Atos 16

25 I̱ndo̱ó máꞌ numuu rí ído̱ neꞌne tikhuu mbroꞌon, Páblo̱ ga̱jma̱á Síla̱s nuthán-jáñíi̱ Ana̱ꞌlóꞌ, nuni̱i̱ ajmúú inuu Ana̱ꞌlóꞌ, jamí i̱ꞌwíin xa̱bo̱ tsí traꞌi̱in ná géjwa̱nꞌ nu̱dxawúu̱n. 26 A̱ꞌkhue̱n nda̱a̱ ajngóo gakhe̱ mi̱ndaꞌkho nixma, rí asndo nakhúu géjwa̱nꞌ niꞌba̱a̱n. Jamí núkho̱ ni̱ma̱ꞌthoo mbá xúgíí xkrugoo géjwa̱nꞌ, xúꞌkhue̱n máꞌ nikhúu mbá xúgíí ñuu ajwa̱nꞌ rí xtuꞌúún ga̱jma̱á xa̱bo̱. 27 Ído̱ nijwi̱i xa̱bo̱ tsí na̱ña̱wu̱u̱n géjwa̱nꞌ, jamí ndiꞌyoo̱ rí ja̱ma̱ꞌtha xkrugoo géjwa̱nꞌ, a̱ꞌkhue̱n niríye̱e̱ꞌ chídii̱ kajngó maxíya̱-mine̱e̱ꞌ, numuu na̱ju̱mu̱u̱ rí nigáñúú xa̱bo̱ tsí traꞌi̱in géjwa̱nꞌ. 28 Xómáꞌ Páblo̱ phú gakhe̱ nindxaꞌwá rí niꞌthúu̱n: «¡Ma̱xátha̱ne ñawún-mina̱ꞌ, numuu rí mbá xúgiáanꞌxo̱ꞌ máꞌ gacháanꞌxo̱ꞌ ge̱jyoꞌ!».

29 A̱ꞌkhue̱n xa̱bo̱ tsí na̱ña̱wu̱u̱n géjwa̱nꞌ ni̱nda̱ꞌa̱ agu, jamí nagáyuu̱ ni̱to̱ꞌo̱o̱ awúún, xúꞌkhue̱n máꞌ asndo naguaꞌaa̱n rí namíñuu̱ nismáti̱go̱o̱ ná nakhúu Páblo̱ ga̱jma̱á Síla̱s. 30 A̱ꞌkhue̱n ikhaa̱ ni̱gu̱wíi̱n ná géjwa̱nꞌ jamí niraxúu̱n:

—Xa̱bo̱ buanuu, dí jaꞌyoo ma̱ne̱ kajngó ma̱jríñu̱úꞌ rá.

31 Xómáꞌ ikhii̱n nitháa̱n:

—Ga̱nimba̱a̱ꞌ xtayáá Táta̱ Jesukrísto̱, kajngó ma̱jríñáaꞌ ikháánꞌ, jamí ma̱jáwíin xa̱bo̱ guꞌwáaꞌ.

32 A̱ꞌkhue̱n ikhii̱n nitháa̱n ajngóo̱ Táta̱, ikhaa̱ gajmíi̱ mbá xúgíin xa̱bo̱ tsí júwa̱ꞌ ná guꞌwóo̱. 33 Jamí ikhaa máꞌ mbroꞌon rúꞌkhue̱n, xa̱bo̱ tsí na̱ña̱wu̱u̱n géjwa̱nꞌ niꞌjñáa̱ ná nijámbi̱yu̱u̱ꞌ Páblo̱ ga̱jma̱á Síla̱s. A̱ꞌkhue̱n mbá nacha̱ máꞌ waxúꞌdu-maꞌáa̱n ná awúun iya, ikhaa̱ jamí mbá xúgíin xa̱bo̱ guꞌwóo̱ waxúꞌdu-maꞌíin ná awúun iya. 34 A̱ꞌkhue̱n ni̱ka̱ jaguu̱n ná guꞌwóo̱, jamí nistrámee̱ rí mu̱pho̱. Jamí phú nadxu a̱kuii̱n, ikhaa̱ gajmíi̱ mbá xúgíin xa̱bo̱ guꞌwóo̱, numuu rí nanimbúu̱n juyáa̱ Ana̱ꞌlóꞌ.