Daniel 3

ನೆಬುಕಡ್ನೆಜ್ಜರಾನ್ ಹರ್ ಎಕ್ಲ್ಯಾಕ್ಬಿ ಸೊನ್ಯಾಚ್ಯಾ ಮುರ್ತಿಕ್ ಫುಜ್ಯಾ ಕರುಚೆ ಮನುನ್ ಹುಕುಮ್ ದಿಲ್ಲೆ

1 ರಾಜಾ ನೆಬುಕದ್ನೆಜ್ಜರಾನ್ ತೆರಾ ಟಕ್ಕಲ್ ಭರ್ ಉಪ್ಪರ್, ಅನಿ ತಿನ್ ವಾವ್ ರುಂದ್ ಎಕ್ ಸೊನ್ಯಾಚಿ ಮುರ್ತಿ ಕರ್ಸುನ್ ಬಾಬಿಲೊನ್ ರಾಜ್ವಾಡ್ಯಾಚ್ಯಾ ದುರಾ ಮನ್ತಲ್ಯಾ ಮ್ಹಾಳ್ ಜಾಗ್ಯಾರ್ ಇಬೆ ಕರ್ಲ್ಯಾನ್. 2 ಮಾನಾ ರಾಜಾನ್ ಅಪ್ನಿ ಕರಲ್ಲ್ಯಾ ಸೊನ್ಯಾಚ್ಯಾ ಮುರ್ತಿಕ್ ಉದ್ಗಾಟನ್ ಕರುಕ್ ಸಾಟ್ನಿ ಕರುಕ್ ರಾಜ್ ಪ್ರತಿನಿಧಿ, ಮುಖಂಡಾ, ರಾಜ್ಯ್ ಪಾಲ್, ಮಂತ್ರಿ, ಖಜಾನ್ಯಾಚೊ ಅಧಿಕಾರಿ ಅನಿ ನ್ಯಾಯಾಧಿಪತಿ ಅನಿ ಪ್ರಾಂತ್ಯಾಚ್ಯಾ ಸಗ್ಳ್ಯಾ ಅಧಿಕಾರಿಕ್ನಿ ಬಲ್ವುಕ್ ಲಾವ್ಲ್ಯಾನ್. 3 ತೆ ಸಗ್ಳಿ ಅಧಿಕಾರಿಯಾ, ರಾಜ್ ಪ್ರತಿನಿಧಿ, ಮುಖಂಡಾ, ರಾಜ್ಯ್ ಪಾಲ್, ಮಂತ್ರಿ, ಖಜಾನ್ಯಾಚೊ ಅಧಿಕಾರಿ ಅನಿ ನ್ಯಾಯಾಧಿಪತಿ ಅನಿ ಸಗ್ಳ್ಯಾ ಪ್ರಾಂತ್ಯಾಂಚಿ ಅಧಿಕಾರಿಯಾ, ರಾಜಾ ನೆಬುಕದ್ನೆಜ್ಜರಾನ್ ತಯಾರ್ ಕರಲ್ಲ್ಯಾ ಮುರ್ತಿಕ್ ಉದ್ಗಾಟನ್ ಕರುಕ್ ಸಾಟ್ನಿ ಯೆವ್ನ್ ಮುರ್ತಿಚ್ಯಾ ಇದ್ರಾಕ್ ಇಬೆ ರಾಲ್ಯಾನಿ. 4 ತನ್ನಾ ಪರ್ಗಟ್ ಕರ್‍ತಲ್ಯಾ ಮಾನ್ಸಾನ್ ಮೊಟ್ಟ್ಯಾ ಧನಾನ್, ಸಗ್ಳ್ಯಾ ಕುಳಿಚ್ಯಾ, ಭಾಶ್ಯಾಚ್ಯಾ ಅನಿ ರಾಜ್ವಾಡ್ಯಾಚ್ಯಾ ಲೊಕಾನು ತುಮ್ಕಾ ರಾಜಾಕ್ನಾ ಹುಕುಮ್ ಹೊಲಾ; 5 ತುಮಿ, ಪಾಂವೊ, ಪಿರ್ಲುಕ್, ಕಿನ್ನರಿ, ಸರಂಗಿ, ವಿನೆ, ಶನಯಾ ಹ್ಯಾ ಸಗ್ಳ್ಯಾ ನಮುನ್ಯಾಚ್ಯಾ ವಾಜ್ಪಾಂಚೊ ಆವಾಜ್ ಆಯ್ಕಲ್ಲ್ಯಾ ತನ್ನಾಚ್, ರಾಜಾ ನೆಬುಕದ್ನೆಜ್ಜರಾನ್ ಇಬೆ ಕರಲ್ಲ್ಯಾ ಸೊನ್ಯಾಚ್ಯಾ ಮುರ್ತಿಕ್ ಟಕ್ಲೆ ಬಾಗ್ವುನ್, ಆರಾದನ್ ಕರುಚೆ. 6 ಜೆ ಕೊನ್ ಡಬ್ಬ್ ಪಡುನ್ ಆರಾದನ್ ಕರಿನಾ, ತೊ ತನ್ನಾಚ್ ಝಳ್ ಝಳಿತ್ ಪೆಟ್ತಲ್ಯಾ ಆಗಿತ್ ಟಾಕುನ್ ಹೊತಾ ಮನುನ್ ಪರ್ಗಟ್ ಕರ್ಲ್ಯಾನ್. 7 ತಸೆ ಹೊವ್ನ್ ತ್ಯಾ ಎಳಾರ್ ಸಗ್ಳ್ಯಾ ಭಾಶಾ, ದೆಶ್, ಕುಳಿ, ಪ್ರಾಂತ್ಯಾಚ್ಯಾ ಲೊಕಾನಿ, ತುತ್ತುರಿ, ಪಿರ್ಲುಕ್, ಕಿನ್ನರಿ, ಸರಂಗಿ, ವಿನೆ ಸಗ್ಳ್ಯಾ ನಮುನ್ಯಾಚ್ಯಾ ವಾಜ್ಪಾಂಚೊ ನಾದ್ ಆಯ್ಕುನ್, ನೆಬುಕದ್ನೆಜ್ಜರ್ ರಾಜಾನ್ ಇಬೆ ಕರಲ್ಲ್ಯಾ ಸೊನ್ಯಾಚ್ಯಾ ಮುರ್ತಿಕ್ ಡಬ್ಬ್ ಪಡುನ್ ಆರಾದನ್ ಕರ್ಲ್ಯಾನಿ.

ದಾನಿಯೆಲ್ ಅನಿ ತೆಚಿ ವಾಂಗ್ಡಿಯಾಂಚ್ಯಾ ವರ್‍ತಿ ಮಾನುಕ್ ನಾತ್ ಮನ್ತಲೊ ಅಪ್ವಾದ್ ಯೆಲ್ಲೆ

8 ಅಸೆ ರ್‍ಹಾತಾನಾ ಉಲ್ಲಿ ಬುದ್ವಂತಾಂಚ್ಯಾ ಲೊಕಾ ಬಾಬಿಲೊನಾಚ್ಯಾ ಜುದೆವಾಂಚ್ಯಾ ವರ್‍ತಿ ಅಪ್ವಾದ್ ವಾವುಕ್, ಸಾಟ್ನಿ ರಾಜಾಚ್ಯಾ ಇದ್ರಾಕ್ ಯೆವ್ನ್, 9 ರಾಜಾ ನೆಬುಕದ್ನೆಜ್ಜರ್ ತಿಯಾ ಸರ್ವತಾಕ್ ಝಿತ್ತೊ ರಾ! 10 ಧನಿ, ಸಗ್ಳ್ಯಾ ನಮುನ್ಯಾಚ್ಯಾ ವಾಜ್ಪಾಚೊ ಆವಾಜ್ ಆಯ್ಕಲ್ಲ್ಯಾ ತನ್ನಾ, ಹರ್ ಎಕ್ಲೊಬಿ ಡಬ್ಬ್ ಪಡುನ್ ಸೊನ್ಯಾಚ್ಯಾ ಮುರ್ತಿಕ್ ಆರಾದನ್ ಕರುಂದಿತ್, 11 ಅನಿ ಜೆ ಕೊನ್ ಡಬ್ಬ್ ಪಡುನ್ ಆರಾದನ್ ಕರಿನಸ್ಲ್ಯಾರ್, ತೆಕಾ ಝಳ್ ಝಳಿತ್ ಪೆಟ್ತಲ್ಯಾ ಆಗಿತ್ ಟಾಕುಚೆ ಮನುನ್ ಹುಕುಮ್ ದಿಲೆ ನ್ಹಯ್. 12 ತಿಯಾ ಬಾಬಿಲೊನ್ ರಾಜ್ವಾಡ್ಯಾಚೆ ಕಾಮ್ ವಯ್ಸುನ್ ದಿಲ್ಲಿ ಜುದೆವಾಂಚಿ ಶದ್ರಕ್, ಮೆಶೆಕ್, ಅನಿ ಅಬಿದ್ನೆಗೊ ಮನ್ತಲಿ ಮಾನ್ಸಾ ಹಾತ್, ಹೆನಿ ತುಕಾ ಧ್ಯಾನ್ ದಿಯ್ನಾ ಹೊಲಾತ್, ಅನಿ ತುಜ್ಯಾ ದೆವಾಕ್ನಿ ಆರಾದನ್ ಕರಿನಾತ್, ಅನಿ ತಿಯಾ ಇಬೆ ಕರಲ್ಲ್ಯಾ ಸೊನ್ಯಾಚ್ಯಾ ಮುರ್ತಿಕ್ಬಿ ಮಾನ್ ಬಾಗ್ವಿನಾತ್, ಮನುನ್ ಸಾಂಗಲ್ಲ್ಯಾ ತನ್ನಾ,

13 ನೆಬುಕದ್ನೆಜ್ಜರ್ ರಾಜಾ ರಾಗಾನ್ ಪೆಟ್ಲೊ, ಅನಿ ಶದ್ರಕ್, ಮೆಶೆಕ್, ಅಬಿದ್ನೆಗೊ ಮನ್ತಲ್ಯಾಕ್ನಿ ಧರುನ್ ಹಾನುಕ್ ಹುಕುಮ್ ದಿಲ್ಯಾನ್. 14 ತೆಂಕಾ ಧರುನ್ ಹಾನಲ್ಲ್ಯಾ ತನ್ನಾ, ನೆಬುಕದ್ನೆಜ್ಜರಾನ್, ಶದ್ರಕ್, ಮೆಶೆಕ್, ಅಬಿದ್ನೆಗೊ, ತುಮಿ ಮಾಜ್ಯಾ ದೆವಾಕ್ನಿ ಆರಾದನ್ ಕರಿನಸ್ತಾನಾ, ಮಿಯಾ ಇಬೆ ಕರಲ್ಲ್ಯಾ ಮುರ್ತಿಕ್ ಮಾನ್ ಬಾಗ್ವಿನಸಲ್ಲೆ ಆಯಿಕ್ಲೊ ತೆ ಖರೆಚ್ ಕಾಯ್? 15 ಅತ್ತಾ ತರಿಬಿ ತುಮಿ ತಯಾರ್ ಹೊವ್ನ್ ಸಗ್ಳ್ಯಾ ನಮುನ್ಯಾಚಿ ವಾಜ್ಪಾ ತಂಬುರಿ, ತುತ್ತುರಿ, ಕಿನ್ನರಿ, ವಿನೆ, ಸರಂಗಿ, ಶನಯಾಂಚೊ ನಾದ್ ಆಯಿಕ್ತಾನಾ ಮಿಯಾ ಇಬೆ ಕರಲ್ಲ್ಯಾಸೊನ್ಯಾಚ್ಯಾ ಮುರ್ತಿಕ್ ಮಾನ್ ಬಾಗ್ವುನ್, ಆರಾದನ್ ಕರ್ಲ್ಯಾರ್ ಬರೆ ಹಾಯ್, ನಾತರ್ ತನ್ನಾಚ್ ತುಮ್ಕಾ ಝಳ್ ಝಳಿತ್ ಪೆಟ್ತಲ್ಯಾ ಆಗಿತ್ ಟಾಕುನ್ ಹೊತಾ, ತುಮ್ಕಾ ಮಾಜ್ಯಾ ಹಾತಿತ್ನಾ ಸೊಡಸ್ತಲೊ ದೆವ್ ಕೊನ್? ಮಟ್ಲ್ಯಾನ್. 16 ಹೆ ಆಯ್ಕುನ್ ಶದ್ರಕ್, ಮೆಶೆಕ್, ಅಬಿದ್ನೆಗೊ ಹೆನಿ ರಾಜಾಕ್, ರಾಜಾ ನೆಬುಕದ್ನೆಜ್ಜರ್, ಹ್ಯಾ ವಿಶಯಾತ್ ಅಮಿ ಕಾಯ್ಬಿ ಸಾಂಗ್ತಲೆ ನಕ್ಕೊ, 17 ರಾಜಾ, ಅಮಿ ಆರಾದನ್ ಕರ್‍ತಲ್ಯಾ ದೆವಾಕ್ ಇಚ್ಚ್ಯಾ ರಾಲ್ಯಾರ್, ತೊ ಅಮ್ಕಾ ಝಳ್ ಝಳಿತ್ ಪೆಟ್ತಲ್ಯಾ ಆಗಿತ್ನಾ ಸುಟ್ಕಾ ಕರುಕ್ ಸಕ್ತಾ, ತೊ ಕಸೊ ತರ್ಬಿ ಅಮ್ಕಾ ತುಜ್ಯಾ ಹಾತಿತ್ನಾ ಸೊಡಸ್ತಾ. 18 ಖರೆ, ರಾಜಾ ತುಕಾ ಹೆ ಕಳುನ್ ರಾಂವ್ದಿತ್, ತೆಚಿ ಇಚ್ಚ್ಯಾ ನಸ್ಲ್ಯಾರ್ಬಿ ಅಮಿ ತುಜ್ಯಾ ದೆವಾಕ್ನಿ ಆರಾದನ್ ಕರಿನ್ಯಾಂವ್, ಅನಿ ತಿಯಾ ಇಬೆ ಕರಲ್ಲ್ಯಾ ಸೊನ್ಯಾಚ್ಯಾ ಮುರ್ತಿಕ್ ಮಾನ್ ಬಾಗ್ವಿನ್ಯಾಂವ್ ಮಟ್ಲ್ಯಾನಿ.

ದಾನಿಯೆಲಾಕ್ ಅನಿ ತೆಜ್ಯಾ ವಾಂಗ್ಡಿಯಾಕ್ನಿ ಮರ್ನಾಚಿ ಶಿಕ್ಷ್ಯಾ ದಿಲ್ಲೆ

19 ತನ್ನಾ ನೆಬುಕದ್ನೆಜ್ಜರಾನ್, ಶದ್ರಕ್, ಮೆಶೆಕ್, ಅಬಿದ್ನೆಗೊ ಮನ್ತಲ್ಯಾಂಚ್ಯಾ ವರ್‍ತಿ ಲೈ ರಾಗಾನ್ ಪೆಟುನ್, ಆಗಿಕ್ ಸದ್ದಾಕಿಂತಾಬಿ ಸಾತ್ ಪಟ್ಟ್ ಜಾಸ್ತಿ ಪೆಟ್ವುಚೆ ಮನುನ್ ಹುಕುಮ್ ದಿಲ್ಯಾನ್. 20 ಅನಿ ಸಯ್ನ್ಯಾತ್ ಹೊತ್ತ್ಯಾ ಉಲ್ಲ್ಯಾ ಘಟ್ಮುಟ್ ಹೊತ್ತ್ಯಾಕ್ನಿ ಹ್ಯಾ ಶದ್ರಕ್ ಮೆಶೆಕ್ ಅನಿ ಅಬಿದೆನೆಗೊಕ್ ಭಾಂದುನ್ ಜಳ್ತಲ್ಯಾ ಆಗಿತ್ ಟಾಕುಚೆ ಮನುನ್ ಹುಕುಮ್ ದಿಲ್ಯಾನ್. 21 ತಸೆ ತೆಂಕಾ ಕಪ್ಡೆ, ಅನಿ ಟೊಪಿಯಾ, ಹ್ಯಾ ಸಗ್ಳ್ಯಾ ನೆಸ್ಪಾಂಚ್ಯಾ ಸಮೆತ್ ಭಾಂದುನ್ ಪೆಟ್ತಲ್ಯಾ ಆಗಿತ್ ಟಾಕುನ್ ಹೊಲೆ. 22 ಅಸೆ ರ್‍ಹಾತಾನಾ ರಾಜಾಚ್ಯಾ ಖಡಕ್ ಹುಕುಮಾ ವಯ್ನಾ ಅನಿ ಆಗ್ ಲೈ ಪೆಟಿತ್ ಹೊತ್ತ್ಯಾ ಸಾಟ್ನಿ ಶದ್ರಕ್, ಮೆಶೆಕ್ ಅನಿ ಅಬಿದ್ನೆಗೊ ಹೆಂಕಾ ಟಾಕುಕ್ ಮನುನ್ ಯೆಲ್ಲ್ಯಾ ಮಾನ್ಸಾಕ್ನಿ ಆಗಿಚ್ಯಾ ಝಪಾಟ್ಯಾನ್ ಜಾಳ್ವುನ್ ಮಾರುನ್ ಟಾಕ್ಲ್ಯಾನ್. 23 ಶದ್ರಕ್, ಮೆಶೆಕ್, ಅಬಿದ್ನೆಗೊ ಹೆನಿ ತಿಗೆಬಿ ಭಾಂದಲ್ಲೆ ಹೊತ್ತೆ ತಸೆಚ್ ಪೆಟ್ತಲ್ಯಾ ಆಗಿಚ್ಯಾ ಮದ್ದಿ ಪಡ್ಲೆ. 24 ತನ್ನಾ, ರಾಜಾ ನೆಬುಕದ್ನೆಜ್ಜರಾನ್, ಕಂಗಾಲ್ ಹೊವ್ನ್ ಉಟುನ್ ಇಬೆ ರಾವ್ನ್, ಅಪ್ನಾಚ್ಯಾ ಮಂತ್ರಿಯಾಕ್ನಿ ತಿಗ್ಯಾಕ್ನಿ ಭಾಂದುನ್ ಆಗಿತ್ ಟಾಕುಕ್ ನಾತ್ ಕಾಯ್? ಮನುನ್ ಇಚಾರ್‍ತಾನಾ, ತೆನಿ ಹೊಯ್, ಧನಿ ತೆ ಖರೆ ಹಾಯ್ ಮನುನ್ ಜವಾಬ್ ದಿಲ್ಯಾನಿ. 25 ಅನಿ ಮಾಕಾ ಹಿತ್ತೆ ಚಾರ್ ಜನಾ ಭಾಂದುಕ್ ನಸಲ್ಲೆ ಆಗಿತ್ ಚಲುಲಾಗಲ್ಲೆ ದಿಸ್ತಾತ್ ನ್ಹಯ್, ತೆಂಕಾ ಕಾಯ್ಬಿ ಹಾನಿ ಹೊವ್ಕ್ ನಾ, ಚಾರ್ವೆಚ್ಯಾ ಮಾನ್ಸಾಚೆ ತೊಂಡ್ ದೆವಾಚ್ಯಾ ಲೆಕಾಚ್ಯಾ ಸಾರ್ಕೆ ಹೊಳ್ವುಲಾಗಲ್ಲೆ ದಿಸುಲ್ಲಾ ಮಟ್ಲ್ಯಾನ್.

ತಿನ್ ಮಾನ್ಸಾ ಸುಟ್ಕಾ ಹೊತಲೆ ಅನಿ ಜಾಸ್ತಿಚೊ ಅಧಿಕಾರ್ ದಿಲ್ಲೆ

26 ಅನಿ ನೆಬುಕದ್ನೆಜ್ಜರ್ ರಾಜಾನ್, ಝಳ್ ಝಳಿತ್ ಪೆಟುಲಾಗಲ್ಯಾ ಆಗಿಚ್ಯಾ ಜಗ್ಗೊಳ್ ಜಾವ್ನ್, ಸಗ್ಳೆ ಕರುಕ್ ಶಕ್ತ್ ಹೊತ್ತ್ಯಾ ದೆವಾಚಿ ಸೆವಕಾ ಶದ್ರಕ್, ಮೆಶೆಕ್, ಅಬಿದ್ನೆಗೊ ಭಾಯ್ರ್ ಯೆವಾ ಮನುನ್ ಬೊಬ್ ಮಾರ್ತಾನಾ, ತೆನಿ ಆಗಿತ್ನಾ ಭಾಯ್ರ್ ಯೆಲ್ಯಾನಿ. 27 ಥೈ ಗೊಳಾ ಹೊವ್ನ್ ಯೆಲ್ಲ್ಯಾ ಮಂತ್ರಿಯಾ, ದೆಶಾಧಿಪತಿಯಾ, ಮುಖಂಡಾ ಹೆನಿ ಸಗ್ಳ್ಯಾನಿ ದಾನಿಯೆಲಾಕ್ ಅನಿ ತೆಜ್ಯಾ ವಾಂಗ್ಡಿಯಾನಿ ಬಗುನ್ ತೆಂಚ್ಯಾ ವರ್‍ತಿ ಆಗಿಚೊ ಅಧಿಕಾರ್ ಚಾಲುಕ್ನಾ, ತೆಂಚಿ ಕೆಸಾಬಿ ಜಳುಕ್ನಾತ್, ತೆಂಚ್ಯಾ ಕಪ್ಡ್ಯಾಕ್ನಿ ಆಗ್ ಲಾಗುಕ್ನಾ ಆಗಿಚಿ ವಾಸ್ಬಿ ತೆಂಕಾ ಯೆಯ್ನಾ, ಆಗಿನ್ ತೆಂಕಾ ಆಪ್ಡುಕ್ ನಾ ಮನುನ್ ಕಳ್ವುನ್ ಘೆಟ್ಲ್ಯಾನಿ. 28 ತನ್ನಾ ನೆಬುಕದ್ನೆಜ್ಜರಾನ್, ಶದ್ರಕ್, ಮೆಶೆಕ್, ಅಬಿದ್ನೆಗೊಂಚ್ಯಾ ದೆವಾಕ್ ಸುತ್ತಿ ಹೊಂವ್ದಿತ್! ಅಪ್ನಾಚ್ಯಾ ಧುತಾಕ್ ಧಾಡುನ್ ತೆನಿ ಅಪ್ನಾ ವರ್‍ತಿ ಬರೊಸೊ ಥವ್ನ್, ರಾಜಾಚೊ ಹುಕುಮ್ ಜಿಕುನ್, ಅಪ್ನಾಕ್ ಸೊಡುನ್ ದುಶ್ರ್ಯಾ ದೆವಾಕ್ನಿ ಆರಾದನ್ ಅನಿ ಸೆವಾ ಕರುಚೆ ನ್ಹಯ್ ಮನುನ್ ಅಪ್ನಾಕುಚ್ ಅಪ್ನಿ ಮರ್ನಾಕ್ ಒಪ್ಸುನ್ ದಿಲ್ಲ್ಯಾ ಸೆವಕಾಕ್ನಿ ಬರೆ ಕರ್ಲ್ಯಾನ್. 29 ಸಗ್ಳಾ ಕುಳಿ, ಭಾಶಾ, ದೆಶಾಚ್ಯಾ ಲೊಕಾತ್ನಿ ಕೊನ್ ತರ್ಬಿ ಶದ್ರಕ್, ಮೆಶೆಕ್ ಅನಿ ಅಬಿದ್ನೆಗೊಚ್ಯಾ ದೆವಾಚ್ಯಾ ವಿಶಯಾತ್ ಕೊನ್ಬಿ ಚುಕ್ ಬೊಲ್ಯಾರ್ ತೆಂಕಾ ತುಕ್ಡೆ ತುಕ್ಡೆ ಕರುನ್ ಕಾತ್ರುನ್, ತೆಂಚಿ ಘರಾ ನಾಶ್ ಕರುಚೆ ಮನುನ್ ಹುಕುಮ್ ದಿತಾ, ಅನಿ ಅಸೆ ಉದ್ದಾರ್ ಕರ್ತಲೊ ದೆವ್ ಅನಿ ಕೊನ್ಬಿನಾ ನ್ಹಯ್, ಮಟ್ಲ್ಯಾನ್. 30 ಅನಿ ಮಾನಾ ರಾಜಾನ್ ಶದ್ರಕ್, ಮೆಶೆಕ್, ಅಬಿದ್ನೆಗೊ ಮನ್ತಲ್ಯಾಕ್ನಿ ಬಾಬಿಲೊನ್ ರಾಜ್ವಡ್ಯಾತ್ ಮೊಟ್ಟ್ಯಾ ಪದ್ವಿಕ್ ಹಾನ್ಲ್ಯಾನ್.