1 Farisifoɛ ne Sadukifoɛ ne wale Yesu berɛ, né bɛpena kyɛ bɛsɔ ye bɛnea, yeti bɛha bɛhyirele ye kyɛ ɔyɛ nzɛngyerɛneɛ bɔ ofi anwuro ma bɛnea. 2 Yeɛ Yesu ha hyirele bɛ kyɛ: "Sɛ odwu nnɔsoa a, ɛmɔka kyɛ, ‘Ewienu kɔte, ofikyɛ ewienu ayɛ kɔɔ;’ 3 na ngyerɛmɔ koso, ɛmɔka kyɛ: ‘Ewienu kɔyɛ frɔlɔɔ maa nzue kɔtɔ, ofikyɛ ewienu ayɛ kɔɔ, na nzue ne amuna.’ Ɛmɔ kora bɛkyire ewienu tebea bo, nakoso mmerɛ nanwo nzɛngyerɛneɛ ne de, ɛmɔnze. 4 Ɛnɛ mmerɛ* abɔnefoɛ ne bɛ bɔ bɛsɛkye agyaa ne pena nzɛngyerɛneɛ, nakoso bɛngonya nzɛngyerɛneɛ biala, sana Yona deɛ ne." Yeɛ ɔyakyile bɛ berɛ hɔle ɔ.

5 Bɛkɔ nzue ne si dɔ ne, asuafoɛ nemɔ wora fili kyɛ bɛkɔfa paanoo. 6 Na Yesu ha hyirele bɛ kyɛ: "Ɛmɔnea ɛmɔ nwo yé wɔ Farisifoɛ ne Sadukifoɛ mmɔka* nwo." 7 Na bɛhyɛle yebo kyɛ bɛdwene edwirɛ nanwo, yeɛ bɛhane kyɛ: "Sãa yamva paanoo biala yamma." 8 Yesu nwuni ngɔmmɔ bɔ bɛbɔ ne, ɔhane kyɛ: "Ɛmɔ bɔ ɛmɔ gyidie te kaa, nzuati yeɛ ɛmɔdwene paanoo bɔ ɛmɔ amva nanwo ne? 9 Ɛmɔnya bɛttele yebo? Ɛmɔngaye paanoo nnu bɔ mmenia 5,000 ne lili ne, ɔne ngɛndɛn dodoɔ bɔ ɛmɔ sesale ye wɔ yebo ne? 10 Anaa paanoo nzoo bɔ mmenia 4,000 lili, ɔne ngɛndɛn dodoɔ bɔ ɛmɔ sesale ye wɔ yebo ne? 11 Nzuati yeɛ ɛmɔnnwu ye kyɛ, nná paanoo nwo dwirɛ yeɛ meka ne? Mmom, ɛmɔnea ɛmɔ nwo yé wɔ Farisifoɛ ne Sadukifoɛ mmɔka* nwo." 12 Ɛberɛ yeɛ bɛtele yebo kyɛ, nná mmɔka* bɔ bɛfa bɛyɛ paanoo nanwo dwirɛ yeɛ ɔka ɔ, mmom Farisifoɛ ne Sadukifoɛ ngyerɛkyerɛ yeɛ ɔka ye nwo dwirɛ ne.

13 Yesu wale Kaesarea Filipi mandanu berɛ ne, obisale ye asuafoɛ nemɔ kyɛ: "Mmenia adwene yɛ bɛ kyɛ, sona Awa ne te nwa?" 14 Bɛyele ye noa kyɛ: "Ebiemɔ nwa Yohane Suboniɛ ne, ebiemɔ koso nwa Elia, yeɛ bɛ bɔ baha ne nwa Yeremia, anaa adiifoɛ bɔ baha ne bie." 15 Yeɛ obisale kyɛ: "Ɛmɔ koso, ɛmɔnwa nde sona beni?" 16 Yeɛ Simon Petro hane kyɛ: "Wɔ yeɛ ele Kristo ne, Nyameɛ teasefoɛ ne awa ne." 17 Yeɛ Yesu ha hyirele ye kyɛ: "Yona awa Simon, anigye yeɛ ole wɔ! Ofikyɛ nná anwoɔnaen ne mogya yeɛ ɔmaa ɛnwuni ɛhe ɔ, mmom me Baba bɔ ɔwɔ anwuro ne yeɛ ɔlale ye ali hyirele wɔ ɔ. 18 Afei meka mekyire wɔ kyɛ, wɔ yeɛ ɛle Petro, na nyɔbotaen he aso yeɛ ngosi m’asafo ngosie ɔ, na asieleɛ* ngɔhora nngoli so ngunim. 19 Ngɔfa anwuro ahennie ne nzafoa ngɔma wɔ, na bɔ ɛkɔkyekye ye wɔ aseɛ he aso ne, bɛkɔkyekye ye wɔ anwuro, na bɔ ɛkɔsangye ye wɔ aseɛ he aso ne, bɛkɔsangye ye wɔ anwuro." 20 Yeɛ ɔbɔle bɛ noa kyɛ, nnɛmaa bɛka bɛkyire ebiala kyɛ ye yeɛ ole Kristo ne.

21 Ofi sɔ mmerɛ ne, Yesu hyɛle yebo ha hyirele ye asuafoɛ ne kyɛ, odikyɛ ɔkɔ Yerusalem konwu amaneɛ wɔ mbanyi ne, sɔfo mbanyi, ne atwerɛfoɛ ne sa nu, na bɛku ye, na kyẽa bɔ ɔtɔ so nza ne, ɔkɔtingye. 22 Yeɛ Petro fale ye hɔle ahameɛ, na ɔhyɛle yebo hwili ye nyunu kyɛ: "Awurade, ka edwirɛ pa ma wɔ nwo, ɛhe ngɔwa wɔ so lle." 23 Na Yesu kakyile ye si hyirele Petro, yeɛ ɔha hyirele ye kyɛ: "Fi berɛ kɔ dɔ, Satan! Ɛte sintidua ma me. Ofikyɛ ɛndwene Nyameɛ adwene, sona adwene yeɛ ɔwɔ wɔ ti anu ɔ."*

24 Yeɛ Yesu ha hyirele ye asuafoɛ nemɔ kyɛ: "Sɛ ebie pena kyɛ odi me si a, ma ɔpa ye nwo si, ɔfa ye asɛnnua, na ɔhɔ so li me si. 25 Ofikyɛ ebiala bɔ ɔpena kyɛ ɔbɔ ye ngoa* nwo waen ne, okofi ye sa, nakoso ebiala bɔ me ti ye ngoa kofi ye sa ne, ye sa kɔha ye. 26 Na sɛ ebie nya wiase ahonyadeɛ mukoraati, na ye ngoa fi ye sa a, mvasoɛ beni ye okonya ye ɔ? Na nzu yeɛ sona kɔhora kɔfa kɔsesa ye ngoa ɔ? 27 Sona Awa ne kɔwa ye Baba anuonyam nu bɔ abɔfo boka ye so, na okotua ebiala kerɛ, kyɛbɔ ye nneyɛɛ te ɔ. 28 Nahorɛ meka mekyire ɛmɔ kyɛ, bɛ bɔ bɛgyigyi wa ne bie wɔ berɛ a, bɛngɔwu, sana banwu kyɛ sona Awa ne awa ye ahennie nu kora."