1 Yeti aliemaa mɔ akrongronfoɛ, bɔ bafrɛ ɛmɔ baboka bɛbɔ bɛkɔ anwuro naso, ɛmɔdwene Yesu bɔ ɔte somafoɛ ne sɔfo panyi bɔ yedɛ ye yɛtonu nanwo. 2 Olili Nyameɛ nahorɛ, kyɛbɔ Mose koso lili nahorɛ wɔ nikye biala nu wɔ Nyameɛ awuro berɛ ne. 3 Nakoso bɛnwu ye kyɛ ole anuonyam tra Mose, ofikyɛ bɔ osi sua ne le anuonyam koraa tra sua ne. 4 Bɔ ɔte yeɛ ole kyɛ, awuro biala ebie yeɛ osi ɔ, na bɔ ɔyɛle nikye biala yeɛ ole Nyameɛ. 5 Ne Mose te somvoɛ wɔ Nyameɛ awuro berɛ, na olili nikye biala nu nahorɛ fa lili edwirɛ bɔ né bɛkɔha ye kyẽabie nanwo adanzeɛ. 6 Nakoso Kristo de, olili nahorɛ kyɛ Baa bɔ ɔnea Nyameɛ awuro naso. Awuro ne yeɛ ole yɛ, nakoso sana yɛsɔ akukuduro ne anidasoɛ bɔ yɛle ye nanu yɛkodwu awieɛ.

7 Yeti, kyɛbɔ honhom krongron ne ka ne,

"Ɛnɛ, sɛ ɛmɔte ye konvi a,

8 nnɛmɔyɛ asoserɛ,

te kyɛ mmerɛ bɔ bɛtele me so atua,

na bɛsɔle me bɛneane wɔ ɛserɛ naso ne,

9 nekaa bɔ ɛmɔ nana mɔ gyegyele me, na bɛsɔle me bɛneane

ɔmva ye nwo kyɛ né bafa afoɛ 40 banwu me nyumaa ne.

10 Ɛhe ati, sɔ aworɛ ndoɔtoasoɛ ne nwo yɛle me ahi,

na ngane kyɛ:

‘Daa biala bɛmini atee wɔ b’ahone nu,

na bennya bɛnwuni m’atee.’

11 Yeti, mvɛle yaa ngane ndaen kyɛ:

‘Bengowura me nwomeɛ nu lle.’ "

12 Yeti aliemaa mɔ, ɛmɔnea yé paa na ɛmɔ nu biala annya ahone tɛɛ bɔ olle gyidie, ná wandwe ye nwo wamvi Nyameɛ teasefoɛ nanwo; 13 mmom ɛmɔhɔ so bɛhyehyɛ ɛmɔ nwo nguraen kyẽa biala bɔ bɛfrɛ ye "Ɛnɛ" ne, na bɔne anlaka-laka ɛmɔ nu biala ma wanyɛ asoserɛ. 14 Ofikyɛ, sɛ yɛkɔhora yekonya kyɛfa wɔ Kristo nu a, sana yɛsɔ ahotɔsoɛ bɔ ahyɛaseɛ ne, yɛnyane ye nanu yɛkosi awieɛ. 15 Kyɛbɔ baha ne:

"Ɛnɛ, sɛ ɛmɔte ye konvi a,

nnɛmɔyɛ asoserɛ,

te kyɛ mmerɛ bɔ bɛtele me so atua ne."

16 Nwamɔ yeɛ bɛtele, nakoso bɛtele ye so atua ne? Nná bɛ bɔ Mose lili bɛ nyunu yele bɛ fili Egypt namukoraati? 17 Afei, nwamɔ yeɛ bɛ nwo yɛle Nyameɛ ahi afoɛ 40 ne? Nná bɛ bɔ bɛyɛle bɔne, maa bɛ fuin guale ɛserɛ naso ne? 18 Na nwamɔ yeɛ ɔhane bɛ ndaen kyɛ, bengowura ye nwomeɛ nu ne? Nná bɛ bɔ bɛyɛle asoserɛ ne? 19 Yeti yɛnwu ye kyɛ, gyidie bɔ bannya ye nati yeɛ bangora banwura ye nwomeɛ nu ne.