1 «Madiherida humá, afiñe humá luagu Bungiu, afiñe huguyame nuagu. 2 Anihein saragu ubaraü tidan luban Núguchi, néibuga lubeiti aranseha aban ubaraü hubá. Lun hamuga mítaranti, ariñaga naali hamuga hun. 3 Lárigiñeme nidin, aranseneime ubaraü ligía, ábame nagiribudunya lun nanügünün númagua, lun ñéinbadün lan giñe lememe ñein numuti. 4 Ani subudi humuti üma lidoun fulasu le ñéinhinbadina lubéi».

5 Lariñaga Tomasi lun:

—Nabureme, ibidiñeti woun haliñounbadibu lan; ida lubati wasubudiruni üma?

6 Lariñaga Hesusu lun:

—Au ǘmabei, au inarüni, au ibagari. Ani úati achülürüti lumoun Bungiu Úguchili anhein mama lubéi nuéigiñe. 7 Anhein subudi hubalina, hasubudirubei giñe Núguchi; ani subudi humaali lúmagiñe guentó, ladüga ariha humaali.

8 Lariñagati Felipe lun:

—Nabureme, arufudabéi Úguchili woun, buídurügaalime woun.

9 Lariñaga Hesusu lun:

—Felipe, lǘhadina huma, ibidiñegidina bun? Le arihitina, larihiñein giñe Bungiu Úguchili; kati uagu bariñaga nun lun narufuduni Bungiu Úguchili hun? 10 Mafiñentibu san luagu anahein lan lidan Bungiu Úguchili, anihein lan giñe Bungiu Úguchili nidan? Le burí katei le nariñagubei hun, mama lan lau nani nungua nariñagei; Bungiu Úguchili le aganóubei nidan, ligía adügübalin luadigimari guánarügü. 11 Afiñe humá nun luagu anahein lan lidan Bungiu Úguchili, ani anihein lan giñe Bungiu Úguchili nidan; íbini luágurügü katei le burí nadügübei. 12 Ninarün hau, luagu le lan afiñeti nuagu, ladügübei lan katei le burí nadügübei; ani ladügüba burí katei wéinamutimati, ladüga au, néibuga le ñeinhin lubéi Núguchi. 13 Sun le hamuriahan lidan niri, nadügübei, arufuda náamugei luéirigun Núguchi. 14 Nadügüba furumiñeguarügü katei le hamuriahan lidan niri.

15 «Anhein hínsiñe nubéi hun, gúnfuli humá lau le nubeibei; 16 ábame nayumuragun lun Núguchi lun lóunahan amu ámalihati hun, lun húmabei lan Sífiri lánina inarüni lun súnwandan. 17 Ha lánigu ubóu le, siñati heresibiruni Sífiri Sandu ligía, ladüga siñá lan harihini ni hasubudiruni; anhein huguya, subudi humaali, ladüga anihein huma ani lerederuba hidan.

18 «Mígirun nubadün hábugua; nagiribudayaba lun huma nan. 19 Málühadina ánhana marihin hamá gürigia; anhein huguya, harihubadina, ani gabagaribadün ladüga gabagaritina lan. 20 Lárigiñeme liabin Sífiri Sandu lun huma lan lun sun dan, hasubudirubei luagu anahein lan lidan Núguchi, huguya nidan, au giñe hidan. 21 Ha subudihabútiña lun nugumadin ani úaragua hagía luma, arufuda hamuti luagu hínsiñe nan houn le tímatimaati. Ani hínsiñehabubei Núguchi houn ha hínsiñehabutiña nun, hínsiñebaña giñe nun, arufudagua aume nungua houn».

22 Aba lariñagun Húdasi (mámatia le Isükarióte):

—Aburemei ka san uagu barufudaguba lubéi bungua woun, mama houn gürigia ha lánigu ubóu le?

23 Lariñaga Hesusu lun:

—Ha hínsiñehabutiña nun, adügatiña gasu lau le nubeibei; ani hínsiñeduba lun Núguchi, ábame wayabin, au luma Núguchi, aganawa hama. 24 Ha mínsiñehabutiña nun, madügüntiña gasu lau le nubeibei. Ani dimurei le nariñagubei, mama nani, lani Núguchi le óunahabalina.

25 «Nariñaguñein sun le hun lau anahagua lan huma; 26 Sífiri Sandu le lunbei lóunahani Núguchi lidan niri lun líderagunün, larufudahaba hun, laritaguagüdübadün giñe luagu sun le ariñaga náalibei hun.

27 «Nígiraali nidarangilaü hun, ru numuti darangilaü hun. Mítaranti níchuguni keisi le líchugubei ubóu. Madiherida humá, manufude huguyame. 28 Aganba humaali nariñagun luagu néibuga lan, ani nagiribudayaba lan lun huma nan; lun hamuga hínsiñe nan hun lau hinarün, gúndaatün hamuga lau hasubudiruni luagu néibuga lan lumoun Núguchi, ladüga ligía íñugutimati nuéi. 29 Ligía ariñagagia nubalin hun, lun danme lan lasuseredun, afiñe humaamuga.

30 «Madimurehanhadina saragu huma, ladüga aniteeli le agumadihabei lidan ubóu le. Lau sun mabafu lan nuagu, 31 lunti ítara luba lan lun lasubudiruni ubóu luagu hínsiñe lan Núguchi nun, ani adüga nani le lubeibei nun. Sará humá, keimoun yáagiñe.