1 Iɗana i nda, iɗana i limatan va Ada̱mu ɗa. Ana A̱sula̱ a yuwain vuma u yuwan yi ta̱ oroci a̱ yi. 2 U yuwan le ta̱ vali na̱ ka, reve u zuwaa le aba'un, a̱vu u zuwaa le aala <<Vaɗilima̱.>> 3 She na Ada̱mu yuwain a'wan ukpaku na̱ mata'atsu (130), ɗaɗa u tsura̱i mawun mo ulobo cu'un va̱ yi no oroci a̱ yi, a̱vu u ca yi aala Shitu. 4 A'wan ukpakukunla̱ (800) ɗa Ada̱mu da̱shi yuwain mantsa ma na u matsain Shitu. Waru a mantsa'a u matsan ta̱ olobo ne esheli. 5 Suru suru Ada̱mu yuwan ta̱ a'wan ukpakukucci na̱ mata'atsu (930), ɗaɗa u kuwa̱i.

6 Ana Shitu yuwain a'wan ukpaku no ozo o ton (105), reve u tsura̱ Enos. 7 Ana u matsain Enos, a̱vu u yuwisan a'wan ukpakukunla̱ na̱ a̱za̱ e cindere (807), a̱vu waru a mantsa'a u matsisan olobo ne esheli. 8 Suru suru Shitu yuwan ta̱ a'wan ukpakukucci na̱ kupa ne ejere (912), ɗaɗa u kuwa̱i.

9 Ana Enos yuwain a'wan kupakucci, ɗaɗa u matsain Kena. 10 Ana Enos matsain Kena, u yuwisan ta̱ a'wan ukpakukunla̱ na̱ gendu (815), a̱vu a mantsa'a u matsisan olobo ne esheli. 11 Suru suru Enos yuwan ta̱ a'wan ukpakukucci no ozo o ton (905), ɗaɗa u kuwa̱i.

12 Mantsa ma na Kena rawai a'wan kupocindere, u matsan ta̱ Mahalalel. 13 Ana Kena matsain Mahalalel, u yuwisan ta̱ a'wan ukpakukunla̱ na amunga (840), reve waru a mantsa'a u matsisan olobo ne esheli. 14 Suru suru Kena yuwan ta̱ a'wan ukpakukucci na̱ kupa (910), ɗaɗa u kuwa̱i.

15 Ana Mahalalel yuwain a'wan kupota̱li no ozo o ton, ɗaɗa u matsain Jare. 16 Ana u matsain Jare, Mahalalel yuwisan ta̱ a'wan ukpakukunla̱ na̱ mata'atsu (830), a̱vu a mantsa'a u matsisan olobo ne esheli. 17 Suru suru Mahalalel yuwan ta̱ a'wan ukpakukunla̱ na̱ kupa kucci no ozo o ton (895), ɗaɗa u kuwa̱i.

18 Ana Jare yuwain a'wan ukpaku na̱ kupota̱li ne ejere (162), ɗaɗa u matsain Anuhu. 19 Ana u matsain Anuhu, Jare yuwisan ta̱ a'wan ukpakukunla̱ (800), reve waru a mantsa'a u matsisan olobo ne esheli. 20 Suru suru Jare yuwan ta̱ a'wan ukpakukucci na̱ kupota̱li ne ejere (962), ɗaɗa u kuwa̱i.

21 Ana Anuhu yuwain a'wan kupota̱li no ozo o ton, u matsan ta̱ Metusela. 22 Ana Anuhu matsain Metusela, u lyuwa ta̱ elime na̱ mmalu na̱ A̱sula̱, u yuwisan ta̱ a'wan ukpakuta'atsu (300), reve a mantsa'a u matsan olobo ne esheli. 23 Suru suru Anuhu yuwan ta̱ a'wan ukpakuta'atsu na̱ kupota̱li no ozo o ton (365). 24 Anuhu yuwan ta̱ mmalu na̱ A̱sula̱, a̱vu A̱sula̱ a tara yi, a̱ da̱shi ene yi shi.

25 A yashi i na Metusela yuwain a'wan ukpaku na̱ kupakunla̱ na̱ a̱za̱ e cindere (187), u matsan ta̱ Lame. 26 Ana Metusela matsain Lame, u yuwisan ta̱ a'wan ukpakucindere na̱ kupakunla̱ ne ejere (782), a mantsa'a u matsisan ta̱ olobo ne esheli. 27 Suru suru Metusela yuwan ta̱ a'wan ukpakukucci na̱ kupota̱li na̱ kucci (969), ɗaɗa u kuwa̱i.

28 Ana Lame yuwain a'wan ukpaku na̱ kupakunla̱ ne ejere (182), u matsan ta̱ ulobo, 29 a̱vu u ca yi aala Nuhu * a dansa, <<Ya̱'a̱ yi ɗa a̱tsu tsa̱a̱ tsura̱ ujebu a̱tsuma̱ o ulinga u tsu na̱ a̱tsuma̱lima̱ e ekere a̱ tsu e iɗa i na A̱sulazuva a yuwayin una̱.>> 30 Ana Lame matsain Nuhu, u yuwisan ta̱ a'wan ukpakuton na̱ kupakucci no ozo o ton (595), a̱vu a mantsa'a u matsisan olobo ne esheli. 31 Suru suru Lame yuwan ta̱ a'wan ukpakucindere na̱ kupocindere na̱ a̱za̱ e cindere (777), ɗaɗa u kuwa̱i. 32 Ana Nuhu rawai a'wan ukpakuton (500) ɗaɗa u matsain Shem na̱ Ham na̱ Jafe.