Lucas 22

54 Afei bɛhyele ye, na bɛfale ye bɛwale sɔfo panyi né awuro, na Petro lili bɛ si, nakoso ne ɔwɔ dede. 55 Bɛsɔle see wɔ awuro ne aluo berɛ bɛtenane ye nwo, na Petro tenane bɛ nwo berɛ bie. 56 Na abaawa bie nwuni kyɛ ɔte see nanwo berɛ ne, ɔneane ye haa hane kyɛ, "Akoaa he koso, né ɔboka ye so." 57 Nakoso ɔsale kyɛ, "Maame, menze ye!" 58 Ɔyɛle kaa ne, sona foforɛ nwuni ye, yeɛ ɔhane kyɛ: "Wɔ koso, né ɛboka bɛ so." Nakoso Petro hane kyɛ: "Baba, mmmoka bɛ so." 59 Kɔyɛ dɔnhwere kõ si ne, sona foforɛ sa sili so kyɛ: "Amba, ne sɔ akoaa he boka ye so, na ye koso ɔte Galileaniɛ." 60 Nakoso Petro hane kyɛ: "Baba, bɔ ɛka ne, menze ye nwo hwee." Na ogu so odwudwo ne, akɔ bɔle. 61 Na Awurade pɛle ye nye neane Petro. Na Petro kayele edwirɛ bɔ Awurade ha hyirele ye ne, ɔhane kyɛ: "Ɛnɛ, kora bɔ akɔ kɔbɔ ne, né aha ye pɛn nza kyɛ ɛnze me." 62 Na ofitele oosuni paa.