1 Ná majñu̱ú tsí nanimbu̱únꞌ juyáá Jesús ná Antiokía̱ júwa̱ꞌ xa̱bo̱ tsí nu̱rawíjnga̱a ajngóo Ana̱ꞌlóꞌ jamí tsí nusngáá. Ikhii̱n ñajúún: Bernabé, Simón (tsí nutháa̱n «Xa̱bo̱ Skunii»), Lúsio̱ tsí na̱ꞌkha̱ ná xuajen Siréne̱, Manaén tsí mbóó nigaja̱a̱ ga̱jma̱á thúngaa Eróde̱s, jamí Sáu̱lo̱ mangaa. 2 Mbá mbiꞌi rí tsúꞌkhue̱n júwa̱ꞌ nune̱-mba̱a̱ Táta̱, jamí nune̱-miꞌkhíi̱, a̱ꞌkhue̱n niꞌthán Xu̱u̱ꞌ Ana̱ꞌlóꞌ: «Gu̱ríya̱a̱ꞌlaꞌ janíí Bernabé ga̱jma̱á Sáu̱lo̱, kajngó muni̱i̱ ñajun rí ni̱ndxa̱ꞌwúu̱n muni̱i̱». 3 Ído̱ wámbúu̱n nene̱-miꞌkhíi̱ jamí nithán-jáñíi̱ Ana̱ꞌlóꞌ, a̱ꞌkhue̱n ni̱xkra̱mii̱ꞌ jamí nithan-ngawúu̱n.

4 A̱ꞌkhue̱n Bernabé ga̱jma̱á Sáu̱lo̱ waxúꞌmii̱ neꞌne Xu̱u̱ꞌ Ana̱ꞌlóꞌ ná Seléusia̱, jamí ikhín nitsimúu̱ mbá guꞌwá-rguwa rí na̱ka̱ ná Chípre̱. 5 Ído̱ niguáꞌníi̱ ná xuajen Salamína̱, a̱ꞌkhue̱n ni̱gíꞌdíi̱n nithan-raꞌee̱ ajngóo Ana̱ꞌlóꞌ ná awúun mbámbá guꞌwá rí na̱gi̱mbíin xa̱bo̱ judío̱. Na̱ka̱ Juáán mangaa ga̱jma̱á nindxúu̱n jamí nambáñúu̱.

6 Nigóo̱-ranújngúu̱n mbá xúgíí mbaa rí kua̱ꞌa̱n ná awúun iya a̱pha̱, jamí niguáꞌníi̱ asndo ná xuajen Páfo̱s. Ikhín ni̱xkamaa̱ mbáa xa̱bo̱ judío̱ mbiꞌyuu Barjesús, tsí na̱ma̱ñuu naꞌne xawan, jamí na̱gu̱wíjnga̱a ajngáa rí mi̱nduwa. 7 Xa̱bo̱ xawan tsíge̱ꞌ ngrigo̱o̱ꞌ ga̱jma̱á thúngaa Sérgio̱ Páulo̱, tsí phú máján idxu̱u̱. Thúngaa tsíge̱ꞌ nindxaꞌwóo Bernabé ga̱jma̱á Sáu̱lo̱, numuu rí nandoo̱ madxawuu̱n ajngóo Ana̱ꞌlóꞌ. 8 Xómáꞌ xa̱bo̱ tsí na̱ma̱ñuu naꞌne xawan, tsí mbiꞌyuu Elíma̱s ná ajngáa griégo̱, na̱we̱je̱-ꞌthu̱u̱n Bernabé ga̱jma̱á Sáu̱lo̱, numuu rí tsíyoo̱ rí ma̱nimbo̱o̱ꞌ thúngaa jaꞌyoo Ana̱ꞌlóꞌ. 9 A̱ꞌkhue̱n Sáu̱lo̱, tsí mbiꞌyuu Páblo̱ mangaa, xtáa Xu̱u̱ꞌ Ana̱ꞌlóꞌ ga̱jma̱á nindxu̱u̱, niraꞌe̱e̱ inuu Elíma̱s. 10 Jamí niꞌthúu̱n: «Gatíí mbá xúgíí inii rí mi̱nduwa jamí mbá xúgíí inii rí ra̱máján ná awúun a̱kia̱anꞌ. A̱dée gixa̱a̱ ñajwaanꞌ, jamí xa̱bo̱ tsí tsíyoo jaꞌyoo mbá xúgíí rí máján ñajwaanꞌ. Á ma̱xáta̱tsi̱ꞌñáá rí nathane̱-maꞌchíí jamba̱a̱ jmbu drígo̱o̱ Táta̱ dxe̱ꞌ. 11 Ikhaa jngó rí xúge̱ꞌ rá, Táta̱ ma̱ꞌne rí ma̱ta̱míni̱í. Ma̱ꞌnii̱ rí ma̱xáfriga̱a̱ꞌ jamí ma̱xátha̱ya̱á aguu a̱kha̱ꞌ mbá wátha̱ wáa mbiꞌi».

A̱ꞌkhue̱n núkho̱ máꞌ nijúgoo iduu̱ jamí neꞌne jína inuu̱. Wíji̱i̱-ratuaꞌáa̱n, jamí ndaꞌyáa̱ tsí maguatuun ñawúu̱n kajngó mbayá ikhoo̱. 12 Ído̱ rí thúngaa ndiꞌyoo rí niríga̱, a̱ꞌkhue̱n ninimbo̱o̱ꞌ jaꞌyoo̱ Ana̱ꞌlóꞌ, jamí phú nimakuu̱ neꞌne gisngáá ga̱jma̱á numuu Táta̱.

13 Páblo̱ jamí tsí gajmíi̱ nitsimúu̱ guꞌwá-rguwa ná Páfo̱s, niguáꞌníi̱ ná xuajen Pérje̱, mbayuu Panfília̱. Xómáꞌ Juáán niniñúu̱, nithangaa̱ ni̱kaa̱ ná xuajen Jerusalén. 14 A̱ꞌkhue̱n ikhii̱n, nigájnúu̱ ná xuajen Pérje̱, niguáꞌníi̱ ná xuajen Antiokía̱ mbayuu Pisídia̱. Mbá mbiꞌi rí nduya̱a xu̱únꞌ xa̱bo̱ ni̱tu̱ꞌúu̱n ná guꞌwá rí na̱gi̱mbíin xa̱bo̱ judío̱ jamí nitrigii̱n. 15 Nda̱wa̱á, ído̱ wámba̱ ni̱gi̱ꞌxnuu xtángoo drígo̱o̱ Moisés xúꞌkhue̱n máꞌ rí nithan tsí ni̱rawíjnga̱a ajngóo Ana̱ꞌlóꞌ, a̱ꞌkhue̱n xa̱bo̱ tsí juya̱ idxu̱u̱ ná guꞌwá rí na̱gi̱mbíin xa̱bo̱ judío̱ ni̱xu̱ꞌma ajngáa rí mi̱ꞌthúu̱n: «Xa̱bo̱ buanuu a̱ngui̱nꞌ, xí guáꞌdáálaꞌ ajngáa rí mu̱tha̱n-múꞌúúnlaꞌ xa̱bo̱ xuajen, ma̱goo mu̱tha̱nlaꞌ xúge̱ꞌ».

16 A̱ꞌkhue̱n ni̱we̱je̱ Páblo̱, jamí niꞌnii̱ ñawúu̱n rí ma̱ꞌne-wíyuu gúne̱ xa̱bo̱, jamí niꞌthée̱n: «Xa̱bo̱ buanuu Israél, jamí tsáanꞌ nu̱ne̱-mba̱a̱laꞌ Ana̱ꞌlóꞌ, gu̱dxawíínlaꞌ. 17 Ana̱ꞌlóꞌ tsí nune̱-mba̱a̱ xa̱bo̱ xuajen Israél niraꞌwíi̱n táta̱-xi̱ꞌñálóꞌ wajyúú, jamí niꞌnii̱ rí ma̱nindxúu̱n mbá xuajen mba̱a̱ nákhí júwe̱e̱ꞌ ná ra̱ꞌkháa xuajñúu̱, ná Ejípto̱. Nda̱wa̱á ni̱gu̱wíi̱n ikhín ga̱jma̱á phú mba̱a̱ ski̱yu̱u̱ꞌ. 18 Jamí ni̱ꞌngo̱o̱ a̱kuii̱n jaꞌñúu̱ a̱jma̱ skíñú (40) tsigu ná mbaa niníí. 19 Jamí ído̱ wámbo̱o̱ Ana̱ꞌlóꞌ neꞌne-gámba̱a mbá juwan xuajen numbaa rí triga̱ ná Kanaán, a̱ꞌkhue̱n niniñuu̱ mbañúú xa̱bo̱ tsúꞌkhue̱n ná ñawúún táta̱-xi̱ꞌñálóꞌ wajyúú. 20 Mbá xúgíí ríge̱ꞌ niríga̱ awúun rí xó mbá akho̱ siénto̱ a̱jma̱ skíñú gu̱wa̱ꞌ (450) wáa tsigu.

»Nda̱wa̱á a̱ꞌkhue̱n Ana̱ꞌlóꞌ neꞌne rí ma̱ju̱wá xa̱bo̱ tsí mbuya̱ ikhúu̱n, xkuaꞌnii asndo mbiꞌi rí nixtáa Samuél tsí ni̱gu̱wíjnga̱a ajngóo Ana̱ꞌlóꞌ. 21 A̱ꞌkhue̱n ikhii̱n ni̱nda̱ꞌa̱a̱ mbáa thúngaa, jamí Ana̱ꞌlóꞌ niꞌgíi Saúl, a̱dée táta̱ Sís, tsí na̱ꞌkha̱ ná ri̱jyu̱u̱ꞌ Benjamín. A̱ꞌkhue̱n Saúl niꞌthán-ñájun a̱jma̱ skíñú (40) tsigu. 22 Ído̱ rí Ana̱ꞌlóꞌ niríya̱aꞌ Saúl, a̱ꞌkhue̱n niꞌgíi̱ Dabíd rí ma̱nindxu̱u̱ thúngaa, tsí niꞌthée̱n ríge̱ꞌ numuu: "Ni̱xkamaalo̱ꞌ ná Dabíd, a̱dée táta̱ Isaí, mbáa xa̱bo̱ tsí xómá jaꞌnii a̱kui̱nꞌ jaꞌnii a̱kuii̱n. Ikhaa̱ ma̱ꞌnii̱ mbá xúgíí rí nandoꞌ".

23 »Ikhín máꞌ ná ri̱jyu̱u̱ꞌ Dabíd ni̱ꞌkha̱ Jesús tsí ma̱ꞌne-jáwíin xa̱bo̱ Israél, xómá rí nixuda-mina̱ꞌ Ana̱ꞌlóꞌ wajyúú. 24 Nákhí rí inu máꞌ ma̱ꞌkha̱ Jesús, niꞌthán-raꞌa Juáán ná inúú xa̱bo̱ xuajen Israél, rí mi̱xúꞌdu-maꞌíin xa̱bo̱ ná awúun iya kajngó ma̱kujma rí nathanga̱a a̱kuíi̱n ná inuu Ana̱ꞌlóꞌ. 25 Jamí ído̱ rí inu máꞌ na̱ka̱-rámbo̱o̱ Juáán ñajun rí naꞌne, a̱ꞌkhue̱n niꞌthée̱n: "Tsáa ñajunꞌ i̱ju̱ma̱ꞌlaꞌ rá. Ra̱ꞌkhá ikhúúnꞌ ñajunꞌ ikhaa̱. I̱ndo̱ó máꞌ numuu rí gu̱ya̱álaꞌ rí ná tsu̱du̱ꞌ na̱ꞌkha̱ mbáa tsí ni ra̱jáꞌyoꞌ rí ma̱ra̱khúu chádoo".

26 »Xa̱bo̱ buanuu a̱ngui̱nꞌ, tsáanꞌ ñajwanlaꞌ xa̱bo̱ ri̱jyu̱u̱ꞌ Abraám, xúꞌkhue̱n máꞌ tsáanꞌ ra̱ꞌkháa xa̱bo̱ judío̱ ñajwanlaꞌ tsí nu̱ne̱-mba̱a̱laꞌ Ana̱ꞌlóꞌ, ná inalaꞌ ikháanꞌlaꞌ ni̱ga̱nú ajngáa ríge̱ꞌ kajngó ma̱jríñáaꞌlaꞌ.* 27 Numuu rí xa̱bo̱ tsí júwa̱ꞌ ná Jerusalén jamí xa̱bo̱ ñajun drígúu̱n, táfruꞌúu̱n tsáa ñajuun Jesús, ni máꞌ táfruꞌúu̱n ajngúún xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú, rí na̱gi̱ꞌxnuu inúu̱ mbámbá mbiꞌi rí nduya̱a xu̱únꞌ xa̱bo̱. I̱ndo̱ó máꞌ numuu rí ikhii̱n máꞌ nene̱-mbáníi̱ ajngúún xa̱bo̱ tsúꞌkhue̱n nákhí nixna-ñajwii̱n rí ma̱ja̱ñúu Jesús. 28 Maske máꞌ na̱nguá ni̱xkamaa̱ náá numuu kajngó asndo jaꞌyoo rí ma̱ja̱ñúu̱, ni̱nda̱ꞌáa̱ Piláto̱ maxná ajngóo rí ma̱ja̱ñúu Jesús. 29 Ído̱ wámbúu̱n nene̱-mbáníi̱ mbá xúgíí rí ka̱ma naꞌthán ga̱jma̱á numuu Jesús, a̱ꞌkhue̱n ni̱ríguíi̱ ná ixe̱ krúsi̱ jamí nidii̱. 30 I̱ndo̱ó máꞌ numuu rí Ana̱ꞌlóꞌ neꞌne rí mbayáa̱ mbiꞌyuu̱. 31 Jamí ikhaa̱ nisngájma-mine̱e̱ꞌ mbaꞌa mbiꞌi ná inúú tsí mbóó nitsimuu̱ gajmíi̱ ná Galiléa̱ asndo ná Jerusalén. Jamí xúge̱ꞌ ikhiin tsúꞌkhue̱n ñajúún tsí nuthan ná inúú xa̱bo̱ xuajen, rí ndiyáa̱ rí gakon ndiyáa mbiꞌyuu Jesús.

32 »Xúꞌkhue̱n máꞌ mangáanꞌxo̱ꞌ nu̱tha̱nꞌlaꞌxo̱ꞌ ajngáa máján rúꞌkhue̱n, rí nixuda-mina̱ꞌ Ana̱ꞌlóꞌ maxnúú táta̱-xi̱ꞌñálóꞌ wajyúú. 33 Ikhaa rúꞌkhue̱n neꞌne-mbánuu Ana̱ꞌlóꞌ ná inalóꞌ ikháánꞌlóꞌ, tsáanꞌ ñajwanlóꞌ i̱jíi̱n ikhii̱n, ído̱ niꞌnii̱ rí mbayáa mbiꞌyuu Jesús. Xómá ka̱ma naꞌthán ná Ajmúú rí riajma̱ mangaa:

"Ikháánꞌ ñajwaanꞌ A̱ꞌdéꞌ.

Ikhúúnꞌ ne̱ne̱-ku̱mááꞌ xúge̱ꞌ".*

34 Ana̱ꞌlóꞌ neꞌne rí mbayáa mbiꞌyuu Jesús, kajngó ni miꞌtsú náxíga xuyuu̱, xómá rí niꞌthée̱n nákhí wajyúú: "Ikhúúnꞌ ma̱ne̱-tsakun-rámáaꞌlaꞌ xómá ni̱tha̱n rí jámuu ma̱ne̱-tsakun-rámaa Dabíd".* 35 Ikhaa jngó naꞌthán ná i̱mba̱ Ajmúú mangaa: "Ma̱xáta̱tsi̱ꞌñáá rí mi̱ga xuyuu Yumbiáaꞌ tsí Jmbii".* 36 Numuu rí gakon máꞌ rí Dabíd neꞌne-mba̱ꞌwi̱in xa̱bo̱ tsí nijúwa̱ꞌ nákhí mbiꞌi rí nixtáa, xómá rí nandoo Ana̱ꞌlóꞌ. Nda̱wa̱á nijáñuu̱, nijnguáa̱n gajmíi̱ táta̱-xi̱ꞌñúu̱ wajyúú, jamí niꞌga xuyuu̱. 37 Xómáꞌ tsí ndiyáa mbiꞌyuu neꞌne Ana̱ꞌlóꞌ, tíga xuyuu̱.

38 »Ikhaa jngó, xa̱bo̱ buanuu a̱ngui̱nꞌ, nandoꞌ rí ma̱fraꞌa̱ꞌlaꞌ ríge̱ꞌ: ikháanꞌlaꞌ nithánlaꞌ rí Ana̱ꞌlóꞌ naꞌne mba̱a̱ a̱kui̱in jaꞌyoo aꞌkhánlaꞌ ga̱jma̱á majñu̱u̱ Jesús. 39 Jamí Ana̱ꞌlóꞌ naꞌne mba̱a̱ a̱kui̱in jaꞌyoo aꞌkhúun jámba̱a̱ xa̱bo̱ tsí nanimbo̱o̱ꞌ jaꞌyoo Jesús. Naꞌne mba̱a̱ a̱kuii̱n jaꞌyoo̱ mbá xúgíí aꞌkhúún xa̱bo̱ rí ra̱khóo ma̱ꞌne mba̱a̱ a̱kuii̱n jaꞌyoo̱ ga̱jma̱á majñu̱u̱ xtángoo drígo̱o̱ Moisés. 40 Ikhaa jngó, gu̱ña̱wa̱n-mijnálaꞌ, ra̱ꞌkhá ma̱gíꞌníí ikháanꞌlaꞌ rí nithan xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú:

41 "Gu̱ya̱xe̱laꞌ, tsáanꞌ nu̱tsi̱jmúúlaꞌ,

ga̱makualaꞌ, jamí ga̱mbáanꞌlaꞌ.

Numuu rí ikhúúnꞌ ma̱ne̱ mbá ñajun awúun mbiꞌi rí juwalaꞌ,

mbá ñajun rí ma̱xánimba̱ꞌlaꞌ,

maske máꞌ mbáa xa̱bo̱ maꞌthánlaꞌ ne̱"».*

42 Ído̱ rí Páblo̱ gajmíí a̱ngui̱in nigájnáa̱ ná guꞌwá rí na̱gi̱mbíin xa̱bo̱ judío̱,* a̱ꞌkhue̱n xa̱bo̱ tsí ra̱ꞌkháa judío̱ ñajúún nithan-jáñúu̱ rí ma̱thangii̱n i̱mba̱ mbiꞌi rí nduya̱a xu̱únꞌ xa̱bo̱, kajngó muthúu̱n xóó ga̱jma̱á numuu rúꞌkhue̱n. 43 Jamí ído̱ nigúun xa̱bo̱ tsí ni̱gi̱mbíin, a̱ꞌkhue̱n phú mbaꞌiin xa̱bo̱ judío̱ jamí tsí ni̱rtaxe̱-mijná rí ma̱nindxu̱ún xa̱bo̱ judío̱ nigóó tsu̱du̱u̱ Páblo̱ ga̱jma̱á Bernabé. Xómáꞌ ikhii̱n nithán-múꞌúu̱n rí mu̱xúni̱ꞌñáa̱-ranimbúu̱n juyáa̱ rí máján najanúu̱ eꞌne Ana̱ꞌlóꞌ.

44 Ído̱ ni̱ga̱nú i̱mba̱ mbiꞌi rí nduya̱a xu̱únꞌ xa̱bo̱, i̱tha̱án ma̱ꞌne mbá xúgíin xa̱bo̱ xuajen ni̱gi̱mbúun kajngó mu̱dxawíín ajngóo Ana̱ꞌlóꞌ. 45 Ído̱ ndiyáá xa̱bo̱ judío̱ rí phú mbaꞌiin xa̱bo̱ ni̱gi̱mbúun, a̱ꞌkhue̱n phú nixígúu̱n, jamí ni̱gíꞌdíi̱n nuthee̱n rí ra̱gákon rí naꞌthán Páblo̱ jamí nuthan-xkawíi̱ꞌ. 46 A̱ꞌkhue̱n Páblo̱ ga̱jma̱á Bernabé támíñúu̱ juñúu̱ jamí ni̱riꞌñúu̱: «Gakon máꞌ rí ikháanꞌlaꞌ ginii ndiꞌyóo rí mi̱ꞌthánlaꞌ ajngóo Ana̱ꞌlóꞌ. I̱ndo̱ó máꞌ numuu rí ikháanꞌlaꞌ tsíyalaꞌ gúdrígú ne̱, jamí na̱ju̱ma̱ꞌlaꞌ rí Ana̱ꞌlóꞌ táraꞌwáanꞌlaꞌ rí ma̱juwalaꞌ jámuu, ikhaa jngó rí xúge̱ꞌ rá, mu̱thu̱únxo̱ꞌ ne̱ xa̱bo̱ tsí ra̱ꞌkháa judío̱ ñajúún. 47 Numuu rí xkuaꞌnii nixná-ñájwanxo̱ꞌ Táta̱ nákhí niꞌthán:

"Ni̱ꞌgíínlo̱ꞌ rí ma̱nindxa̱a̱ꞌ xómá agu

rí nambiꞌñúú xa̱bo̱ tsí ra̱ꞌkháa judío̱ ñajúún,

kajngó ma̱nindxa̱a̱ꞌ tsí naꞌthán rí ikhúúnꞌ ma̱ꞌne-jáwíin xa̱bo̱

asndo ná ndámba̱-ri̱go̱o̱ rawuun numbaa"».*

48 Ído̱ ni̱dxawíín ajngáa ríge̱ꞌ xa̱bo̱ tsí ra̱ꞌkháa judío̱ ñajúún, phú gagi a̱kuíi̱n neꞌne jamí ni̱gíꞌdíi̱n nithee̱n rí máján ga̱jma̱á numuu ajngóo Táta̱. Xúꞌkhue̱n máꞌ ninimbu̱únꞌ juyáá Jesús mbá xúgíin tsí watraꞌwíin rí ma̱ju̱wá jámuu. 49 Jamí nithán-raꞌa ajngóo Táta̱ ná mbá xúgíí numbaa rúꞌkhue̱n. 50 Xómáꞌ xa̱bo̱ judío̱ nithan-mijnée̱ gajmíi̱ go̱ꞌo̱ tsí májíin jamí phú nitiamakúún ene̱ xa̱bo̱, xúꞌkhue̱n máꞌ nithan-mijnée̱ gajmíi̱ tsí ñajúún xa̱bo̱ ede̱ ná xuajen. Ikhiin tsúꞌkhue̱n nene̱-rájíi̱n kajngó mune̱-ngínáa̱ Páblo̱ ga̱jma̱á Bernabé, jamí ni̱ꞌngúu̱n ni̱xkawíi̱n ná awúun mbañúu̱. 51 A̱ꞌkhue̱n ikhii̱n ni̱xprígúu̱ yujnda̱ꞌ nakhúu̱n ná inúú xa̱bo̱ xuajen kajngó mbuyáa̱ rí ra̱máján ini̱i̱. Jamí nigóo̱ ná xuajen rí mbiꞌyuu Ikónio̱. 52 Xómáꞌ tsí nanimbu̱únꞌ juyáá Jesús phú gagi a̱kuíi̱n júwe̱e̱ꞌ, jamí xtáa mbá jayu Xu̱u̱ꞌ Ana̱ꞌlóꞌ ga̱jma̱á nindxúu̱n.