1 Lárigiñe sun katei le, aba éibugañaha lan Hesusu lóubawagu Galiléa; mabusenrunti lerederun Hudéa ladüga habusenrun huríu háfaruni hilagubei. 2 Keiti yarafaali lan aban lídangiñe hafedun huríu le gíribei tufedun Dibasein, 3 aba hariñagun lamulenu lun:

—Merederabá ya; beiba Hudeoun ariha hamaamugei giñe bánigu ha ñéinbaña katei le burí badügübei. 4 Dan le busén lan aban gürigia lasubudirúniwa, madügün lumuti burí katei aramudaguarügü. Keiti adüga ban katei líbeina le, adügabéi ligibugiñe sun ubóu.

5 Ni íbini lamulenu mafiñentiña luagu. 6 Ábati lariñagun Hesusu houn:

—Machülügili dan lun nidin Herusalén luagu fedu ligia; anhein hun, buiti furumiñeguarügü oura. 7 Siñati hiyereegudún houn ha lánina ubóu le; anati au, iyereegutina houn, ladüga arufuda numuti luagu wuriba lan burí katei le hadügübei. 8 Heiba lidan fedu, au mídinbadina guentó; machülügili nidaani lun nidin.

9 Lárigiñe lariñaguni sun le houn, aba lerederun Galiléa.

10 Lárigiñe houdin lamulenu, ligía lidin Hesusu lidan fedu ligía, mafurangunrügü liña, kamá hamuga mabusenrunti larihíniwa. 11 Ítara liña háluahani huríu lidan fedu ligía, aba hariñagun:

—Hagéi funa san wügüri le?

12 Saragu hañati agülülühatiña luagu hadan gürigia. Ñéinñanu ariñagutiña luagu aban lan wügüri buiti ligía, híbiri ariñaga: «Mabuidunti, eyeeha lumutiña gürigia».

13 Úati ni aban adimurehati furangu luagu, ladüga hanufude hawéi huríu.

14 Lamidounhali fedu lúmagua, ligía lebelurun Hesusu ténpulurugun, aba lagumeserun arufudaha. 15 Aba taweiridun hanigi huríu, aba hariñagun:

—Ida liña san lasubudirunbei le saragu katei, maturiahanga ligía?

16 Aba lariñagun Hesusu houn:

—Le narufudahabei, mama númagiñeti, lúmagiñeti le óunahabalina. 17 Anhein anihein lubéi aban le aranseti lun ladügüni le labusenrubei Bungiu, lasubudirubei anhein lúmagiñeti lubéi Bungiu le narufudahabei lumoun luagu lan nani nungua nadimureha. 18 Le adimurehabei luagu lani lungua, ladügüni lun luéirigun guánarügü; le áluahabei uéiriguni lun le óunahabalin, ligía ariñagubalin inarüni, ani úati marichaü lidan.

19 «Ma inarüni luagu ru lani Moisesi lúrudu hun? Lau sun lira, úati ni aban hídangiñe úaraduti luma lúrudu ligía. Ka uagu habusenra háfarunina hilagubei?»

20 Aba hariñagun lun:

—Anihein sífiri wuribati bidan; ka busenbei láfarunibu hilagubei?

21 Aba lariñagun Hesusu houn:

—Luágurügü aban katei le nadügübei lidan luéyuri emeraaguni taweirida hanigi sun huguya. 22 Arufudaha lumuti Moisesi luáguti hagaburi huríu le seini tuagu óustaruni, (lau sun mama lan ligía agumeserubalin igaburi ligía, hagumeserun lagüchagu lubaragiñe); ligía lébubei leresibirun aban irahü seini tuagu lóustarun íbini lidan lan luéyuri emeraaguni. 23 Anhein adüga hubalin lira íbini lidan lan luéyuri emeraaguni luéirügü hadüraaguni lilurudun Moisesi, kati uagu hagañida numa luéigiñe nareidaguagüdün aban wügüri dayarügubei lidan luéyuri emeraaguni? 24 Maguseragüda humá luagu le harihubei, laulá irichaü haguseragüda.

25 Ábati hagumeserun hádangiñe ha aganóubaña Herusalén álügüdaha, hariñaga:

—Ma san anihán le háluahabei lun háfaruni hilagubei? 26 Anihánga adimureha ligibugiñe guririguaü, ani úati ni aban ariñaguti ni kata lun. Le funa san afiñe hamá gumadimatiña luagu wügüri lan le Krístubei? 27 Subuditi woun halíagiñe lan liabin le; ánheinti danme le liabin Kristu, ibidiñebei ni ka un halíagiñe lan liabin.

28 Dan laganbubalin Hesusu katei le, dan larufudahaña lubéi ténpulurugu; aba lariñagun lau umalali héreti:

—Subudi humutina lubeiti, subudi huméi halíagiñe lan niabin! Mama lau nani nungua niabin; aban le inarünibei luagu anihein lan, ligía óunahabalina, ani ibidiñeti hun. 29 Au, subudi numuti ladüga lúmagiñe lan niabin, ani ligía óunahabalina.

30 Aba yebeti habusenrun hadaürüni; úati ni aban aguuruti luagu ladüga machülügili lan lidaani. 31 Saragu haña afiñerutiña luagu, aba hariñagun:

—Danme le liabin Kristu, ladügüba funagia amu milaguru sügǘ lau wügüri le?

32 Aba haganbuni fariséugu le hariñagubei gürigia luagu Hesusu; hagía hama hábutigu fádirigu, aba hóunahan súdaragu ténpulurugugiñe lun hadaürüni. 33 Ábati lariñagun Hesusu:

—Murusunrügübei dan nerederun huma ya, ábame nagiribudun lumoun le óunahabalina. 34 Háluahabadina, gama lumoun madari hubadina, ladüga siñabei lan hidin le ñéinhinbadina lubéi.

35 Ábati hagumeserun huríu álügüdagua hámagua:

—Haliñounba funa san lidin le siñabei lubéi nege wadariruni? Léibuga funa san hamoun huríu ha Güresiabaña? 36 Ka mini lan lau lariñagun woun: "Háluahabadina, gama lumoun madari hubadina ladüga siñabei lan hidin le ñéinhinbadina lubéi"?

37 Le lagumuhóun weyu lidan fedu ligía, ligíatima wéirigubei. Lídanti weyu ligía, aba lararamun Hesusu, aba lariñagun lau umalali héreti:

—Le mágürabuti, ñǘbuinla numoun, gurala. 38 Le afiñeti nuagu, láwiyuhaba duna wínwanti tídangiñe lanigi, kei tariñaguni Lererun Bungiu.

39 Lariñaguña Hesusu lau lira luagu ha lan afiñerutiña luagu, heresibirubei lan Sífiri Sandu; dan ligía, miábingili meha Sífiri Sandu ladüga magiribudúngili lan Hesusu lárigoun sielun lidoun luéirigun.

40 Ñéinñanu hádangiñe gürigia, dan le haganbunbalin katei le, aba hariñagun:

—Inarüni luagu anihán lan profeta le meha lunbei liabin.

41 Hariñaga híbiri:

—Anihán Krístubei.

Hariñaga híbiri:

—Ida luba san Galiléanabei lan Kristu? 42 Tariñahare Lererun Bungiu luagu ladügawagunbei lan urúei Dawidi Kristu, ani Belengiñetibei lan, fulasuméme le ñéingiñeti lubéi Dawidi.

43 Aba lubeiti hafanreinragun gürigia luéigiñe Hesusu. 44 Ñéinñanu yebe abusenrutiña hadaürüni, úati ni aban adügüti.

45 Aba hagiribudun súdaragu ha tánina ténpulu hárigoun hamoun fariséugu hama hábutigu fádirigu. Aba hariñagun houn súdaragu:

—Ka uagu manügün hubalin?

46 Aba hariñagun súdaragu:

—Úagili ni aban adimurehati kei ladimurehan wügüri le!

47 Ábati hariñagun fariséugu houn:

—Ígiraguagüdaadün giñe hungua lun leyeedunün? 48 Anihein funagia aban hádangiñe wábutigu o hádangiñe lan fariséugu afiñeruti luagu? 49 Ánhaña gürigia ha, ha afalarubalin wügüri ligía, ha ibidiñehabúbaña lun lúrudu, íñarawaguaaña.

50 Nikodému, le ñǘdünbei adimureha luma Hesusu guñoun, ligía aban hádangiñe fariséugu; aba lariñagun houn:

51 —Según walurudun, siñati wasiadiruni aban wügüri maganbunga waméi furumiñe lun wasubudiruni ka lan lidurunbei.

52 Ábati hariñagun lun:

—Galiléana giñe buguya, badimurehanbei luagu lufulesein? Aturiahabóun Lererun Bungiu, basubudirubei luagu úagili lan ni aban profeta Galiléana.

53 [Aba houdin súngubei hábiñoun.