1 Nda̱wa̱á rí niríga̱ rúꞌkhue̱n, a̱ꞌkhue̱n nigájnuu Páblo̱ ná Aténa̱s, jamí ni̱ke̱e̱ ná xuajen Korínto̱. 2 Ikhín nixkamaa̱ mbáa xa̱bo̱ judío̱ mbiꞌyuu Akíla̱, tsí na̱ꞌkha̱ ná xuajen Pónto̱. Ni̱kú jayu máꞌ nigájnúu̱ ná Itália̱ ga̱jmáa̱ a̱ꞌguii̱ Prisíla̱, numuu rí thúngaa Kláudio̱ nixná-ñájun rí mbá xúgíin xa̱bo̱ judío̱ ma̱ga̱jnúú ná xuajen Róma̱. Páblo̱ ni̱ka̱ gáꞌñúu̱, 3 jamí ninguanúu̱ gajmíi̱, numuu rí ikhaa máꞌ ñajun rí naꞌne Páblo̱ nuni̱i̱ mangii̱n. Mbá ꞌnduꞌ nu̱ñajwii̱n, numuu rí xa̱bo̱ tsí nune̱ guꞌwá-xtíin ñajúu̱n. 4 Jamí mbámbá mbiꞌi rí nduya̱a xu̱únꞌ xa̱bo̱, naꞌthán-mina̱ꞌ gajmíi̱ xa̱bo̱ judío̱ ga̱jma̱á xa̱bo̱ griégo̱, ná guꞌwá rí na̱gi̱mbíin xa̱bo̱ judío̱. Naꞌnii̱ rí ma̱nimbu̱únꞌ ajngáa rí naꞌthúu̱n.

5 Ído̱ rí Síla̱s ga̱jma̱á Timotéo̱ nigájnúu̱ ná Masedónia̱ jamí niguáꞌníi̱ ná Korínto̱, Páblo̱ xtáa̱ mbá jayu naꞌthán-ráꞌa ajngóo Ana̱ꞌlóꞌ, jamí naꞌthúu̱n xa̱bo̱ judío̱ rí Jesús ñajuun Krísto̱. 6 Xómáꞌ xa̱bo̱ judío̱ nawajún-ꞌthíi̱n rí naꞌsngáá Páblo̱ jamí nuthan-xkawíi̱ꞌ. A̱ꞌkhue̱n ikhaa̱ nixprígúu̱ xtíñuu̱ jamí niꞌthúu̱n: «Aꞌkhánlaꞌ máꞌ ikháanꞌlaꞌ rí ma̱ja̱ñálaꞌ, ra̱ꞌkhá aꞌkhúnꞌ ikhúúnꞌ. Jamí asndo nákhí máꞌ xúge̱ꞌ rá ma̱tha̱n-rúꞌúúnlo̱ꞌ xa̱bo̱ tsí ra̱ꞌkháa judío̱ ñajúún».

7 A̱ꞌkhue̱n Páblo̱ nigájna̱a ikhín, jamí ni̱ke̱e̱ ná guꞌwóo mbáa xa̱bo̱ tsí mbiꞌyuu Jústo̱,* tsí naꞌne-mba̱a̱ Ana̱ꞌlóꞌ, jamí xtáa ná níjñúu guꞌwá rí na̱gi̱mbíin xa̱bo̱ judío̱. 8 Jamí Kríspo̱, tsí jayá idxu̱u̱ ná guꞌwá rí na̱gi̱mbíin xa̱bo̱ judío̱, ninimbo̱o̱ꞌ jaꞌyoo̱ Táta̱ xúꞌkhue̱n máꞌ mbá xúgíin xa̱bo̱ guꞌwóo̱. Mangaa máꞌ phú mbaꞌiin xa̱bo̱ Korínto̱ ninimbu̱únꞌ juyáá Táta̱ ído̱ nu̱dxawíi̱n rí naꞌthán Páblo̱ jamí waxúꞌdu-maꞌíi̱n ná awúun iya. 9 A̱ꞌkhue̱n mbá mbroꞌon nisngájma-mina̱ꞌ Táta̱ ná inuu Páblo̱ ga̱jma̱á majñu̱u̱ mbá xnuꞌndaa jamí niꞌthúu̱n: «Ma̱xámíñaaꞌ ma̱ra̱thu̱ún xa̱bo̱, jamí ma̱xáta̱tsi̱ꞌñáá-rarathán, 10 numuu rí ikhúúnꞌ xtáá ga̱jma̱á nindxa̱a̱ꞌ, jamí nimbáa ma̱xáꞌngo̱o̱ ma̱ꞌne-ñawáanꞌ, numuu rí ikhúúnꞌ phú gúꞌdiin xa̱bi̱ꞌ ná xuajen ríge̱ꞌ». 11 Ikhaa jngó ninguanúu Páblo̱ mbá tsigu tikhu ná Korínto̱, niꞌsngúu̱n xa̱bo̱ ajngóo Ana̱ꞌlóꞌ.

12 I̱ndo̱ó máꞌ numuu rí nákhí Galión ñajuun thúngaa ná numbaa Akáya̱, ni̱ru̱wa-mijnáa xa̱bo̱ judío̱ tsí najiꞌníi juyáá Páblo̱, jamí nigóo̱ juya̱a̱ ná na̱ge̱ꞌe̱ Galión kajngó maxúdaa awan. 13 A̱ꞌkhue̱n nithee̱n: «Xa̱bo̱ tsíge̱ꞌ naꞌne-rájíin xa̱bo̱ rí mune̱-mba̱a̱ Ana̱ꞌlóꞌ ga̱jma̱á i̱mba̱ ju̱ma̱, ra̱ꞌkhá xómá naꞌthán xtángoo».

14 Inu máꞌ nagíꞌdu̱u̱n Páblo̱ naꞌthán, a̱ꞌkhue̱n Galión niꞌthúún xa̱bo̱ judío̱: «Xí ikháanꞌlaꞌ, xa̱bo̱ judío̱, nu̱ne̱-xkundulaꞌ ga̱jma̱á numuu mbá rí ra̱máján ni̱gu̱máaꞌlaꞌ o ga̱jma̱á numuu mbá aꞌkhán mba̱a̱ mbo̱ꞌ, xtáá máꞌ ma̱dxawanlaꞌ xómá phú jaꞌyoo. 15 I̱ndo̱ó máꞌ numuu rí ajngáa jayu ñajuun ne̱, mbiꞌñúú xa̱bo̱, jamí xtángoo dríga̱ꞌlaꞌ, ikhaa jngó gu̱ne̱-mbáníí máꞌ ikháanꞌlaꞌ ne̱. Numuu rí ikhúúnꞌ tsíyoꞌ gáxu̱ꞌdá-mina̱ꞌ ga̱jma̱á numuu rúꞌkhue̱n».

16 A̱ꞌkhue̱n nixná-ñájwii̱n rí mi̱xkawíi̱n ná ꞌgíi̱ naxudaa̱ awan. 17 A̱ꞌkhue̱n mbá xúgíin xa̱bo̱ ni̱rtuwiin Sóste̱ne̱s, tsí ñajuun xa̱bo̱ ede̱ ná guꞌwá rí na̱gi̱mbíin xa̱bo̱ judío̱. A̱ꞌkhue̱n nixnáa̱ ná inuu ꞌgí thúngaa Galión, xómáꞌ ikhaa̱ táxná-gamiéjuu̱n mbá jayu ga̱jma̱á numuu rúꞌkhue̱n.

18 Xómáꞌ Páblo̱, ninguanúu xóó mbaꞌa mbiꞌi ná Korínto̱. Nda̱wa̱á niꞌthán-ngawúu̱n a̱ngia̱nꞌlóꞌ, a̱ꞌkhue̱n ndiyée̱ ikhoo̱ ma̱ki̱daa̱ ná numbaa Síria̱. Na̱ka̱ Prisíla̱ jamí Akíla̱ ga̱jma̱á nindxu̱u̱. Ído̱ ni̱ga̱níi̱ ná xuajen Senkréa̱ niꞌda̱-ráꞌtse̱e̱ idxu̱u̱, numuu rí ríga̱ rí nixuda-mine̱e̱ꞌ ná inuu Ana̱ꞌlóꞌ, a̱ꞌkhue̱n nijngúu̱n ná awúun guꞌwá-rguwa. 19 Ído̱ niguáꞌníi̱ ná xuajen Éfe̱so̱, ikhín niniñuu̱ Prisíla̱ ga̱jma̱á Akíla̱, a̱ꞌkhue̱n ni̱to̱ꞌo̱o̱ ná guꞌwá rí na̱gi̱mbíin xa̱bo̱ judío̱ jamí niꞌthán-mine̱e̱ꞌ gajmíi̱. 20 Ikhii̱n nithán-jáñíi̱ rí ma̱nguanúu̱ xóó mbaꞌa mbiꞌi ga̱jma̱á nindxúu̱n, xómáꞌ ikhaa̱ ra̱khóo̱. 21 A̱ꞌkhue̱n niꞌthán-ngawúu̱n ga̱jma̱á ajngáa ríge̱ꞌ: «Ndaꞌyóo rí ma̱xtáá ná Jerusalén ná ma̱gu̱ma-ri̱ya̱aꞌ ndxa̱a̱ rí na̱ꞌkha̱.* I̱ndo̱ó máꞌ numuu rí ma̱ꞌkha gáya̱ꞌlaꞌ mbu̱júꞌ nda̱wa̱á, xí Ana̱ꞌlóꞌ nandoo».

A̱ꞌkhue̱n nijngúu̱n ná awúun guꞌwá-rguwa ná Éfe̱so̱, jamí nigájnuu̱ ni̱ke̱e̱. 22 Ído̱ ni̱ga̱níi̱ ná xuajen Sesaréa̱, a̱ꞌkhue̱n nitsimuu̱ ni̱ke̱e̱ ná Jerusalén gáraxii̱n tsí nanimbu̱únꞌ juyáá Jesús, nda̱wa̱á nithangaa̱ ná Antiokía̱.

23 Ído̱ neꞌne mba̱yo̱ꞌ máꞌ rí xtáa̱ ikhín, a̱ꞌkhue̱n nigájnuu̱ ni̱ke̱e̱ mbámbá máꞌ xúꞌkhue̱n xuajen ná mbayuu Galásia̱ ga̱jma̱á mbayuu Fríjia̱, ni̱ke̱e̱ gaxnáa̱ la tsiakhe̱ a̱kui̱ín tsí nanimbu̱únꞌ juyáá Jesús.

24 Nákhí mbiꞌi rí ñúꞌún ni̱ga̱nú ná Éfe̱so̱ mbáa xa̱bo̱ judío̱ mbiꞌyuu Apólo̱s, tsí na̱ꞌkha̱ ná xuajen Alejandría̱. Apólo̱s phú na̱ma̱ñuu naꞌthán-ráꞌa ná inúú xa̱bo̱, jamí ndaꞌyoo̱ mújúu̱n rí naꞌthán i̱yi̱i̱ꞌ ajngóo Ana̱ꞌlóꞌ. 25 Ikhaa̱ waꞌsngáa̱ ga̱jma̱á numuu gisngáá drígo̱o̱ Táta̱. Phú gagi a̱kuii̱n naꞌthúu̱n xa̱bo̱ jamí naꞌsngúu̱n ga̱jma̱á numuu Jesús, maske máꞌ i̱ndo̱ó na̱ma̱ñuu̱ xáne Juáán nixúꞌdu-maꞌíin xa̱bo̱ ná awúun iya. 26 Jamí nigíꞌdu̱u̱n niꞌthée̱n ga̱jma̱á mbá jañii a̱kuii̱n ná guꞌwá rí na̱gi̱mbíin xa̱bo̱ judío̱. I̱ndo̱ó máꞌ numuu rí ído̱ nidxawuun Prisíla̱ ga̱jma̱á Akíla̱ rí naꞌsngáa̱, a̱ꞌkhue̱n ni̱ríya̱a̱ꞌ janíí, jamí mbá jaꞌwu nitháa̱n ga̱jma̱á numuu gisngáá drígo̱o̱ Ana̱ꞌlóꞌ. 27 Ído̱ rí Apólo̱s ndiyoo ma̱ꞌga ná numbaa Akáya̱, a̱ꞌkhue̱n a̱ngia̱nꞌlóꞌ nixnáa̱ tsiakhe̱ rí ma̱ꞌgee̱, jamí nini̱i̱ mbá i̱yi̱i̱ꞌ rí ma̱ꞌga ná inúú tsí nanimbu̱únꞌ juyáá Jesús, kajngó mu̱dri̱guíi̱. Jamí ído̱ ni̱ga̱níi̱ ikhín, phú nimbáñúu̱ tsí ninimbu̱únꞌ juyáá Jesús ga̱jma̱á numuu rí phú májáan a̱kui̱in Ana̱ꞌlóꞌ. 28 Numuu rí ga̱jma̱á mba̱a̱ ski̱yu̱u̱ꞌ ajngóo̱ naꞌne wíyuu̱ rawúún xa̱bo̱ judío̱ ná inúú xa̱bo̱, nasngájmúu̱ ga̱jma̱á rí naꞌthán ná i̱yi̱i̱ꞌ ajngóo Ana̱ꞌlóꞌ rí Jesús ñajuun Krísto̱.