1 Yesu tole ye nye ne, onwuni kyɛ asikafoɛ ne fa b’akyɛdeɛ gua sikaa alaka nanu. 2 Afei onwuni brasua kunaniɛ hianiɛ bie, né ɔfa ngaprɛ nyɔ bɔ ɔtte sikaa biala gua alaka nanu. 3 Yeɛ ɔhane kyɛ: "Nahorɛ bɔ meka mekyire ɛmɔ yeɛ ole kyɛ, bɔ kunaniɛ hianiɛ he afa agua nu ne, ɔsone tra bɛ mukoraati bɛ deɛ ne; 4 ofikyɛ bɛ de, bɔ banya ye maa wabo so ne bie yeɛ bafa bagua nu ɔ, nakoso ye de, ɔmva ye nwo kyɛ wahia ye buburoo ne, bɔ ole ye namukoraati yeɛ wafa waagua alaka nanu ne."

5 Ye si ne, ne ebiemɔ ka asɔre awuro nanwo dwirɛ, né bɛka kyɛbɔ bɛfale nyɔboɛ pa ne nningyein bɔ bahyira so bɛsili nanwo dwirɛ. Nakoso ɔhane kyɛ: 6 "Meka mekyire ɛmɔ kyɛ, nningyein bɔ ɛmɔnwu ye wa ne, mmerɛ bie kɔwa bɔ bɛngɔyakyi nyɔboɛ komapɛ po wɔ nyɔboɛ so, bɛkɔdwiri ye mukoraati bɛkogua." 7 Yeti bɛbisale ye kyɛ: "Kyerɛkyerɛniɛ, mmerɛ beni yeɛ ɛhe kosi ɔ, na nzɛngyerɛneɛ beni yeɛ ɔkɔmaa yekonwu kyɛ sɔ nikye ne baasi ɔ?" 8 Yeɛ ɔha hyirele bɛ kyɛ: "Ɛmɔnea yé na ebiala anlaka-laka ɛmɔ; ofikyɛ mmeni pee kɔfa me dumaa kɔwa kɔɔha kyɛ: ‘Me yeɛ nne ye,’ na ‘Mmerɛ ne aso ayie!’ Nakoso nnɛmɔ di bɛ si. 9 Afei sɛ ɛmɔte koɛ ne basabasa nwo dwirɛ a, nnɛmɔ maa ɛmɔ kunu tete ɛmɔ; ofikyɛ odikyɛ nningyein hemɔ sisi, nakoso nná ɛberɛ ala yeɛ awieɛ ne kɔwa ɔ."

10 Yeɛ osa ha hyirele bɛ kyɛ: "Maen ne maen kɔhõ, na ahennie ne ahennie kɔhõ. 11 Afei aseɛ wosolɛ mbiri-mbiri, ɛhɔen ne anwonyerɛ suronyi-suronyi bɔ osa kɔwa nekaa ahoroɛ; na nningyein bɔ ɔyɛ suro ne nzɛngyerɛneɛ mbiri-mbiri kofi anwuro kɔwa. 12 Nakoso kora bɔ ɛhemɔ kosisi ne, bɛkɔhye ɛmɔ, ná batane ɛmɔ nye; ná bɛkɔhwe ɛmɔ bɛkɔhɔ sua bɔ beyia nu nanu, na bafa ɛmɔ bagua prizin. Na me dumaa bɔ ɔla ɛmɔ so nati, bɛkɔfa ɛmɔ bɛkɔhɔ ahemvo ne atumvoɛ nyunu. 13 Ɛhe kɔmaa ɛmɔ koli bɛ adanzeɛ. 14 Ɛmɔma ɛhe la ɛmɔ tianu, nnɛmɔ di moa bɛdwene edwirɛ bɔ ɛmɔ kɔfa bɛkɔye ɛmɔ noa nanwo, 15 ofikyɛ edwirɛ ne nyanza bɔ ngɔfa ngɔma ɛmɔ ne, ɛmɔ atamfo nemɔ ngɔhora ye noa gyina, na bɛngɔhora ye bɔ gua. 16 Ɛmɔ awofo, ɛmɔ aliema mɔ, ɛmɔ abusuafoɛ ne ɛmɔ nnamvo mɔ po kɔye ɛmɔ kɔma, na bɛkɔhu ɛmɔ nu biemɔ. 17 Me dumaa ti, mmenia mukoraati kɔtane ɛmɔ. 18 Nakoso ɛmɔ ti nwiaa komapɛ po ngomini. 19 Sɛ ɛmɔmia ɛmɔ nye begyina nu a, ɛmɔ konya ngoa.

20 "Sɛ ɛmɔnwu kyɛ sogyafoɛ apɛ Yerusalem kuro nanwo ayia a, ɛmɔnwu ye kyɛ, waha kaa bie maa basɛkye ye. 21 Ɔba sɔ a, bɛ bɔ bɛwɔ Yudea ne, odikyɛ bɛnwati bɛkɔ mmokaa so, bɛ bɔ bɛwɔ kuro nanu ne, odikyɛ bɛnwati bɛfi nu, na bɛ bɔ bɛwɔ nguraa nemɔ nu ne, nnɛmaa bɛba kuro nanu; 22 ofikyɛ ɛhe yeɛ ole mmerɛ bɔ Nyameɛ kɔfa kɔhwe mmenia so, kyɛbɔ ɔkɔyɛ a, bɔ bahworɔ ne kɔwa nu ɔ. 23 Sɔ mmerɛ ne, mmrasua bɔ bɛnwonzɛ, ɔne bɛ bɔ bɛma ngwalaa nyɔfone ne de, bɛ yaakɔ! Ofikyɛ ahohiehia kandinga paa kɔwa aseɛ naso, na Nyameɛ kɔfɛ mmenia so yaa. 24 Bɛkɔfa dadeɛ bɛkɔhu bɛ, na bɛkɔfa bɛ nnɔmun bɛkɔhɔ maen mukoraati so, na maen-maen ne kotietia Yerusalem so tonn koodwu kyɛ maen-maen ne mmerɛ ne koso.

25 "Na nzɛngyerɛneɛ kɔwa eyia, ɛsraen, ne nzramaa mɔ so; na kyɛbɔ ɛpo ne kohu na okobu kɔfa so nati, ahunu–ndetelɛ kɔto maen-maen nemɔ so, na bɛngonwu bɔ bɛyɛ ɔ. 26 Na esuronyi ne nningyein bɔ ɔbaasisi wiase nati, mmenia nye so koburu bɛ, ofikyɛ bɛkɔwoso anwuro tumi. 27 Na ɛberɛ yeɛ bekonwu kyɛ Sona Awa ne nate munungum nu ɔba, bɔ ole tumi ne anuonyam kandinga. 28 Sɛ sɔ nningyein ne hyɛ yebo kyɛ osisi a, ɛmɔma ɛmɔ nu so, na ɛmɔma ɛmɔ ti so, ofikyɛ mmerɛ bɔ bekole ɛmɔ ne apingye."

29 Yeɛ ɔyɛle mvandoho hyirele bɛ kyɛ: "Ɛmɔnea borɔdoma ne mmakaa bɔ waha ne. 30 Sɛ onya fa nyaa a, ɛmɔse kyɛ ɔngɔhyɛ ne ahuhuro awa. 31 Sɔ ala yeɛ ɛmɔ koso, sɛ ɛmɔnwu ye kyɛ ɛhemɔ ahyɛ yebo osisi a, ɛmɔnwu ye kyɛ, waha kaa ne Nyameɛ Ahennie ne awa. 32 Nahorɛ bɔ meka mekyire ɛmɔ yeɛ ole kyɛ, sɔ aworɛ ndoɔtoasoɛ ne nngɔpɛ nu, sana ɛhe amukoraati awa nu kora. 33 Anwuro ne aseɛ kɔpɛ nu, nakoso me dwirɛ ne de, ɔngɔpɛ nu lle.

34 "Nakoso ɛmɔnea ɛmɔ nwo yé, na adufum, nzãa nonɛ pembe, ne asetena nu dadwene anni ɛmɔ ti lle, na sɔ kyẽa ne amvu ɛmɔ nu te kyɛ ngaen. 35 Ofikyɛ ɔkɔwa bɛ bɔ bɛtete aseɛ naso namukoraati so. 36 Yeti daa biala, ɛmɔma ɛmɔ nye la berɛ, na ɛmɔbɔ mbaeɛ, kyɛbɔ ɔkɔyɛ a, ɛmɔ konya anwoserɛ bɛkɔfa bɛkɔnwati bɔ ɔbaasisi namukoraati, na ɛmɔ ahora bagyina Sona Awa ne nyunu."

37 Na daa biala, né ɔyɛ ngyerɛkyerɛ wɔ asɔre awuro berɛ, na aleɛ sa a, ne ɔkɔ bokaa bɔ bɛfrɛ Olive naso kɔda dɔ. 38 Na ngyerɛmɔ tutuutu ne, né mmenia namukoraati ba asɔre awuro berɛ, kyɛ bɛbaatie ye.