesusu sun katei le, aba larihin sielun, aba lariñagun:

«Núguchi, chülüha nidaani; ruba uéiriguni lun Biráü, ru láamuga giñe Biráü uéiriguni bun. 2 Rúhadibu ubafu lun Biráü hawagu sun gürigia lun líchugun ibagari magumuchaditi houn ha bíchugubaña lun. 3 Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei.

4 «Rúhadina uéiriguni bun ya ubouagu, gumú nan giñe le uágubei bóunahana. 5 Guentoti Núguchi, rubei uéiriguni lememe meha nánibei buma lubaragiñe meha ñein lan ubóu.

6 «Subudigüda naali houn ha basagarubaña lídangiñe ubóu lun bíchuguniña nun, kátabu lan. Bánigu meha, aba bíchuguniña nun; ani ñǘdüntiña lau le bubeibei. 7 Guentó, subudi hamaali luagu sun lan le bíchugubei nun búmagiñe lan liabin; 8 ru naali uganu le bíchugubei nun houn ani resibi hamuti, ani subudi hamaali luagu inarüni lan luagu búmagiñe lan niabin, afiñeeña giñe luagu buguya lan óunahabalina.

9 «Ayumuraguatina bun hawagu; mayumuraguntina hawagu lánigu ubóu, nayumuragun hawagu ha bíchugubaña nun, ladüga bani hamá. 10 Sun le nani, bani, le bani, nani; ani arihúati nuéirigun hadan.

11 «Au, meredeedina ubouagu; anhein hagía, herederuba. Au, néibuga bumoun. Núguchi Sánduti, góunigibaña ha bíchugubaña nun lau bubafu, lun lidan hamá aban le tímatimaati kei au buma. 12 Dan meha le hama nan ubouagu, góunigi numutiña meha ha bíchugubaña nun lau bubafu; meferidiruntina ni aban hádangiñe luéidigia le meha féridihalibei, lun lagunfulirún le bürüwañubei tidan Bererun.

13 «Guentó, néibuga le ñeinhin bubéi; luagu anahagua lan ubouagu ariñaga numuti burí katei le lun habuinchun lau ugundanimeme le nuágubei. 14 Ru naali bererun houn, aba heyereegudún lun ubóu, ladüga mama hamá lánigu ubóu ítara keisi mama nan lánigu ubóu. 15 Mamuriahantina buma lun basagaruniña ubouagugiñe, namuriahan buma lun bóunigiruniña luéi wuribani. 16 Ítara kei mama nan lani ubóu, mama giñe lani ubóu hagía. 17 Deregeguagüda baña houngua bun, lau lubafu bererun le inarünibei. 18 Kei bóunahanina hadoun lánigu ubóu lau uganu lánina asalbaruni, ítara giñe nóunahaniña hadoun lánigu ubóu. 19 Ani deregeguatina nungua bun hawagu, lun giñe hederegeragun houngua bun le tímatimaati.

20 «Mámarügüñein hawagu namuriaha buma, amuriahatina giñe hawagu ha lúnbaña hafiñerun nuagu danme le haganbuni uganu hámagiñe. 21 Amuriahatina buma lun lidan hamá aban sun hagía, lun ábanmeme hamá wama kei au buma, buguya numa, lun lidan hamá aban buidu buidu, lun lafiñerun ubóu luagu bóunahan nan. 22 Ru naali uéiriguni lememe bíchugubei nun houn, lun ábanmeme hamá kei ábanmeme wamá au buma; 23 au hadan, buguya nidan, lun hayabin lun ábanmemebaña lan buidu buidu, subudi láamugei ubóu luagu bóunahan lan au, ani hínsiñe hamá bun saragu kei nínsiñe bun.

24 «Núguchi, buguya íchugubaliña nun, busentina lun númabaña lan le ñein numuti, lun harihini uéiriguni le bíchugubei nun; ladüga hínsiñegubeiñadina bun lubaragiñe ladügǘniwa ubóu. 25 Núguchi richaguati, ibidiñetibu houn lílana ubóu; gama lumoun subuditibu nun, subudi hamaali giñe wügüriña ha luagu bóunahan lan au. 26 Subudigüda naali houn kátabu lan, ani nasubudiragüdamemebadibu, lun ñein lan ínsiñeni le buágubei nun hadan, lun giñe ñein nan hadan».