1 Reve Ada̱mu reve ka va̱ yi Hawa, a̱vu u yuwan a̱a̱tsuma̱, a̱vu u matsan Ka̱yinu* ana, <<Ni ikambi ya̱ A̱sulazuva a ɗa n tsura̱i ulobo.>> 2 Na̱ a̱ca̱pa̱ reve u matsisan zawa'a va̱ yi, a̱vu u ca yi aala Habila. A̱vu Habila o'wo za va aguɓa, Ka̱yinu gba wo o'wo cimbi. 3 Ana a yuwain yashi i re, a̱vu Ka̱yinu tara a̱tsuma̱ e itana yu uɗuma̱'a̱, reve u ta̱wa̱a̱ uba̱ta̱ wa̱ A̱sulazuva. 4 A̱vu Habila reme a̱tsuma̱ o oɓolo e inama ya̱ yi aza a na a fara matsain, a̱vu wu una, a̱vu u ta̱wa̱a̱ nu upasu u na u la'ai ulobonu. Reve A̱sulazuva a uwwa uyo'o wa Habila na̱ kucci na u ta̱wa̱yi. 5 Amma u 'yuwan ta̱ Ka̱yinu na̱ kucci na u ta̱wa̱yi. Ɗaɗa Ka̱yinu gba uwwai upan lon, reve u lukuta̱ urewesu wa̱ yi. 6 Reve A̱sulazuva a damma Ka̱yinu, <<Nye i zuwai vaa uwwusa upan? Waru adama a̱ nye urewesu wa̱ wu u ri ulukutu? 7 Na̱ vu yuwan ili yu ulobonu, a̱a̱ ushi shi? Agba na̱ vu yuwan ili yu ulobonu shi, nlo unusu a vawusan wu o una̱ntsu. U ta ciga u yuwan tsugbain a aci a̱ wu, amma vi isawan tsa̱ra̱ vu yuwan tsugbain tsa̱ yi.>>

8 Reve Ka̱yinu damma zawa'a va̱ yi Habila, <<Ta̱wa̱ tsu 'ya̱wa̱ o una.>> Ele pe a̱tsumona, a̱vu Ka̱yinu reme Habila zawa'a va̱ yi, reve wu una yi.

9 A̱vu A̱sulazuva a damma Ka̱yinu, <<Te ɗa zawa'a va̱ wu Habila?>>

A̱vu u usu, <<N reve shi. A̱mu za vi ipiri yi zawa'a va̱ ɗa?>>

10 Reve u damma, <<Nye i zuwa vu yuwain ne? Ka̱lyuwa̱, uɗyo wu mpasa mu zawa'a va̱ wu n rawa mu ta̱ diga e iɗa. 11 Diga gogo a yuwaan wu ta̱ una̱ e iɗa i na i sowoi mpasa mu zawa'a va̱ wu o ukere wa̱ wu. 12 Mantsa ma na vu yuwain cimba, iɗa i buwa a ca wu aba'un a cimba va̱ wu shi. Vu to o'wo uta̱ka̱luwu za vi igaru waru o uvaɗi.>> 13 Reve Ka̱yinu damma A̱sulazuva, <<Oforo a̱ va̱ a la'a ta̱ ucira u va̱! 14 A̱yi ɗa nda, vu gba̱ra̱ numu e iɗa'a ana'an, waru u ta putsa mu nu urewesu wa̱ wu. N to o'wo uta̱ka̱luwu za vi igaru waru o uvaɗi, waru za na ga'ain na̱ a̱mu suru u ta gura una mu.>> 15 Reve gba A̱sulazuva a damma yi, <<Ne ɗa shi! Za na suru unai Ka̱yinu a ta tsupaa yi toto ucindere.>> Ɗaɗa A̱sulazuva a zuwayi Ka̱yinu urotsu, adama za na ga'ain na̱ a̱yi suru wu una yi wan. 16 Reve Ka̱yinu uta̱ a̱ ma̱ka̱ka̱n ma̱ A̱sulazuva reve u da̱nu e iɗa ya Nod asana a Adini. 17 A̱vu Ka̱yinu reve ka va̱ yi, reve u yuwan a̱a̱tsuma̱, ɗaɗa u matsain Anuhu; reve u suwa lyuci reve u ca yi aala Anuhu na aala o ulobo wa̱ yi Anuhu. 18 A matsaan ta̱ Anuhu Irada. Irada ɗa matsain Mehujaye, reve Mehujaye matsan Metushaye, a̱vu Metushaye matsan Lame. 19 Lame zuwa ta̱ a̱ma̱ci e re. Aala a̱ za̱ ta̱ a ɗa Ada, za ve ire waru aala a̱ yi Zila. 20 Ada matsan ta̱ Jaba. A̱yi ɗa akaya a aza na a̱a̱ da̱nusu o ogodo waru a̱ ta̱ ni iliyamunga yu u'wa. 21 Aala a mawun ma̱ a̱na̱wun ma̱ yi a ɗa Juba. A̱yi ɗa akaya a aza a na a wa'asa ikumburu na̱ wivulu wi igbala suru. 22 Zila ɗa matsain Tuba Ka̱yinu, za na aa yuwusan uruma wi ili yu ulinga i na a yuwusan na̱ rumushili ni irumu suru. Zawa'a va Tuba Ka̱yinu vu usheli a̱yi ɗa Na'ama. 23 Urana u ro reve Lame damma a̱ma̱ci a̱ yi, <<Ada na̱ Zila, uwwa numu; a̱ɗu a̱ma̱ci a Lame, uwwai ili na maa dansa. Mu una ta̱ vuma ro adama a na wu wa amaton numu, molobo adama a na u lapa numu. 24 Nna a tsupaa Ka̱yinu e ekere a za na una niyi toto ucindere, to a ta tsupaa Lame toto kupocindere na̱ a̱za̱ e cindere e ekere a za na oo una yi.>>

25 Reve Ada̱mu revishe ka va̱ yi, a̱vu u matsan ulobo, a̱vu Hawa ca yi aala Shitu,* adansa, <<A̱sula̱ a ca mu ta̱ mawun o una̱ wa Habila za na Ka̱yinu unai.>> 26 Reve a matsaan Shitu ulobo, a̱vu u ca yi aala Enos. A mantsa mo ndolo ma ɗa ama e temei e ɗesu ala a̱ A̱sulazuva a̱tsuma̱ a̱ a̱ga̱nda̱.