1 Ído̱ ninújngoo witsu mbiꞌi, a̱ꞌkhue̱n ni̱ga̱nú Ananía̱s ná Sesaréa̱, tsí jayá idxu̱ún dxakuun, gajmíí mbá tikhuun xa̱bo̱ buanuu, jamí juya̱a̱ mbáa xa̱bo̱ tsí naꞌthán-mbáñúu̱ tsí mbiꞌyuu Tértu̱lo̱. Jamí ni̱xna̱xí-mijnée̱ ná inuu xa̱bo̱ ñajun rí muni̱i̱ aꞌkhúun Páblo̱. 2 Ído̱ rí ni̱ꞌkha̱ jiꞌyáa Páblo̱ ná inúu̱, a̱ꞌkhue̱n Tértu̱lo̱ nigíꞌdu̱u̱n neꞌne aꞌkhúu̱n xáꞌnii ná inuu xa̱bo̱ ñajun: «Táta̱ nikhi̱i̱, xa̱bo̱ ñajun Féli̱ks, ga̱jma̱á numuu rí ikháánꞌ na̱ma̱ñaaꞌ narathán-ñájun phú tsímáá juwaxo̱ꞌ, jamí phú mbaꞌa rí máján nithán-ñájwíín ná xuajen. 3 Phú núma̱aꞌ la ikháánꞌ, numuu rí tsitsíí nu̱drígúxo̱ꞌ mbá xúgíí rúꞌkhue̱n jamí asndo náá máꞌ. 4 I̱ndo̱ó máꞌ numuu rí mu̱xúne̱-gajmáaꞌxo̱ꞌ mba̱yo̱ꞌ guéño, ikhaa jngó na̱tha̱n-jáñaaꞌ rí ma̱ta̱dxawanxo̱ꞌ mbá ꞌduun ajngáa rí mu̱tha̱a̱nꞌxo̱ꞌ. 5 Numuu rí ni̱xkamaaxo̱ꞌ xa̱bo̱ tsíge̱ꞌ tsí ñajuun asndo xó mbá nandii xkawe̱ꞌ, jamí ngrigo̱o̱ꞌ mbá xúgíí numbaa naꞌnii̱ rí mu̱xpi̱ꞌtha̱-mijná xa̱bo̱ judío̱, xúꞌkhue̱n máꞌ ikhaa̱ jayá idxu̱ún xa̱bo̱ mi̱nduwiin tsí mbiꞌñúú nasaréno̱. 6 Mangaa máꞌ ndiyoo̱ ma̱ꞌnii̱ rí ma̱xáya-makuu̱ guꞌwá dxákuun. Ikhaa jngó ni̱rtuwii̱nxo̱ꞌ, [jamí ndiyaxo̱ꞌ mu̱xu̱ꞌdáa awan ga̱jma̱á numuu̱ xómá naꞌthán xtángoo dríga̱ꞌxo̱ꞌ. 7 Xómáꞌ xa̱bo̱ ede̱ drígu̱ún tsí ku̱ra̱tuun ajwa̱nꞌ tsí mbiꞌyuu Lísia̱s, nixuda-mine̱e̱ꞌ ga̱jma̱á tsiakhe̱ niríya̱a̱ꞌ xa̱bo̱ tsíge̱ꞌ ná ñawánxo̱ꞌ. 8 Jamí niꞌthée̱n rí xa̱bo̱ tsí nune̱ aꞌkhúu̱n a̱guwée̱ꞌ ná inaaꞌ ikháánꞌ ge̱jyoꞌ.]* Ído̱ gátra̱xíi̱ ikháánꞌ, a̱ꞌkhue̱n ma̱tha̱ya̱á rí gakon mbá xúgíí rí nu̱ne̱xo̱ꞌ aꞌkhúu̱n». 9 Jamí xa̱bo̱ judío̱ mangiin nuthan rí gakon mbá xúgíí rí naꞌthán Tértu̱lo̱.

10 Ído̱ rí xa̱bo̱ ñajun neꞌne ñawúun ná inuu Páblo̱, kajngó ma̱goo maꞌthée̱n, a̱ꞌkhue̱n niꞌthée̱n: «Numuu rí nda̱yo̱o̱ rí mbaꞌa máꞌ tsigu ñajwaanꞌ xa̱bo̱ tsí naxúdaa awan ná numbaa ríge̱ꞌ, ikhaa jngó mbá jañii a̱kui̱nꞌ na̱tha̱n-mbáá ga̱jma̱á numuꞌ ná inaaꞌ xúge̱ꞌ. 11 Naꞌne mbá gu̱wa̱ꞌ i̱jma̱ (12) mbiꞌi rí nika gáne̱-mba̱a̱ Ana̱ꞌlóꞌ ná Jerusalén, xómá rí ikháánꞌ ma̱goo ma̱tha̱ya̱á. 12 Jamí xa̱bo̱ tsí nune̱ aꞌkhúnꞌ na̱nguá ni̱xkamúu̱ rí na̱tsa̱ñu̱ꞌ ga̱jmi̱ꞌ nimbáa xa̱bo̱, ni máꞌ tásngrúꞌúún xa̱bo̱ tsí mbaꞌiin rí mu̱xu̱xí a̱ꞌwá, ni máꞌ ná guꞌwá dxákuun, ni máꞌ ná awúun mbámbá guꞌwá rí na̱gi̱mbíin xa̱bo̱ judío̱, ni máꞌ ná awúun xuajen. 13 Xa̱bo̱ tsíge̱ꞌ ni máꞌ ma̱xáꞌngúu̱n mu̱snga̱jmee̱ rí gakon mbá xúgíí rí nuni̱i̱ aꞌkhúnꞌ xúge̱ꞌ ná inaaꞌ. 14 I̱ndo̱ó máꞌ numuu rí na̱tha̱a̱nꞌ mbá jmbu ríge̱ꞌ: ikhúúnꞌ na̱ne̱-mba̱a̱ Anu̱ú táta̱-xi̱ꞌñáxo̱ꞌ ga̱jma̱á gisngáá drígo̱o̱ Jesús, rí ikhii̱n nuthee̱n rí mi̱nduwa ñajuun. Nanimbo̱ꞌ ja̱yo̱o̱ mbá xúgíí rí ka̱ma naꞌthán ná awúun i̱yi̱i̱ꞌ xtángoo, jamí rí ka̱ma naꞌthán ná awúun i̱ñu̱ú xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú. 15 Xúꞌkhue̱n máꞌ gúꞌthu̱u̱n ga̱jma̱á mbá jañii a̱kui̱nꞌ ná inuu Ana̱ꞌlóꞌ, xómá rí guáꞌthíi̱n ikhii̱n mangii̱n, rí mbuya̱a mbiꞌñúú xa̱bo̱ tsí nijáñúú, tsí májíin jamí tsí ra̱májíin. 16 Ikhaa numuu rúꞌkhue̱n jámba̱ miꞌtsú na̱ne̱ rí ma̱xtáá mbá jaꞌwu a̱kui̱nꞌ ná inuu Ana̱ꞌlóꞌ, jamí ná inúú xa̱bo̱.

17 »Ído̱ ninújngoo mbá wátha̱ wáa tsigu rí ningrigo̱ꞌ tsíngua̱ꞌ, a̱ꞌkhue̱n nithangu̱ún ná xuajñuꞌ kajngó ma̱xnu̱ú mbúkha̱a̱ xa̱bo̱ tsí ngíníi, jamí ma̱xna̱xí tsi̱gi̱jña̱ꞌ ná inuu Ana̱ꞌlóꞌ. 18 Xtáá na̱ne̱ rúꞌkhue̱n, ído̱ rí mbá tikhuun xa̱bo̱ judío̱ tsí naguwá ná numbaa Ásia̱ ni̱xkamúú rí wámba̱ máꞌ ne̱ne̱-jaꞌwu-mina̱aꞌ ná guꞌwá dxákuun. Na̱nguá gajmíꞌ mbaꞌiin xa̱bo̱ ni máꞌ táxu̱xí a̱ꞌwá. 19 Ikhii̱n phú jaꞌyoo ma̱ju̱wée̱ꞌ ná inaaꞌ ge̱jyoꞌ kajngó muni̱i̱ aꞌkhúnꞌ, xí ríga̱ aꞌkhúnꞌ iyáa̱. 20 O aguthan máꞌ xa̱bo̱ tsíge̱ꞌ mbo̱ꞌ, xí ni̱xkamaa̱ rí ra̱máján ne̱ne̱lo̱ꞌ, nákhí nixtáá ná inúú xa̱bo̱ buanuu ede̱. 21 Mbóó máꞌ rí ma̱goo muthee̱n, rí nákhí nixtáá ná inúú xa̱bo̱ buanuu ede̱, ni̱tha̱n gakhe̱ ajngáa ríge̱ꞌ: "Xúge̱ꞌ nu̱xu̱ꞌdáalaꞌ awan ga̱jma̱á numuꞌ, numuu rí nanimbo̱ꞌ rí mbuya̱a mbiꞌñúú tsí nijáñúú"».

22 Ído̱ nidxawuun Féli̱ks ajngáa rúꞌkhue̱n, a̱ꞌkhue̱n nifroꞌo̱o̱ mújúu̱n rí ñajuun gisngáá drígo̱o̱ Jesús, jamí niniñuu̱ naꞌcho̱o̱ rí maxudaa̱ awan. Xáꞌnii niꞌthée̱n: «Ído̱ gáꞌkha̱ Lísia̱s, xa̱bo̱ ede̱ drígu̱ún tsí ku̱ra̱tuun ajwa̱nꞌ, a̱ꞌkhue̱n ma̱dxawuun i̱tha̱án xóó ga̱jma̱á numuu rí nu̱tha̱nlaꞌ». 23 A̱ꞌkhue̱n nixná-ñájuu̱n xa̱bo̱ tsí naꞌthán-ñájúún tsí ku̱ra̱tuun ajwa̱nꞌ rí mu̱ña̱wáa̱n Páblo̱, i̱ndo̱ó máꞌ numuu rí ma̱nguanúu̱ ma̱ngrigo̱o̱ꞌ, jamí ma̱xátrikhúún a̱nguii̱n tsí naguwá gúne̱-mba̱ꞌwi̱i̱ o naguwá gúyáa̱.

24 Ninújngoo mbá wátha̱ wáa mbiꞌi, a̱ꞌkhue̱n ni̱ꞌkha̱a Féli̱ks ga̱jma̱á a̱ꞌgui̱i tsí mbiꞌyuu Drusíla̱, tsí ñajuun a̱ꞌgo̱ judío̱. A̱ꞌkhue̱n Féli̱ks nindxaꞌwóo Páblo̱, kajngó madxawuu̱n rí maꞌthán ga̱jma̱á numuu rí xáne ma̱nimba̱ꞌlóꞌ juꞌyáá Jesukrísto̱. 25 I̱ndo̱ó máꞌ numuu rí ído̱ Páblo̱ niꞌthán ga̱jma̱á numuu rí xa̱bo̱ jaꞌyoo ma̱xtáa̱-raꞌne rí máján, xúꞌkhue̱n máꞌ rí jaꞌyoo ma̱ꞌngo̱o̱ maꞌthán-ñájun-mine̱e̱ꞌ, jamí ma̱ga̱nú mbiꞌi rí Ana̱ꞌlóꞌ maxúdaa awan ga̱jma̱á numúú xa̱bo̱, a̱ꞌkhue̱n nimíñuu Féli̱ks jamí niꞌthúu̱n Páblo̱: «Rí xúge̱ꞌ rá, ma̱goo máꞌ mi̱dxu̱uꞌ. Ma̱ndxa̱ꞌwa̱a̱ꞌ máꞌ a̱ꞌkhue̱n ído̱ nayaphúún». 26 Mbáá máꞌ rí Féli̱ks gíꞌthu̱u̱n rí Páblo̱ maxnúu̱ mbúkha̱a̱ kajngó maniñuu̱. Ikhaa jngó phú mbaꞌa nothon nandxaꞌwóo̱ ma̱ꞌkha̱ kajngó mandxákuu̱n ga̱jmáa̱.

27 Xkuaꞌnii ninújngoo a̱jma̱ tsigu, a̱ꞌkhue̱n Féli̱ks niniñuu-ranindxu̱u̱ xa̱bo̱ ñajun, jamí ni̱ta̱ꞌa̱a Pórsio̱ Fésto̱ ga̱jma̱á numuu̱. I̱ndo̱ó máꞌ numuu rí Féli̱ks nandoo̱ ma̱nguanú-mújúu̱n gajmíi̱ xa̱bo̱ judío̱, ikhaa jngó niniñuu̱ Páblo̱ ná géjwa̱nꞌ.