1 Ibrahim zuwa ta̱ ka ro, aala a̱ yi a ɗa Ketura. 2 Reve u matsaan yi Zimuri na̱ Jokushan na̱ Medan na̱ Midiya na̱ Ishiba na̱ Shuwa. 3 Jokushan ɗa matsain Sheba na̱ Dedan, olobo a Dedan ele ɗa, Ashuriya na̱ Letushiya na̱ Lewutumiya. 4 Olobo a Midiya ele ɗa, Efa na Efar na̱ Hanoku na̱ Abida na̱ Elida'a. Suru nle muwun n tsukaya ma Ketura n ɗa.

5 Reve Ibrahim ca Ishiyaku ili i na u ri na̱ a̱yi suru. 6 Amma a̱yi wuma reve u ca olobo a na a̱ma̱ci a alanga a matsaan niyi une'e. Reve u zuwa le a̱ tyo asana adama a kasa na̱ Ishiyaku.

7 Suru suru Ibrahim yuwan ta̱ a'wan ukpaku na̱ kupocindere no ozo o ton (175). 8 A̱vu u rono wivuwun wu ukosu, reve u kuwa̱ na̱ tsukutsa tsa sa'ani na a'wan a̱ a̱bunda̱, a̱vu u kuru nkaya ma̱ yi. 9 Reve olobo a̱ yi Ishiyaku na̱ Isma'ila a̱ ciɗo yi a̱ a̱a̱ba̱nu a Makafela asana a Mamure, a atsusa a Efuron ulobo wa Zoha za va Hitiya. 10 A̱yi nda a̱yi ɗa atsusa a na Ibrahim tsulai uba̱ta̱ wa aza a Hitiya. Lo ɗa a̱ ciɗo niyi na̱ ka va̱ yi Saratu. 11 Ana Ibrahim kuwa̱i, A̱sula̱ a zuwaa ta̱ mawun ma̱ yi Ishiyaku aba'un. Ishiyaku da̱nu ta̱ zuzu na̱ Be'e Lahai Roi.

12 Apa nda muwun mu ugundo ma Isma'ila, ulobo wa Ibrahim, za na Hajara va Masar, aagbashi o usheli a Saratu a matsaan niyi. 13 Apa nda ugeru na ala nu umatsun u le ukurula̱i: Zakpara a̱yi ɗa Nebayoti, reve Keda kuru na̱ Abidi na̱ Mibisam 14 na̱ Mishima na̱ Duma na̱ Masa 15 na̱ Hadad na̱ Tema na̱ Jetu na̱ Nafi na̱ Kedema. 16 Ele nda ele ɗa olobo a Isma'ila. E gere le ta̱ na̱ mulyuci na̱ ba̱ta̱ a̱ nden n le. Ele ɗa o o'woi ngono kupa ne ejere ve elentsu e le. 17 A'wan a na Isma'ila yuwain a'wan ukpaku na̱ mata'atsu na̱ a̱za̱ e cindere (137) a ɗa, reve u kuwa̱ u kuru nkaya ma̱ yi. 18 Muwun mu ugundo ma Isma'ila n da̱nu ta̱ e iɗa ya Havila a̱ tyo Shur, upasu wa asana wa Masar o ure wa Asiriya. A yuwan ta̱ nden mu n'yuwunlai na̱ a̱za̱ e le suru.

19 Apa nda muwun mu ugundo ma Ishiyaku ulobo wa Ibrahim.

Ibrahim ɗa matsain Ishiyaku. 20 Ishiyaku na a'wan amunga ɗaɗa u zuwai Rikatu usheli wa Betuwe za va Aram diga Fada Aram, zawa'a va Laban.

21 Ishiyaku yuwan ta̱ avasa o una̱ wu ka va̱ yi adama a na koto u tsura̱i limatan shi. A̱vu A̱sulazuva a uwwa avasa a̱ yi, a̱vu ka va̱ yi tsura̱ a̱a̱tsuma̱. 22 Reve mawu'un n reme mpolo va̱ni le a̱ a̱a̱tsuma̱ a̱ yi, hali u damma, <<Nye i zuwai ili i nda i cina numu?>> Reve we ece A̱sulazuva.

23 Reve A̱sulazuva a damma yi,

<<Nɗa n re n ɗa n ri pe a̱ a̱a̱tsuma̱ a̱ wu.

Elentsu e re a na vaa matsan, a ta kasa.

Za ta̱ ta la'a za ta̱ ucira,

waru zakpara ta yuwaan zawa'a tsugbashi.>>

24 Ana mantsa ma na waa matsan ma rawai, reve u matsan mpishe. 25 A̱vu za vu ufaru uta̱* ushili cine vu revei utugu u na u ri ne eleme, adama o ndolo a ɗa a zuwaa niyi aala Isuwa * 26 Na̱ a̱ca̱pa̱ ɗaɗa zawa'a va̱ yi uta̱i ekere a̱ yi uremu na̱ a̱civa̱ a Isuwa, adama o ndolo a ɗa a ca niyi aala Yakubu. * Ana u matsan nle, Ishiyaku na a'wan kupota̱li.

27 Ana muwu'un n yuwain mgbain, a̱vu Isuwa o'wo meten ma amayun, wo o'wo za vi icigi yu una, a̱vu Yakubu o'wo vuma kpaku, za na cigai nden mu u'wa. 28 A̱vu Ishiyaku la'a ciga Isuwa adama a na u tsu tamusa inama i na Isuwa tsu unusa o una, Rikatu gba u la'a ta̱ ciga Yakubu.

29 Urana u ro, Yakubu a yuwusan ilyalya i shili ya aluba, a̱vu Isuwa rawa diga o una, a̱yi a uwwusa ambulu lon. 30 A̱vu u damma zawa'a va̱ yi, <<Kenee mu ilyalya i shili ya̱ wu, n lyuwa. N ta uwwusa ambulu lon!>> (Adama o ndolo a ɗa e ɗe niyi Edom). *

31 A̱vu u damma, <<She na̱ vaa winaa mu tsugaji tsa̱ wu.>>

32 A̱vu Isuwa damma, <<A̱mu ɗa nda n cigai ma̱kuwa̱a̱, nye tsugaji tsaa yuwaan mu?>>

33 A̱vu Yakubu damma, <<She vu kucinaa mu ne'en.>>

Reve u kucinaa Yakubu u winaa yi ta̱ na̱ tsugaji tsa̱ yi. 34 A̱vu u ca Isuwa opopofu ni ilyalya ya aluba u lyuwa u sowo, a̱vu u 'yon u ka̱ra̱ ili ya̱ yi. U tara tsugaji tsa̱ yi ili ya̱ a̱ɓula̱ shi.