1 Gyidie te ahotɔsoɛ bɔ yɛle ye kyɛ, nningyein bɔ yɛ nye la so ne kɔwa nu; ɔte adanzeɛ pefee bɔ okyire kyɛ, nningyein bɔ yɛnnwu ye ne wɔ berɛ paa. 2 Ɛhene yeɛ ɔmaa bɛlili tetefoɛ nemɔ nwo adanzeɛ ne. 3 Gyidie yeɛ ɔmaa yɛnwu ye kyɛ, ɔnate Nyameɛ dwirɛ so yeɛ bɛyɛle wiase ne ɔ, yeti nningyein bɔ yɛnwu ye ne, ofi nningyein bɔ yɛnnwu ye nanu yeɛ ɔwale ɔ.

4 Gyidie yeɛ ɔmaa Habel bɔle afɔleɛ bɔ odi mu trale Kain deɛ ne. Na ɔnate sɔ gyidie naso ne, bɛlili ye nwo adanzeɛ kyɛ ɔte teneneeniɛ, ofikyɛ Nyameɛ lɛle ye akyɛdeɛ ne tole nu. Na ɔwɔ nu, wawu de, nakoso ɔnate ye gyidie naso dwudwo.

5 Gyidie ti, bɛfale Enok bɛhɔle nekaa foforɛ kyɛbɔ ɔkɔyɛ a ɔngonwu ewue ɔ, na bannwu ye wɔ nekafee, ofikyɛ Nyameɛ fale ye fili nekaa bɔ né ɔwɔ ne. Na kora bɔ bɛfa ye ne, bɛlili ye nwo adanzeɛ kyɛ wayɛ bɔ Nyameɛ kuro ɔ.

6 Sɛ ebie lle gyidie a, ɔngɔhora ngɔsɔ Nyameɛ nye, ofikyɛ, odikyɛ ebiala bɔ ɔba Nyameɛ berɛ ne nya gyidie kyɛ ɔwɔ berɛ, na otua bɛ bɔ bɛ nye aboro bɛpena ye ne kerɛ.

7 Gyidie ti, mmerɛ bɔ bɛbɔle Nowa kɔkɔ wɔ nningyein bɔ onya nwuni ye nanwo ne, otiele na ɔyɛle alaka bɔ ɔkɔfa kole ye abusua ne ngoa; ofikyɛ né osuro Nyameɛ. Na ɔnate sɔ gyidie naso buli wiase ne fɔ, na ye gyidie ti, bɛnwuni ye kyɛ ɔte teneneeniɛ.

8 Gyidie ti, mmerɛ bɔ bɛfrɛle Abraham ne, otiele, na ɔhɔle nekaa bɔ né okonya ye kyẽabie kyɛ ye agyapadeɛ ne; ɔhɔle, ɔmva ye nwo kyɛ né ɔnze nekaa bɔ ɔkɔ ne. 9 Gyidie yeɛ ɔmaa ɔtenane bɔhyɛ aseɛ naso te kyɛ ɛwɔfoɛ bɔ ɔte ebie maen so ne. Na ɔne Isaac ne Yakob bɔ bɛ koso bekonya sɔ bɔhyɛ nala bie ne tenane tɛnt nu. 10 Ofikyɛ ne ɔnea kuro bɔ ye fapem yɛ se ne atee. Sɔ kuro ne, Nyameɛ yeɛ ɔhyehyɛle ɔ, na ye yeɛ osili ɔ.

11 Gyidie ti, Sara nyane anwoserɛ fa nwonzɛle wole baa, ɔmva ye nwo kyɛ né wabo aworɛ so ne, ofikyɛ obuli bɔ ɔhyɛle bɔ ne kyɛ ɔte ebie bɔ odi nahorɛ. 12 Ɛhe ati, ɔnate brienzua kõ bɔ ne wawu wayie naso nyane mmaa pee bɔ bɛ dodoɔ te kyɛ anwuro nzramaa, ne ɛpo noa anweaa bɔ olle ye noa.

13 Gyidie nu yeɛ sɔ mmenia hemɔ mukoraati wuli ɔ. Ɔwɔ nu, bɛ sa anga bɔhyɛ ne, nakoso bɛnwuni ye wɔ dede, na bɛfale anigye bɛle bɛtole nu. Na bɛle bɛtole nu kyɛ, bɛte ɛwɔfoɛ ne amanfrafoɛ wɔ aseɛ naso. 14 Bɛ bɔ bɛka sɔ dwirɛ ne, bɔ okyire yɛ ole kyɛ bɛ nye aboro bɛpena bɛ bɔbɔ bɛ deɛ. 15 Na sɛ bɛhɔle so bɛdwenene maen bɔ bɛtu bɛfili nu nanwo a, ahaa benyane atee besa bɛhɔle. 16 Nakoso kesaalae de, bɛpena nekaa bɔ ɔte pa, kyire kyɛ, nekaa bɔ ofi anwuro. Yeti, ɔnyɛ Nyameɛ fɛle kyɛ bɛkɔfrɛ ye bɛ Nyameɛ, ofikyɛ wasiesie kuro bie wama bɛ.

17 Gyidie ti, mmerɛ bɔ Nyameɛ sɔle Abraham neane ne, ɔhale sɔa, ahaa ɔfale ɔwa brienzua Isaac bɔle afɔleɛ. Biaa bɔ ne wale bɔhyɛ ne wato nu ne, ɔyɛle ye adwene kyɛ ɔfa ɔwa komapɛ ne bɔ afɔleɛ 18 ɔmva ye nwo kyɛ ne baha bahyire ye kyɛ: "Bɔ bɛkɔfrɛ ye wɔ bosoniɛ ne, ɔnate Isaac so yeɛ ɔkɔwa" ne. 19 Nakoso onyane adwene kyɛ, Nyameɛ kɔhora kotingye ye kofi ewue nu, na atee bie so ne, ye sa hane ye.

20 Gyidie yeɛ ɔmaa Isaac hyirale Yakob ne Esau wɔ nningyein bɔ ne ɔkɔwa nu kyẽabie nanwo ɔ.

21 Gyidie ti, Yakob baawu ne, ohyirale Yosef mmaa mmrienzua nemɔ, na obutuli ye pɔmaa naso sone ye.

22 Gyidie ti, ɔka kaa maa Yosef wu ne, ɔhane Israel mmaa bɔ bɛkɔtu bɛkofi Egypt nanwo dwirɛ, na ye mmowie koso ohyirele bɛ bɔ bɛyɛ ye ɔ.

23 Gyidie ti Mose aworɛ si ne, ye awofo fale ye siele bosome nza; ofikyɛ bɛnwuni kyɛ akwalaa ne nwo yɛ nyemene, na banzuro ɔhene ne mmeraa ne.

24 Gyidie ti yeɛ Mose nyini ne, wamma bamvrɛ ye Farao awa brasua awa ne, 25 mmom né okuro kyɛ ɔne Nyameɛ mmenia nwu amaneɛ tra kyɛ okoli fɛɛ wɔ bɔne nu mmerɛ kaa bie. 26 Na onwuni kyɛ sɛ Kristo ti bɛgua ye nyunu ase a, mvasoɛ wɔ so tra kyɛ ekonya Egypt ahonyadeɛ, ofikyɛ né ye nye la akatua bɔ okonya ye kyẽabie naso.

27 Gyidie yeɛ ɔmaa ofili Egypt bɔ wanzuro ɔhene ne yaa ne, na ogyinane pindinn te kyɛ ɛnwa onwu Ɛdangama bɔ bɛnnwu ye ne. 28 Gyidie ti olili Pɛnu ne, na ɔfale mogya petene ye anoa nanwo, kyɛbɔ ɔkɔyɛ a sɛkyefoɛ ne ngɔha bɛ piesie nemɔ ɔ.

29 Gyidie ti, Israelfoɛ ne fale ɛpo kɔkorɛ nanu te kyɛ ɛnwa bɛnate aseɛ kesee so, na mmerɛ bɔ Egyptfoɛ né pena kyɛ bɛyɛ bie ne, nzue ne fale bɛ.

30 Gyidie yeɛ ɔmaa Yeriko fasue ne dwiri guale, mmerɛ bɔ Israelfoɛ ne fale ɛlɛsoo pɛle ye nwo yiale ne. 31 Ná gyidie ti, bangu tuutuuniɛ Rahab bammoka asoserɛfoɛ naso, ofikyɛ olɛle bɛ bɔ bɛwale kyɛ bɛbaatetɛ kuro ne kama.

32 Nzu bieku po yeɛ nga ɔ? Sɛ menwa meka Gideon, Barak, Samson, Yefta, David, Samuel ne adiifoɛ bɔ baha nanwo dwirɛ a, ahaa mengoyie. 33 Bɛ yeɛ ɔnate gyidie ti, bɛlili ahennie ahoroɛ so ngunim, bɛmaa atɛn tenenee yɛle adwuma, benyane bɔhyɛ ahoroɛ, bɛsili gyata mɔ noa, 34 bɛnuane see bɔ ɔsɔ buru-buru, bɛnwati bɛfili dadeɛ noa, benyane anwoserɛ ɔmva ye nwo kyɛ ne bayɛ mmerɛ, benyane anwoserɛ paa bɛhone ngondii, na bɛfoane sogyafoɛ bɔ bawa bɛ so ne.

35 Mmrasua sa hane b’awufo bɔ batingye bafi ewue nu ne, nakoso ebiemɔ de, bɛyɛle bɛ ayayade paa, nakoso bambene maa banyakyi bɛ, kyɛbɔ ɔkɔyɛ a, bekonya ewue tingyele bɔ ɔte pa ne. 36 Nzɔhwɛ bɔ ebiemɔ yiale yeɛ ole ngorohoɛ ne ɛgwalɛ, ebiemɔ po de, bɛfale kyenyi bɛkyekyele bɛ, na bɛfale bɛ bɛguale prizin. 37 Bɛsili bɛ nyɔboɛ, bɛsɔle bɛ bɛneane, bɛfale sralaa bɛpakyele bɛ nu, bɛfale dadeɛ bɛhuni bɛ, bɛfale mmoan ne mmɔngye nwomaa bɛyɛle ndadeɛ bɛwurale, bɛlili hiaa, bɛnwuni amaneɛ, bɛteeteele bɛ, 38 na ne ewiase po mvata bɛ. Yeti bɛhyinini ɛserɛ ne mmokaa so, ɔne nyɔboɛ bɔ wayɛ sua ne bɔen bɔ ɔwɔ aseɛ naso nanu.

39 Sɔ mmenia hemɔ mukoraati, bɛ gyidie ti bɛlili bɛ nwo adanzeɛ pa, nakoso bɔhyɛ ne amma nu maa bannwu ye, 40 ofikyɛ Nyameɛ ayɛ nhyehyɛɛ pa ato berɛ ama yɛ, kyɛbɔ ɔkɔyɛ a, yɛne bɛ mukoraati kɔbɔ nu kɔyɛ pɛ ɔ.