1 "Ɛmɔnea yé, na ɛmɔ anyɛ ɛmɔ tenenee wɔ mmenia nyunu, kyɛbɔ bekonwu ɛmɔ ɔ. Sɛ ɛmɔyɛ sɔ a, ɛmɔngonya akatua biala nngofi ɛmɔ Baba bɔ ɔwɔ anwuro ne berɛ.

2 "Yeti, sɛ ɛmɔkwaayɛ adɔyɛ a, nnɛmɔ bɔ awɛen bɛdi ɛmɔ nyunu kyɛbɔ nyaatwomfoɛ nemɔ yɛ ye wɔ sua bɔ beyia nu nanu ne dwaaso maa mmenia kamvo bɛ ne. Nahorɛ nu, meka mekyire ɛmɔ kyɛ, banya b’akatua namukoraati bayie. 3 Nakoso wɔ de, sɛ ɛkwaayɛ adɔyɛ a, nnɛmaa wɔ sa bɛen nwu bɔ wɔ sa famaa ne yɛ ne, 4 kyɛbɔ ɔkɔyɛ a w’adɔyɛ ne kɔyɛ kokoanu deɛ. Ɛhene yeɛ wɔ Baba bɔ ɔnea kokoanu ne kotua wɔ kerɛ ɔ.

5 "Na sɛ ɛmɔ bɔ mbaeɛ a, nnɛmɔyɛ ye kyɛ nyaatwomfoɛ ne, bɛ de, bɛpena kyɛ bɛbɔ mbaeɛ wɔ sua bɔ beyia nu nanu, anaa dwaaso, nekaa bɔ mmenia konwu bɛ ɔ. Nahorɛ, meka mekyire ɛmɔ kyɛ, banya b’akatua mukoraati dada. 6 Nakoso, wɔ de, sɛ ɛbɔ mbaeɛ a, kɔ wɔ sua nu, to w’anoa nu, na bɔ wɔ Baba bɔ ɔwɔ kokoanu ne mbaeɛ. Ɛhene yeɛ wɔ Baba bɔ ɔnea kokoanu ne kotua wɔ kerɛ ɔ.

7 "Sɛ ɛmɔbɔ mbaeɛ a, nnɛmɔ dwudwo pee* kyɛbɔ wiasefoɛ ne yɛ ne. B’adwene yɛ bɛ kyɛ, sɛ bɛdwudwo pee a,* ɛhene yeɛ ɔkɔmaa bɛkotie bɛ ɔ. 8 Nnɛmɔyɛ bɔ bɛyɛ ne bie, ofikyɛ ɛmɔ Baba ne se bɔ ohia ɛmɔ kora yeɛ ɛmɔ bisa ye ɔ."

9 "Sɔa yeɛ ɛmɔbɔ mbaeɛ ɔ:

‘Yɛ Baba bɔ ɛwɔ anwuro,

wɔ dumaa nwo te.

10 W’Ahennie bra.

Bɔ ɛkuro yeɛ ɔyɛ berɛ wɔ aseɛ so,

kyɛbɔ ɔkɔ so wɔ anwuro ne.

11 Ma yɛ aleɛ bɔ ɔkɔso yɛ ɛnɛ,

12 na fa yɛ bɔne* kyɛ yɛ,

kyɛbɔ yafa yahyɛ bɛ bɔ bɛyɛ yɛ bɔne* ne.

13 Nnɛfa yɛ kɔ nzɔhwɛ nu,

mmom dɛ́ yɛ fi ɔbɔnefoɛ ne sa nu.’"*

14 "Sɛ ɛmɔfa amanvoɛ bɔne bɛkyɛ bɛ a, ɛmɔ Baba bɔ ɔwɔ anwuro ne koso kɔfa ɛmɔ deɛ kɔhyɛ ɛmɔ; 15 nakoso, sɛ ɛmɔ amva amanvoɛ bɔne bangyɛ bɛ a, ɛmɔ Baba bɔ ɔwɔ anwuro ne koso ngɔfa ɛmɔ deɛ ngɔhyɛ ɛmɔ lle.

16 "Sɛ ɛmɔyɛ akɔngyere a, nnɛmɔyɛ ɛmɔ nyunu bosaa te kyɛ nyaatwomfoɛ ne, ofikyɛ bɛyɛ bɛ nyunu bosaa na wamaa mmenia anwu kyɛ bɛyɛ akɔngyere. Nahorɛ, meka mekyire ɛmɔ kyɛ, banya b’akatua mukoraati dada. 17 Nakoso, wɔ de, sɛ ɛyɛ akɔngyere a, fa sakyeɛ popa wɔ ti anu, na nwunzi wɔ nyunu, 18 kyɛbɔ ɔkɔyɛ a, mmenia ngonwu kyɛ ɛyɛ akɔngyere. Mmom wɔ Baba bɔ onwu kokoanu ne ngome yeɛ okonwu ye ɔ. Ɛhene yeɛ ɔkɔmaa wɔ Baba bɔ ɔwɔ kokoanu ne kotua wɔ kerɛ ɔ.

19 "Ɛmɔyakyi agyapadeɛ bɔ ɛmɔboɔboa ye noa wɔ aseɛ he aso ne; ɛwa de mvrɔlɔ di, ɔwe naakye, na awiefoɛ kora wia. 20 Mmom, ɛmɔboa ɛmɔ agyapadeɛ noa wɔ anwuro, ɛberɛ de mvrɔlɔ nni, ɔnwe naakye, na awiefoɛ ngora nnwia. 21 Ofikyɛ nekaa bɔ w’agyapadeɛ wɔ ne, ɛberɛ yeɛ w’ahone wɔ ɔ.

22 "Anyeɛ yeɛ ɔte nipadua ne kanea ɔ. Yeti sɛ wɔ nye te pa* a, wɔ nipadua namukoraati kɔta hyireinn. 23 Nakoso, sɛ wɔ nye ttemaye a,* wɔ nipadua namukoraati kɔha awosii nu. Na sɛ kanea bɔ ɔwɔ wɔ nu ne te awosii a, ye de, né ye awosii ne te kabii pa.

24 "Ebiala nne berɛ bɔ ɔkɔhora kɔsõ mmenia* nyɔ ɔ; ofikyɛ ɔkɔtane kõ, na wahuro kõ dwirɛ, anaakyɛ ɔkɔbata kõ anwo, na wabu kõ né animtia. Ɛmɔ ngɔhora bɛngɔsõ Nyameɛ ne ahonyadeɛ.

25 "Yeti, meka mekyire ɛmɔ kyɛ: Nnɛmɔ dwene ɛmɔ ngoa* nwo kyɛ, nzu yeɛ yɛkoli, anaa nzu yeɛ yɛkɔno ɔ; anaa ɛmɔ nipadua nwo kyɛ nzu yeɛ yɛkowura ɔ. Aso, ngoa nhia ndra aleɛ, na nipadua ne ndra atadeɛ? 26 Ɛmɔto ɛmɔ bo ase bɛnea ewienu nnomaa: Bɛnyɛ boo, bɛmbɛ, ná baboaboa ye noa bagua pata so, nakoso, ɛmɔ anwuro Baba ne ma bɛ aleɛ. Aso ɛmɔ nwo nhia ndra bɛ? 27 Ɛmɔ nu nwa yeɛ sɛ ɔdwene dee a, ɔkɔhora kɔfa dɔnhwere komapɛ* po kɔboka ye ngoa so ɔ?

28 "Na nzuati yeɛ ɛyɛ a ɛmɔha ɛmɔ nwo wɔ ndadeɛ nwo ɔ? Ɛmɔnea kyɛbɔ flawa nyi ne, ná ɛmɔsua nikye bie bɛfi nu; bɛnyɛ adwuma, na bɛnwõ ɛtena. 29 Nakoso, meka mekyire ɛmɔ kyɛ, anuonyam bɔ Solomon nyane ye namukoraati si ne, wanziesie ye nwo kyɛ ɛhemɔ nu kõ po. 30 Na sɛ Nyameɛ wura eburo nningyein bɔ ɔwɔ berɛ ɛnɛ, na ɛhema bagyi bagua see nu né ndaadeɛ a, ɔngowura ɛmɔ atadeɛ maa ɔngɔbo so? Ɛmɔ bɔ ɛmɔ gyidie te kaa ɔ.

31 "Yeti, nnɛmɔ ha ɛmɔ nwo bɛdwene bɛka kyɛ, ‘Nzu yeɛ yɛkoli ɔ?’ anaa ‘Nzu yeɛ yɛkɔno ɔ?’ anaa ‘Nzu yeɛ yɛkowura ɔ?’ 32 Ofikyɛ sɔ nningyein he yeɛ bɛ bɔ bɛwɔ wiase ne nye aboro ye nwo ne. Nakoso, ɛmɔ anwuro baba ne se kyɛ ɛmɔhia sɔ nningyein he amukoraati. 33 Ɛmɔ de, ɛmɔli moa bɛpena Ahennie ne, ɔne Nyameɛ tenenee, na ɔkɔfa sɔ nningyein he amukoraati kɔboka ɛmɔ so." 34 "Yeti, nnɛmɔ dwene ɛhema nwo, ofikyɛ kyẽa ne bɔbɔ kɔdwene ye nwo. Kyẽa biala, ɔhaw bɔ ɔwɔ nu ne sone ma ye."