1 Ɗe nu ufaru ama a̱ da̱na̱ ta̱ ne elentsu a̱ ta̱. Uvaɗi ma̱ɓula̱ waru adanshi a̱ ta̱ a ɗa a yuwusain. 2 Wo o'wo ta̱ mantsa ma na a̱ da̱na̱i a mmalu a̱ tyo asana, reve a cina uba̱ta̱ u sa'ani e iɗa ya Shina, reve a̱ da̱nu ɗe. 3 Reve a dammulai va̱ni le, <<Ta̱wa̱i tsu yuwain iponu, reve tsu zun nle lon.>> Reve a yuwan ulinga ni iponu o una̱ wa atali erepu waru o una̱ u ci'in. 4 A̱vu a damma, <<Ta̱wa̱i tsu suwayi aciya̱tsu lyuci gbain na aatsura a na aa rawa zuva, tsa̱ra̱ tsu tsura̱yi aciya̱tsu ala, waru tsee bete'wei a̱tsuma̱ o uvaɗi shi.>>

5 Reve A̱sulazuva a̱ cipa̱, tsa̱ra̱ we ene lyuci gbain na aatsura a na ama a suwai. 6 A̱vu u damma, <<Ele ɗa nda ama a̱ ta̱ a ɗa, suru nle waru elentsu a̱ ta̱ a ɗa, apa ili i na e temei, agba ili yi lo a na aa yuwan a̱sa̱la̱ a aci a̱ yi, a̱vu a̱a̱ kuɗa̱ yuwan shi. 7 Tsu cipa̱i e iɗa, tsa̱ra̱ tsu satarai elentsu e le, tsa̱ra̱ e reve ili i na aa dansa va̱ni le wan.>>

8 Reve u bete'we le suru a̱tsuma̱ o uvaɗi, reve a lyawa usaa u lyuci'i. 9 Adama o ndolo a ɗa e ɗeyi aala a̱ lyuci'i Babila,* adama a na pe ɗa A̱sulazuva a̱ ja̱mba̱ra̱i elentsu e le o uvaɗi suru. Diga lo ɗa waru A̱sulazuva e bete'we nle a̱tsuma̱ o uvaɗi suru.

10 Ele nda ele ɗa limatan va̱ Shem. Ana Shem rawai a'wan ukpaku (100), ɗaɗa u matsain Arafakashada, cina o koto iro'i na a'wan e ire. 11 Shem yuwisan ta̱ a'wan ukpakuton (500) ana u matsain Arafakashada, reve waru a mantsa'a u matsisan olobo ne esheli.

12 Ana Arafakashada rawai a'wan mata'atsu no ozo o ton, u matsan ta̱ Shela. 13 U yuwisan ta̱ a'wan ukpakuna̱shi na aza a ta'atsu (403), a̱vu a mantsa'a u matsisan olobo ne esheli.

14 Shela na a'wan mata'atsu, reve u tsura̱ ulobo Eba. 15 Ana u matsain Eba, Shela yuwisan ta̱ a'wan ukpakuna̱shi na aza a ta'atsu (403), a̱vu a mantsa'a u matsisan olobo ne esheli.

16 Ana Eba rawai a'wan mata'atsu na̱ a̱za̱ a̱ na̱shi, reve u matsan mawun mo ulobo Fele. 17 A̱vu u yuwisan a'wan ukpakuna̱shi na̱ mata'atsu (430), a̱vu a mantsa'a u tsurisa̱ olobo ne esheli.

18 Ana Fele yuwain a'wan mata'atsu, u matsan ta̱ ulobo Reyu. 19 U yuwisan ta̱ a'wan ukpakure na̱ kucci (209), a̱vu a mantsa'a u tsurisa̱ olobo ne esheli.

20 Ana Reyu rawai a'wan mata'atsu ne ejere, reve u matsan ulobo Seru. 21 U yuwisan ta̱ a'wan ukpakure na̱ a̱za̱ e cindere (207), reve a mantsa'a u matsisan olobo ne esheli.

22 Ana Seru rawai a'wan mata'atsu, reve u matsan ulobo Naho. 23 U yuwisan ta̱ a'wan ukpakure (200), a̱vu a mantsa'a u matsisan olobo ne esheli.

24 Ana Naho rawai a'wan ushin na̱ kucci, reve u matsan ulobo Tera. 25 U yuwisan ta̱ a'wan ukpaku na̱ kupa na̱ kucci (119), reve a mantsa'a u matsisan olobo ne esheli.

26 Ana Tera rawai a'wan kupocindere, a̱vu u matsan Aburam, na̱ Naho, na̱ Haran.

27 Limatan va̱ Tera ɗa nda, dada va Aburam na̱ Naho, na̱ Haran. Haran ɗa dada va̱ Lutu. 28 Reve Haran kuwa̱ dada va̱ yi Tera ubuwu wuma, e iɗa i na a matsan niyi, a̱ lyuci va̱ Ur e iɗa ya Kaldiya. 29 Ana Aburam na̱ Naho a yuwain lolo, aala a ka va Aburam Saraya ɗa. Ka va Naho gba Milka ɗa, a̱yi usheli wa Haran u ɗa, za na matsain Milka na̱ Isikaya. 30 Saraya shi matsan shi, idari i ɗa u shi.

31 A̱vu Tera tara ulobo wa̱ yi Aburam, na̱ mawun ma tsukaya ma̱ yi Lutu (mawun ma Haran), na̱ jene va̱ yi Saraya (ka va Aburam). Reve u lyawa lyuci'i ni iɗa ya Kaldiya a̱ tyo e iɗa ya Ka'ana. Ana a rawai Haran, reve a̱ da̱nu pe. 32 Tera yuwan ta̱ a'wan ukpakure no ozo o ton (205), a̱vu u kuwa̱ pe Haran.