1 Ǘrüwa weyu lárigiñe, ñeinñein aban maríei lidan aban fulasu gíriti Kaná, le lídanbei Galiléa. Ñéinñounti lúguchu Hesusu, 2 amisurahóuati gíñeti Hesusu hau sun lani disipulugu lidoun maríei ligía. 3 Aba tagumuchun diwéin; aba tariñagun lúguchu Hesusu lun:

—Gumuhatia diwéin.

4 Aba lariñagun Hesusu tun:

—Kagia uagu bariñagei le nun, núguchu? Machülügili nidaani.

5 Aba tariñagun houn ha éheeragubaña:

—Adüga huméi sun le lariñagubei hun.

6 Ñeinñein sisi ágeidinaü lauti dübü libe le hayusurubei huríu lun hachibuni háhabu luma hagudi según hagaburi. Kada aban ágeidinaü ligía barüti wein o darandi galun duna. 7 Aba lariñagun Hesusu houn éheeragutiña:

—Buíngüda huméi sun ágeidinaü le lau duna.

Aba habuinchagüdüni buidu buidu. 8 Ábati lariñagun Hesusu houn:

—Dabú humati murusun lídangiñe, ábame hanügüni lun le arihubei lau fedu.

Aba hadügüni ítara. 9 Ábati lóuchuni le arihubei lau fedu duna ligía saligua lun diweinme, ibidiñoun lun halíagiñeti lan; hárügüñanu éheeragubaña asubudirei, ladüga hagía lan adaburubalin duna. Ábati lagúarun le arihubei lau fedu lun le amarieidubei, 10 aba lariñagun lun:

—Sun gürigia seriwi hamutu tubuidun-agei diwéin furumiñe, danti le gíbeeli hatun amisurahóutiña, ligía héheeragun diwéin to furumiñeguarügü; ánheinti buguya, aba bareidunu tubuidun-agei diwéin, darí guentó basagaroun.

11 Katei le, le ladügübei Hesusu lidan fulasu le gíribei Kaná le lídanbei Galiléa lasusereda, ligía furumiñetibei milaguru le aubei larufudei luéirigun, aba hafiñerun lani disipulugu luagu.

12 Lárigiñe katei le, aba lidin lidoun fulasu le gíribei Kafarünaumu, úara tuma lúguchu, lamulenu, hama lani disipulugu; aba herederun átiri weyu ñein.

13 Ábati lidin Hesusu uburugu Herusalén ladüga yarafaali lan hafedun huríu le Luéyuri Esefuruni. 14 Ñein ladariraña ha alugurahabaña bágasu, mudún, unhun, hama burí ha ñúnbaña lidan habara le ñein lubéi hasansiha seinsu houn gürigia. 15 Dan le larihinbalin Hesusu katei le, aba ladügün aban abeigülei lau gúrudu, aba labugaguniña sun hagía lídangiñe tibürürün ténpulu hau sun halügüniña mudún hama bágasu, chagalei haseinsun ha asansihabaña seinsu, garabagualéi hadabulan. 16 Aba lariñagun houn ha alugurahabaña unhun:

—Sagá huméi sun katei le yáagiñe! Manüga humóun luban Núguchi lun mágidume!

17 Ábati haritagun lani disipulugu luagu lariñawagún tidan líburu to Lererun Bungiu: «Lagumuchaguagüdüñadina nemeidin tau buban».

18 Ábati hariñagun huríu lun:

—Ka seini barufudubei woun lun wasubudiruni anhein garicha bubéi lun badügüni katei le?

19 Aba lariñagun Hesusu houn:

—Günringua humóun ténpulu to, ábayame nararamagüdünu lidan ǘrüwa weyu.

20 Aba hariñagun huríu lun:

—Bián-wein-sisi irumu hanügün adügoun ténpulu to; lun gayara bubóun lan araramagüda lidan ǘrüwa weyu?

21 Lúgubu guánarügü Hesusu ténpulu to uáguboun ladimureha houn. 22 Ligía danbei lubéi lásaarun lídangiñe óunweni, aba haritagun luagu dimurei le meha lariñagubei, aba hafiñerun luagu sun le tídanbei líburu to Lererun Bungiu luma luagu dimurei burí le meha lariñagubei houn.

23 Dan le Herusalén lubéi Hesusu lidan fedu le lánina esefuruni, saragu haña afiñerutiña luagu dan harihinbalin seini burí le ladaagubei lun larufuduni luagu ligía lan Krístubei. 24 Ánheinti Hesusu, mafiñenti hawagu ladüga subudi lániña kátañanu lan. 25 Memegeirunti lariñawagúniwa lun ida haña lan gürigia; ligía guánarügü subudi lumuti katei lan tídanbei hanigi.