1 Lidan le lásügürünbei Hesusu lídangiñe aban fulasu, aba larihin aban wügüri marihinti lúmagiñe lágurahoun. 2 Aba hariñagun lani disipulugu lun:

—Máisturu, ka san uagu lágurahounbei wügüri le marihinga? Ladüga san hafigoun lagübürigu, odi ladüga lifigoun guánarügü?

3 Aba lariñagun Hesusu houn:

—Mama ladüga lifigoun, mama giñe ladüga hafigoun lagübürigu; lasuseredunbei ítara lun larihíniwa le liyaraabei Bungiu adüga. 4 Lunti wadügüni luadigimari le óunahabalina luagu wéyuagugili lan; gúñeeli ligíame, siñaame wadügüni. 5 Sun anaha lan ligibuagu ubóu le, au lilanpunbei ubóu.

6 Lárigiñe lariñaguni Hesusu katei le, aba lásuerun múarugun, aba ladügün murusun baribarabu lau larüre, aba láhuruduni luagu lagu le marihinbei, 7 aba lariñagun lun:

—Beiba achibei bigibu lidan duna le gíribei Siloé (mini lan lira, "Ounahóuti").

Aba lidin marihinti ligía, aba lachibuni ligibu ñein; dan le lagiribudunbei, arihaali. 8 Hati lubesinanigu hama gürigia háñaha arihañahabálin amuriaha, aba hariñagun:

—Ma san anihán léñaha añuurubei amuriaha seinsu?

9 Ñéinñanu ariñagutiña:

—Anha, ligía.

Hariñaga híbiri:

—Mama ligía, lenege.

Aba lariñagun wügüri ligía:

—Anha, au.

10 Ábati hariñagun lun:

—Ida liñati arihaadibu lubéi?

11 Aba lariñagun houn:

—Wügüri le gíribei Hesusu, ligía adügübei murusun baribarabu, aba láhuruduni luagu nagu, aba lariñagun nun: "Beiba lidan duna le gíribei Siloé, ábame bachibuni bigibu ñein". Ábati nidin, lásurun nachibuni nigibu, aba narihin.

12 Ábati hariñagun lun:

—Hageigia wügüri ligía?

Lariñaga houn:

—Ibidiñeti nun hagéi lan.

13 Ábati hanügüni wügüri le meha marihinbei hagibugiñoun fariséugu. 14 Keiti lidan lan luéyuri emeraaguni ladügei Hesusu baribarabu le aubei lareidaguagüdei marihinti ligía, 15 aba giñe hálügüdüni fariséugu wügüri ligía ida liña lan gayaraahali lubéi larihin. Aba lariñagun houn:

—Aba líchugun baribarabu luagu nagu, aba nachibuni nigibu, guentó arihaadina.

16 Ábati hariñagun hádangiñe fariséugu:

—Le wügüri le adügübalin katei le, siñati lóunagüle lan Bungiu ladüga minebenti luéyuri emeraaguni lun.

Hariñagati híbiri:

—Ida liñati ladaaguni burí milaguru le, anhein gafigoun lubéi?

Aba lubeiti ñein lan fánreinguaü hadan. 17 Ábaya hálügüdüni le meha marihinbei:

—Angia buguya, kagia bariñagubei luagu wügüri le, keisi buguya lubéi larihagüdübei?

Aba lariñagun:

—Au, nariñahare luagu aban lan profeta.

18 Máhatiña yebe fariséugu hafiñerun luagu marihin lan meha wügüri ligía ani arihaali lan guentó, darí lun hagúarun houn lagübürigu, 19 aba hariñagun houn:

—Anihán san hiráü le uágubei hariñaga luagu marihingubeiñein lan lúmagiñe lágurahoun? Ida liñati arihaali lubéi guentó?

20 Aba hariñagun lagübürigu:

—Subudi wamuti luagu waráü lan le, ani marihin lan dan le lágurahounbei; 21 ibidiñeti woun ida liña lan arihaali lubéi, ni ka lan arihagüdübalin. Álügüda huméi; wéiriyaali, gayaraati lóunabun luéigiñegua.

22 Anufudeiti ariñagagüdübalin lira houn lagübürigu wügüri ligía, ladüga ariñagaaña lan fariséugu luagu sun lan ha afiñerutiña luagu Hesusu lan Krístubei, habugúba lan tídangiñe haligilisin huríu. 23 Ligía hariñagunbei lagübürigu: «Álügüda huméi, wéiriyaali».

24 Ábayati hagúarun huríu lun wügüri le meha marihinbei, aba hariñagun lun:

—Ariñagabéi inarüni woun ligibugiñe Bungiu, subuditi woun luagu gafigoun lan wügüri lira.

25 Ábati lariñagun houn:

—Ibidiñeti nun anhein gafigoun lubéi lumoun mafigoun lan. Le nasubudirubei, luagu marihin nan meha, ani guentó arihaadina.

26 Ábaya hariñagun lun:

—Ka san ladügübei bau? Ida liña san ladüga lun larihagüdünibu?

27 Aba lariñagun houn:

—Ariñaga naali hun, mebereseguntün nau; kati uagu habusenra nariñaguniya hun? Odi busentün giñe hafalaruni?

28 Ábati hanabuni, aba hariñagun lun:

—Buguya, falá bumuti larufudahan wügüri ligia; anhein wagía, larufudahan Moisesi wafalarubei. 29 Subuditi woun luagu adimureha lan meha Bungiu lun Moisesi; anhein le, ibidiñegubéiti woun halíagiñeti lan.

30 Ábati lariñagun wügüri ligía houn:

—Anihán katei le buídutimabei, ibidiñe lan hun halíagiñeti lan, ani arihagüda láadina! 31 Subuditi woun luagu maganbun lániña Bungiu gafigountiña; hárügüñanu áhuduragubaña lun hama ha adügübalin lugundan, laganba. 32 Maganbúnñahagili luagu ni aban arihagüdüti aban gürigia le águrahouti marihinga. 33 Lun hamuga mama lan lúmagiñe Bungiu liabin wügüri le, siñati hamuga ladügün ni kata.

34 Ábati hariñagun lun:

—Buguya san le águrahoubei buin lau figóu, busentibu barufudahan woun?

Aba habuguni tídangiñe haligilisin.

35 Aba laganbun Hesusu luagu bugá hamani marihinti le meha lareidaguagüdübei; danti le ladunragunbei luma, aba lariñagun lun:

—Afiñetibu luagu Liráü Wügüri?

36 Aba lariñagun wügüri ligía lun:

—Ariñagabéi nun katei lan, afiñe náamuga luagu.

37 Aba lariñagun Hesusu lun:

—Ariha baali, au, le úmabei badimureha.

38 Aba láhuduragun ligibugiñe Hesusu, aba lariñagun:

—Afiñetina, Nabureme.

39 Aba lariñagun Hesusu:

—Niábinbei ñahoun ubouagun lun nadügün irichaü, lun harihin ha marihinbaña luma lun marihingüda nániña ha arihabaña.

40 Dan le haganbunbalin hádangiñe fariséugu ha ñéinbaña katei le, aba hariñagun lun:

—Bariñaguñati luagu marihin wamá?

41 Lariñaga Hesusu houn:

—Lun hamuga marihin humá, mafigountün hamuga; gama lumoun kei hariñagun luagu ariha humá, gafigouhadün.