1 Né waha kaa maa bɛdi Paanoo bɔ Yiste Nne Nu afahyɛ bɔ bɛfrɛ ye Pɛnu ne. 2 Na ne sɔfo mbanyi ne atwerɛfoɛ nemɔ pena atee pa bɔ bɛkɔfa so bɛkɔhu Yesu, ofikyɛ ne bɛsuro mmenia ne.

3 Na Satan wurale Yuda, bɔ bɛfrɛ ye Iskariot bɔ ɔboka buru-ne-nyɔ naso nanu. 4 Ɔhɔle sɔfo mbanyi ne polisifoɛ bɔ bɛnea asɔre awuro berɛ ne dɔ, na ɔne bɛ hane atee bɔ ɔkɔfa so kɔye Yesu kɔma bɛ ɔ. 5 Bɛ nye gyele paa, na bɛhane kyɛ, bɛkɔma ye sikaa. 6 Ole tole nu, na ɔhyɛle yebo penane atee pa bɔ ɔkɔfa so kɔye ye kɔma bɛ, mmerɛ bɔ mmenia nne berɛ ɔ.

7 Kyẽa bɔ bɛdi Paanoo bɔ Yiste Nne Nu afahyɛ ne dwuli so, sɔ kyẽa ne yeɛ né bɛfa Pɛnu boan ne bɛbɔ afɔleɛ ne. 8 Yeti, Yesu somane Petro ne Yohane, na ɔha hyirele bɛ kyɛ: "Ɛmɔhɔ bɛɛsiesie Pɛnu ne ma yɛɛli." 9 Bɛha bɛhyirele ye kyɛ: "Nisɔa yeɛ ɛpena kyɛ yɛkosiesie Pɛnu ne?" 10 Ɔha hyirele bɛ kyɛ: "Sɛ ɛmɔwura kuro nanu a, ɛmɔ koyia biaa bie, ɔsõ bua bɔ nzu wɔ nu. Ɛmɔli ye si bɛhɔ awuro bɔ okowura nu nanu, 11 na ɛmɔha behyire efiewura ne kyɛ, ‘Kyerɛkyerɛniɛ ne nwa yɛbisa wɔ kyɛ: "Ɛwɔfoɛ sua bɔ mene m’asuafoɛ ne koli Pɛnu ne wɔ nu ne, ɔwɔ nisua?" ’ 12 Na okohyire ɛmɔ aborosaen sua kandinga bie bɔ basiesie nu kama, ɛmɔsiesie Pɛnu ne wɔ berɛ." 13 Bɛhɔle ne, bɛnwuni ye kyɛbɔ ɔhane ne pɛpɛɛpɛ, yeti bɛsiesiele Pɛnu ne.

14 Mmerɛ ne sone ne, Yesu ne asomafoɛ nemɔ tenane tɛbulu nwo kyɛ bɛdidi. 15 Yeɛ ɔha hyirele bɛ kyɛ: "Bɔ ɔla me ahone so paa yeɛ ole kyɛ, mene ɛmɔ koli Pɛnu he kora ne manwu amaneɛ. 16 Ofikyɛ meka mekyire ɛmɔ kyɛ, mengoli kõ, sana wawa nu wɔ Nyameɛ Ahennie nanu." 17 Yeɛ ɔfale kwangoa, na ɔlale ase yiele ne, ɔhane kyɛ: "Ɛmɔle ɛhe, na ɛmɔma ebiala no bie. 18 Na meka mekyire kyɛ, ofi ɛnɛ bɔ ɔkɔ ne, mengɔno bobe nzãa kõ kodwu kyɛ Nyameɛ Ahennie ne kɔwa." 19 Afei ɔfale paanoo, na ɔlale ase yiele ne, obuli nu, yeɛ ɔfa mane bɛ hane kyɛ: "Ɛhe gyi berɛ ma me nipadua bɔ ɛmɔ ti bɛfa bɛma ne. Ɛmɔhɔ so bɛyɛ ɛhe bɛfa bɛkaye me." 20 Na bɛlili nnɔsoa aleɛ ne beyiele ne, ɔyɛle kwangoa ne koso sɔ; ɔhane kyɛ: "Sɔ kwangoa he gyi berɛ ma apam foforɛ bɔ bɛfa me mogya bɛyɛ ne, bɔ ɛmɔ ti bɛkɔhwie bɛkogua ne.

21 "Nakoso ɛmɔse, bɔ ɔkɔye me kɔma ne, ɔte tɛbulu he anwo bie. 22 Bɔ ɔte yeɛ ole kyɛ, Sona Awa ne kowu kyɛbɔ bahyɛ bato berɛ ne, nakoso sona bɔ ɔkɔye ye kɔma ne, ye yaakɔ!"

23 Né bɛpena kyɛ bɛnwu sona-horɛ bɔ ɔkɔyɛ sɔ nikye ne, yeti bɛhyɛle yebo kyɛ bɛbisa bɛ nwo ngoko-ngoko.

24 Afei asuafoɛ nemɔ suli aporowaa paa, né ɔfa sona bɔ ɔte piri wɔ bɛ nu nanwo. 25 Yeɛ Yesu ha hyirele bɛ kyɛ: "Ahemvo bɔ bɛwɔ maen-maen nanu ne de, bɛdi bɛ mmenia nemɔ so bakoma, na bɛ bɔ bɛdi tumi ne, bɛka kyɛ bɛte mmeni pa. 26 Nakoso nná sɔ yeɛ odikyɛ ɔkɔso wɔ ɛmɔ nu ɔ. Mmom bɔ ɔte piri wɔ ɛmɔ nu ne, ɛmɔma ɔyɛ ye nwo akwalaa, ná bɔ oli anyunu ne yɛ ye nwo somvoɛ. 27 Ma mmisa ɛmɔ, sona bɔ ɔte tɛbulu nwo odidi, ɔne bɔ ɔsõ ne, nwa yeɛ ɔte piri ɔ? Nná bɔ odidi ne? Nakoso me de, nwɔ ɛmɔ nu kyɛ mesõ ɛmɔ.

28 "Ɛmɔ yeɛ ɛmɔ abata me nwo wɔ me nzɔhwɛ nu, 29 yeti mene ɛmɔ yɛ ahennie nwo apam, kyɛbɔ me Baba ne me ayɛ ahennie nwo apam ne, 30 ná ɛmɔ ne me atena tɛbulu nwo badidi bano wɔ m’ahennie nu, na ɛmɔ atena ahemvo bia* so babu Israel mmusuakue 12 ne atɛn.

31 "Simon, Simon, nea, Satan pena kyɛ ohu ɛmɔ so te kyɛ hwiit. 32 Nakoso mabɔ mbaeɛ mama ɛmɔ, kyɛbɔ ɔkɔyɛ a, ɛmɔ gyidie ngɔyɛ mmerɛ; esa ba ala pɛ, hyɛ eliema nemɔ nguraen." 33 Yeɛ Petro ha hyirele ye kyɛ: "Awurade, mayɛ krado kyɛ mene wɔ kɔhɔ prizin, na ewue po mene wɔ kowu." 34 Nakoso Yesu ha hyirele ye kyɛ: "Petro, meka mekyire wɔ kyɛ, kyɛ dee bɔ akɔ bɔ ne, ne aha ye pɛn nza kyɛ ɛnze me."

35 Yeɛ osa ha hyirele bɛ kyɛ: "Mesoma ɛmɔ, bɔ ngane kyɛ nnɛmɔfa sikaa bɔtɔ, aleɛ bɔtɔ anaa mmaboa ne, ɛmɔ nwo hyerele ɛmɔ hɔ?" Bɛyele yenoa kyɛ: "Daabi." 36 Yeɛ ɔha hyirele bɛ kyɛ: "Nakoso kesaalae de, bɔ ole sikaa bɔtɔ ne, ma ɔfa na bɔ ole aleɛ bɔtɔ ne koso, ma ɔfa. Na bɔ olle dadeɛ ne, ɔtɔne ye atadeɛ na ɔfa tɔ bie. 37 Na bɔ meka mekyire ɛmɔ yeɛ ole kyɛ, odikyɛ sɔ tworɔnzɛm he ba nu wɔ me so kyɛ: ‘Bɛfale ye bɛ bokale mmeratofoɛ.’ Ofikyɛ bɔ bahworɔ bafa me nwo ne, ɔba nu." 38 Yeɛ bɛha bɛhyirele ye kyɛ: "Awurade, nea, dadeɛ nyɔ ɛhe." Na ɔha hyirele bɛ kyɛ: "Ɛhene ala te pa."

39 Kyɛbɔ ne Yesu taa yɛ ne, ofili berɛ hɔle Olive Bokaa naso, na asuafoɛ nemɔ ne ye hɔle. 40 Odwuli berɛ ne, ɔha hyirele bɛ kyɛ: "Ɛmɔ bɔ mbaeɛ, na ɛmɔ angɔ nzɔhwɛ nu." 41 Na ofili bɛ nwo berɛ hɔle dede kaa, yeɛ obuli ndwerɛ bɔle mbaeɛ 42 kyɛ: "Baba, sɛ ekuro a, ye kwangoa he fi me so. Nakoso nná bɔ mekuro yeɛ ɔyɛ berɛ ɔ, bɔ ekuro mmom yeɛ ɔyɛ berɛ ɔ." 43 Na abɔfo fili anwuro wale, na ɔhyɛle ye nguraen. 44 Ná ye nwo bɔ ne ɔteetee ye nati, ɔyerele ye nwo bɔle mbaeɛ paa; na ye nwo mvifire yɛle kyɛ mogya bɔ ɔpepe ne.

45 Na ɔbɔle mbaeɛ ne yiele ne, ɔhɔle nekaa bɔ asuafoɛ ne wɔ ne, odwuli berɛ ne, né bala, ofikyɛ aworaborɛ ti, né bafɛ. 46 Yeɛ ɔha hyirele bɛ kyɛ: "Nzuati yeɛ ɛmɔda ne? Ɛmɔ dwɔso bɛbɔ mbaeɛ, na ɛmɔ angɔ nzɔhwɛ nu."

47 Ogu so odwudwo ne, bɛkwaanea a, mmeni lɔen bie ɛhe, na Yuda bɔ né ɔboka buru-ne-nyɔ naso ne, yeɛ né oli bɛ nyunu ɔ. Ɔwale Yesu nwo berɛ, na ɔfele ye noa nwo. 48 Yeɛ Yesu bisale ye kyɛ: "Yuda, yeti bɔ ɛfa ye Sona Awa ne ma yeɛ ole kyɛ ɛkɔfe ye noa?" 49 Asuafoɛ bɔ ne bɛne Yesu wɔ berɛ ne nwuni bɔ ɔbobɔ ba ne, bɛbisale ye kyɛ: "Awurade, yɛfa dadeɛ ne yɛhɔ bɛ so anaa?" 50 Na bɛ nu kõ fale dadeɛ pɛle sɔfo panyi ne akoaa ne so famaa fili berɛ. 51 Nakoso Yesu hane kyɛ: "Ɛhe ala te pa!" Na ɔfale ye sa hane ye so ne maa ye nwo tɔle ye. 52 Afei Yesu ha hyirele sɔfo mbanyi, polisifoɛ bɔ bɛnea asɔre awuro berɛ, ɔne mbanyi bɔ bɛwale kyɛ bɛbaahye ye ne kyɛ: "Nzuati yeɛ ɛmɔ afa dadeɛ ne mmo-kuro-mma bawa me so te kyɛ ɛmɔ baahye awieniɛ bie ne? 53 Mmerɛ bɔ ne mene ɛmɔ wɔ asɔre awuro berɛ eyia ne kɔngɔen ne, ɛmɔ angye me. Nakoso ɛmɔ mmerɛ ɛhe, ɔte mmerɛ bɔ awosii di tumi."

54 Afei bɛhyele ye, na bɛfale ye bɛwale sɔfo panyi né awuro, na Petro lili bɛ si, nakoso ne ɔwɔ dede. 55 Bɛsɔle see wɔ awuro ne aluo berɛ bɛtenane ye nwo, na Petro tenane bɛ nwo berɛ bie. 56 Na abaawa bie nwuni kyɛ ɔte see nanwo berɛ ne, ɔneane ye haa hane kyɛ, "Akoaa he koso, né ɔboka ye so." 57 Nakoso ɔsale kyɛ, "Maame, menze ye!" 58 Ɔyɛle kaa ne, sona foforɛ nwuni ye, yeɛ ɔhane kyɛ: "Wɔ koso, né ɛboka bɛ so." Nakoso Petro hane kyɛ: "Baba, mmmoka bɛ so." 59 Kɔyɛ dɔnhwere kõ si ne, sona foforɛ sa sili so kyɛ: "Amba, ne sɔ akoaa he boka ye so, na ye koso ɔte Galileaniɛ." 60 Nakoso Petro hane kyɛ: "Baba, bɔ ɛka ne, menze ye nwo hwee." Na ogu so odwudwo ne, akɔ bɔle. 61 Na Awurade pɛle ye nye neane Petro. Na Petro kayele edwirɛ bɔ Awurade ha hyirele ye ne, ɔhane kyɛ: "Ɛnɛ, kora bɔ akɔ kɔbɔ ne, né aha ye pɛn nza kyɛ ɛnze me." 62 Na ofitele oosuni paa.

63 Na bɛ bɔ bɛnea Yesu so ne hyɛle yebo gorole ye nwo, na bɛbole ye. 64 Afei bɛfale nikye bɛkatale ye ti, yeɛ bɛha bɛhyirele ye kyɛ: "Hyɛ ngɔm! Nwa yeɛ ɔbɔle wɔ ne?" 65 Na bɛkekane mmusue dwirɛ pee betiale ye.

66 Aleɛ hene ne, maen nanu mbanyi ne, sɔfo mbanyi ne atwerɛfoɛ namukoraati yiale nu, na bɛfale Yesu bɛhɔle Sanhendrin ne nyunu, yeɛ bɛbisale ye kyɛ: 67 "Sɛ wɔ yeɛ ɛle Kristo ne a, ka kyire yɛ." Nakoso ɔha hyirele bɛ kyɛ: "Sɛ meka mekyire ɛmɔ po a, ɛmɔ ngole ngoli, 68 na sɛ me bisa ɛmɔ dwirɛ a, ɛmɔ ngɔye me noa. 69 Nakoso ofi ɛnɛ bɔ ɔkɔ ne, Sona Awa ne kɔtena Otumvoɛ Nyameɛ ne sa famaa so." 70 Ɛhe ati, bɛ mukoraati bɛbisale ye kyɛ: "Ye de, nnaa wɔ yeɛ ɛle Nyameɛ Awa ne?" Ɔha hyirele bɛ kyɛ: "Ye ala yeɛ ɛmɔ aha ne." 71 Yeɛ bɛhane kyɛ: "Yɛpena adanzeɛ foforɛ yɛyɛ nzu? Edwirɛ ne mia ye bɔbɔ wapakye nu waha."