1 Homeda bie, Yesu hɔle Farisifoɛ mbanyi nanu kõ awuro kyɛ ɔkwaadidi, na bɛ bɔ bɛwɔ berɛ ne, né bɛnea ye paa. 2 Nea, né biaa bie wɔ wanwu-nwu wɔ Yesu nyunu berɛ. 3 Yeti Yesu bisale bɛ bɔ bɛse mmeraa nanu ne Farisifoɛ nemɔ kyɛ: "Mmeraa ma atee kyɛ bɛsa ebie anwonyerɛ Homeda, anaa ɔmma ate?" 4 Nakoso bandwudwo. Yeti Yesu sɔle biaa ne nu, na ɔsale ye anwonyerɛ maa ɔhɔle. 5 Yeɛ obisale bɛ kyɛ: "Ɛmɔ nu nwa yeɛ ɔwa anaa ye nandwie tɔ kumaa nu homeda a, ɔngɔye ye ngofi nu ndɛ ɔ?" 6 Na bangora bamma ye mmuayɛ biala.

7 Mmerɛ bɔ onwuni kyɛ bɛ bɔ bato bɛ sa bafrɛ bɛ ne pena nekaa bɔ odi mu tena ne, ɔyɛle mvandoho hyirele bɛ kyɛ: 8 "Sɛ ebie to ye sa frɛ ɛmɔ kyɛ ɛmɔbra ayeforɔ a, nnɛmɔ kɔtena nekaa bɔ odi mu ne, ofikyɛ ebia ne wato ye sa wafrɛ ebie bɔ odi mu tra wɔ. 9 Ɔba sɔ, sona bɔ ɔtole ye sa frɛle ɛmɔ munyɔ ne kɔha kohyire wɔ kyɛ, ‘Dwɔso, na fa wɔ bia ne ma ye.’ Ɔba sɔ a ɛkɔdwɔso, na afa animguaseɛ aatena neka bɔ ɔba ase koraa ne. 10 Mmom sɛ bɛto bɛ sa bɛfrɛ wɔ a, kɔtena nekaa bɔ ɔba ase koraa ne, ɔba sɔ a, bɔ ɔtole ye sa frɛle wɔ ne kɔha kohyire wɔ kyɛ, ‘Me damvo, dwɔso fi wa, na kɔtena neka bɔ odi mu ne.’ Ɛhene kɔmaa ekonya anuonyam wɔ bɛ bɔ bɛwɔ berɛ namukoraati nyunu. 11 Ofikyɛ ebiala bɔ ɔma ye nwo so ne, bɛkɔbrɛ ye ase, na ebiala bɔ ɔbrɛ ye nwo ase ne, bɛkɔma ye so."

12 Yeɛ Yesu ha hyirele sona bɔ ɔtole ye sa frɛle ye ne kyɛ: "Sɛ ɛto paati eyia anaa kɔngɔen a, nnɛfrɛ wɔ nnamvo, eliema mɔ, w’abusuafoɛ anaa wɔ mmango asikafoɛ. Sɛ ɔba sɔ a, bɛ koso bɛkɔto bɛ sa bɛkɔfrɛ wɔ, na ɛhene yeɛ ɔkɔyɛ w’akatua ɔ. 13 Mmom to wɔ sa frɛ ahiafoɛ, mmubuafoɛ ne anyesiniwaafoɛ, 14 ɛhene kɔmaa Nyameɛ kohyira wɔ. Ofikyɛ bɛ de, bɛlle hwee bɔ bɛfa betua wɔ kerɛ, na ekonya w’akatua mmerɛ bɔ bɛtingye ateneneefoɛ ne."

15 Bɛ bɔ ɔne bɛ didi nanu kõ tele sɔ dwirɛ ne, ɔha hyirele ye kyɛ: "Anigye yeɛ ole sona bɔ okodidi wɔ Nyameɛ Ahennie nanu ne." 16 Nakoso Yesu ha hyirele ye kyɛ: "Baba bie yɛle paati kandinga bie, na ɔtole ye sa frɛle mmeni pee. 17 Ná paati ne mmerɛ sone ne, ɔsomane ye ngoaa kyɛ, bɛɛha behyire bɛ bɔ ɔtole ye sa frɛle bɛ ne kyɛ, ‘Ɛmɔbra, ofikyɛ yasiesie nikye biala yayie.’ 18 Nakoso bɛ nu biala hyɛle yebo kyɛ ɔfa edwirɛ bie ye ye nwo noa. Bɔ oli moa ne hane kyɛ, ‘Matɔ aseɛ, odikyɛ mekɔnea; mesrɛ wɔ, ye me fi nu.’ 19 Sona foforɛ koso hane kyɛ: ‘Matɔ nandwie buru, odikyɛ mekɔnea bɛ; mesrɛ wɔ, ye me fi nu.’ 20 Yeɛ sona foforɛ koso hane kyɛ: ‘Bekye bɔ magya ɔ, yeti mengɔhora ba.’ 21 Yeti akoaa ne wale, na ɔhane ɛhe mukoraati hyirele ye wura ne. Yeɛ efiewura ne fɛle yaa, na ɔha hyirele ye akoaa ne kyɛ: ‘Yɛ ndɛ, kɔ kuro né atee ne ye mmorɔnoa nemɔ so, na kɔfa ahiafoɛ ne mmubuafoɛ ne anyesiniwaafoɛ ne apakye nemɔ bra.’ 22 Yesi ne, akoaa ne ha hyirele ye wura ne kyɛ, ‘Me wura, mayɛ bɔ ɛhane ne, nakoso atee tɛ́ wɔ berɛ.’ 23 Yeɛ ye wura ne sa ha hyirele ye akoaa ne kyɛ, ‘Kɔ atembire ne atee mmaa-mmaa naso, na ka kyire bɛ bɔ bɛwɔ berɛ ne kyɛ bɛbra; mepena kyɛ m’awuro wa yi. 24 Meka mekyire ɛmɔ kyɛ, bɛ bɔ mvrɛle bɛ ne, bɛ nu komapɛ po nne berɛ bɔ m’aleɛ ne bie kɔha ye gye ɔ.’ "

25 Afei, mmeni pee tu lili ye si, na ɔkakyile ye nwo ha hyirele bɛ kyɛ: 26 "Sɛ ebie ba me berɛ, na sɛ wannde ɔdɔ bɔ ole ye ma ye baba, ye maame, ɔye, ye mmaa, oliema mmrienzua ne mmrasua, ɔne ye bɔbɔ ye ngoa naso a, ɔngɔhora ngɔyɛ me suaniɛ. 27 Ná sɛ ebie anzoa ye asɛnnua, ná wanni me si a, ɔngɔhora ngɔyɛ me suaniɛ. 28 Ɛmɔ nu nwa yeɛ ɔpena kyɛ osi aborosaen a, onni mmoa ndena ase nzese nnea sɛ ole sikaa bɔ ɔkɔfa kosi a? 29 Sɛ wanyɛ sɔ a, ɔkɔhyɛ yebo, nakoso ɔngɔhora yie, na bɛ bɔ bekonwu ye namukoraati kɔhyɛ yebo kɔgoro ye nwo kyɛ, 30 ‘Akoaa he hyɛle yebo kyɛ osi sua, nakoso wangora ye si yie.’ 31 Anaa ɔhene beni yeɛ ɔne ɔhene foforɛ kwaahõ a, ɔngɔli moa ngɔtena ase ngɔnea, sɛ ɔkɔhora kɔfa sogyafoɛ 10,000 kooyia kõhene bɔ ɔfa sogyafoɛ 20,000 ba ye so ne? 32 Sɛ onwu ye kyɛ ɔngɔhora a, mmerɛ bɔ ɔhene kõ ne wɔ dede ne, ɔkɔsoma mmenia maa bɛkɔɔsrɛ ye kyɛ, ɔpena kyɛ ɔne ye tena asomdwie nu. 33 Sɛ ala yeɛ ɛmɔ koso, sɛ ebie anyakyi bɔ ole ye ne mukoraati berɛ a, ɔngɔhora ngɔyɛ me suaniɛ.

34 "Ngyee te pa, nakoso sɛ ye fɛɛ ne fi nu a, ɔkɔyɛ sɛɛ ne wasa wasi ye daa nu? 35 Ɛfa fra anweaa ɔnyɛ yé, na ɛfa yɛ fɛtelaza koso a, ɔnyɛ ye, sana egyi gua. Bɔ ole asoɛ bɔ ɔkɔfa kotie ne, ma otie."