Daniel 11

1 ಮೆದಿಯಾಚೊ ಮಿಯಾ ದಾರಿಯಾಸ್ ರಾಜಾಚ್ಯಾ ರಾಜ್ವಟ್ಕಿಚ್ಯಾ, ಪಯ್ಲೆಚ್ಯಾ ವರ್ಸಾತ್, ಮಿಂಗೆಲಾಕ್ ಬೆಂಬಲ್ ದಿವ್ನ್ ತೆಜ್ಯಾ ವಾಂಗ್ಡಾ ಇಬೆ ರಾಲೊ. 2 ಅತ್ತಾ ಮಿಯಾ ತುಕಾ ಸಾಂಗುಕ್ ಲಾಗಲ್ಲೆ ಖರೆ ಹಾಯ್.

ಇಜಿಪ್ತ್ ಅನಿ ಸಿರಿಯಾಚೆ ರಾಜ್ಯ್

ಅಬಕ್, ಪಾರಸಿಯಾಚ್ಯಾ ದೆಸಾತ್ ಅನಿ ತಿನ್ ರಾಜಾ ಉಟ್ತಲೆ ಹಾತ್, ಚಾರ್ವೆಚೊ ರಾಜಾ ಸಗ್ಳ್ಯಾಕಿಂತಾ ಲೈ ಸಾವ್ಕಾರ್ಕಿಚೊ ಅನಿ ಬಳೆಚೊ ಹೊವ್ನ್ ರ್‍ಹಾತಾ, ಗ್ರಿಕ್ ರಾಜ್ವಡ್ಯಾಕ್ ವಿರೊದ್ ಹೊವ್ನ್ ಅಪ್ನಾಚಿ ಬಳ್ ಜಾಸ್ತಿ ಕರುನ್ಗೆತಾ. 3 ತೆಜ್ಯಾ ಮಾನಾ ಲೈ ಪರಾಕರ್ಮಿ ಹೊಲ್ಲೊ ರಾಜಾ ಉಟುನ್ ರಾಜ್ವಟ್ಕಿ ಕರುನ್ಗೆತ್ ಅಪ್ನಾಚ್ಯಾ ಮರ್ಜಿ ಸಾರ್ಕೊ ಚಲ್ತಾ. 4 ತೆನಿ ದಾಕ್ವುನ್ಗೆಟಲ್ಲ್ಯಾ ಮಾನಾ ತೆಚೆ ರಾಜ್ವಾಡೊ ಫುಟುನ್ ಚಾರಿ ದಿಕ್ಕಾರ್ ವಾಟೆ ಹೊತಾತ್, ತೆ ತೆಜ್ಯಾ ಪಿಳ್ಗಿಕ್ ಗಾಯ್ನಾ, ತೆಜ್ಯಾ ರಾಜ್ವಟ್ಕಿತ್ ಬಳಾನ್ ಹೊತ್ತ್ಯಾ ಸಾರ್ಕೆ ಅನಿ ಕನ್ನಾಬಿ ಬಳೆಚೆ ಹೊಯ್ನಾತ್, ತೊ ರಾಜ್ವಾಡೊ ಕಾಡುನ್ ಘೆವ್ನ್ ಚಾರ್ ಲೊಕಾಕ್ನಿ ತವ್ಡೆಚ್ ನಸ್ತಾನಾ ಹುರಲ್ಯಾಕ್ನಿ ವಾಟೆ ಹೊತಾ. 5 ದಕ್ಷಿನ್ ದಿಕ್ಕಾಚೊ ರಾಜಾ ಅನಿ ತೆಜ್ಯಾ ಮುಖಂಡಾತ್ನಿ ಎಕ್ಲೊ ಬಳೆಚೊ ಹೊತಾ, ಮುಖಂಡ್ ರಾಜಾಕಿಂತಾ ಬಳೆಚೊ ಹೊವ್ನ್ ರಾಜ್ವಟ್ಕಿಕ್ ಯೆತಾ, ತೊ ರಾಜ್ವಾಡೊ ಮೊಟೊ ಹೊವ್ನ್ ರ್‍ಹಾತಾ. 6 ಉಲ್ಲಿ ವರ್ಸಾ ಹೊಲ್ಲ್ಯಾ ಮಾನಾ ತೆನಿ ಯೆವ್ನ್ ಮಿಳ್ತಾತ್, ದಕ್ಷಿನ್ ದಿಕ್ಕಾಚ್ಯಾ ರಾಜಾಚೊ ಲೆಕ್ ಉತ್ತರ್ ದಿಕ್ಕಾಚ್ಯಾ ರಾಜಾಚ್ಯಾಚ್ಯಾ ವಾಂಗ್ಡಾ ಕರಾರ್ ಕರುನ್ ಘೆವ್ಕ್ ಯೆತಾ, ಖರೆ ಅಪ್ನಾಚ್ಯಾ ಭುಜೆಚಿ ಬಳ್ ಹುರ್ವುನ್ ಘೆಯ್ನಾ, ತಿ ಅನಿ ತಿಜಿ ಭುಜ್ ಇಬೆ ರ್‍ಹಾಯ್ನಾತ್, ತಿ ಅನಿ ತಿಕಾ ಬಲ್ವುನ್ ಹಾನಲ್ಲೆ, ಘೆಟಲ್ಲೆ, ಅನಿ ದಿಲ್ಲೊ ತ್ಯಾ ಎಳಾರ್ ನಾಸ್ ಹೊತಾ. 7 ಮಾನಾ ತಿಚ್ಯಾ ವಂಸಾವಳಿತ್ ಉಪಾಜಲ್ಲೊ ರಾಜಾ ಹೊತಾ, ಸಿರಿಯಾ ದೆಶಾಚ್ಯಾ ರಾಜಾಚ್ಯಾ ಸಯ್ನ್ಯಾಕ್ ವಿರೊಧ್ ಹೊವ್ನ್ ಯೆವ್ನ್, ತೆಜ್ಯಾ ಕೊಟೆತ್ ಗುಸುನ್ ತೆಂಚ್ಯಾಕ್ನಾ ಲಡಾಯ್ ಕರುನ್ ಜಿಕುನ್, 8 ತೆಚಿ ದೆವಾ ಅನಿ ಮುರ್ತಿಯಾ, ಸೊನೆ ಅನಿ ಚಾಂದಿಚಿ ಕಿಮ್ತಿಚಿ ಆಯ್ದಾನಾ ಚೊರುನ್ ಘೆವ್ನ್ ಇಜಿಪ್ತಾಕ್ ಯೆವ್ನ್, ಉಲ್ಲ್ಯಾ ವರ್ಸಾಂಚ್ಯಾ ಪತರ್ ಉತ್ತರ್ ದಿಕ್ಕಾಚ್ಯಾ ರಾಜಾಚ್ಯಾ ಲಡಾಯಿಕ್ ಜಾಯ್ನಾ. 9 ಮಾನಾ ಉತ್ತರ್ ದಿಕ್ಕಾಚೊ ರಾಜಾ, ದಕ್ಷಿನ್ ರಾಜಾಚ್ಯಾ ವರ್‍ತಿ ಲಡಾಯಿಕ್ ಯೆತಾ, ಖರೆ ಪರ್‍ತುನ್ ಅಪ್ನಾಚ್ಯಾ ಸ್ವತ್ಯಾಚ್ಯಾ ದೆಸಾಕ್ ಜಾತಾ. 10 ತೆಜ್ಯಾ ಮಾನಾ ಉತ್ತರ್ ದಿಕ್ಕಾಚ್ಯಾ ರಾಜಾಚಿ ಲೆಕಾ ಲಡಾಯಿಕ್ ತಯಾರ್ ಹೊವ್ನ್, ಮೊಟೊ ಸಯ್ನ್ ತಯಾರ್ ಕರ್‍ತಾತ್, ತೊ ಸಯ್ನ್ ಮೊಟ್ಟ್ಯಾ ಹಂವಾರ್ಯಾ ಸಾರ್ಕೊ ಪಗಳ್ತಾ, ತೆನಿ ಅನಿ ಪರ್‍ತುನ್ ಲಡಾಯಿಕ್ ಉಟುನ್ ದಕ್ಷಿನ್ ದಿಕ್ಕಾಚ್ಯಾ ರಾಜಾಚ್ಯಾ ಕೊಟೆ ಪತರ್ಬಿ ಜಾತಾತ್. 11 ತನ್ನಾ ದಕ್ಷಿನ್ ದಿಕ್ಕಾಚೊ ರಾಜಾ ರಾಗಾನ್ ಪೆಟುನ್, ಯೆವ್ನ್ ಉತ್ತರ್ ದಿಕ್ಕಾಚ್ಯಾ ರಾಜಾ ವಾಂಗ್ಡಾ ಲಡಾಯ್ ಕರ್ತಾ, ಉತ್ತರ್ ದಿಕ್ಕಾಚ್ಯಾ ರಾಜಾನ್ ಸಯ್ನ್ ತಯಾರ್ ಕರ್ಲ್ಯಾರ್ಬಿ ತೊ ಸಯ್ನ್ ದಕ್ಷಿನ್ ದಿಕ್ಕಾಚ್ಯಾ ರಾಜಾಚ್ಯಾ ಹಾತಿತ್ ಗಾವ್ನ್ ಪಡ್ತಾ. 12 ಹೆಚ್ಯಾ ವಯ್ನಾ ತೊ ಲೈ ಬಡಾಯ್ಚೊ ಹೊತಾ, ಲಾಕಾನ್ ಲಾಕ್ ಸಯ್ನಿಕಾಕ್ನಿ ಹಾರ್ವುಲ್ಯಾರ್ಬಿ ತೊ ಜಿಕುಕ್ ಹೊಯ್ನಾ. 13 ಕಶ್ಯಾಕ್ ಮಟ್ಲ್ಯಾರ್, ಉತ್ತರ್ ದಿಕ್ಕಾಚೊ ರಾಜಾ ಅನಿ ಪರ್‍ತುನ್ ಪಯ್ಲೆಚ್ಯಾನ್ಕಿ ಮೊಟ್ಟೊ ಸಯ್ನ್ ಗೊಳಾ ಕರುನ್ಗೆವ್ನ್, ಲೈ ವರ್ಸಾ ಕಳದಲ್ಲ್ಯಾ ಮಾನಾ ಮೊಟ್ಟ್ಯಾ ಸಯ್ನ್ಯಾಚ್ಯಾ ವಾಂಗ್ಡಾ ಸಗ್ಳ್ಯಾ ನಮುನ್ಯಾಚ್ಯಾ ಹಾತಿಯಾರಾಂಚ್ಯಾ ವಾಂಗ್ಡಾ ಲಡಾಯಿಕ್ನಿ ತಯಾರ್ ಹೊವ್ನ್ ಯೆತಾ. 14 ಅನಿ ತ್ಯಾ ಎಳಾರ್ ದಕ್ಷಿನ್ ದಿಕ್ಕಾಚ್ಯಾ ರಾಜಾಕ್ ವಿರೊದ್ ಹೊವ್ನ್ ಲೈ ಲೊಕಾ ಉಟ್ತಾತ್, ತವ್ಡೆಚ್ ನಸ್ತಾನಾ ತುಜ್ಯಾ ಸ್ವತ್ಯಾಚ್ಯಾ ಲೊಕಾತ್ನಿ ಬುರ್ಸೆಪಾನ್ ಕರುಕ್ ಮನ್ ಕರ್ತಲೊ ಎಕ್ಲೊ ತೆ ದರ್ಶನ್ ಖರೆ ಹೊವ್ಚೆ ಮನ್ತಾನಾ, ಧಂಗೊ ಉಟ್ತಾತ್, ಖರೆ ತೆನಿಚ್ ಹಾರ್ತಾತ್. 15 ಖರೆ ಉತ್ತರ್ ದಿಕ್ಕಾಚೊ ರಾಜಾ, ಯೆವ್ನ್ ಲಡಾಯ್ ಕರುನ್ ಕೊಟೆ ಹೊತ್ತಿ ಬರಿ ಗಾಂವಾ ಕಾಡುನ್ಗೆತಾ, ದಕ್ಷಿನ್ ದಿಕ್ಕಾಚ್ಯಾ ರಾಜಾಕ್ಡೆ ತೆಂಕಾ ಧರುಕ್ ಹೊಯ್ನಾ, ಥೈ ಹೊತ್ತ್ಯಾ ಮೊಟ್ಟ್ಯಾ ಸಯ್ನಿಕಾಂಚ್ಯಾಕ್ಡೆಬಿ ಧರುಕ್ ಹೊಯ್ನಾ, ಅಡ್ವುತಲಿ ಬಳ್ ಖಲಿಬಿ ರ್‍ಹಾಯ್ನಾ. 16 ದಕ್ಷಿನ್ ದಿಕ್ಕಾಚ್ಯಾ ರಾಜಾಕ್ ವಿರೊದ್ ಹೊವ್ನ್ ಯೆತಲೊ ಅಪ್ನಾಚ್ಯಾ ಮನಾಕ್ ಯೆಲ್ಯಾ ಸಾರ್ಕೊ ರ್‍ಹಾತಾ, ತೆಕಾ ವಿರೊದ್ ಹೊವ್ನ್ ಉಟ್ತಲಿ ತಾಕತ್ ಕೊನಾಕ್ಬಿ ರ್‍ಹಾಯ್ನಾ, ತೊ ತೆ ಸುಂದರ್ ಜಾಗೊ ಜಿಕುನ್ ಅಪ್ನಾಚ್ಯಾ ಹಾತೊಟಿತ್ ಥವ್ನ್ ಘೆತಾ. 17 ಉತ್ತರ್ ದಿಕ್ಕಾಚೊ ರಾಜಾ ದಕ್ಷಿನ್ ರಾಜಾ ವಾಂಗ್ಡಾ ಝಗ್ಡೊ ಕರುಚೆ ಮನುನ್ ನಿರ್ದಾರ್ ಕರುನ್, ಅಪ್ನಾಚ್ಯಾ ರಾಜ್ಯಾತ್ಲಿ ಸಗ್ಳಿ ಬಳ್ ಘೆವ್ನ್, ತೆಜ್ಯಾ ವಾಂಗ್ಡಾ ಕರಾರ್ ಕರುನ್ಗೆತಾ, ವಿರೊಧಿಚೊ ರಾಜ್ವಾಡೊ ಹಾಳ್ ಕರುಚೆ ಮನ್ತಲ್ಯಾ ಉದ್ದೆಶಾ ವಯ್ನಾ, ಲೆಕಿಕ್ ಲಗಿನ್ ಕರುನ್ ದಿತಾ, ಖರೆ ಹಿ ಯೆವ್ಜನ್ ಸಮಾ ಹೊಯ್ನಾ, ತೆಜ್ಯಾ ವಯ್ನಾ ಬಿ ತೆಕಾ ಅನ್ಕುಲ್ ಹೊಯ್ನಾ. 18 ತೆಜ್ಯಾ ಮಾನಾ ತೊ ಸಮುಂದರಾಚ್ಯಾ ದಂಡೆಚ್ಯಾ ಗಾಂವಾಂಚ್ಯಾಕ್ಡೆ ಪರ್‍ತುನ್, ಥೈ ಹೊತ್ತಿ ಲೈ ಗಾಂವಾ ಅಪ್ನಾಚಿ ಕರುನ್ಗೆತಾ, ಖರೆ ಎಕ್ ಸಯ್ನ್ಯಾಚೊ ಮುಖಂಡ್ ತೆಜ್ಯಾ ಹ್ಯಾ ಸಗ್ಳ್ಯಾ ಕಾಮಾಕ್ನಿ ಅಡ್ಡಿ ಹೊತಾ, ತೆಚಿ ದಬ್ಬಾಳ್ಕಿ ತೆಕಾಚ್ ಪರ್‍ತುನ್ ಹೊಯ್ ಸಾರ್ಕೆ ಕರ್ತಾ. 19 ಮಾನಾ ತೊ ರಾಜಾ ಸ್ವತ್ಯಾಚ್ಯಾ ಗಾಂವಾಚ್ಯಾ ವಾಟಾಂಚ್ಯಾಕ್ಡೆ ಪರ್‍ತುನ್ ಜಾತಾ, ಖರೆ ಪಡುನ್ ನಾಶ್ ಹೊವ್ನ್ ಜಾತಾ. 20 ತೆಜ್ಯಾ ಜಾಗ್ಯಾ ವರ್‍ತಿ ಅನಿ ಎಕ್ಲೊ ರಾಜ್ವಡ್ಕಿಕ್ ಯೆತಾ, ಹ್ಯೊ ಸಗ್ಳೆ ಗಾಂವ್ ಸ್ವತಾಕ್ ಕರುನ್ಗೆತಲ್ಯಾ ಎಕ್ ಅಧಿಕಾರಿಕ್ ನೆಮಸ್ತಾ, ಖರೆ ಉಲ್ಲ್ಯಾ ದಿಸಾತ್ನಿ ತೊ ಕಸ್ಲೊಬಿ ಝಗ್ಡೊ ಹೊಂವ್ದಿತ್, ರಾಗ್ ಹೊಂವ್ದಿತ್ ನಸ್ತಾನಾ ನಾಶ್ ಹೊವ್ನ್ ಜಾತಾ.

ಸಿರಿಯಾಚೊ ಬುರ್ಸೊ ರಾಜಾ

21 ಅನಿ ಫಿಡೆ ದೆವ್ ಧುತಾನ್ ಬೊಲುನ್, ತೆಜ್ಯಾ ಮಾನಾ ಲೈ ಘಮಂಡಿಚೊ ಎಕ್ಲೊ ರಾಜಾ ಹೊತಾ, ತೊ ರಾಜಾಚ್ಯಾ ಜಾಗ್ಯಾರ್ ರಾವ್ಕ್ ಯೊಗ್ಯ್ ನ್ಹಯ್, ಖರೆ ಆರಾಮಾನ್ ಹೊತ್ತ್ಯಾ ಎಳಾರ್ ಬರಿ ಗೊಸ್ಟಿಯಾ ಬೊಲುನ್ ಬರೊ ಹೊತ್ತೊ ರಾಜ್ವಾಡೊ ಕಾಡುನ್ಗೆತಾ. 22 ತೆಕಾ ವಿರೊದ್ ಹೊವ್ನ್ ಉಟ್ತಲೆ ಮೊಟೆ ಮೊಟೆ ಸಯ್ನೆ ಅನಿ ದೆವಾಚಿ ಯಾಜಕಾ, ತೆಜ್ಯಾ ಸಯ್ನ್ಯಾಚ್ಯಾ ಝಪಾಟ್ಯಾಕ್ ಗಾವ್ನ್ ತ್ಯಾತುರ್ ಬುಡುನ್ ಜಾತಾತ್. 23 ತೆಜ್ಯಾ ವಾಂಗ್ಡಾ ಸಮಾಧಾನಾಚೊ ಕರಾರ್ ಕರುನ್ಗೆಟಲ್ಲ್ಯಾಕ್ನಿ ಪಸ್ವುತಾ, ಉಲ್ಲ್ಯಾಚ್ ಲೊಕಾಂಚ್ಯಾ ಮಜತ್ತಿ ವೈನಾ ಫಿಡೆ ಯೆವ್ನ್ ಬಳಾನ್ ಭರ್ತಾ. 24 ಆರಾಮಾನ್ ರ್‍ಹಾತಲ್ಯಾ ಎಳಾರ್ ಶಾರಾಚ್ಯಾ ಬರ್ಯಾ ಜಾಗ್ಯಾಂಚ್ಯಾ ವಯ್ನಿ ಝಗ್ಡೊ ಕರ್ತಾ, ವಾಡ್ ವಡ್ಲಾನಿ ಕರುಕ್ ನಸಲ್ಲಿ ಕಾಮಾ ಕರ್ತಾ, ಕಾಡುನ್ಗೆವ್ನ್ ಹಾನಲ್ಲೆ, ವಾಟ್ಮಾರಲ್ಲೆ, ಲುಟಲ್ಲೆ ಅನಿ ಹಾಳ್ ಕರಲ್ಲೆ ಸಗ್ಳೆ ಅಪ್ನಾಚ್ಯಾ ಲೊಕಾಂಚ್ಯಾ ಸಾಟ್ನಿ ದಿತಾ, ಕೊಟೆ ಕಾಡುನ್ಗೆತಲಿ ಬುದ್ದ್ ಆಕ್ರಿ ಪತರ್ಬಿ ವಾಪರ್ತಾ. 25 ತೊ ಧಯ್ರೊ ಹಾನುನ್ಗೆವ್ನ್, ಮೊಟೊ ಸಯ್ನ್ ಭಾಂದುನ್ಗೆವ್ನ್, ದಕ್ಷಿನ್ ದಿಕ್ಕಾಚ್ಯಾ ರಾಜಾಕ್ ವಿರೊದ್ ಹೊವ್ನ್, ಅಪ್ನಾಚೊ ಸಗ್ಳೊ ಸಯ್ನ್ ಗೊಳಾ ಕರ್ತಾ, ದಕ್ಷಿನ್ ದಿಕ್ಕಾಚೊ ರಾಜಾ ಲೈ ಬಳಾಚೊ ಹೊವ್ನ್ ಮೊಟ್ಟ್ಯಾ ಸಯ್ನ್ಯಾ ವಾಂಗ್ಡಾ, ಝಗ್ಡ್ಯಾಕ್ ಜಾತಾ, ಖರೆ ಜಿಕಿನಾ, ಬುರ್ಶಿ ಬುದ್ದ್ ವಾಪರಲ್ಲ್ಯಾ ಸಾಟ್ನಿ ಹಾರ್ತಾ. 26 ತೆಚೆ ಜೆವಾನ್ ಕರಲ್ಲಿ ಲೊಕಾಚ್ ತೆಕಾ ವಿರೊದ್ ಹೊವ್ನ್ ಉಟ್ತಾತ್, ಉತ್ತರ್ ದಿಕ್ಕಾಚ್ಯಾ ರಾಜ್ಯಾಚೊ ಸಯ್ನ್ ಹೊಂವ್ನ್ ಜಾತಾ, ಲೈ ಲೊಕಾ ಮರುನ್ ಪಡ್ತಾತ್. 27 ತೆ ದೊನಿ ರಾಜಾ ಎಕಾಮೆಕಾಕ್ ಬುರ್ಸ್ಯಾ ಮನಾಚೆ ಹೊವ್ನ್, ಎಕುಚ್ ಮೆಜಾ ವರ್‍ತಿ ಜೆವ್ನಾಕ್ ಬಸ್ಲ್ಯಾರ್ಬಿ ಝುಟೆಚ್ ಬೊಲುನ್ಗೆತಾತ್, ಖರೆ ಸಮಾ ಎಳ್ ಯೆಯ್ ಪತರ್ ತೆಂಚ್ಯಾಕ್ಡೆ ಕಾಯ್ಬಿ ಕರುಕ್ ಹೊಯ್ನಾ. 28 ತೆಜ್ಯಾ ಮಾನಾ ತೊ ಬುರ್ಸೊ ರಾಜಾ ಲೈ ಆಸ್ತಿ ಸ್ವತಾಚಿ ಕರುನ್ಗೆವ್ನ್, ಅಪ್ಲ್ಯಾ ದೆಸಾಕ್ ಪರ್‍ತುನ್ ಜಾತಾ, ತೆಜೊ ಮನ್ ಪವಿತ್ರ್ ಕರಾರಾಕ್ನಿ ವಿರೊದ್ ಹೊವ್ನ್ ರ್‍ಹಾತಾ, ತೊ ಹೆಕಾ ಸಗ್ಳ್ಯಾಕ್ ವಿರೊದ್ ಹೊವ್ನ್ ಕಾಮ್ ಕರುನ್ ಅಪ್ಲ್ಯಾ ಸ್ವತ್ಯಾಚ್ಯಾ ದೆಶ್ಯಾಕ್ ಪರ್‍ತುನ್ ಜಾತಾ. 29 ನೆಮಲ್ಲ್ಯಾ ಎಳಾರ್ ತೊ ಅನಿ ಪರ್‍ತುನ್ ದಕ್ಷಿನ್ ದಿಕ್ಕಾಕ್ ಯೆತಾ, ಖರೆ ಅದ್ದಿ ಹೊಲ್ಲ್ಯಾ ಸಾರ್ಕೆಚ್ ದೊನ್ವೆಪಟಿ ಹೊಯ್ನಾ. 30 ಕಶ್ಯಾಕ್ ಮಟ್ಲ್ಯಾರ್, ಕಿತ್ತಿಮಾಚಿ ಮೊಟಿ ಢೊನಾ ತೆಕಾ ವಿರೊಧ್ ಹೊವ್ನ್ ಯೆತಾತ್, ತೆಜ್ಯಾ ವಯ್ನಾ ತೊ ಧಯ್ರೊ ಕಳ್ದುನ್ಗೆವ್ನ್ ಪವಿತ್ರ್ ಕರಾರಾಕ್ನಿ ವಿರೊಧ್ ರಾಗ್ ಹೊತಾ, ಅನಿ ತೊ ಪರ್‍ತುನ್ ಯೆವ್ನ್ ಪವಿತ್ರ್ ಕರಾರಾಕ್ ವಿರೊದ್ ಹೊಲ್ಲ್ಯಾಂಚ್ಯಾ ವಾಂಗ್ಡಾ ಚಕೊಟ್ ರ್‍ಹಾತಾ. 31 ತೆನಿ ಧಾಡಲ್ಲೊ ಸಯ್ನ್ ಪವಿತ್ರ್ ಗುಡಿಯಾಕ್ನಿ ಅಶುದ್ದ್ ಕರುನ್, ಸದ್ದಾಚಿ ಬಲಿಯಾ ಹಾಳ್ ಕರುನ್, ನಾಶ್ ಕರ್‍ತಲೆ ಬುರ್ಸೊ ವಸ್ತ್ ಇಬೆ ಕರ್‍ತಾತ್. 32 ಅನಿ ಕರಾರಾಕ್ ವಿರೊದ್ ಬುರ್ಸೆಪಾನ್ ಕರುನ್ ಚಲ್ತಲ್ಯಾಕ್ನಿ ಬರೆ ಬೊಲುನ್ ಹಾಳ್ ಕರ್ತಾ, ಖರೆ ಅಪ್ನಾಚ್ಯಾ ದೆವಾಚ್ಯಾ ವಿಶಯಾತ್ ಗೊತ್ತ್ ಹೊತ್ತಿ ಲೊಕಾ ತೆಜ್ಯಾ ಗೊಸ್ಟಿಯಾಕ್ನಿ ಮಾನಿ ನಾತ್. 33 ಲೊಕಾತ್ನಿ ಬುದ್ದ್ ಹೊತ್ತಿ ಲೊಕಾ ಉಲ್ಲ್ಯಾಕ್ನಿ ಶಿಕಾಪಾ ಕರ್‍ತಾತ್, ಖರೆ ಲೈ ದಿಸಾಂಚ್ಯಾ ಪತರ್ ಆಗಿನ್, ಕೊಯ್ತ್ಯಾನ್, ಬಂಧಿಖಾನ್ಯಾತ್ನಿ ಗಾವ್ನ್, ಅನಿ ಚೊರಿಕ್ ಗಾವ್ನ್, ತರಾಸಾತ್ ಪಡ್ತಾತ್. 34 ತೆನಿ ಪಡಲ್ಲ್ಯಾ ತನ್ನಾ ದೆವಾಚ್ಯಾ ಲೊಕಾಕ್ನಿ ಉಲ್ಲಿ ಮಜ್ಜತ್ ಗಾವ್ತಾ, ಖರೆ ಲೈ ಲೊಕಾ ತೆಂಕಾ ಪಸ್ವನ್ಕಿಚಿ ಗೊಸ್ಟಿಯಾ ಬೊಲುನ್ ಮಿಳ್ವುನ್ಗೆತಾತ್. 35 ತವ್ಡೆಚ್ ನಸ್ತಾನಾ ತ್ಯಾ ಬುದ್ವಂತ್ ಮುಖಂಡಾತ್ನಿ ಉಲ್ಲ್ಯಾ ಲೊಕಾಕ್ನಿ ಜಿವ್ ಕಾಡುನ್ ಹೊತಾ, ಹೆ ಸಗ್ಳೆ ಆಕ್ರಿಕ್ ದೆವಾನ್ ನೆಮುನ್ ಥವಲ್ಲ್ಯಾ ಎಳಾರ್ ಹೊತಾ.

36 ರಾಜಾ ಅಪ್ನಾಚ್ಯಾ ಮನಾಕ್ ಯೆಲ್ಲ್ಯಾ ಸಾರ್ಕೆ ಕರ್ತಾ, ಅಪ್ನಾಕುಚ್ ಅಪ್ನಿ ಬಡಾಯ್ ಬೊಲುನ್ಗೆವ್ನ್, ಸಗ್ಳ್ಯಾ ದೆವಾಂಚ್ಯಾನ್ಕಿ ಮೊಟೊ ಮನುನ್ ಘೆವ್ನ್ ದೆವಾಕ್ನಿ ವಿರೊಧ್ ಹೊವ್ನ್ ಆಜಾಪಾಚಿ ವಿಶಯಾ ಬೊಲುನ್ಗೆತ್, ರಾಗ್ ಕಮ್ಮಿ ಹೊಯ್ ಪತರ್ಬಿ ವಾಡ್ವಳ್ಕಿ ಹೊವ್ನ್ ಗೆತ್ ರ್‍ಹಾತಾ, ನಿರ್ದಾರ್ ಕರುನ್ ಥವಲ್ಲೆ ಕರುಕುಚ್ ಪಾಜೆ ಹೊಲ್ಲೆ ಹಾಯ್. 37 ಅನಿ ತೊ ಅಪ್ಲ್ಯಾ ಪುರ್ವಜಾಂಚಿ ದೆವಾ ಹೊಂವ್ದಿತ್, ಬಾಯ್ಕಾ ಮಾನ್ಸಾಂಚೊ ಪ್ರೆಮಾಚೊ ದೆವ್ ಹೊಂವ್ದಿತ್, ಅನಿ ಖಲ್ಯಾ ದೆವಾಕ್ಬಿ ಧ್ಯಾನ್ ದಿಯ್ನಾ, ಕಶ್ಯಾಕ್ ಮಟ್ಲ್ಯಾರ್, ತೆನಿ ಸಗ್ಳ್ಯಾ ದೆವಾಂಚ್ಯಾ ಕಿಂತಾಬಿ ಅಪ್ನಾಕುಚ್ ವರ್‍ತಿ ಕರುನ್ಗೆಟ್ಲಾ. 38 ತೊ ಹೆಂಕಾ ಸಗ್ಳೆ ಮಾನ್ ದಿತಲ್ಯಾ ಕಿಂತಾ ಕೊಟ್ಯಾಂಚ್ಯಾ ದೆವಾಕ್ ಮಾನ್ ದಿತಾ, ಅಪ್ನಾಚ್ಯಾ ಪುರ್ವಜಾಕ್ನಿ ವಳಕ್ ನಸಲ್ಲ್ಯಾ ದೆವಾಕ್ನಿ ಸೊನ್ಯಾನಿ, ಚಾಂದಿನ್, ಕಿಮ್ತಿಚ್ಯಾ ಗುಂಡ್ಯಾಂಚೆ ದೆನೆ ದಿವ್ನ್ ಮಾನ್ ಕರ್ತಾ. 39 ಅನಿ ತೊ ದುಶ್ರ್ಯಾ ದೆವಾಂಚ್ಯಾ ಮಜತಿ ವಯ್ನಾ, ಲೈ ಘಟ್ ಮುಟ್ ಹೊತ್ತ್ಯಾ ಕೊಟ್ಯಾಂಚ್ಯಾ ವರ್‍ತಿ ಲಡಾಯ್ ಕರ್ತಾ, ಅಪ್ನಾಚ್ಯಾ ಮನಾಕ್ ಯೆಲ್ಲ್ಯಾಕ್ನಿ ಲೈ ಕರುನ್ ಮಾನ್ ದಿತಾ, ಅನಿ ತೆಂಕಾ ಲೈ ಲೊಕಾಂಚ್ಯಾ ವರ್‍ತಿ ಅಧಿಕಾರಿ ಕರುನ್ ನೆಮಸ್ತಾ, ಪಯ್ಸ್ಯಾಚ್ಯಾ ಆಶ್ಯಾಕ್ ಪಡುನ್ ಸಗ್ಳ್ಯಾ ದೆಶಾಕುಚ್ ಲಂಚಾಕ್ ಸೊಡ್ತಾ. 40 ಆಕ್ರಿಚ್ಯಾ ಎಳಾರ್ ದಿಸ್ ಬುಡ್ತಲ್ಯಾ ದಿಕ್ಕಾಚೊ ರಾಜಾ ತೆಜ್ಯಾ ವರ್‍ತಿ ಝಗ್ಡೊ ಕರ್ತಾ, ಅನಿ ಉತ್ತರ್ ದಿಕ್ಕಾಚೊ ರಾಜಾ ರಥಾ, ಅನಿ ತಿ ಚಾಲ್ವುತಲ್ಯಾಕ್ನಿ ಘೆವ್ನ್, ಅನಿ ಲೈ ಢೊನಾ ಹಾನುನ್, ವಾರೆ ವಾದಾಳ್ ಯೆಲ್ಲ್ಯಾಚ್ಯಾ ಗತಿನ್, ದೆಸಾತ್ ಗುಸುನ್ ಹೊಂವಾರ್ಯಾಚ್ಯಾ ಗತಿನ್ ಸಗ್ಳೆ ನಾಶ್ ಕರುನ್ ಜಾತಾ. 41 ಅನಿ ತೊ ಸುಂದರ್ ದೆಶ್ಯಾಚ್ಯಾ ಭುತ್ತುರ್ ಗುಸ್ತಾ, ಲೈ ದೆಶಾ ನಾಶ್ ಹೊತಾತ್, ಖರೆ ಎದೊಮ್, ಮೊವಾಬ್ ಅನಿ ಅಮ್ಮೊನಿಯಾಂಚಿ ಮುಖಂಡಾ ತೆಜ್ಯಾ ಹಾತಿಕ್ ಗಾಯ್ನಾತ್. 42 ಅನಿ ತೊ ಹುರಲ್ಲ್ಯಾ ದೆಶಾಂಚ್ಯಾ ವರ್‍ತಿ ಅಪ್ನಾಚೊ ಹಾತ್ ಉಕಲ್ತಾ, ಅನಿ ಇಜಿಪ್ತ್ ದೆಶ್ ತೆಜ್ಯಾಕ್ನಾ ಚುಕ್ವುನ್ ಘೆಯ್ನಾ. 43 ಖರೆ ತೊ ಸೊನೆ ಅನಿ ಚಾಂದಿಚ್ಯಾ ದಿವ್ಯಾಂಚ್ಯಾ ವರ್‍ತಿ ಅನಿ ಇಜಿಪ್ತಾಚ್ಯಾ ಸಗ್ಳ್ಯಾ ಕಿಮ್ತಿಚ್ಯಾ ವಸ್ತಾಂಚ್ಯಾ ವರ್‍ತಿ ಅಧಿಕಾರ್ ಥವ್ನ್ ಘೆಟಲ್ಲೊ ರ್‍ಹಾತಾ, ಲಿಬಿಯಾ ಅನಿ ಎಥಿಯೊಪಿಯಾಚಿ ಲೊಕಾ ತೆಜ್ಯಾ ವಾಂಗ್ಡಾ ಜಾತಾತ್. 44 ಖರೆ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ಅನಿ ಉತ್ತರ್ ದಿಕ್ಕಾಕ್ನಾ ಯೆಲ್ಲಿ ಖಬ್ರಿಯಾ ತೆಕಾ ಭಿಂವಸ್ತಾತ್, ತೆಜ್ಯಾ ವಯ್ನಾ ತೊ ಲೈ ರಾಗಾನ್ ಉಲ್ಲ್ಯಾ ಲೊಕಾಕ್ನಿ ಮಾರುನ್ ನಾಶ್ ಕರುಚೆ ಮನುನ್ ಜಾವ್ಕ್ ಲಾಗ್ತಾ. 45 ಅನಿ ತೊ ಸಮುಂದರಾಚ್ಯಾ ಅನಿ ಸುಂದರ್ ನಿತಳ್ ಮಡ್ಡಿಯಾಂಚ್ಯಾ ಮದ್ದಿ ರಾಜಾಚ್ಯಾ ಘರಾಚಿ ಸಾರ್ಕಿ ಸಾವ್ಕಾರ್ಕಿಚಿ ಅಪ್ಲಿ ಬಿಡಾರಾ ಭಾಂದಸ್ತಾ, ಖರೆ ತೊ ನಾಶ್ ಹೊತಾ ಅನಿ ತೆಕಾ ಕೊನ್ಬಿ ಮಜ್ಜತ್ ಕರಿನಾತ್.