Xa̱bo̱ ebréo̱ 12

5 Jamí wámba̱ máꞌ nimbumalaꞌ ajngáa rí naꞌthán-máꞌánlaꞌ Ana̱ꞌlóꞌ tsáanꞌ i̱jii̱n ñajwanlaꞌ:

«Táa̱, ma̱xátha̱da̱ꞌ lá nikhuáa ajngáa tsixprígú rí naꞌtháanꞌ Táta̱,

ni máꞌ ma̱xáwabaa a̱kia̱anꞌ ído̱ rí naríyáa̱ꞌ.

6 Numuu rí Táta̱ naxprígúu̱ tsí nandoo̱ jaꞌyoo̱,

jamí naxpáthii̱n jámba̱a̱ tsí na̱grui̱guíi̱ ma̱ꞌne a̱dée̱».*12.6 Ajngáa ríge̱ꞌ na̱ꞌkha̱ ná I̱yu̱u̱ꞌ ajngáa ju̱ma̱ 3.11-12.

7 Ga̱ꞌngo̱o̱ a̱kia̱nꞌlaꞌ rí naxpríguálaꞌ Ana̱ꞌlóꞌ, numuu rí ikhaa̱ naꞌñalaꞌ xómá i̱jii̱n. Tsáa lá ada̱a̱ tsí na̱nguá nixpríguíí eꞌne tátée rá. 8 Xí tsíxpríguálaꞌ Ana̱ꞌlóꞌ xómá naxprígúu̱n xúgíin i̱jii̱n, ra̱ꞌkhá i̱jii̱n ñajwanlaꞌ xúꞌkhue̱n rá, rí e̱je̱n-xáná ñajwanlaꞌ. 9 Mbáá máꞌ rí nákhí makáanꞌlóꞌ nixpríguálóꞌ tátiálóꞌ ga̱jma̱á nániálóꞌ ná numbaa ríge̱ꞌ, jamí ndiꞌya-makúu̱nlóꞌ. Á ra̱ꞌkhá i̱tha̱án máján rí mu̱ꞌne̱-mbáníílóꞌ rí naꞌthán Ana̱ꞌlóꞌ Mikhuíí kajngó mbu̱ꞌyalóꞌ jámuu rá. 10 Jamí tsí ñajuun tátiálóꞌ ga̱jma̱á nániálóꞌ ná numbaa ríge̱ꞌ, mbá wátha̱ máꞌ tsigu ni̱xpríguálóꞌ, xómá nifruꞌúu̱n ikhii̱n. Xómáꞌ Ana̱ꞌlóꞌ rá, naxpríguálóꞌ kajngó phú i̱tha̱án máján gágájnalóꞌ jamí ma̱ꞌne-jaꞌwáanꞌlóꞌ xómá ikhaa̱. 11 Gakon máꞌ rí xúge̱ꞌ nimbá tsixprígú tsíꞌne ne̱ rí ma̱xtáa gagi tsí na̱grui̱gú ne̱, rí naꞌne ne̱ rí ma̱xtáa̱-jínúu̱. I̱ndo̱ó máꞌ numuu rí nda̱wa̱á rí ni̱ꞌngo̱o̱ máꞌ a̱kui̱ín tsí waxprígúún, nakujma rí xa̱bo̱ tsúꞌkhue̱n júwe̱e̱ꞌ tsímáá jamí nuni̱i̱ rí máján.