1 Urana u ro Dina usheli wa Yakubu u na ka va̱ yi Liyatu matsaan niyi uta̱ ta̱ adama we ene esheli e iɗa'a. 2 Ana Shekem ulobo wa Hamo mogono ma aza a Hiviya mo upasu mo ndolo we enei Dina, reve u reme yi, reve u von na̱ a̱yi babu u ciga. 3 Reve Dina uwa yi o okolo, a̱vu Shekem ciga yi lon, ɗaɗa u kpara niyi nu una̱ wu uyo'o. 4 Reve u 'ya̱wa̱ u damma dada va̱ yi, <<N ciga ta̱ vu taraa mu usheli u nda wo o'wo ka va̱.>> 5 Yakubu uwwa ta̱ a na Shekem lungusa̱i usheli wa̱ yi. Olobo a̱ yi gba a̱ shi ta̱ ɗe a atsusa a aguɓa e iliyamunga ya̱ yi, agba u damma ili i ro shi, hali she ana a̱ ka̱mba̱i o u'wa.

6 Reve Hamo dada va Shekem ka̱ra̱ a̱ 'ya̱wa̱ ya Yakubu adama a dammulai. 7 Reve olobo a Yakubu a ka̱mbushi diga o una ana a uwwai ili i na i farai. Ili'i u lungusa̱ le ta̱ okolo reve a yuwan upan lon, adama a na Shekem yuwan ta̱ ili i wono a̱ tyo e ekere aza a Isra'ila a na u voyin nu usheli wa Yakubu, waru ili i na u lobonoi za ro yuwan ɗa shi ko ke'en. 8 Amma a̱vu Hamo yuwan adanshi ne ele u damma le, <<Ulobo u va̱ Shekem ciga ta̱ usheli u ɗu lon. Yuwain ankuri lyawa niyi u zuwa yi. 9 Lyawai tsu zuwulai, i ca tsu esheli a̱ ɗu a̱tsu waru tsu ca ɗu esheli a̱ tsu. 10 I ta̱ da̱nu oɓolo na̱ a̱tsu. I ta gura da̱nu reve waru i tsula ni i wini a̱vu waru i tsura̱ iɗa.>> 11 Reve Shekem fo damma dada va Dina na̱ muwun ma̱ a̱na̱wun ma̱ yi, <<Yuwain ankuri n te izami yi isa'ani e ekere a̱ ɗu. N ta ca ɗu ili i na i cigai biti. 12 N ta ca ili i tsutoto nu uneꞌe u na yaa ciga suru. Ko nu u shi u la'a a̱bunda̱, n ta ca, a̱mu de i lyawa mu n zuwa yi.>>

13 Reve muwun ma Yakubu n usu Shekem na̱ dada va̱ yi ni ikpa'a adama a na u lungusa̱i zawa'a le Dina. 14 Reve a damma le, <<Tsaa gura yuwan ili i ndolo shi, tsaa ca zawa'a tsu lolo e ekere a za na a paɗai uryumbu shi. Ili i ndolo u to o'wo tsu ili i wono. 15 She na̱ yaa yuwan ili i ta̱ i nda gon ɗaɗa tsa̱a̱ usu: she na aa paɗa ali o upasu u ɗu suru aryumbu tsa̱ tsu. 16 Ɗaɗa tsaa ca ɗu esheli a̱ tsu a̱ɗu waru i ca tsu esheli a̱ ɗu. Reve tsu da̱nuyi uba̱ta̱ u ta̱ na̱ a̱ɗu, reve tso o'woi ili i ta̱ na̱ a̱ɗu. 17 Amma ni i usu a paɗa ɗu aryumbu shi, tsu ta tara zawa'a tsu reve tsu ka̱ra̱.>>

18 Reve adanshi e le o yo'onoto Hamo nu ulobo wa̱ yi Shekem okolo. 19 Shekem gba za na a̱yi ɗa a la'a cayi tsugbain a̱tsuma̱ o u'wa wa dada le, u lungusa̱ mantsa shi, adama a na u cigai usheli wa Yakubu lon. 20 Reve Hamo nu ulobo wa̱ yi a̱ 'ya̱wa̱ o una̱ntsu u lyuci a yuwan adanshi na azagbain a̱ lyuci le a damma, 21 <<Ama a nda a ciga ta̱ nden n sa'ani na̱ a̱tsu. Tsu lyawa nle a̱ da̱nu oɓolo na̱ a̱tsu a yuwan atsulu na a wina. Iɗa'a u ta̱ mgbain n na waa rawa ntsu suru. Tsu ta gura zuwai esheli e le, ele waru a ta gura zuwa esheli a̱ tsu. 22 Ama'a a̱ ta̱ usu a̱ da̱nu na̱ a̱tsu o o'wo ili i ta̱ na̱ a̱tsu e ili i ta̱ goon a̱yi ɗa a paɗa ali a̱ tsu aryumbu tse le. 23 Na̱ ne ɗa, ashe inama yu u'wa i le, ni itana i le suru na akapi e iliyamunga i le suru oo o'wo a̱za̱ tsu shi? Lyawai tsu yuwain ili i na a dammai, adama a̱ da̱nu oɓolo na̱ a̱tsu.>>

24 Reve azagbain a na a̱ shi lo o una̱ntsu suru a̱ usu adanshi a Hamo na̱ ulobo wa̱ yi Shekem. Reve a paɗa vali suru lyuci'i uryumbu. 25 Ana a yuwain rana ta'atsu, aryumbu na a paɗai ali ubuwu a̱ mɓa̱la̱. Ɗaɗa olobo e re a Yakubu, Saminu na̱ Levi azakpakpara a Dina a tarai mutsun mu pe'eni nle. Reve a̱ riya̱a̱ lyuci babu urevu, a̱vu o una̱ ali'i suru. 26 A̱vu o una Hamo nu ulobo wa̱ yi Shekem na̱ mutsun mu pe'eni n le, a̱vu a tara Dina o uta̱ o u'wa wa Shekem a̱vu a̱ ka̱ra̱. 27 A mantsa'a reve olobo a Yakubu a̱ ta̱wa̱ uba̱ta̱ wa̱ a̱kwa̱kwa̱'a̱, reve a̱ pura̱ itana i lyuci'i adama a na a̱ lungusa̱i zawa'a le. 28 A̱ pura̱ ta̱ ikyon na̱ mgbele ni inan na̱ nloli ni ili i na i ri pe a̱ lyuci'i ni ili i na i ri a̱ a̱ɗuma̱. 29 A̱ pura̱ ta̱ utsuru u le suru o o'wo ili i na a̱ tsura̱i uba̱ta̱ wu uvon, muwun n le suru na̱ a̱ma̱ci e le, ili i na i ri a 'wa suru.

30 Ɗaɗa Yakubu dammai Saminu na̱ Levi, <<I ronoo mu ta̱ addama! I zuwa ta̱ mo o'wo ili yi idaba e ekere a ama a na a̱ ri nden e iɗa i nda aza a Ka'ana na aza a Feriziya. Meketeci ma ɗa tsu ri, reve no o ɓoluloi adama a yuwan nla̱ngi na̱ a̱tsu, a̱ to una mu nu u'wa u va̱ suru.>> 31 Reve ele gba a̱ usu, <<Adama a̱ nye waa tara zawa'a tsu tsa aashakala?>>