1 Reve Aburam lyawa Masar reve u ka̱ra̱ a̱ tyo Nege na̱ ka va̱ yi ni ili i na suru u ri ne ele, reve Lutu kuru yi. 2 Aburam za vu utsuru u ɗa wa'ashi: ni ikyon, na̱ mgbele, ni inan, oɓolo na̱ azurufa na̱ zinariya. 3 Reve u yuwan mmalu ugeru ugeru, diga Nege a̱ tyo Betel, hali a̱ tyo uba̱ta̱ u na u fara shuwa̱i oogodo, e memere ma Betel na̱ Ai, 4 a̱ tyo uba̱ta̱ u na u fara suwai masa'a. Lo ɗa u yuwayin A̱sulazuva a̱ga̱nda̱.

5 Aburam na̱ Lutu a̱ da̱na̱ ta̱ a agara uba̱ta̱ u ta̱. Lutu fo u da̱na̱ ta̱ ni ikyon, na̱ mgbele, ni inan, waru u da̱na̱ ta̱ na̱ muwun na agbashi. 6 Iɗa'a i ka̱la̱ma̱ le ta̱, a na a̱a̱ da̱nu uba̱ta̱ u ta̱, adama a na ili i na a̱ ri na̱ a̱yi a̱ ta̱ a̱bunda̱, a na waa putsa le a̱ da̱nu uba̱ta̱ u ta̱. 7 Nla̱ngi n 'yon ta̱ a̱tsuma̱ a aza a na a guɓusaa Aburam ikyon na̱ Lutu. A mantsa mo ndolo aza a Ka'ana na aza a Periziya ele ɗa a̱ da̱na̱i a̱za̱ e iɗa.

8 A̱vu Aburam damma Lutu, <<She tsu lyawa nla̱ngi n uwa e memere ma̱ tsu wan, ko a̱tsuma̱ a aza a na a yuwusaan wu aguɓa na aza a na a yuwusaan mu aguɓa, ana wo o'woi ili i ta̱ i ɗa tsu ri. 9 Iɗa'a suru u ta̱ a̱ ma̱ka̱ka̱n ma̱ wu. Lyawa tsu kasa. Ɗangwa upasu u na vu cigai vu tyo. Vu tyo upasu u ta̱, a̱mu n tyo upasu u ta̱.>> 10 Reve Lutu ka̱lyuwa̱ reve we ene Uɓaa wa̱ Urudu hali a̱ tyo Zowa u ta̱ na̱ mini uba̱ta̱ suru, tsa̱ a̱a̱rumbu a̱ A̱sulazuva, tsi iɗa ya Masar. Ili i nda i fara ta̱ kafu A̱sula̱ o kototo Sodom na̱ Gomora.

11 A̱vu Lutu ɗangwaa aciya̱yi Uɓaa wa̱ Urudu suru, reve u zuwa ma̱ka̱ka̱n ma̱ yi a̱ tyo asana. Ne ɗa ele ra a kakasai. 12 Aburam da̱nu ta̱ e iɗa ya Ka'ana, a̱vu Lutu da̱nu upasu wi ilyuci yu uɓa'a, u va̱la̱ no ogodo a̱ yi a̱ tyo zuzu na̱ Sodom. 13 Aza a na ama e le a̱ da̱na̱i ni iwuya, a yuwusaan A̱sulazuva unusu lon.

14 Ana Lutu ka̱ra̱i, a̱vu A̱sulazuva a damma Aburam, <<Diga uba̱ta̱ u na vu ri ka̱lyuwa̱ asana na̱ a̱livu, ugana nu uyagi. 15 N ta ca wu oɓolo na̱ muwun mu ugundo ma̱ wu iɗa i na ve enei suru, u to o'wo za ɗu hali hali hali. 16 N ta ca wu limatan cine vu revei ma̱buta̱ me iɗa. Na̱ vuma aa gura kece ma̱buta̱ me iɗa, a ta gura kece limatan va̱ wu. 17 'Yon vu bura iɗa'a suru, adama a na n ta ca wu a̱yi suru.>> 18 Reve Aburam mula̱ ogodo a̱ yi, reve u ta̱wa̱ u da̱nu zuzu na̱ ɗanga Oku va Mamure * aza a na a̱ da̱na̱i Heburon. Ɗe ɗa u suwayi A̱sulazuva masa'a.