1 Lárigiñe, ábaya larufudagun Hesusu lungua houn lani disipulugu laru duna le gíribei Tiweriasi. Anihán ligaburi ladügüni: 2 Lídanñanu aban Simón Féduru, Tomasi le unbei hariñaga Madou, Natanaéli, le lílana Kaná le lani Galiléa, lirahüñü Sebedéu, hámaya bián hádangiñe lani Hesusu disipulugu. 3 Aba lariñagun Simón Féduru houn:

—Néibuga eseniha.

Aba hariñagun lun:

—Wéibuga giñe buma.

Aba hádinun tidoun hagune, aba houdin; sun áriebu ligía mañuguntiña ni kata. 4 Dan le arugadeina lubéi, aba harihini Hesusu ñein laru duna, ibidiñeti yebe houn disipulugu luagu Hesusu lan. 5 Ábati lariñagun houn:

—Numadagu, mañugungidün san?

Hariñaga lun:

—Uá.

6 Ábati lariñagun Hesusu houn:

—Chü humá luéigiñe tóunwenren ugunei, hañuguba.

Aba hágurun, lárigiñe siñá yebe hachawarunu seni dúnarugugiñe le hiibe úduraü tidan. 7 Ábati nariñagun, au Huan, lun Féduru:

—Hesusutia le!

Kei laganbun Simón Féduru luagu Hesusu lan, aba ladaürünu ladaüragun, aba lachubarun dúnarugun. 8 Ha híbiri disipulugu, aba houdin larun beya tau ugunei, aduruuheina hamóun seni buin hau úduraü, kei ábanrügüñein lan san méturu hadise luéi beya. 9 Dan le hararirunbei múarugun, aba hadarirun watu gemeti lau eñeguraü, lau aban úduraü ligibuagu tuma fein. 10 Aba lariñagun Hesusu houn:

—Barǘ humá fiu hádangiñe úduraü ha hadigibaña.

11 Aba ládinun Simón Féduru tidoun ugunei, aba ladurugudunu seni larun beya buin hau úduraü wéinamutiña, san-dimí-san-ǘrüwañanu; lau sun hiibe, maheiridaguntu seni. 12 Ábati lariñagun Hesusu houn:

—Higougu, hata bachati.

Úati ni aban hádangiñe disipulugu álügüdüti katei lan, ladüga subudi hamani luagu Hesusu lan. 13 Aba liabin, aba lanügünu fein lúhaburugu, aba líchugunu houn, ligiaméme ladüga lau úduraü.

14 Ligía lǘrüwan larufudagun Hesusu lungua houn lani disipulugu lárigiñe lásaarun lídangiñe óunweni.

15 Lárigiñe hatun bachati, aba lariñagun Hesusu lun Simón Féduru:

—Simón, Liráü Huan, hínsiñetina san bun sügǘ lau nínsiñe houn ha?

Lariñaga Féduru lun:

—Anha, Nabureme, subuditi bun luagu hínsiñe ban nun.

Lariñaga Hesusu lun:

—Góunigibañati nánigu.

16 Ábaya lálügüdüni luagu libiaman wéiyaasu:

—Simón, liráü Huan, hínsiñetina san bun le tímatimaati?

Lariñaga Féduru lun:

—Anha, Nabureme, subuditi bun luagu hínsiñe ban nun.

Lariñaga lun:

—Góunigibañati nánigu.

17 Ábaya lálügüdüni luagu lǘrüwan wéiyaasu:

—Simón, liráü Huan, hínsiñetina san bun?

Aba lírudagun Féduru ladüga lálügüdüni Hesusu luagu lǘrüwan wéiyaasu anhein hínsiñe lubéi lun; aba lariñagun lun:

—Nabureme, subuseti sun katei bun. Subuseti bun luagu hínsiñe ban nun.

Aba lariñagun Hesusu lun:

—Góunigibañati nánigu. 18 Ninarün bau luagu dan lan meha nibureingidibu, sánsiguatibu aba bidin le ñeinhin lumuti babusenra; gama lumoun danme le wéiyaadibu, iñurarügü báalime barüna, ábame lagüürüni somu badi, ábame lanügünibu le ñeinhin lumuti mabusenrun ban bidin.*

19 Lau lariñaguni Hesusu katei le, lasubudiragüdüñein ida luba lan ligaburi lounwen Féduru, lun líchugun uéiriguni lun Bungiu lau. Lárigiñe, aba lariñagun lun:

—Falabana!

20 Dan ladigiragunbei Féduru, aba larihin luagu anite lan disipulu le hínsiñetimabei lun Hesusu hárigi hárigi, lememe añuurubei lóubagiñe Hesusu lidan adineruni, le giñe álügüdübalin Hesusu kaba lan wádangiñe ederegerei. 21 Dan larihinbalin Féduru, aba lariñagun lun Hesusu luagu:

—Nabureme, an san le, kaba san asusereda lun?

22 Lariñaga Hesusu lun:

—Ánhana busén labagaridun darime nagiribudun, kámegia buma? Buguya, falabana.

23 Ábati léibaagun dimurei hadan híbiri lánigu Hesusu luagu móunwenbei lan nege disipulu ligia; mariñagunti Hesusu luagu móunwenbei lan, ariñagarügüti: «Ánhana busén labagaridun darí lumoun nagiribudun, kámegia buma?»

24 Ligiaméme disipulu ligía, le achoururubalin burí katei le, abürühabarun giñe gárada to, to haliihaboun guentó. Ani subudiwati luagu inarüni lan le lariñagubei.

25 Anihein giñe saragu katei ladüga Hesusu; anhein hamuga abürühóua aban aban, afiñewati luagu mabara tan hamuga burí líburu to abürühóutu lau lidan sun ubóu.