Ester 4

ಮೊರ್ದೆಕೈನ್ ಎಸ್ತೆರಾಕ್ಡೆ ಮಜತ್ ಮಾಗಲ್ಲೆ

1 ಮೊರ್ದೆಕೈನ್ ಘಡಲ್ಲಿ ಘಟನಾ ಆಯ್ಕಲ್ಲ್ಯಾ ತನ್ನಾ, ಅಪ್ನಾಚೆ ಕಪ್ಡೆ ಪಿಂಜುನ್ ಘೆವ್ನ್, ಚಿಲಾಚೆ ಫಟೆ ನೆಸುನ್ ಘೆವ್ನ್, ರಕ್ಕಾ ಲಾವ್ನ್ ಘೆವ್ನ್, ಲೈ ದುಕ್ಕಾನ್ ಶಾರಾಚ್ಯಾ ಮದ್ದಿ ಯೆವ್ನ್, ಮೊಟ್ಯಾನ್ ರಡುನ್, 2 ರಾಜಾಚ್ಯಾ ಘರಾಚ್ಯಾ ದಾರಾಚ್ಯಾ ಇದ್ರಾಕ್ ಯೆವ್ನ್ ಇಬೆ ರಾಲೊ; ಕಶ್ಯಾಕ್ ಮಟ್ಲ್ಯಾರ್, ಚಿಲಾಚೆ ಫಟೆ ನೆಸಲ್ಲೊ ಮಾನುಸ್ ಭುತ್ತುರ್ ಜಾತಲೆ ನಾ ಮನುನ್ ಹುಕುಮ್ ಹೊಲ್ಲೊ ಹೊತ್ತೊ. 3 ಖಲ್ಯಾ ಖಲ್ಯಾ ಸಂಸ್ಥಾನಾಕ್ನಿ ರಾಜಾನ್ ಹುಕುಮ್ ಅನಿ ನಿರ್ದಾರ್ ಪರ್ಗಟ್ ಹೊಲಾ ತೈಯ್ ಸಗ್ಳ್ಯಾಕ್ಡೆ ಜುದೆವಾಂಚ್ಯಾ ಮದ್ದಿ ಮೊಟೆ ದುಖ್ ಅನಿ ಉಪಾಸಾಚೆ ಆಳಾಪ್ ಚಾಲು ಹೊಲೆ, ಲೈ ಲೊಕಾನಿ ಚಿಲಾಚಿ ಪಟಿ ಹಾತ್ರುನ್ ರಕ್ಕಾ ಘಾಲುನ್ ತೆಚ್ಯಾ ವರ್‍ತಿ ಬಸ್ಲ್ಯಾನಿ. 4 ತನ್ನಾ ಎಸ್ತೆರ್ ರಾನಿಚಿ ಸೆವಕಿಯಾ ಅನಿ ಕಂಚುಕಿಯಾ ತಿಚೆಕ್ಡೆ ಯೆವ್ನ್ ತಿ ಖಬರ್ ಸಾಂಗ್ತಾನಾ, ತಿಕಾ ಲೈ ಬೆಜಾರ್ ಹೊವ್ನ್ ಮೊರ್ದೆಕೈಕ್ ಕಪ್ಡೆ ಧಾಡುನ್ ದಿವ್ನ್, ಚಿಲಾಚೆ ಪಟೆ ಕಾಡುನ್ ಥವ್ನ್ ಹೆ ನೆಸುನ್ ಘೆ ಮಟ್ಲಿನ್, ಖರೆ ತೆನಿ ತೆ ಘೆವ್ಕ್ ನಾ. 5 ತನ್ನಾ ತಿನಿ ರಾಜಾಕ್ನಾ ಅಪ್ನಾಚಿ ಸೆವಾ ಕರುಕ್ ಮನುನ್ ನೆಮಲ್ಲ್ಯಾ ಹತಾಕ್ ಮನ್ತಲ್ಯಾ ರಾಜ ಕಂಚುಕಿಕ್ ಬಲ್ವುನ್, ತಿಯಾ ಮೊರ್ದೆಕೈ ಹೊತ್ತ್ಯಾಕ್ಡೆ ಜಾವ್ನ್ ಹೆ ಕಾಯ್, ಅನಿ ಅಸಿ ಕಶ್ಯಾಕ್ ಕರಲೈ ಮನುನ್ ಇಚಾರುನ್ ಯೆ ಮನುನ್ ಸಾಂಗುನ್ ಧಾಡ್ಲಿನ್. 6 ಹಾತಾಕ್ ರಾಜಾಚ್ಯಾ ಘರಾಚ್ಯಾ ಇದ್ರಾಕ್ ರ್‍ಹಾತಲ್ಯಾ ಶಾರಾಚ್ಯಾ ಮ್ಹಾಳಾತ್ ಬಸಲ್ಲ್ಯಾ ಮೊರ್ದೆಕೈಚ್ಯಾ ಜಗ್ಗೊಳ್ ಗೆಲ್ಲ್ಯಾ ತನ್ನಾ, 7 ಮೊರ್ದೆಕೈನ್ ಅಪ್ನಾಕ್ ಹೊಲ್ಲೆ ಸಗ್ಳೆ ಹಾಮಾನ್ ಜುದೆವಾಂಕ್ನಿ ನಾಶ್ ಕರುಚೆ ಮನುನ್ ಹುಕುಮ್ ಘೆವ್ಕ್ ಸಾಟ್ನಿ ರಾಜಾಚ್ಯಾ ಹುಂಡಿತ್ ಚಾಂದಿ ಮೆಜುನ್ ಘಾಲ್ತಾ ಮನುನ್ ಆನ್ ಗಾಲುನ್ ಅನಿ ತೆ ಪೈಸೆ ಕವ್ಡೆ ಮನ್ತಲೆ ತೆಕಾ ಕಳ್ವುಲ್ಯಾನ್ ಅನಿ, 8 ಅಪ್ನಾಕ್ನಿ ನಾಶ್ ಕರುಕ್ ಸಾಟ್ನಿ ಸುಸಾತ್ ಪರ್ಗಟುನ್ ಹೊಲ್ಲ್ಯಾ ರಾಜ್ಯಾಚ್ಯಾ ಹುಕುಮಾಚಿ ಚಿಟ್ ಎಕ್ ದಿವ್ನ್ ಹೆ ಎಸ್ತೆರಾಕ್ ದಾಕ್ವುನ್ ಸಾಂಗ್, ಅನಿ ತಿ ರಾಜಾಕ್ಡೆ ಜಾವ್ನ್ ತೊ ದಯಾ ದಾಕ್ವಿ ಸಾರ್ಕೆ ತೆಜ್ಯಾ ಇದ್ರಾಕ್ ಅಪ್ನಾಚ್ಯಾ ಲೊಕಾಂಚ್ಯಾ ಸಾಟ್ನಿ ಮಾಗ್ನಿ ಕರುಂದಿತ್ ಮನುನ್ ಸಾಂಗುನ್ ಧಾಡ್ಲ್ಯಾನ್. 9 ಮಾನಾ ಹತಾಕಾನ್ ಫಾಟಿ ಪರ್‍ತುನ್ ಯೆವ್ನ್ ಎಸ್ತೆರ್ ರಾನಿಕ್ ಮೊರ್ದೆಕೈನ್ ಸಾಂಗಲ್ಲೆ ಸಗ್ಳೆ ಕಳ್ವುಲ್ಯಾನ್. 10 ತನ್ನಾ ಎಸ್ತೆರ್ ರಾನಿನ್ ಹತಾಕಾಕ್, "ತಿಯಾ ಅನಿ ಪರ್‍ತುನ್ ಮೊರ್ದೆಕೈಕ್ಡೆ ಜಾವ್ನ್ ಅಸಿ ಸಾಂಗ್: 11 ರಾಜಾನ್ ಬಲ್ವುಲ್ಯಾ ಸಿವಾಯ್ ತೊ ಹೊತ್ತ್ಯಾ ಜಾಗ್ಯಾರ್ ಭುತ್ತುರ್ ಜಾತಲ್ಯಾಕ್ನಿ ಮರ್ನಾಚಿ ಶಿಕ್ಷ್ಯಾ ಹೊತಾ, ಮನ್ತಲೊ ಎಕ್ ನಿಯಮ್ ಸಗ್ಳ್ಯಾ ಬಾಯ್ಕಾಮಾನ್ಸಾಕ್ನಿ ಅನಿ ಘೊಮಾನ್ಸಾಕ್ನಿ ಹಾಯ್; ತೊ ಕೊನಾಕ್ಡೆ ಸೊನ್ಯಾಚೊ ದಾಂಡೊ ದಾಕ್ವುತಾ, ತೆನಿ ತವ್ಡೆಚ್ ಝಿತ್ತೆ ರ್‍ಹಾತ್ಯಾತ್, ಮನುನ್ ರಾಜಾಚ್ಯಾ ಸಗ್ಳ್ಯಾ ಸೆವಕಾಕ್ನಿ, ಅನಿ ಸಂಸ್ಥಾನಾಚ್ಯಾ ಸಗ್ಳ್ಯಾ ಲೊಕಾಕ್ನಿ ಗೊತ್ತ್ ಹಾಯ್; ಮಾಕಾ ತರ್ ತಿಸ್ ದಿಸಾಕ್ನಾ ರಾಜಾಚ್ಯಾ ಜಗ್ಗೊಳ್ ಜಾತಲಿ ಬಲ್ವನ್ಕಿ ಹೊವ್ಕ್ ನಾ ಮನುನ್ ಸಾಂಗುನ್ ಧಾಡ್ಲಿನ್. 12 ಹತಾಕಾನ್ ಜಾವ್ನ್ ತೆ ಮೊರ್ದೆಕೈಕ್ ಕಳ್ವಲ್ಲ್ಯಾ ತನ್ನಾ, 13 ತೆನಿ ಪರ್‍ತುನ್ ಎಸ್ತೆರಾಕ್, ಜುದೆವಾನಿ ನಾಶ್ ಹೊಲ್ಯಾರ್ಬಿ ಮಿಯಾ ಎಕ್ಲಿಚ್ ರಾಜಾಚ್ಯಾ ಘರ್‍ಹಾತ್ ಹೊತ್ತ್ಯಾ ಸಾಟ್ನಿ ಹುರ್ತಾ ಮನುನ್ ಚಿಂತುನಕ್ಕೊ. 14 ತಿಯಾ ಅತ್ತಾ ಗಪ್ ರಾಲ್ಯಾರ್ ದುಶ್ರ್ಯಾಕ್ನಾ ಮಜತ್ ಯೆವ್ನ್ ಜುದೆವಾಕ್ನಿ ಸುಟ್ಕಾ ಹೊಯ್ಲ್, ಖರೆ ತಿಯಾ ತುಜ್ಯಾ ಬಾಬಾಚ್ಯಾ ಘರಾಚ್ಯಾ ಲೊಕಾಂಚ್ಯಾ ವಾಂಗ್ಡಾ ನಾಶ್ ಹೊತೈಯ್, ತವ್ಡೆಚ್ ನಸ್ತಾನಾ ತಿಯಾ ಹ್ಯಾ ಯೆಳಾ ಸಾಟ್ನಿಚ್ ರಾನಿ ಹೊವ್ಕ್ ಫಿರೆ ನ್ಹಯ್ , ಹೆ ಕೊನಾಕ್ ಗೊತ್ತ್ ಮನುನ್ ಸಾಂಗುನ್ ಧಾಡ್ಲ್ಯಾನ್. 15 ತನ್ನಾ ಎಸ್ತೆರಾನ್, ತಿಯಾ ಜಾವ್ನ್ ಸುಸೆನಾತ್ ಹೊತ್ತ್ಯಾ ಸಗ್ಳ್ಯಾ ಜುದೆವಾಕ್ನಿ ಗೊಳಾ ಕರ್; 16 ಅನಿ ತುಮಿ ಸಗ್ಳೆ ರ್‍ಹಾತ್ ಅನಿ ದಿಸ್ ಜೆವಾನ್ ಪಾನಿ ಸೊಡುನ್ ತಿನ್ ದಿಸ್ ಮಾಜ್ಯಾ ಸಾಟ್ನಿ ಉಪಾಸ್ ಕರಾ; ತಸಿಚ್ ಮಿಯಾಬಿ ಮಾಜ್ಯಾ ಸೆವಕಿಯಾಂಚ್ಯಾ ವಾಂಗ್ಡಾ ಉಪಾಸ್ ಕರ್ತಾ. ಮಾನಾ ಮಾಕಾ ಕಾಯ್ಬಿ ಹೊಂವ್ದಿತ್ ಮಿಯಾ ರಾಜಾಚ್ಯಾ ಜಗ್ಗೊಳ್ ಜಾತಾ, ಮರ್ಲ್ಯಾರ್ ಮರುಂದಿತ್", ಮನುನ್ ಮೊರ್ದೆಕೈಕ್ ಸಾಂಗುನ್ ಧಾಡ್ಲಿನ್. 17 ತನ್ನಾ ಮೊರ್ದೆಕೈಯಾನ್ ಜಾವ್ನ್ ಎಸ್ತೆರಾನ್ ಸಾಂಗಲ್ಲ್ಯಾ ಸಾರ್ಕೆ ಕರ್ಲ್ಯಾನ್.